Marcos 1

Juan judi, uirä go̧e cjaeä chudamȩ pio judi to̧bari̧ a̧ra̧ano̧rëremȩdejȩrȩ pumȩ ji̧ri̧

Mateo 3:1-12; Uruca 3:1-9; Uruca 3:7; Juan 1:19-28

1,2Pio yoa ma̧ȩ üdë, Jechu Quiricho pio ju̧i̧ chjiari ma̧ȩde. Ütë tjamo̧ ja̧ Joja pio ju̧i̧ chjiari ma̧ȩde. Ado pio jiro ma̧ȩ chjadëi̧ üdë taruparëremȩde Ichaia quȩmȩ pio judi go̧ȩparërea̧mi̧. Tjamo̧ davä. Ichaia judi, Ütërë ea jana̧ chjadüa̧ ni̧bämȩ pio judi jabërä go̧ȩparëremȩde Juan quȩmȩ pio ju̧i̧ chjiari, jȩnȩ Jechu Quiricho ja̧ oa ja̧bepapea̧ pio ju̧i̧ chjiari, no̧mi̧ da oa jëdanȩ yürüpea̧ pio ju̧i̧ chjiari. Aja̧, ta̧rëchji̧vä Ütë tjamo̧ judi jibëa̧ Ja oa jabërä yo̧rërea̧ pio ju̧i̧:

“Danȩ, ca̧ mu̧i̧tjoi̧ pio ju̧i̧ chjadüpareconȩ na̧ yaboi̧. Jabechji̧ mȩnȩ jäpea̧ no̧mi̧ da pio ju̧i̧ jabërä chjadëri̧ jëdano̧mi̧ dari̧ japapea̧ oa, na̧ yaboi̧ chjadüpareconȩ. 3Aja, ju̧ri̧pȩ, chiri maearäpȩ ju̧ri̧ to̧bari̧ ni̧bä chjaopadejȩrȩ pumȩ ji̧ri̧. 'Danȩrȩ, Ano̧mȩ pio judi ma̧na̧padiibe' yo̧mȩrȩ ni̧bä chjaopadejȩrȩ. 'Ado judi chjadëri̧ ma̧na̧rea̧ dapea̧ oa, jabechji̧ no̧ oa coëmape bagami̧ dari̧ chjadëri̧ jëdano̧chji̧vä' yo̧mȩrȩ ni̧bä chjaopadejȩrȩ."

Aja̧, ja̧di ta̧rëri̧ jabërä go̧ȩparëremȩde Ichaia judi Juan pio ju̧i̧ chjiari.

