Éxodo 3
3
Cohamacʉ Moisere bajua, tirore Egipto yahpapʉ faraõ mehne durucuro waha dutiha
1Ã yoa tiro Moise sehe to marechʉno Jetro nuina ovejaare ã jichʉ cabraare ñʉ wihbo cohtariro jia tiha. Cʉ̃ nʉmʉ tiro wahiquinare tjare ti chʉchʉ cohta tinino waharo, tinare wʉari dʉjʉropʉ naaha. Naa, yoaro waha, sʉropʉ cʉ̃dʉ tʉ̃cʉ Sinaí wama tidʉ cahapʉ tinare na sʉha. Tʉ tʉ̃cʉ sehe, “Ahdʉ Cohamacʉ to bajua mʉjadʉ jira” ni, cua pisaro mehne ti ñʉdʉ jiha. 2Ã yoa tói cʉ̃dʉ yucʉcʉcã jʉ̃rucudʉcãpʉ Yawe Moisere sʉhʉduro taro niha. Tʉre Moise noano to ñʉchʉ, tʉ sehe jʉ̃dʉ yoaro sehe bajuparota jʉ̃ pihtieraha. 3Ã jʉ̃ pihtierachʉ ñʉno, tiro õ sehe ni tʉhotuha:
—¿Yaba baro choro jijari sohõ? ¿Dohse yoaro jʉ̃rucuparota jʉ̃ pihti boraerajari? Cahacãpʉ ñʉi wahaihtja —ni, ñʉno wahaha.
4Moise cahacã curepʉ to sʉchʉ ñʉno, Cohamacʉ sehe tʉ jʉ̃rucudʉcãpʉ tirore:
—¡Moise! ¡Moise! —ni pisuha.
To pisuchʉ tʉhoro,
—Õi jija —ni yʉhtiha Moise.
5To yʉhtichʉ, Cohamacʉ sehe tirore õ sehe niha:
—Tóihta tjuarʉcʉ sʉga. Tjuarʉcʉ sʉ, mʉ dahpo suhtire tjuwega. Yʉhʉ õi jichʉ, ahri yahpa noari yahpa jiro nina —niha.
à ni tuhsʉ, õ sehe ni namoha:
6—Yʉhʉ jija Abrahã, Isaa, Jacobo mʉ ñʉchʉsʉma cjiri ti Cohamacʉ —niha.
To ã nichʉta, Moise sehe, “Ahriro Cohamacʉre ñʉi, yariaa wahaboca yʉhʉ” ni, cuiro, muhri yo, to wʉhdʉare to wamomacari mehne dʉcataha. 7To ã yoachʉta, Yawe sehe tirore õ sehe niha:
—Yʉhʉ ñʉja yʉ masa, Egiptopʉ jiina ti ñano yʉhdʉchʉ. Tinare ñʉ nʉnʉ, tuaro mehne ti dahra dutichʉ ñano wapʉ tia, ti sañurucuchʉ, tʉhoja yʉhʉ. Masija tuaro ti ñano yʉhdʉare. 8Ã jicʉ dija tahi yʉhʉ. Yʉ masa ñano yʉhdʉinare, egipto masa ti bui tuaina jia, cahamaca ti cjʉainare na wioi tai dija tahi. Tinare na wio, cʉ̃ yahpa, pjiri yahpa, noari yahpapʉ naaihtja tinare. Tí yahpapʉre jipihtia chʉa jira. Tí yahpa cananeo masa, hitita masa, amorreo masa, fereseo masa, heveo masa, jebuseo masa ti jiri yahpa jira. 9Yʉ nino seheta yʉhʉ tʉhoja yʉ masa wapʉ tia, ti sañurucuchʉ. Ã yoa ñʉja egipto masa tinare ñano ti dutipechʉ. 10Ã jicʉ yʉhʉ sehe mʉhʉre warocaihtja tí yahpa macariro pʉhtoro cahapʉ. Tópʉ sʉ, yʉ masa israe masare tí yahpai jiinare pʉhtoro mehne sʉhʉdu, tinare na wioga mʉhʉ —niha Yawe tirore.
11To ã nichʉ tʉhoro, Moise sehe õ sehe ni yʉhtiha:
—Yʉhʉ wiho jiriro jija. Faraõ cahapʉ waha, tinare na wio masieraja yʉhʉ —ni yʉhtiha.
12To ã nichʉ tʉhoro, Cohamacʉ sehe tirore õ sehe niha:
—Cuii tjiga. Yʉhʉ cʉ̃hʉ mʉhʉ mehneta jiihca tópʉre. Tuhsʉ, yʉ masa curua, Egipto yahpapʉ jiinare mʉ na wiori baharo, õpʉta tina mehne wihiihca mʉhʉ. Ã wihicʉ, ahdʉ tʉ̃cʉpʉta tinare yʉhʉre sʉho ño payoihca mʉhʉ. Ã ño payoipʉ, mʉhʉ sehe “Potocãta Cohamacʉta jiri jira yʉhʉre tinare na wio duti warocariro” ni, yʉhʉre masiihca mʉhʉ jʉna —niha Cohamacʉ Moisere.
13To ã nichʉ tʉhoro, Moise õ sehe ni sinitu ñʉha:
—Israe masa cahapʉ sʉ, “Mari ñʉchʉsʉma cjiri ti Cohamacʉ mʉsa cahapʉ yʉhʉre warocahre” yʉ nichʉ, tina yʉhʉre õ sehe ni sinitu ñʉahca: “¿Dohse wama tiriro jihri tiro?” ni, yʉhʉre sinitu ñʉahca tina. Ti ã ni sinitu ñʉchʉ, ¿yʉhʉ sehe tinare dohse ni yʉhtiihcari? —ni sinitu ñʉha.
