1 Kurintuwaraita 6
6
Maitaa yambeu yanerumuara rese
1Umunya rame puxuwerawa penye arama kua perumuara, maitaa kuri pembeu sesewara ainta supe arama kuaita serakuenawaita tiwaita uruyari u pembeu sesewara ainta supe kuaita Deus umukaturuwaita?
2Maitaa tiserá pekuawa umukaturuwaita aintaumbeu kuri aintapekadu kuaita mundu puraita? Maitaa tiserá pepuderi pembeu aintapekadu kuaita perumuaraita?
3Maitaa tipekuawa yarikute yambeu kuri aintarese kuaita anjuita? Ape yapuderi yuiri yakuawa kuaita mundu puraita rese.
4Peputari rame pembeu amu resewara, marantaa ainta supe ae kuaita tiwaita uwajudari yande ingreja upe?
5Yawe hanyee hamutiĩ kuri penye. Maitaa tiserá aikue yepe apigawa ukuawawaa pesuiwara upuderi umbeu aintapekadu kuaita perumuaraita?
6Maitaa puranga yepe uruyariwaa umbeu sumuara resewara serakuenaita supe tiwaita uruyari?
7Peputari rame pembeu amu resewara pexari kuri yakuawa peyawi. Marantaa tipepurara pepekadu resewara? Marantaa tipeaguentari kua pepurarawaa?
8Maa penye pemunya puxuwerawa perumuaraita supe arama, peganani pemunda kua pemunya kuaita peimuita Kristu rupi.
9Maitaa tiserá pekuawa tikuri Deus uxari aintauwike setama kiti kuaita puxuwerawaita? Tepeyuganani penyepawa, tikuri Deus uxari uwike setama kiti kuaita umunyawaita puxuwerawa aintapira irumu, kuaita upuranduwaa idulu irumu, kuaita yuiri warixiwaita aintarimiriku sui, tiyuiri kuaita apigawaita umunyawaita puxi amuita apigawaita ipira irumu.
10Tiyuiri mundawasuita, tiyuiri umuasiwaita, tiyuiri ukauwaita, tiyuiri upurungitawaita puxi, tiyuiri ugananiwaita, uyuka amuita aintayara, tikuri Deus uxari aintauwike Setama kiti.
11Kuxima yepeyepe pesuiwara aintaumunya aintayawe kuaita puxuwerawaita maa yaneruixawa umuyasukana penye, uxari ixupe aramawaita penye uxari penye pekaduimawaita yawe yaneruixawa Jesus Kristu rera rese, sese yuiri kua yaneDeus Espiritu.
Yayawawa ikiawasawa sui
12Hapuderi hamunya panye maa haputari hamunya, maa tipanye umunya puranga ixe arama. Hapuderi hamunya panye maa haputari hamunya, maa tihaxari upukuari hamanduarisawa kua hamunyawaita.
13Yanerimbiu aete yanemarika supe arama, yanemarika aete yanerimbiu riru, maa Deus kuri uxari ukanyemu kua yanerimbiu kua yanemarika yuiri. Tiuxari yande arama yanepira yamunya arama tenyuntu irumu, maa yaneruixawa ixupe aramawaa kua yanepira, asui yanepira ixupe aramawaa kua yaneruixawa.
14Kuxima Deus usupiri yaneruixawa iwi kuara sui, asui usupiri kuri yuiri yande ikirimbawasawa irumu.
15Maitaa tiserá pekuawa Kristu yara kua yanepira? Ape maitaa puranga hayuka Kristu sui iyara haxari arama ae ixupe arama kua kunya warixiwaa? Tikuri mairame.
16Maitaa tire pekuawa kua uikuwaa warixiwaa irumu yepenyute aintapira? Nyãse yawe aintaumpinima kuxima: "Yepenyute kuaita mukuĩwaita."
17Maa kua uikuwaa kua Yaneruixawa irumu yepenyuwate ae Espiritu irumu.
18Peyawawaa ikiawasawa sui. Panye apigawaita pekadu aintaumunya amu kiti aintapira sui, maa kua umunyawaa tenyuntu ipira irumu umunya ipekadu ipira supe aramapawate.
19Maitaa tire pekuawa Espiritu Santu ruka pepira? Deus uxariwaa penye arama kua Espiritu asui tipeyara kua pepira.
20Nyãse sipiwasu irumu upiripana penye kuxima, ape pemee purangawaa Deus supe pepira irumu pepia sui yuiri, nyãse Deus yaraita penye.
Currently Selected:
1 Kurintuwaraita 6: BBp
Highlight
Share
Copy
Want to have your highlights saved across all your devices? Sign up or sign in
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO
