Za 10

Sasafë n'luungë mëmemë

1Licyelikë, licyelikë yilukaambë : « Wunë wun'kaambu kukotilë fë livitu li civakë ci mëmemë#10.1 Yi bwiilu, mëmemë babë mu civakulili yi mëmanyi mu lukengulu lu waaci., kasi wunë wun'yaangë cibakë mu kukukotë ku n'zo, naandyoowo mwiifi, cituutë. 2Kasi wunë wun'kotilë fë livitu li n'zo, naandyoowo n'luungë mëmemë. 3Mu lyaawu olyo, waaci wukun'zibulilë livitu i mëmemë bën'kuwu mbeembwaandi. N'luungë mëmemë wun'telë kadë limemë mu lizinë lyaandi i kumënatë ku ngaandë. 4Bunë kumëbasi makë mooso ku ngaandë, naandi wun'lyaatë fë ntwaalë i mëmemë mooso më kun'laandë cibilë maawu mëzabisi mbeembwaandi. 5Kasi maawu kupodi ve kulaandë wo bëkaambusu kuzaabë, tiilyoko, maawu mën'tiinë cinaanu yi naandi cibilë maawu mësye zaabë mbeembwaandi ko. »

6Yeesu wusë bëkaambë sasafë be yooyi, kasi baawu bësye bakulë kuve suundu mu manë kulëtubaangë.

Yeesu : n'luungë wumboti

7Yeesu wutubooso : « Licyelikë, licyelikë yilukaambë : Miinu livitu li n'zo civaku ci mëmemë. 8Bakë booso banë bëyisë ntetë yi miinu miifi, bituutë#10.8 Zel 23.1-2; Ezk 34.2-3.. Kasi mëmemë mësye bëkuwulu ko. 9Miinu livitu li n'zo. Wunë wun'kotë wun'vyokilë fëke miinu, naandi wun'vuukë. Naandi wun'kotë i wum'basikë, i wum'bakë ndiiwaandi. 10Mwiifi wun'kwisilë tokë mu kwiibë, kuvoondë i kutyamunë. Kasi miinu yiyisilë bwiinji baatu bëbakë luziingu luke lunduu. 11Miinu n'luungë wumboti#10.11 Twi 23.1; Ezy 40.11; Ezk 34.15;37.24.. N'luungë wumboti wubelëminë mu kuvaanë luziingu lwaandi mu cibilë ci mëmemë maandi. 12Wunë wun'salilaangë tokë mu cibilë ci mboongo, naandyoowo wukeeli ko n'luungë wumboti, mëmemë mëkeeli maandi ko. Fanë cikuumbu cin'kwisilë, naandi wun'lekulë mëmemë i wun'tiinë. Cikuumbu cim'bwiilë mëmemë i cin'tyamunë n'kaangu wooso. 13Tala manë mën'kwisë cibilë muutu be woowo wun'salilaangë tokë mu mboongo i naandi lusweenu voo mu mëmemë. 14Miinu n'luungë wumboti. Miinu yizabisi mëmemë maami i maawu mën'zabisi, 15bo bumweekë Taatë wukun'zabisi i miinu yizabisi Taatë#10.15 Mat 11.27; Lik 10.22.. Miinu yin'vaanë luziingu lwaami mu cibilë ci mëmemë maami. 16Miinu yikeelyooso yi mëmemë mën'ka mëkaambusu mu civakë be ciici. Miinu yifwenikini kumënatë yivaandi, maawu mën'kuwu mbeembwaami i maawu mëm'ba n'kaangu mweekë yimunë n'luungë. 17Taatë wukun'zolisi cibilë yivaanë luziingu lwaami, bwiinji yilubakooso. 18Muutu ve wum'podi kum'pokënë luziingu, kasi miinu yi luvaanë mu n'vwiilwaamë. Miinu yike lutumu mu kuvaanë luziingu i mu kube luboongooso. Lya lyoolyo libe fwanëkënë mu n'swa wo Taatë kum'paanë. »

19Sizwiifë bisë kabukooso mu cibilë ci mëbuungu mëtubë Yeesu. 20Mpaapë mu baawu bëlëtubaangë : « Naandi wavwaatu ke ciluunzi cibi! Naandi walawukë! Mu mbici luke n'yuwulwaangë? » 21Bën'ka bëlëtubaangë : « Muutu wuvwaatu ke ciluunzi cibi kupodi ve kutubilë obo. Ciluunzi cibi kupodi kuzibulë meeso më mpofo? »

