Marcos 2

Jechu judi chjaparȩrëremȩdejȩ tai̧dëmȩ pio ju̧i̧

Mateo 9:1-8; Uruca 5:17-26

1Do ji̧ra̧dë chjätä ëte Jechu judi ado chjereno̧ baärëremȩde Capanau̧ quȩmȩ bë ma̧ri̧räpȩ. Ado chjaodëri̧ baärëremȩde ma̧ȩ üdë pio ju̧i̧ chjiari. 'Ma̧na̧dida, bërädida' quëna̧ji̧ri̧pea̧dirȩ goë ta̧rëa̧ oaiä. 2Ado pio ju̧i̧iä pumȩ no̧i̧dërë goëdepea̧diro̧jo̧ȩ. Jibëa̧ jo̧ dai oati̧ cjiari̧ järëreji̧ri̧diro̧jo̧ȩ yu̧a̧rea̧ joë ya pio ju̧i̧ tuti cjiami̧ dari̧. Ado Jechu judi a̧ra̧ano̧rëremȩdejȩrȩ Ütë tjamo̧ ja̧ ma̧ȩ oa. 3Ado judi a̧ra̧ano̧a̧ nöta jadüchiami̧rȩ ara go̧düna̧ra̧rëreji̧ri̧dirȩ, tai̧dëmȩ pio ju̧i̧ araji̧ri̧rȩ. 4Jabo Jechu pio ju̧i̧iäpȩ ara yu̧a̧tärea̧ ji̧, cjäri̧ madirȩ, yu̧a̧rea̧ dadëa̧dirȩ pumȩ no̧i̧dërë tuti cjia̧ pio oaiä. Pio ju̧i̧iä jo̧ dairi pio judiri jo̧ uëräpȩ bua̧diro̧jo̧ȩ tai̧dëmȩ ju̧i̧, ju chjererea̧ dadëmȩ pio ju̧i̧. Ado a̧rüa̧ cotori judiri cjürëri̧ japa ëte bira tänȩrëreji̧ri̧diro̧jo̧ȩ Jechu pio ju̧i̧iäpȩ. Baramȩ oa bira tänȩa̧diro̧jo̧ȩ.

5Ado Jechu judi pio jȩaiäpȩ go̧düdäräji̧ri̧ oa cjacjarë daea̧ oaiä, jibëa̧ chji̧rä chjuari̧ quëna̧ji̧ri̧ oa cjacjarë daea̧ oaiä, jabechji̧ yo̧a̧dejȩ tai̧dëmȩ ju̧i̧:

—Danȩ ca̧ ja, mȩnȩ chjai̧dëri̧ japea̧ üdë duridëparȩa̧ oa cjiade.

6Jabo Moicherë go̧ȩparërea̧ ma̧ȩ oa a̧ra̧ano̧ji̧ri̧ judiro̧ pio jiro ma̧ȩ oa ta̧rëa̧ oaiä ana̧ri̧ jo̧rȩtaji̧ri̧pea̧dirȩ jibëa̧ chji̧rä. 7'Jabo cjäri̧ madida, ja̧di ta̧rëri̧ yo̧rea̧mi̧dëdida, Ütëcji quëna̧ japamȩdida, Ütë tjamo̧ pio ju̧i̧iäpȩmo̧ chjai̧dëri̧ ni̧bädiji̧da, Ütë tjamo̧ pio judimo̧dida, pumȩrȩ chjai̧dëri̧ japea̧ pio ju̧i̧ duridëparȩmȩ pio judimo̧dida, ado judiri decjiadida' quëna̧ jo̧rȩtaji̧ri̧rȩ ta̧rërëreji̧ri̧diro̧jo̧ȩ.

