Tiagu 3
3
Yaneapeku puxuwerawa
1Semuita, tepexari siya kuaita umbuesaraita pesuiwaraita, nyãse pekuawate Deus kuri umbeu kirimbawa piri yaneresewara yande umbuesaraita aintasui kuaita amuita.
2Nyãse panye yande siya viaji yayawi, ape aikue rame yepe tiwa uyawi inyenga irumu, kua apigawa purangawaa ae, ukuawa yuiri upukuari panye ipira.
3Yapukuari rame kavaluita yuru aintaumunya arama kuaye yaputariwaa yawe, yapuderi yuiri yamundu panye aintapira.
4Pemaa yuiri kuaita naviwita ipuwasuwaita ainta, asui iwitu kirimbawawaa upeyu ainta, maa kua pilutu urasu ae maa kiti uputari usu kua lemi kuairawaa irumu.
5Yawete yuiri kuaira kua yaneapeku, umbeu nyenga turusuwaa. Pemaa maitaa kua tata kuairawaa upuderi usapi turusuwaa.
6Asui tata kua yaneapeku. Kua yaneapeku uiku yanepira rakanga piterupi kuaye mundu puxuwerawa yawe, umuaiwa panye yanepira, umundeka panye kua yanepira uputariwaa umunya, kua infernu umundeka yaneapeku.
7Kuaita miraita aintaupuderi aintaumunyaruima panye suu, panye wirá, panye maiwaita, parana puraita yuiri. Aintaumunyaruima siyawaita.
8Tiawa aintasuiwara kuaita apigawaita upuderi umunyaruima kua iapeku, tiupuderi timaarese ae, teresemu ae venenu irumu.
9Yaneapeku irumu yamee purangawaa yaneruixawa supe, yanepaya supe yuiri, irumute yuiri yambeu puxi aintarese kuaita apigawaita kuaita Deus umunyawaita iyawe.
10Yepenyu yaneyuru sui yamusemu nyenga purangawaa, nyenga puxuwerawa yuiri. Semuita tipuranga yamunya yawe.
11Maitaa yepe ii rukena upuderi umusemu ii purangawaa, irawawaa yuiri?
12Semuita, maitaa kukura upuderi umusemu iya patawa? Maitaa fava upuderi umusemu iya kukura? Yawete yuiri kua ii rukena sembikawaa, tiupuderi umusemu ii seẽwaa.
Yakuawasawa iwaka suiwara
13Awa ukuawa pepiterupi, urikute umukame yamaa umunyawaita purangawaita ukuawasawa tiwa ipiaiwasawa irumu.
14Maa periku rame pemuasisawa irawawaa pepia upe, peputari rame peyumusuuri penyepawate, tepembeu purangawaa peresewara, tepeganani sese kua nyenga supiwa.
15Nyãse kua pemanduarisawa yawewaa timaa iwaka suiwara ae, maa kua mundu upewara ae, mira suiwara ae, Yurupari suiwara ae.
16Kuaita umuasiwaita aintapia upe, kuaita uputariwaita uyumusuuri aintapawa, aintauriku yuiri kuri puxuwerawa aintapia upe, aintaumunya panye puxuwerawa.
17Maa kua ukuawasawa iwaka suiwara uxari ikiaimawaa yamanduarisawa, uxari timaarese yande, uxari timaa ipiaiwa yande, uxari yasendu ainta supe puranga, uxari pirasua yamaa amuita supe, uxari yamunya purangawaa, timaa uxari mukuĩ yamanduarisawa, timaa uxari retentuwaita yande.
18Ainta supe arama kua iya puranga aintauyutima timaarese.
Currently Selected:
Tiagu 3: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