4Ado Ichaia judi go̧ȩparërea̧mi̧ chjadürëremȩdejȩ Ütë tjamo̧ judi Juan pio ju̧i̧. Ado chiri maearäpȩ ju̧ri̧ to̧bari̧ a̧ra̧ano̧rëremȩdejȩrȩ pumȩ ji̧ri̧. Peaja̧di uirä go̧e cjaeä chudarëremȩdejȩrȩ. "Aja̧, ano̧ mire jo̧rȩtachji̧vä" yo̧a̧dejȩrȩ. "Chjai̧dë oa japë ano̧chji̧vä. Ado uirä go̧e cjaeä chuda̧ oa cjiachji̧vä. Jabechji̧ Ütë tjamo̧ judi dibë chjadëri̧ duridëparȩrea̧mi̧ dari̧ chuda̧ oa cjiachji̧vä." Aja̧, ja̧di ta̧rëri̧ yo̧mȩrȩ to̧bari̧ a̧ra̧ano̧rëremȩdejȩrȩ pumȩ ji̧ri̧. 5Ado Judea quȩmȩ chiriräpȩ cjo̧ro̧ji̧ri̧ judiro̧ no̧i̧dërë ta̧repea̧diro̧jo̧ȩ. Ado Jerucharȩ quȩmȩ bë ma̧ri̧räpȩ cjo̧ro̧ji̧ri̧ pio judiro̧borë ta̧repea̧diro̧jo̧ȩ no̧i̧dërë. Ado judiro̧ yo̧a̧ji̧ri̧ oa, “Aja̧ Ütë, pio mȩaiäpȩmo̧ chjai̧dëri̧ japea̧rea̧ro̧mȩ” yo̧a̧ji̧ri̧ oa uirä go̧e cjaeä chudarëremȩdejȩrȩ. Joroda̧ quȩmȩ bearäpȩ ju̧ri̧ chuda̧dejȩrȩ. 6Ado Juan judi cameyo cö̧ maeara̧ aea̧ oa ina̧rëremȩde jibëa̧ chjibo oa. Ado i maeara̧ japea̧ oa cjiamȩ cada abürea̧ oa abürëremȩde. Ado jurarëremȩde chiriräpȩ cjo̧ro̧mȩ ȩ oa. Tagara oa peaja̧di jurarëremȩde. 7Ado pio judi to̧bari̧ yo̧mȩrȩ a̧ra̧ano̧rëremȩdejȩrȩ pumȩ ji̧ri̧, ja̧di ta̧rëri̧ yo̧mȩrȩ: "Danȩrȩ, ca duri oa ma̧na̧pamȩ judi, coa u̧i̧ ba chiade. Cüdëmi̧ dadëde. Ju chia tjamo̧de. Nö̧tadëreconȩ. Pio ju̧i̧ ja̧ ta joë cä oa jareno̧pea̧ ji̧ nö̧tadë marequede. Jabechji̧ cüdë pio ju̧i̧ ja̧ mu̧i̧tjoi̧ tara, judi a̧dë chjäte ba chia tara, jabechji̧ pio ju̧i̧ ja̧ ta joë cä oa jareno̧pea̧ ji̧ tjamo̧ri̧ nö̧tadërequede. 8Ado danȩrȩ, cüdë dibë chuda̧ ji̧, jabechji̧ ui maeara̧ go̧e cjaeä chudarequededibe. Jabo judi Tjo tjamo̧ra̧ pio ju̧ri̧ra̧ go̧e cjaeä chudapadidibe." Aja̧, ja̧di ta̧rëri̧ yo̧mȩrȩ araano̧rëremȩdejȩrȩ pumȩ ji̧ri̧ Juan judi.

Juan judi go̧e cjaeä chudarëremȩdejȩ Jechu ju̧i̧

Mateo 3:13-17; Uruca 3:21-22

9Ja̧dëa ji̧ pio jiro japamitërä, Jechu judi Nachare quȩmȩ bë ma̧ri̧ri pio judiri jana̧mȩrȩ, Garirea quȩmȩ chiriri pio judiri go̧düdärärëremȩde Juan judi pumȩ ji̧ri̧ go̧e cjaeä chudaräpȩ ju̧ri̧. Ado Juan judi go̧e cjaeä chudarëremȩdejȩ bea Joroda̧räpȩ. 10Ado Jechu judi uiri pio judiri go̧dümȩrȩ, uëräpȩmo̧ gatë damȩrȩ darëremȩdejȩ a̧dë oa areië baämȩ oa. Ado pio judiri biramȩ oa daea̧dejȩ Tjo tjamo̧ oa, pio jȩaiäpȩmo̧ biramȩ oa, jotoco puami̧ dari̧ birana̧ra̧mȩ oa. 11Ado a̧dëri pio judiri ni̧bämȩ oa chjaodëri̧ ta̧rëa̧ maeadiro̧jo̧ȩ. Ja̧di ta̧rëri̧ yo̧a̧mȩ oa ta̧rëa̧diro̧jo̧ȩ: "Ea tjamo̧requedemȩ ca̧ Ja. Ma̧ chiadëri̧ cjia tjamo̧mȩrȩ darequedemȩ." Aja̧, ja̧di ta̧rëri̧ yo̧mȩrȩ yo̧rëremȩde Ama̧i̧ tjamo̧ judi Joja oa.

Ichiae judi chjai̧dëri̧ japa tänȩtarëremȩdejȩ Jechu ju̧i̧

Mateo 4:1-11; Uruca 4:1-13

12Ado Tjo tjamo̧ judi chjaodëri̧ chjadürëremȩdejȩ Jechu ju̧i̧ chiri tjoräpȩ ju̧ri̧, pumȩ decjiaräpȩ ju̧ri̧. 13Chirirä cjo̧ro̧mȩ chjuamȩrȩ cjo̧ro̧mȩräpȩ järëremȩde 40 do nö̧ta cjiadiäpea̧ oa. Ado pio jiro japamitërä, Ichiae judi chjai̧dëri̧ japa tänȩtarëremȩdejȩ. Jabo a̧dëriji̧ri̧ mu̧i̧tjoi̧ pio judiro̧ chjadëri̧ a̧dorëreji̧ri̧diro̧jo̧ȩ.