8Jabo Jechu judi jibëa̧ chji̧ oa chjaodëri̧ cjacjarë damȩrȩ, 'Aja̧, ja̧di dari̧ jo̧rȩtadiro̧da, pio coa chjiari ja̧di dari̧ jo̧rȩtadiro̧da' quëna̧ dabamȩrȩ iëno̧ë ta̧rëa̧dejȩrȩ:

—¿Tjana̧pea̧ oa dibëa̧ chji̧rä ja̧di dari̧ jo̧rȩtanȩrȩ mȩnȩro̧? 9Danȩrȩ, ¿tjana̧ tjamo̧de pio coaiä jamȩpai̧ da tjamo̧ üdë? Tai̧dëmȩ judi chjai̧dëri̧ japea̧ pio ju̧i̧ duridëparȩpea̧ üdë, jabo tai̧dëmȩ pio ju̧i̧ chjaparȩpea̧ üdë. ¿Yö̧ta dari̧ jo̧rȩtanȩrȩ mȩnȩro̧? 10Ado yaba̧, mȩnȩro̧ pio coa chjiari coëma cjiari̧ jo̧rȩtapea̧ oa, jabechji̧ chjadëri̧ na̧rȩparequededibe. 'Aja̧, Pumȩrȩ Ara̧ Tjamo̧ judi pio judidida, Ütë tjamo̧rȩ yürüa̧ oa pio yoa chiriräpȩ chjai̧dë oa duridëparȩrea̧ chiamȩdida' quëna̧rea̧mi̧ dari̧ chjadëri̧ na̧rȩparequededibe. Ado ja̧di ta̧rëri̧ yo̧ ëte Jechu judi yo̧a̧dejȩ tai̧dëmȩ ju̧i̧:

11—Danȩ, yo̧requedemȩ. Cjitëvä. Na̧ tjae mo̧a̧rea̧ oa mitë ëte baävä na̧ bëräpȩ. Chjapea̧ oa cjiarenȩ —yo̧a̧dejȩ.

12Ado tai̧dëmȩ pio judi chjaodëri̧ cjitëno̧rëremȩde. Ado mitëa̧dejȩ jibëa̧ tjae mo̧a̧rea̧ oa. Ado pio ju̧i̧ mitë ëte baärëremȩde. Ado baäa̧mȩ oa, pumȩ judiro̧ ütëborë cho̧rë dae cjia̧diro̧jo̧ȩ. Ado pio ju̧i̧ daea̧ oaiä, ana̧ri̧ jo̧rȩtaji̧ri̧rȩ chjacjiamȩri̧ jo̧rȩtaji̧ri̧pea̧diro̧jo̧ȩ Ütë tjamo̧ ju̧i̧iäpȩmo̧. Ado yo̧a̧dirȩ:

—Jabo cjäri̧ ma, a̧ro̧rȩ cja̧rȩmȩ co ja̧di dari̧ daea̧ ma ja̧didë.

Jechu judi mitërëremȩdejȩ Devi quȩmȩ ju̧i̧

Mateo 9:9-13; Uruca 5:27-32

13Jechu judi ado järëremȩde Garirea quȩmȩ tja yuroropȩ. Ado pumȩ no̧i̧dërë Jechu pio ju̧i̧iäpȩ a̧dope cjiaji̧ri̧ oa a̧ra̧ano̧rëremȩdejȩrȩ. 14Ado pio judiri jämȩrȩ daea̧dejȩ Devi quȩmȩ oa, Arapjeo quȩmȩ joja oa. Domano ja̧ ütëti̧ pio ji̧ri̧ ja̧ oa chëre boamȩ pio ju̧i̧ darëremȩdejȩ chëre boarea̧ jo̧räpȩ chamȩ oa. Ado Jechu judi yabëa̧dejȩ:

—Cho̧rë jana̧coe.

Ado Devi judi cjitëno̧ ëte cho̧rë järëremȩdejȩ.