14To ã ni sinitu ñʉchʉ tʉhoro, Cohamacʉ sehe õ sehe ni yʉhtiha tirore:
—Yʉhʉ jija ã catirucuriro. Ã jicʉ mʉhʉ sehe, “¿Dohse wama tiriro jihri tiro?” ni, mʉhʉre ti sinitu ñʉchʉ, õ sehe ni yʉhtiga tinare: “‘Yʉhʉ jija ã catirucuriro’ to basi niriro yʉhʉre mʉsare na wio dutiro, mʉsa cahapʉ warocahre” ni, yʉhtiga tinare. 15Ã ni tuhsʉ, yʉhʉre tinare õ sehe ni yahubasa namoga: “‘Ti ñʉchʉsʉma cʉ̃hʉ cjiri Abrahã, Isaa, Jacobo cʉ̃hʉ cjiri ti Cohamacʉ jija yʉhʉ. Yʉhʉ Yawe wama tija. Ã jia tina sehe yʉhʉre mipʉre ã dihta ni, pisu ño payo mʉjajaro. Tuhsʉ, tinare ji turia dijaina cʉ̃hʉ boro marieno yʉhʉre ã dihta ni, pisu ño payo mʉjajaro tina cʉ̃hʉ’ ni, yahurocahre mʉsare Yawe” ni, yʉhʉre tinare yahubasaga —niha Cohamacʉ Moisere. (“Yawe” nino, “ã catirucuriro” nino nica hebreo masa ya dʉsero mehne)
16Ã ni tuhsʉ, õ sehe ni namoha:
—Wahaga ti cahapʉ. Ti cahapʉ sʉ, israe masare sʉho ji mʉhtainare pji cahmachu, õ sehe ni yahuga tinare: “Yawe, mari ñʉchʉsʉma cʉ̃hʉ cjiri Abrahã, Isaa, Jacobo cʉ̃hʉ cjiri ti Cohamacʉ yʉhʉ mehne durucuro wihihre. Wihi, yʉhʉre õ sehe ni yahubasa dutirocahre mʉsare: ‘Yʉhʉ ñʉja egipto masa yʉ masare ñano dutipe ti cjʉachʉ. 17Ã ñʉi, tinare, Egipto yahpai ñano yʉhdʉ jiinare na wioi tai nija. Na wio, cananeo masa, hitita masa, amorreo masa, fereseo masa, heveo masa ã jichʉ jebuseo masa tí curuari macaina ti ya yahpapʉ tinare naai tai nija. Tí yahpa noaputiari yahpa jira. Tuhsʉ, jipihtia chʉa jiri yahpa jira. Ã jicʉ tinare tí yahpapʉ naai tai nija’ nirocahre Yawe mʉsare” ni, yahubasaga yʉhʉre tinare. 18Mʉ ã ni yahuchʉ, yʉ masare sʉho ji mʉhtaina sehe mʉhʉre potocã tʉhoahca. Ã jicʉ tinare yahu tuhsʉ, mʉhʉ cʉ̃hʉ tina mehneta wahaga. Waha, Egipto macariro faraõ mehne durucuna wahaga. To cahapʉ sʉ, õ sehe ni siniga tirore: “Yawe sã hebreo masa Cohamacʉ sãre tirore ño payo dutiro taro pjirocahre. Ã jicʉ mʉhʉ sehe sãre wʉari dʉjʉro, yucʉri marieni dʉjʉropʉ tia dacho waha, sʉropʉ sãre warocasiniga. Tópʉ sʉna, sã sehe sã wahiquinare wajã, jʉ̃ wa mʉo, sã Cohamacʉ Yawere ño payona wahana tana nija” ni, siniga tirore. 19-20Wiho mejeta yʉhʉ sehe masija yʉhdʉrʉcariro to jia tiare. Ã yʉhdʉrʉcariro jiro, tiro mʉsare, mʉsa ã ni sinipachʉta, wa wiosi. Ã jicʉ yʉhʉ sehe yʉ tuaa tiare masa ti yoaa bihoeraare egipto masare yoa ñoihtja. Tí mehne tinare ñano yʉhdʉchʉ yoa, tuaro buhiri dahreihtja. Yʉ ã tuaro buhiri dahreri baharo, mʉsare Egipto yahpai jiinare cohãroca wiorohca tiro jʉna. 21-22Tó sehe yoa, mʉsare egipto masa ti ño payochʉ yoaihtja. Ti ã ño payochʉ, jipihtina israe masa numia sehe, mʉsa wijaahto pano, ti ya wʉhʉ cahacã macaina numia ti wahma sitiare sinijaro. Ti siniina numia mehne jiina numia ya cʉ̃hʉre sinijaro. Õpere sinijaro tí numiare. Uru, ã jichʉ plata wama tia comaa mehne ti yoaa, cahmono yosaare, bʉsaa darire, wamo picari sãa sororire, ã jichʉ suhti cʉ̃hʉre sinijaro. Sini tuhsʉ, tí jipihtiare ti pohnare wajaro. Tó sehe yoa, egipto masa ti cjʉaare manahca mʉsa. Ã jina mʉsa wijaana, paye baro maeraina wijaasi —niha Yawe Moisere.
Currently Selected:
Éxodo 3: GVC
Highlight
Share
Copy
Want to have your highlights saved across all your devices? Sign up or sign in
Todo os direitos são reservados a:
©Missão Novas Tribos do Brasil
Rua Itália, Qd. 57 L. 5-7 – Santa Isabel
75083-310 Anápolis, GO
