Juão 21
21
Seti umbuewaita umaa Jesus
1Asui yawewaa rire Jesus uxari umbuewaita aintaumaa ae lagu rimbiwa kiti sera Tiberiade. Yawe uxari aintaumaa ae.
2Aintauyumuatiri kuaita Simão Pedru, Tume yuiri kua aintauserukawaa Didimu, Natanael Kanaã Galileya suiwara, asui kuaita Zebedeu rairaita, asui mukuĩ yuiri umbuewaita.
3Asui Simão Pedru unyee ainta supe:
—Hasu hapisaitika. Asui aintaunyee ixupe:
—Yasute yuiri neirumu. Asui aintauwiye igara upe asui nẽ maa nungara aintauwasemu nyã pituna.
4Asui kuema irumu Jesus uiku praya rese maa kuaita umbuewaita tiaintaukuawa sã aete ae.
5Asui Jesus unyee ainta supe arama:
—Setainaita, maitaa periku pirá? Asui aintaunyee ixupe:
—Umbaa, tiyariku.
6Asui unyee ainta supe arama:
—Pemburi pepisa igara katusawa banda sui asui pewasemu kuri. Asui aintaumunya maye umbeuwaa yawe asui tiaintaupuderi aintausiki aintapisa siya resewara pirá ipupe.
7Asui kua Jesus umbuewaa kua ugustariwaa unyee Pedru supe:
—Aete yaneruixawa. Asui Simão Pedru usendu irumu suixawa ae umundeu irupa nyãse umusakare ae upuraki arama, asui upuri parana kiti.
8Maa kua amuita umbuewaita aintausu igara rupi aintausiki aintapisa pirá irumu nyãse kuayentu garapa sui ainta, kuaji sem metru iapekatusawa.
9Asui aintausika rame simbiwa kiti aintaumaa tata asui pirá yuiri tata upe asui pão yuiri.
10Asui Jesus unyee ainta supe:
—Peruri ixe arama yepeyepe pira aintasuiwara kuaita peyukáwaita kuirintu.
11Asui Simão Pedru uwiye igara kiti usiki arama aintapisa iwi ara kiti, aikue sentu sinkuenta tres pirá ipuwasuwaita ipupe, maa tiusuruka kua aintapisa.
12Asui Jesus unyee ainta supe:
—Peyuiriana pembau. Maa aintausikie aintaupurandu, awataa inde? Nyãse aintaukuawate aintaruixawa ae.
13Asui Jesus uri upisika pão umee ainta supe arama pirá yuiri.
14Musapirisawana Jesus uxari umbuewaita aintaumaa ae upuamu rire manusawa sui.
Jesus upurandu Simão Pedru
15Asui aintaumbau rire Jesus upurandu Simão Pedru unyee ixupe:
—Simão Juão raira, maitaa regustari ixe turusu piri amuita sui? Asui unyee ixupe arama:
—Ẽẽ seruixawa rekuawate hagustari inde. Asui unyee ixupe arama:
—Resaru kuri seuvelyaita.
16Asui upurandu ae mukuĩsawa:
—Simão Juão raira maitaa regustari ixe? Asui usuaxara ae:
—Ẽẽ seruixawa, rekuawate hagustari inde. Asui Jesus unyee ixupe arama:
—Resaru kuri seuvelyaita.
17Asui musapirisawa Jesus upurandu ae:
—Simão Juão raira maitaa regustari ixe? Asui sasiyara Pedru ipia nyãse musapiri viaji Jesus upurandu ae; maitaa regustari ixe? Asui unyee ixupe:
—Seruixawa, rekuawate panye maa rekuawate yuiri hagustari inde, asui Jesus unyee ixupe:
—Resaru kuri seuvelyaita.
18Supiwa hambeu inde arama:
—Taina ramere inde remundeu nerupa indepawate asui resu maa kitintu reputari, maa tuyuwe rameana kuri inde remukame kuri neipu asui amu umundeu kuri nerese nerupa, asui urasu kuri inde maa kiti tiwa reputari resu.
19Yawe unyee uxari arama ukuawa maye kuri umanu ae uxari arama aintaukuawa purangawaa kua Deus. Asui umbeu rire kua inyenga unyee ixupe:
—Reyuiriana serakakuera.
20Asui Pedru uyereu umaa uri yuiri sakakuera kua Jesus umbuewaa kua ugustariwaa, kua uwapikawaa Jesus ruaki paskua upe kua upuranduwaa; "Seruixawa awataa kua uentregariwaa inde?"
21Asui Pedru umaa irumu ae unyee Jesus supe:
—Kuataa maitaa kuri ae?
22Asui Jesus unyee ixupe:
—Haputari rame upita ate hayuiri yuiri kuri timaa arama inde arama ae. Maa inde reyuiriana serakakuera.
23Asui aintauyupurungita kuaita umbuewaita aintapawa tikuri umanu kua umbuewaa. Timaa Jesus umbeu; tikuri umanu ae, maa umbeu: "Haputari rame upita ate hayuiri yuiri kuri timaa arama inde arama ae."
Juão testemunyu
24Aete kua umbuewaa umbeuwaa sese kua Kristu umunyawaa asui hampinima ae, yakuawate supiwa kua umbeuwaa.
25Maa aikuere siyapiri yampinima rame maa ainta hamanduari timaa usika panye kua mundu upe panye kua umpinimawaa.
Currently Selected:
Juão 21: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