15Ji̧dë duri oa Jechu judi järëremȩde Devi ja̧ bëräpȩ jurapea̧ oa. Ado ju̧i̧ ëba chaji̧ri̧ pumȩ pio judiro̧ ji̧ra̧rëreji̧ri̧dirȩ. Jabechji̧ Jechu pio ju̧i̧ cho̧rë jä chjaoa̧ oaiä, jabechji̧ ëba charëreji̧ri̧diro̧jo̧ȩ mechjaräpȩ ju̧ri̧. Domano ja̧ ütëti̧ pio ji̧ri̧ ja̧ oa chëre boaji̧ri̧ pio judiro̧, chjai̧dëri̧ japaji̧ri̧ pio judiro̧borë ëba charëreji̧ri̧diro̧jo̧ȩ Jechu ju̧i̧ nö̧ta, ado jibëa̧ jadü pio ji̧ri̧ nö̧ta. 16Jabo Moicherë go̧ȩparërea̧ ma̧ȩ oa a̧ra̧ano̧ji̧ri̧ judiro̧, pjaricheo quȩji̧ri̧ pio judiro̧ Jechu ju̧i̧ daea̧ ji̧, pio jiro pumȩ pio ji̧ri̧ nöta jura chamȩ oa daea̧ ji̧, goae tjamo̧dërëremȩdejȩrȩ. Ado pio ju̧i̧iäji̧ri̧rȩ iëno̧ë ta̧rëa̧diro̧jȩrȩ Jechu ja̧ jadü ji̧ri̧:

—Danȩrȩ, dibë a̧ra̧ano̧mȩ pio judi ëba jura chadejȩrȩ domano̧ ja̧ oa chëre boaji̧ri̧ pio ji̧ri̧ nöta, chjai̧dëri̧ japaji̧ri̧ pio ji̧ri̧ nöta. ¿Tjana̧ ju̧i̧iä ëba jura chadejȩrȩ pio jiro pumȩ ji̧ri̧? —iëno̧ë ta̧rëa̧diro̧jȩrȩ.

17Ado Jechu pio judi jibëa̧ jadü ji̧ri̧iäpȩmo̧ ja̧di ta̧rëri̧ yo̧a̧ pio ju̧i̧ ta̧rëmȩrȩ, dëbë yo̧a̧dejȩrȩ:

—Tjana̧ ju̧i̧iädë, danȩrȩ, chjari̧ dopaji̧ri̧ judiro̧ chjaparȩmȩ pio ju̧i̧iäpȩ jädëpadirȩ. Jabo gito ja̧boji̧ri̧ pio judiro̧, dëdë, jäpadiro̧jo̧ȩ. Danȩrȩ, 'coëma cjiari̧ cjo̧ro̧quëda, chjai̧dëri̧ japadëmȩrȩ cjo̧ro̧quëda’ quëna̧ji̧ri̧ pio ji̧ri̧ ëna̧diäera̧padëa̧requedejȩrȩ, jabo 'jabechji̧ chjai̧dëri̧ japamȩrȩ cjo̧ro̧mȩquëda' quëna̧ji̧ri̧ pio ji̧ri̧ ëna̧diäera̧pea̧requedejȩrȩ cudë —yo̧mȩrȩ dëbë yo̧rëremȩdejȩrȩ Jechu judi.

Juradëa̧ pio ju̧i̧ chjiari ni̧bä chjaorëreji̧ri̧dirȩ

Mateo 9:14-17; Uruca 5:33-39

18Juan ja̧ jadü judiro̧, jënȩro̧ tarami̧ jurarea̧ oa jiadarëreji̧ri̧diro̧jo̧ȩ. Jabechji̧ juratärea̧ ji̧, tjaoërä jiadarëreji̧ri̧diro̧jo̧ȩ Ütë tjamo̧ pio ju̧i̧ ana̧ri̧ jo̧rȩtapea̧ oa, jurarea̧ pio ju̧i̧iä oëra̧diächea oa. Ado pjaricheo judiro̧ peaja̧di dari̧ japarëreji̧ri̧diro̧jo̧ȩ jënȩro̧ jo̧rȩta̧mi̧. Jabo Jechu ja̧ jadü judiro̧ Ütë tjamo̧ ju̧i̧iäpȩmo̧ ana̧ri̧ jo̧rȩtapea̧ oa jiadadërereji̧ri̧diro̧jo̧ȩ jurarea̧ oa. Pio ju̧i̧iä pumȩ judiro̧ jäa̧diro̧jo̧ȩ Jechu pio ju̧i̧iäpȩ. Ado ja̧di ta̧rëri̧ yo̧ji̧ri̧rȩ iëno̧ë ta̧rëa̧diro̧jo̧ȩ:

