Atu 1
1
Aintaumunyawaita kuaita Jesus Kristu umunduwaita
1Inde Teufilu, hampinima kuera nyã primeru livru upe panye kua Jesus umunyawaa umbuewaa yuiri.
2Hampinima panye maa sese ate nyã ara usuanawaa iwaka kiti uxari rire umbuewaita uparawakawaita supe umbeuwaa Espiritu Santu irumu.
3Umukame aintaumaa upakate ae upurara rire, kuarenta ara uxari aintaumaa ae umukame aintaumaa siya milagri supiwa, umbeu ainta supe sese kua yaneruixawa Deus umunduwaa upe.
4Asui uiku ramere aintairumu umundu ainta tiarama aintauyuiri Jeruzalẽ sui, maa umundu aintausaru kua ipaya umbeuwaa kua pesenduwaa seirumute paa.
5Nyãse supiwa Juão ubatizari ii irumu, maa timaa siya ara rire amu ubatizari kuri penye Espiritu Santu irumu.
Jesus uyuiri iwaka kiti
6Asui kuaita uyumuatiriwaita irumu aintaupurandu ae:
—Yaneruixawa, maitaa rexari kuiri israelitaita supe kua guvernu?
7Asui umbeu ainta supe:
—Timaa puranga pekuawa yanepaya rangawa uxariwaa aepawate.
8Maa Espiritu Santu uwiye irumu kuri perese periku kuri kirimbawasawa asui pembeu kuri seresewara panye Jeruzalẽ kiti, panye Judeya kiti yuiri, panye Samaria kiti yuiri, panye kua mundu rimbiwa rupi yuiri.
9Asui umbeu rire kua nyenga aintaumaa irumu ae uyusupiri iwate kiti, asui yepe nuvẽ usikindawa aintaresa sui ae.
10Asui aintaumaa irumu Jesus uyusupiri iwate kiti mukuĩ apigawa uiku aintaruaki murutingawaa aintarupa.
11Asui aintaumbeu ainta supe:
—Penye apigawaita Galileyawaraita, marantaa pemaa iwate kiti? Kua Jesus usuwaa iwate kiti pepitera sui uyuiri kuri kuaye pemaawaa yawe uyusupiri.
Umbuewaita aintauiku Jeruzalẽ kiti
12Asui aintauyuiri Jeruzalẽ kiti iwitera sui serawaa Ulivera iapekatusawa yepe kilumetru Jeruzalẽ sui.
13Asui aintausika irumu tetama upe aintauwike yepe ukapi iwatewaa kiti, apete aintauyumuatiri kuaita Pedru, Juão, Tiagu, Andre, Filipe, Tume, Bartulumeu, Mateu, Tiagu Alfeu raira, asui Simão Zelute asui Juda kua Tiagu raira.
14Asui yepewasu aintaumanduarisawa aintaupurandu aintairumute kunyaita kua Maria Jesus maya, asui imuita yuiri.
Aintauparawaka Matia
15Asui nyã ara Pedru upuamu aintapiterupi kuaita imuita, aintasiyasawa kuaji sentu vinti kuaita uyumuatiriwaita, asui umbeu:
16—Semuita, aintaurikute aintaumunya kua aintaumpinimawaa Deus nyenga upe Espiritu Santu umbeuwaa Davi yuru sui Judá rese kua urasuwaa kuaita umprezuwaita Jesus.
17Nyãse yanerumuara yawewaa ae, uajudari yande sese kua yapurakiwaa.
18Asui kua apigawa upiripana yepe kampu ipuxuwerasawa rikuyara upe, asui upuri simutara iwate sui asui usuruka imarika asui panye ibuxu usemu isui.
19Asui aintausendu sesewara panye kuaita Jeruzalẽwaraita, asui aintauseruka aintanyenga rupi Aseldama, yawesawa Tuwi Kampu ae.
20Nyãse aintaumpinima Salmu upe: "Iyaraimawaa kuri setama, tepexari yepe uiku arupi, asui amu kuri upuraki imuraki."
21Ape yepe apigawa aintasuiwara kuaita uwatawaita yaneirumu yawewarawate Jesus uiku rame yanepiterupi,
22Uyupiruwaa Juão batizmu rese ate Jesus usu iwaka kiti, urikute uiku yanepiterupi umbeu arama sesewara Jesus usemu manusawa sui.
23Asui aintauyuka mukuĩ apigawaita kua Juze aintauserukawaa Barsaba sera rakapira Justu, asui Matia yuiri.
24Asui aintaupurandu Deus irumu, aintaumbeu:
—Inde Yaneruixawa, inde rekuawawaa aintapia upe panye kuaita apigawaita, remukame yamaa kuiri awataa aintasuiwara reparawaka,
25uwajudari arama yande sese kua yanemuraki remundu aramawaa kuri ae nyãse Juda uxariana ae usu arama uikuwerawaa kiti kuiri.
26Asui aintaumburi surti asui uwari sese kua Matia asui uiku aintapiterupi kuaita unziwaita Jesus umunduwaita.
Currently Selected:
Atu 1: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