Jechu judi taruparëremȩde pumȩ ji̧ri̧ a̧ra̧ano̧pea̧ ji̧

Mateo 4:12-17; Uruca 4:14-15

14Ado chiri tjamo̧ cjo̧ro̧mȩ ütë judi Juan pio ju̧i̧ chaäa̧ duri oa, Jechu judi Garirea quȩmȩ chiriräpȩ järëremȩde Ütërë yürüa̧ ma̧ȩ chjadëi̧ pio ju̧i̧ chjiari a̧ra̧ano̧pea̧ oa. 15Ado ja̧di ta̧rëri̧ yo̧mȩrȩ a̧ra̧ano̧rëremȩdejȩrȩ pumȩ ji̧ri̧: "Danȩrȩ, Ütërë yo̧a̧ chja̧oerä cjo̧ro̧pea̧ üdë querediä tjamo̧diibe. Ano̧ mire jo̧rȩtachji̧vä. Ma̧ȩ chjadëi̧ pio ju̧i̧ quëna̧chji̧vä." Ja̧di ta̧rëri̧ yo̧mȩrȩ a̧ra̧ano̧rëremȩdejȩrȩ Jechu judi.

Jechu judi mitërëremȩdejȩrȩ cho̧ mu̧i̧ji̧ri̧ pio ji̧ri̧

Mateo 4:18-22; Uruca 5:1-11

16Ado Jechu judi Garirea quȩmȩ tja yuroro tai̧mȩrȩ darëremȩdejȩrȩ yo̧a̧ri̧ oari oa, cho̧ mu̧i̧ji̧ri̧ oa. Jibëa̧ cho̧ mu̧i̧rea̧ bäre oa uiräpȩmo̧ mu̧i̧ chideji̧ri̧ oa daea̧dejȩrȩ. Chimeo̧ quȩmȩ oa, ado ju̧i̧ ja̧ omȩ oa, A̧däre quȩmȩ oa daea̧dejȩrȩ. Jabechji̧ cho̧ mu̧i̧ji̧ri̧rȩ cjo̧ro̧rëreji̧ri̧dirȩ. 17Ado Jechu judi yabëa̧dejȩrȩ: "Pio coa cho̧rë jana̧chji̧vä. Mȩnȩro̧ cho̧ ma mu̧i̧rërea̧ ji̧, jabechji̧ pumȩ pio ji̧ri̧ ano̧ mire mu̧i̧mi̧ dari̧ dabapa tänȩparequededibe." Aja̧, ja̧di ta̧rëri̧ yo̧mȩrȩ yo̧rëremȩdejȩrȩ. 18Ado chjaodëri̧ mitë anȩno̧a̧diro̧jo̧ȩ jibëa̧ cho̧ mu̧i̧rea̧ bäre oa Jechu pio ju̧i̧ cho̧rë jäpea̧ oa.

19Ado ji̧dë u̧i̧ jachi oa jämȩrȩ Jechu judi ado darëremȩdejȩrȩ yo̧a̧ri̧ pumȩ oa, ji̧mo̧ ja̧ maea oa. Jibëa̧ chararä ja̧bepaji̧ri̧ oa daea̧dejȩrȩ jibëa̧ cho̧ mu̧i̧rea̧ bäre oa jëdano̧ji̧ri̧ oa. Santiago quȩmȩ ju̧i̧, Juan quȩmȩ ju̧i̧ daea̧dejȩrȩ, Chebedeo pio ju̧i̧ ja̧ u̧ri̧ oa. 20Ado ji̧ri̧ damȩrȩ chjaodëri̧ yabëa̧dejȩrȩ pio jȩa cho̧rë jätä. Ado cho̧rë jäa̧diro̧jo̧ȩ. Jibëa̧ ama̧i̧ pio ju̧i̧ a̧dë jäji̧ri̧rȩ, ado judiro̧ ja̧bepa tänȩa̧ mu̧i̧tjoi̧ pio ji̧ri̧bo a̧dë jäji̧ri̧rȩ, cho̧rë järëreji̧ri̧diro̧jo̧ȩ Jechu pio ju̧i̧.