Yeesu bën'nyeengulë

22Yabë mu ntaangu cyoosi cingolo i bëlëvaangë n'saangu ludumbulu lu n'zo-Nzaambi ku Yelusaleemë#10.22 n'saangu wu ludumbulu yilëvangënaangë ku Yelusaleemë mu lumanunu ngoondë mëfulë mu kutebulë moonyi luzanjikulu i n'saangu wumoonë yi civakululu lu n'zo-Nzaambi civangunu ke zwiifë wu Zuda Makabe 165 kaambofo 164 ntetë Yeesu Kliistu.. 23Yeesu wulëkwendë wulëkwisë mu n'zo-Nzaambi, ku si beedi yi Salomoonë. 24Sizwiifë bisë n'zuukë i kun'kaambë : « Tee ntaangu mbici njeeyi wutubiikë kukaalë mu libobo? Ningë njeeyi Kliistu tukaambi bwiinji tuzaabë cyelikë. » 25Yeesu wusë bëvutulilë : « Miinu yilukaambë lyaawu kasi beeno lusye kun'teelë maanë ko. Mëvaangë mo yilë mu kusalilë mu lizinë li Tataami mëlë mu kun'teelë cimbaanji. 26Kasi beeno lusë kun'teelë maanë ko cibilë lukeeli mu nkaangë mëmemë maami ko. 27Mëmemë maami mu n'kuwaangë mbeembwaami, miinu yimëzabisi i maawu mëlë mu ke kun'laandaangë. 28Miinu yibëvaanë luziingu lu sakë yi sakë, maawu kupodi ve kuzimbilë i muutu ve wumëvokënë mu myookwaamë. 29Linë Tataami wukum'paanë mwiinji bunenë yi byakë byooso i muutu ve wum'podi kubotulë cin'velë mu kooko ku Tataami. 30Taatë i miinu, muutu mweekë tukeeli. »

31Sizwiifë bisë bënoongooso mëmanyi mu kun'laakë.#10.31 8.59. 32Yeesu wusë bëkaambë : « Miinu yaluleesi mpaapë mëvaangë mëboti mëfuminë ke Taatë. Mu lyaambu mbici beeno lun'toombë kum'pondilë mu mëmanyi? » 33Sizwiifë bisë n'vutulilë : « Yaaku mu livaangë liboti lyo wavaangë lyaawu tun'toombë kukuvoondilë mu mëmanyi, kasi cibilë njeeyi wulë mu ke safulaangë Nzaambi : njeeyi muutu wukeeli i wun'toombë kuba Nzaambi#10.33 Lev 24.16.! » 34Yeesu wusë vutulë : « Bësonikë mu n'kaakiinu ti Nzaambi wutubë : “Beeno sinzaambi lukeeli#10.34 Twi 82.6..” 35Beeso tuzabisi ti beeso kupodi ve kubotulë manë mën'sisiminë Libuungu. Tiilyoko, Nzaambi wuteelë sinzaambi banë naandi kukaambë libuungu. 36Miinu, Taatë wukun'soolë i wukun'filë mu buloongo. Kwisilë buni beeno kutubë ti miinu yafiingë Nzaambi cibilë bo yatubë ti “Miinu Mwaanë Nzaambi”? 37Ningë miinu yisye vaangë ko mëvaangë më Tataami, keelaanu lukun'teelë maanë. 38Kasi ningë miinu yilë mu kumëvaangë, keti lulëkaambu kun'teelë maanë, telaanu maanë keti mu mëvaangë be moomo, bwiinji luzaabë mu vyaasi mweekë ti Taatë wun'zingilë mu miinu i miinu mu naandi. » 39Baawu bëtoombooso mu kukaangë, kasi naandi wubëkumbë. 40Yeesu wuyendooso ku lisimu limesi li mwiilë, li Yulëdaanë, kunë Za wabë wubatizyaalë ntetë baatu#10.40 1.28., i naandi wusë kukalë kwaawu. 41Mpaapë baatu bëyisë ke naandi. Baawu bëlëtubaangë : « Za wusye vaangë ko cyosuku ciliimbu ci kwaatë-yekë, kasi makë mooso kutubë mu muutu awu mabë mëcyelikë. » 42Faawu mpaapë baatu bëta maanë mu Yeesu.

Currently Selected:

Za 10: NTVIL

Highlight

Copy