—Danȩ, pjaricheo ja̧ jadü judiro̧, jënȩro̧ tarami̧ jurarea̧ oa jiadaji̧ri̧rȩ cjo̧ro̧dirȩ Ütë tjamo̧ pio ju̧i̧iäpȩmo̧ ma jo̧rȩtapea̧ oa. Ado Juan ja̧ jadü judiro̧ peaja̧di dari̧ japadirȩ. Jabo na̧ jadü judiro̧ ja̧di dari̧ japadë madirȩ. ¿Tjana̧ ju̧i̧iä jurarea̧ oa jiadaji̧ri̧rȩ jo̧rȩtadëdiro̧jo̧ȩ Ütë tjamo̧ ju̧i̧? —iëno̧ë ta̧rëa̧diro̧jo̧ȩ.

19Ado Jechu judi pio ji̧ri̧ ta̧rëa̧ oaiä, dëbë yo̧rëremȩdejȩrȩ na̧rȩrea̧ ma̧ȩmi̧ dara̧ pio ju̧ri̧ra̧. Jabechji̧ iei̧ pea ëbamȩmi̧ darë yo̧mȩrȩ ja̧di ta̧rëri̧ ni̧bä chjaorëremȩdejȩrȩ na̧rȩrea̧ ma̧ȩmi̧ dara̧, pio jȩa chjiari ni̧bämȩrȩ:

—Tjana̧ ju̧i̧iä jurarea̧ oa jiadadë, danȩrȩ, pumȩ judi jibëa̧ iei̧ ji̧ pea ëba̧rä, jabechji̧ pumȩ judiro̧ a̧dopapadirȩ airi̧ cjia airi̧ cjia jurapea̧ oa —yo̧a̧dejȩrȩ—. Ado pea ëbamȩ judi pio ji̧ri̧di ëba a̧dopea̧ oaiä, jabechji̧ jurarea̧ pio ju̧i̧ jiadaji̧ri̧rȩ ëba a̧doparea̧mi̧dëde. Jabechji̧ jurapea̧de. Ana̧ri̧ jo̧rȩtadëpea̧de jabo ma̧ chiadëri̧ cjiaji̧ri̧rȩ a̧dopapea̧de. 20Jabo dëdë, pea ëbamȩ üi̧ pio judi baë goa baäa̧ oa cjiarä, jȩa eadëji̧ri̧ pio ji̧ri̧iä baë goa baäa̧ oa cjiarä, jabechji̧ jibëa̧ pumȩ judiro̧ jurarea̧ pio ju̧i̧ a̧dë jo̧rȩtapadiro̧jo̧ȩ judiro̧ odai̧ dari̧ jo̧rȩta̧ oaiä. Aja̧, pio jiro japamitërä, dëdë, jurarea̧ pio ju̧i̧ jiadapai̧ dadiro̧jo̧ȩ. Judiro̧ jurarea̧ oaiä oëra̧diädëri̧ cjiarä judi, dëdë jiadapai̧ dadiro̧jo̧ȩ Ütë tjamo̧ pio ju̧i̧ ana̧ri̧ jo̧rȩtapea̧ oa —yo̧a̧dejȩrȩ.

Aja̧, ja̧di ta̧rëri̧ dëbë yo̧mȩrȩ yo̧rëremȩdejȩrȩ Jechu judi Juan pio ju̧i̧ ja̧ jadü pio ji̧ri̧iäpȩmo̧. Jabechji̧ iei̧ ëbamȩmi̧ darë na̧rȩrea̧ ma̧ȩmi̧ dara̧ ni̧bä chjaorëremȩdejȩrȩ, pio jȩa chjiari ni̧bämȩrȩ.