Jechu judi baä tänȩrëremȩdejȩ ira̧diä cjaeäa̧mȩ ju̧i̧

Uruca 4:31-37

21Ado japamitë chjätä ëte, Jechu judi jibëa̧ jadüborë go̧düdärärëreji̧ri̧dirȩ Capanau̧ quȩmȩ bë ma̧ri̧räpȩ. Ado järätä chjaparea̧ doro Jechu judi järëremȩde Judiorë a̧doparea̧ bëräpȩ. Ado tarupea̧de a̧ra̧ano̧pea̧ ji̧. 22Ado pumȩ judiro̧ pio ju̧i̧ a̧ra̧ano̧mȩ oa ta̧rëa̧ oaiä ana̧ri̧ jo̧rȩtaji̧ri̧pea̧dirȩ. 'Chia chia, tjaoëpai̧ dari̧ a̧ra̧ano̧mȩdiibëda, Moicherë go̧ȩparërea̧ ma̧ȩ oa a̧ra̧ano̧ji̧ri̧ pio judiro̧mi̧ dari̧ a̧ra̧ano̧dëdiibëda, jabo tjamo̧ yo̧mȩmi̧ darë a̧ra̧ano̧diibëda, uapadëmȩrȩ a̧ra̧ano̧dibëda' quëna̧ jo̧rȩtaji̧ri̧rȩ ta̧rërëreji̧ri̧diro̧jo̧ȩ, ya yabë cjiaji̧ri̧rȩ. 23Ado Jechu judi a̧ra̧ano̧a̧ nöta chjaodëri̧ yu̧a̧de yaröca chiamȩ üi̧ üdë. Ado Jechu pio ju̧i̧iäpȩmo̧ goae tarari̧ ëna̧diämȩrȩ yo̧rëremȩdejȩ:

24—Jechu, pio judirenȩ. Nachare bë ma̧ri̧rimȩ pio judirenȩ. ¿Jabo tjana̧pea̧ oa tja̧reparȩra̧pea̧renȩibe? ¿Ibë goarijä tänȩrea̧mi̧ dari̧ conȩdaera̧pea̧renȩibe? Danȩ, tjamo̧ri̧ dabarequedemȩ. 'Aja̧, Ütë tjamo̧ pio judi china̧chjari̧ tutia̧ pio judidida' quëna̧ dabarequedemȩ —ëna̧diämȩrȩ yo̧rëremȩdejȩ yaröca üdë Jechu pio ju̧i̧iäpȩmo̧.

25Jabo Jechu judi yaröca oa cjiadiä tänȩmȩrȩ to̧bari̧ dëbë yo̧a̧dejȩ:

—Cjapiri̧ cjiavä —yo̧a̧dejȩ—. Ado pio jiro pumȩ ja̧ icjarari pio judiri a̧dë go̧düjo̧ȩ.

26Ado yaröca üdë japea̧ oaiä ma̧i̧ dari̧ bübürüpe chjaorëremȩde. Ado yaröca üdë pumȩ ya oaiä ira̧diä ni̧bämȩrȩ, ma̧i̧ dari̧ ëna̧ quirati̧ cjiamȩrȩ, a̧dë go̧düeno̧a̧dejȩ. 27Ado pumȩ judiro̧ ütëborë ana̧ri̧ jo̧rȩtaji̧ri̧pea̧dirȩ dacho bëremi̧ cjiami̧ dari̧. Ado jibëa̧ dëbëti̧ra̧ chia yo̧ji̧ri̧rȩ iëno̧ iëno̧ ta̧rërëreji̧ri̧dirȩ:

—¿Jabo tjana̧ japea̧de? Danȩrȩ, ado cja̧rȩmo̧ a̧ra̧ano̧rea̧ peaja̧ oa a̧ra̧ano̧mȩmi̧ dari̧ a̧ra̧ano̧diibe tjamo̧ yo̧mȩmi̧ darë. Jiadarea̧mi̧dëri̧ a̧ra̧ano̧mȩde. Ado yaröca pio judiro̧borë ta̧rë japadiro̧jo̧ȩ —yo̧a̧dirȩ.

