Éxodo 1
1
Egipto yahpapʉ israe masa wapʉ tiro mehne jia tiha
1Jacobo to pohna mehne Egipto yahpapʉ wahaa tiha. Jipihtina tina to pohna ti namosanumia, ti pohna mehne wahaa tiha. Õ sehe wama tiina jiha tina: 2-4Rubẽ, Simeõ, Leví, Judá, Isacá, Sabulõ, Benjamí, Dã, Neftali, Gade ã jichʉ Asé jiha. 5Ã yoa cʉ̃iro to macʉno José Egipto yahpapʉ ji tuhsʉa tiha. Tina Jacobo pohna, ã jichʉ to panamana jipihtina mehne setenta waro jia tiha.
6Ã yoa tópʉ ti sʉri baharo, payʉ cʉhmari baharo, tina Jacobo pohna yaria pihtia wahaa tiha. Ã yoa jipihtina paina tí tjuru macaina cʉ̃hʉ yaria pihtia wahaa tiha. 7Wiho mejeta Jacobo cjirore ji turia dijaina, israe masa ti niina sehe, payʉ masa puti, tuari curua waha, paró Egipto yahpare ji sahsea wahaha.
8Ã yoa payʉ cʉhmari baharo, Egipto yahpare pairo faraõ sãa tiha tjoa. (“Faraõ” nino “pʉhtoro” nino nica egipto masa ya dʉsero mehne) Tiro sehe José cjiro Egipto yahpare noano to yoarire masiera tiha. 9Ã jiro õ sehe niha to coyea egipto masare:
—Ahrina israe masa mari bui payʉ masa putia nina. Ã jia tina mari bui tuari curua wahaa nina. 10Ã wahaa, cʉ̃ dacho marine ñʉ tuhtiina ti cahma wajã yʉhdʉrʉca sãa tachʉ, ahrina cʉ̃hʉ tina mehne sãarʉcʉ sʉ, marine cahma wajã yʉhdʉrʉcaboca. Ã cahma wajã yʉhdʉrʉca, tina marine yʉhdʉ witi wijaa wahaboca. “Ã wahari” nina, marine soro yoaro cahmana tinare —niha tiro wahmairo pʉhtoro to coyea, egipto masare.
11To ã nichʉ tʉhoa, egipto masa sehe israe masare ñano cahamaca ti dʉcaha. Ã cahamaca ti dʉcaa, tina israe masare ñʉ nʉnʉ, tuaro mehne dahra dutihtina cjihtire cũha. Tuhsʉ, tinare pʉa maca dahre dutia tiha. Pitõ wama tihti maca cjihto, ã jichʉ Ramesé wama tihti maca cjihto yoa dutia tiha tinare. Tí macari cjihti sehe tí yahpa macaa toaa dichare na cahmachu duti, to wihbo dutihti macari cjihti jiha.
12Ã yoa israe masa sehe, ti ã ñano dutipepachʉta, payʉ masa puti namoha. Ã jia egipto masa sehe tinare tuaro cuia tiha. 13Ã cuia, tinare ti dahra dutimariro bui tuaro dahra dutia tiha. 14Dihta sohãare na duti, tíre tʉ sahba duti, tí mehne dihta cjoari dahre duti, tí cjoari mehne wʉhʉseri dahre dutia tiha tinare. Ã yoa toaa ti toahti weseri cʉ̃hʉre tuaro dahra duti, pja ñʉno marieno dahra dutia tiha. Ã yoaa, israe masare ti catisinino puro tuaro wapʉ ti, purĩno tʉhotuchʉ yoaa tiha tina.
15Ã yoa jia tiha pʉaro numia, Sifrá, Puá wama tia numia. Tí numia sehe hebreo masa numia ti pohna tichʉ cohtaa numia jiha. Cʉ̃ nʉmʉ faraõ tí numiare pji dutiroca, õ sehe niha tí numiare:
16—Hebreo masa numia ti pohna tichʉ ñʉna wahana, õ sehe yoaga: Mʉacã ti pohna tichʉ, ti pohna tiri pjaihta ti pocosanumia ti ñʉerasinichʉta, wajãnocaga tinacãre. Ã yoa numiacã ti pohna tichʉ, wajãena tjiga tí numiacãre —niha faraõ. (Israe masareta pa wama “hebreo masa” ni, pisua tiha tí pjapʉre)
17Wiho mejeta ti pohna tichʉ cohtaa numia sehe Cohamacʉre ño payoa numia jia tiha. Ã jia ti pʉhtoro to dutiro sehe yoaera tiha. Mʉacã ti masa bajuachʉ cʉ̃hʉre, wajãera tiha tí numia. 18Ti wajãerachʉ ñʉno, faraõ sehe tí numiare pji dutiroca, õ sehe ni sinitu ñʉha tí numiare:
—¿Dohse yoana mʉsa tina mʉacãre wajãerajari? —ni sinitu ñʉha.
19To ã ni sinitu ñʉchʉ, tí numia sehe tirore cuia, õ sehe ni mahñoha:
—Hebreo masa numia sehe egipto masa numia yoaro sehe jierara. Ti niji wahcõri baharocãta, pohna ti tuhsʉ mʉjana tí numia. Ã jina sã sehe tí numiare ñʉna wahana, nijinocã ti ñahari baharopʉ sʉ mʉjaa tija —ni mahñoha.
20-21Ã yoa Cohamacʉ sehe ti wajãerachʉ ñʉno, “Ahrina numia yʉhʉre cua pisaro mehne ño payoa numia jira” ni ñʉha. Ã ni ñʉno, tí numiare noano wahachʉ yoaha. Tí numiare nijinocã boca masieraa numia cjirire pohna tichʉ yoaha tiro ti manʉsʉma mehne. Ã yoa israe masa pohnacãre ti wajãerachʉ, tina israe masa sehe payʉ masa puti, tuari curua waha namoha. 22Ti ã tuari curua waha namochʉ ñʉno, faraõ sehe to coyea egipto masare õ sehe niha tjoa:
—Hebreo masa pohna mʉacã ti masa bajuachʉ, tinacãre diapʉ doca ñonocaga. Numiacã sehere doca ñoena tjiga —niha.
Currently Selected:
Éxodo 1: GVC
Highlight
Share
Copy
Want to have your highlights saved across all your devices? Sign up or sign in
Todo os direitos são reservados a:
©Missão Novas Tribos do Brasil
Rua Itália, Qd. 57 L. 5-7 – Santa Isabel
75083-310 Anápolis, GO