21Ado Jechu judi ji̧dë u̧i̧ ni̧bämȩrȩ a̧de ni̧bä chjaorëremȩdejȩrȩ ado cja̧rȩmo̧ na̧rȩrea̧ ma̧ȩmi̧ dara̧, ja̧di ta̧rëri̧ yo̧mȩrȩ:

—Danȩrȩ, eami̧ pumȩ üdë chjibo no̧mȩ ja̧ oa, co chiamȩ chjibo oa goë cararä judi, jabechji̧ pjaranera chjibo coto peaja̧ra̧ pio ju̧ri̧ra̧ goë cararea̧mi̧dëde. Jabechji̧ pjaranera chjibo coto peaja̧ üdë uira̧ joa oaiä, cjäri̧ made, tocoi̧ boi̧chji̧mi̧ dape jäpade. Ado tocoi̧ boi̧chji̧mi̧ dape jäa̧ oaiä ado chjereno̧ quiquiri chiapai̧ dade no̧mȩ ja̧ chjibo üdë. Peaja̧ra̧ goë cararea̧mi̧dëde no̧mȩ ja̧ üdë. 22Ado danȩrȩ, bino quȩmȩ ërü oa japamȩ judi, jabechji̧ joë no̧mȩ ja̧rä boeadëpadejȩ. Tjamo̧ davä. Chivo ira̧ japea̧ oa cjiamȩ joë no̧mȩ ja̧rä boearea̧mi̧dëde. Jabechji̧ joë no̧mȩ ja̧rä boearä judi, cjäri̧ made, ërü üdë ö̧da oaiä popë chiapai̧ dade. Jabechji̧ i üdë chëquë chëquëape jäa̧ oaiä, chjuadëpe baga̧ oaiä, jabechji̧ ërü decjiari̧ popë chjiapai̧ dade. Ja̧di tara joë peaja̧rämo̧ chö̧ra̧pea̧de chjadëri̧ boeapea̧ oa —yo̧mȩrȩ yo̧a̧dejȩrȩ Jechu judi.#2:22 Pio jiro ma̧ȩ üdë, chjibo ütama̧i̧ oa jëdano̧pea̧ pio ju̧i̧ chjiari ma̧ȩ üdë, ado ërü oa joë no̧mȩ ja̧rä boeapea̧ pio ju̧i̧ chjiari ma̧ȩ üdë, cja̧rȩmȩ jo̧retarea̧ chiade. Ji̧mo̧ baäde. Ado chjadëri̧ a̧dodiibë pio jiro ma̧ȩ üdë. Jabechji̧ jabechji̧ a̧ro̧rȩ jo̧rȩtarërea̧ pio ju̧i̧ a̧de quëna̧rea̧mi̧dëde jo̧rȩtarea̧ peaja̧ üdë. Tjamo̧ davä. Jo̧rȩtarea̧ ütama̧i̧ oa a̧de quëna̧rea̧mi̧dëde jo̧rȩtarea̧ peaja̧ üdë. Jabechji̧ a̧ro̧rȩ pearä jo̧rȩtarërea̧ pio ju̧i̧ aeno̧pea̧ pio ju̧i̧ chiari a̧ra̧ano̧rëremȩde Jechu judi.

Järätä chjaparea̧ do pio ju̧i̧ chjiari iëno̧ë ta̧rërëreji̧ri̧diro̧jo̧ȩ Jechu ju̧i̧

Mateo 12:1-8; Uruca 6:1-5

23Ado cja̧rȩmo̧ doremȩrä järätä chjaparea̧ doro, tjado oa yu̧ë chjätärëremȩde Jechu judi jibëa̧ jadü pio ji̧ri̧ nö̧ta. Ado jibëa̧ jadü judiro̧ chjaodëri̧ yarëno̧a̧diro̧jo̧ȩ cho chiamȩ joë pio ju̧i̧. Ado mu̧i̧ yarëno̧ ëte, taruparëreji̧ri̧dirȩ jurapea̧ ji̧. 24Ado pio ju̧i̧iä pjaricheo judiro̧ yo̧a̧diro̧jo̧ȩ Jechu ju̧i̧:

—Danȩ, na̧ jadü judiro̧ tüdüa̧mi̧ darä cjo̧ro̧pea̧ ma̧ȩrä chjadëri̧ cjo̧ro̧tärea̧ ji̧, järätä chjaparea̧ doro chjadëri̧ cjo̧ro̧tärea̧ ji̧, jabechji̧ china̧chja pio ju̧i̧ japadirȩ —yo̧a̧diro̧jo̧ȩ—. Jabechji̧ tjadoro ja̧bepadirȩ jurarea̧ cho oa mitëa̧ oaiä. Ado järätä chjaparea̧ doro ja̧beparea̧mi̧dëde —yo̧a̧diro̧jo̧ȩ.