28Ado pio ju̧i̧iä chjaodëri̧ chjuchjupe chä baärëremȩde ma̧ȩ üdë Jechu pio ju̧i̧ chjiari. Ado pio ju̧i̧iä Garirea quȩmȩ chiriräpȩ cjo̧ro̧ji̧ri̧ judiro̧ chjaodëri̧ goë goë ta̧rëa̧ marëreji̧ri̧dirȩ.

Jechu judi chjaparȩrëremȩdejȩ Chimeo̧ ja̧ cjö̧na̧ ji̧

Mateo 8:14-15; Uruca 4:38-39

29Ado Jechu judi jibëa̧ jadüborë go̧dürëreji̧ri̧dirȩ Judiorë a̧doparea̧ bëri pio judiri. Santiago judi, Juan pio judiborë go̧düa̧dirȩ pio ju̧i̧ nö̧ta. Ado tjamo̧i̧ jäji̧ri̧rȩ järëreji̧ri̧dirȩ A̧däre ado Chimeo̧ pio ji̧ri̧ ja̧ bëräpȩmo̧. 30Ado Chimeo̧ pio ju̧i̧ ja̧ cjö̧na̧ jini̧ taipa ja̧boyi̧rȩ a̧rȩrëreyi̧nȩ. Ado Jechu judi pio ju̧ri̧pȩ go̧düdäräa̧rä chjaodëri̧ yo̧a̧diro̧jo̧ȩ pio ji̧ chjiari. 31Ado Jechu judi goëdepea̧dejȩ. Ado ji̧ ja̧ ichi oa mitë ëte mu̧i̧ gatëmȩrȩ a̧doa̧dejȩ cjitëpea̧ ji̧. Ado chjaodëri̧ chjapea̧nȩ taipa ja̧bodëyi̧pe bagarea̧mi̧ dari̧. Ado chjaodëri̧ taruparëreyi̧nȩ ja̧bepapea̧ ji̧. Ado jurarea̧ oa jëdano̧ ëte goë yürürëreyi̧nȩjȩrȩ.

Jechu chjaparȩrëremȩdejȩrȩ pumȩ no̧i̧dë oa

Mateo 8:16-17; Uruca 4:40-41

32Ado do üdë bira̧ duri oa genȩpea̧rä, Jechu pio ju̧i̧ chjiari ta̧rëa̧ oaiä pumȩ judiro̧ ëba järëreji̧ri̧diro̧jo̧ȩ gito ja̧boji̧ri̧ pio ji̧ri̧ Jechu pio ju̧i̧iäpȩ. Ado yaröca chiaji̧ri̧ pio ji̧ri̧bo ëba järëreji̧ri̧diro̧jȩrȩ. 33Ado pio jiro bë ma̧ri̧räpȩ cjo̧ro̧ji̧ri̧ judiro̧, ütëborë a̧dopea̧no̧a̧dirȩ Jechurë cjiamȩ bë dëbëräpȩ ju̧ri̧. 34Ado Jechu judi no̧i̧dë tjamo̧ oa chjaparȩrëremȩdejȩrȩ. Eami̧ti̧ gito oa taraji̧ri̧ oa chjaparȩa̧dejȩrȩ. Ado yaröca chiaji̧ri̧ pio ji̧ri̧bo a̧domȩrȩ baä tänȩa̧dejȩrȩ ira̧diä cjaeäa̧ji̧ri̧ pio ji̧ri̧. Jabo ira̧diä ni̧bärea̧ yürüdëa̧dejȩrȩ jabo. 'Jechu pio judidida, Ütë tjamo̧ ja̧ Ja pio judidida' quëna̧ daba̧ oaiä, jabechji̧ ira̧diä ni̧bärea̧ yürüdërëremȩdejȩrȩ yarö̧ca ji̧ri̧.

