Juão 19
19
Pilatu uxari aintaunupa Jesus
1Asui Pilatu upisika Jesus uxari aintaunupa ae.
2Asui kuaita suraraita aintaumuruda yuu suiwara ikurua aramawaa asui aintaumundeu iakanga rese ae, asui aintaumundeu ixupe ipupekawa pirangawaa.
3Asui aintausu ipiri aintaunyee:
—Purangawaa inde judewita ruixawa, asui aintaunupa ae aintaipu irumu.
4Asui Pilatu usemu yuiri uka sui unyee ainta supe:
—Haxari penye arama ae pekuawa arama tihawasemu ipuxuwerasawa sese.
5Asui Jesus usemu uka sui iakanga resere ikurua yuu suiwara ipupekawa pirangawaa yuiri, asui Pilatu unyee ainta supe:
—Ikete kua apigawa.
6Asui kuaita saserdutita ruixawaita kuaita yuiri guardaita aintaumaa irumu ae aintausasemu, aintaunyee:
—Renupa uyari kurusa rese, renupa uyari kurusa rese. Asui Pilatu unyee ainta supe:
—Penyete pepisika ae penupa uyari kurusa rese, nyãse tihawasemu ipuxuwerasawa sese.
7Asui kuaita judewita aintausuaxara ae, aintaunyee:
—Yarikute inyenga kuximawara, asui kua inyenga uxari umanu arama ae, nyãse umbeute Deus raira ae.
8Asui Pilatu usendu irumu aintaunyee yawe, asui usikie turusu xinga.
9Asui Pilatu uwike yuiri preturiu kiti, unyee, Jesus supe:
—Maa suiwarataa inde? Maa Jesus tiusuaxara ae.
10Asui Pilatu unyee ixupe:
—Maitaa tiresuaxara ixe? Maitaa tiserá rekuawa hapuderi hayurawa inde, hapuderi yuiri haxari aintauyuká inde kurusa rese?
11Asui Jesus usuaxara ae, unyee:
—Tirame maa uxari inde arama iwate sui remundu aramawaa ixe timaa nungara repuderi remunya ixe arama, sesewara uriku turusu piri ipekadu kua uentregariwaa ixe inde arama.
12Asui arire Pilatu uputari uyurawa Jesus, maa kuaita judewita aintausasemu:
—Reyurawa rame kua apigawa timaa Sezar ianama inde, nyãse panye kua umbeuwaa aintaruixawa ae umuruanyana Sezar.
13Asui Pilatu usendu irumu aintanyenga, urasu Jesus ukara kiti, asui uwapika serakuenawaa banku rese iwatewaa, kua uwapika rendawa sera Pavimentu, asui ebrewita nyenga rupi aintauseruka ae Gabata.
14Asui nyã ara aintauyumukaturu paskua runde, kuaji yandara kurasi. Asui unyee ainta supe kuaita judewita:
—Ikete peruixawa.
15Asui aintausasemu:
—Remburi ae, remburi ae, renupa uyari kurusa rese, renupa uyari kurusa rese. Asui Pilatu usuaxara ainta:
—Maitaa hanupa uyari kurusa kua peruixawa kurusa rese? Asui kuaita saserdutita ruixawaita aintausuaxara aintaunyee:
—Tiyariku amu yaneruixawa Sezar sui.
16Asui Pilatu uentregari ainta supe arama ae, aintaunupa uyari kurusa rese.
Aintaunupa Jesus uyari kurusa rese
17Asui aintaurasu Jesus, aete urasu ikurusa, aintaurasu ae amu kiti serawaa Kalvariu, ebrewita nyenga rupi serawaa Gulguta.
18Ape aintaunupa uyari kurusa rese, asui aintaunupa mukuĩ apigawaita kurusa rese Jesus ruaki amu aintauxari suaxara sui amu aintauxari amu ibanda sui asui Jesus uyari aintapiterupi.
19Asui Pilatu umpinima yepe nyenga asui uxari ae kurusa rakapi rupi, yawe umpinima, Jesus Nazare suiwara judewita ruixawa ae.
20Asui siya judewita aintauleri kua umpinimawaa nyãse kuayentu tetama sui aintaunupa Jesus kurusa rese, umpinima ebrewita nyenga rupi, latim rupi yuiri greguita nyenga rupi yuiri.
21Asui kuaita saserdutita ruixawaita aintaunyee Pilatu supe arama:
—Terempinima judewita ruixawa ae, maa rempinima, umbeu ixete judewita ruixawa.