25,26Ado Jechu judi dëbë yo̧mȩrȩ yo̧a̧dejȩrȩ pjaricheo pio ji̧ri̧iäpȩmo̧:

—Danȩrȩ, ¿Ütë tjamo̧ ja̧ ma̧ȩ oa go̧ȩ ni̧bädëa̧nȩrȩ? —iëno̧ë ta̧rëa̧dejȩrȩ—. Davi quȩmȩrea̧ pio judi japarërea̧ pio ju̧i̧ chjiari ¿go̧ȩ ni̧bädëa̧nȩrȩ? Danȩrȩ, Abiata quȩmȩ judi, o ji̧ri̧ chjiari tjamo̧ goë tuti ja̧bepamȩ pio judi cjo̧ro̧bearä judirä, jabechji̧ Davi judi ta̧mȩcho̧ ja̧bo tjamo̧mȩrȩ dëbëdiärea̧ jo̧räpȩ yu̧a̧rëremȩde. Ado china̧chja oa mitërëremȩdejȩ chja̧pe oa. Tjamo̧ davä. Chja̧pe oa jurapea̧ oa, Ütë tjamo̧ ja̧ oa china̧chjari̧ tutia̧ oa cjiaremȩ chja̧pe pio ju̧i̧ jurapea̧ oa mitërëremȩde, o ji̧ri̧ chjiari goë tuti ja̧bepaji̧ri̧ pio ji̧ri̧ ja̧ oa china̧chjari̧ tutia̧ oa cjiaremȩ chja̧pe pio ju̧i̧. Ado pio jiro jurarea̧ oa mitë ëte ëba jura̧dejȩrȩ jibëa̧ jadü ji̧ri̧. Ado judi juradëpea̧ pio ju̧i̧ jura̧räbo, tüdüa̧mi̧ darä cjo̧ro̧pea̧ ma̧ȩ pio ju̧i̧ ta̧rëdiädëa̧räbo, jabechji̧ eami̧ chjai̧dë oa chjätädërëremȩde —yo̧a̧dejȩrȩ—.

27Ado Jechu judi ji̧dë u̧i̧ yo̧mȩrȩ a̧de yo̧a̧dejȩrȩ:

—Danȩrȩ, Ütë tjamo̧ judi järätä chjaparea̧ do oa china̧chjari̧ tutirëremȩdejȩ pumȩ ji̧ri̧ chjadëri̧ a̧dopea̧ oa, ja̧bepea̧ duri oa chjadëri̧ järätä chjaparea̧ dapea̧ oa. Jabo danȩrȩ, pio jiro do ja̧ chja̧oerä dopadërea̧rȩ. Jabechji̧ pumȩ judiro̧ järätä chjaparea̧ do pio ju̧i̧ ja̧ chja̧oerä cjo̧ro̧pea̧ oa pareapadërëremȩdejȩrȩ. Danȩrȩ, Ütë tjamo̧ judi pumȩ ji̧ri̧ pearä judirä pareaparërea̧ ji̧, 'Aja̧, järätä chjaparea̧ do pio ju̧i̧ ja̧ chja̧oerä cjo̧ro̧pea̧ chiadiro̧da' quëna̧ jo̧rȩtadëa̧de. 28Ado danȩrȩ, Pumȩrȩ Ara̧ Tjamo̧ pio judi järätä chjaparea̧ do Ano̧mȩ pio judirequede. Jabechji̧ pio cüdërequede järätä chjaparea̧ do oa tjamo̧ri̧ yo̧mȩ judi. Ado pio ju̧i̧iä pio cüdë tjamo̧requede ütarë yo̧mȩ judi pumȩ judiro̧ järätä chjaparea̧ do oa japapea̧ pio ju̧i̧ chjiari —yo̧mȩrȩ ni̧bä chjaorëremȩdejȩrȩ Jechu judi pjaricheo pio ji̧ri̧iäpȩmo̧.

Currently Selected:

Marcos 2: Pume

Highlight

Copy