22Asui Pilatu usuaxara ainta:
—Hampinimana kua hampinimawaa.
Aintauyupartiri irupa rese
23Asui kuaita suraraita aintaunupa rire Jesus uyari kurusa rese aintauyupartiri irupa rese aintaupisika arama aintayaweyawe, asui kua ipupekawa yuiri kua tiwa uriku uyumuikasawa nyãse aintaumunyawaa ae yepenyute sakapira sui supita kiti.
24Asui aintaukuntari aintapawa, aintaunyee:
—Purangate tiyamusuruka ae, purangate yaxari sese surti yakuawa arama awataa upita irumu. Aintaumunya maye aintaumpinimawaa yawe kuxima, aintauyupartiri serupa rese asui aintauxari surti sepupekawa rese. Yawe aintaumunya kuaita suraraita.
25Asui Jesus imaya upuamu kurusa ruaki, kua iamu yuiri kua Maria kua Klupa rimiriku asui amu yuiri kua Maria Madalena.
26Asui Jesus umaa irumu imaya suaki kua umbuewaa ugustariwaa unyee ixupe:
—Kunya, remaa nembira.
27Asui unyee umbuewaa supe arama:
—Remaa kua nemaya. Asui nyã ura rire kua umbuewaa urasu imaya suka kiti.
Umanu Jesus
28Asui arirewara Jesus ukuawa irumu umbawana panye imuraki, umbeu kuaye, aintaumpinimawaa yawe kuxima:
—Tikangana sepia.
29Aikue yepe siru teresemu vinagri. Asui aintaumuyapumi yepe espunja vinagri upe aintaupukuari ae mirá rakapi rupi aintausupiri arama Jesus yuru upe.
30Asui Jesus uu rire kua vinagri umbeu:
—Hambauwana semuraki. Asui uxari iakanga uwari, asui ianga usuana ipira sui.
Surara ukutuka Jesus iarukanga upe
31Nyã ara aintauyumukaturu arama paskua runde asui timaa aintauputari aintauxari aintapira uyari kurusa rese sauru rame, nyãse purangawaa kua ara serawaa sauru, asui kuaita judewita aintaupurandu Pilatu uxari arama aintaumpena aintaretima aintaumuye arama ainta kurusa sui.
32Asui kuaita suraraita aintausu aintauyupiru aintaumpena setima kua amu asui amu yuiri kuaita aintaunupawaita aintauyari kurusa rese Jesus ruaki.
33Asui aintausika rame aintaumaa Jesus umanu asui tiaintaumpena setima.
34Asui yepe aintasuiwara kuaita suraraita ukutuka iarukanga rese lansa irumu asui usemu isui tuwi ii yuiri.
35Asui kua umaawaa ae umbeu sesewara, nyãse supiwa umbeuwaa, ukuawate umbeu supiwa peruyari arama kuri yuiri ae.
36Yawe umunya, umunya arama kuaye Deus nyenga umbeuwaa yawe, tikuri aintaumpena yepe ikãwera.
37Deus nyenga umbeu yuiri, aintaumaa kuri kua aintaukutukawaa.
Aintauxari ipira iwi kuara kiti
38Asui arire Juze Arimateia suiwara yepe Jesus umbuewaa ae yumimisawa upe nyãse usikie aintasui kuaita judewita, usu Pilatu ipiri upurandu isui umuye arama kurusa sui Jesus ipira. Asui Pilatu uxari ixupe ae. Asui usu urasu Jesus ipira.
39Asui Nikudemu yuiri kua usuwaa Jesus ipiri pituna rame, urasu kuaji sinkuenta kilu umunaniwaa mirra alue irumu.
40Asui aintaurasu ipira kuera asui aintaupupeka ae fazenda turusuwaa irumu kua sakuenawaa irumu yuiri maye aintaumunyawaa yawe kuaita judewita aintaumukaturu irumu umanuwaita iwi kuara runde.
41Ape yepe iwite kuayentu isui kua aintaunupawaa akiti Jesus uyari kurusa rese, ape yuiri yepe iwi kuara pisasuwaa tiware aintauxari umanuwaa ipupe.
42Akiti aintauxari Jesus ipira kuera nyãse kuayentu kua iwi kuara, asui nyã arate aintauyumukaturu paskua runde kuaita judewita.
Currently Selected:
Juão 19: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