Jechu judi jibëa̧ Ama̧i̧ ju̧i̧ ni̧bä ëte oëra̧ti̧ oa järëremȩde a̧ra̧ano̧pea̧ oa

Uruca 4:42-44

35Jabë gȩnȩrä, jabë tatadërä, dorë cjitëpea̧ queri̧diädërä, Jechu judi bëdü ëte järëremȩde jibëa̧ Ama̧i̧ pio ju̧i̧ ni̧bäpea̧ oa. Bë ma̧ri̧ri pio judiri go̧dümȩrȩ järëremȩde pumȩ decjiaräpȩ. Ado jibëa̧ma̧i̧ cjiamȩrȩ ni̧bäa̧dejȩ. 36Jabo Chimeo̧ judi, jibëa̧ jadüborë jäa̧dirȩ Jechu pio ju̧i̧ dapea̧ oa. 37Ado ju̧i̧ dadäräa̧rä, yo̧a̧diro̧jo̧ȩ:

—Danȩ, pumȩ judiro̧ ütëborë na̧tadiro̧mȩ mȩa.

38Jabo Jechu judi dëbë yo̧mȩrȩ yo̧a̧dejȩrȩ:

—Danȩrȩ, pio yoaiämo̧i̧ a̧ra̧ano̧dëpea̧de, jabo oëra̧ti̧ oa a̧ra̧ano̧pea̧de peaja̧di. Pio yoa bë ma̧ri̧rämo̧ a̧ra̧ano̧dëpea̧de, jabo oëra̧ti̧ oa cjiamȩ bë ma̧ri̧räpȩbo a̧ra̧ano̧pea̧de. Aja̧, pio ju̧i̧ japapea̧ oa ma̧na̧requede cüdë —dëbë yo̧a̧dejȩrȩ.

39Pio ju̧i̧iä Jechu judi Garirea quȩmȩ chiri nötai̧ oa tai̧mȩrȩ a̧ra̧ano̧rëremȩdejȩrȩ pumȩ ji̧ri̧. Judiorë a̧doparea̧ bëräpȩ a̧ra̧ano̧rëremȩdejȩrȩ. Ado pumȩ ji̧ri̧ ira̧diä cjaeäji̧ri̧ pio ji̧ri̧ baä tänȩrëremȩdejȩrȩ yaröca pio ji̧ri̧.

Ma̧i̧ da co chiamȩ pio ju̧i̧ chjaparȩrëremȩdejȩ Jechu judi

Mateo 8:1-4; Uruca 5:12-16

40Ado pumȩ judi, ma̧i̧ da co chiamȩ pio judi, jibëa̧ ichi oa ta̧i̧pape bagami̧ tarari̧ japamȩ co oa ja̧bomȩ pio judi järëremȩdejȩ Jechu pio ju̧i̧iäpȩ. Ado ju̧i̧ ja̧ dëbëräpȩ ju chatura̧ cjiamȩrȩ yo̧rëremȩdejȩ:

—Mȩnȩ ca̧ co oa chjaparȩtämi̧ cjiarä judi, jabechji̧ chjaodëri̧ chjaparȩpai̧ darenȩque co chja maeari̧ —yo̧a̧dejȩ.

41Ado Jechu judi pio jiro pumȩ oa cjäri̧ri̧ cjia damȩrȩ ga̧re tara̧dejȩ jibëa̧ ichira̧. Ado dëbë yo̧a̧dejȩ:

—Danȩ, chjaparȩtämi̧ cjiarequedemȩ. Jabechji̧ chjapea̧ oa cjiavä.

42Ado chjaodëri̧ chjapea̧ oa cjiarëremȩde pumȩ üdë. Ma̧i̧ da coremȩ üdë, jabechji̧ jiro decjiapea̧de. Co chjapea̧de.

43Ja̧dëa ji̧ Jechu judi baä tänȩrëremȩdejȩ. To̧bari̧ yo̧mȩrȩ yo̧a̧dejȩ:

44—Danȩ, cüdë mȩa chjapea̧ pio ju̧i̧ chjiari yo̧dëpea̧de. Jabechji̧ cjapiri̧ cjiamȩrȩ jävä o ji̧ri̧ chjiari goë tuti ja̧bepamȩ pio ju̧i̧iäpȩ. Pio ju̧i̧ tjamo̧i̧ jävä. Ado pio ju̧i̧ na̧rȩjo̧ȩ na̧ i oa chjapea̧ oa cjiamȩ oa. Ado pio ju̧i̧ na̧rȩ ëte, Moicherë go̧ȩparërea̧ ma̧ȩ üdë yo̧a̧mi̧ japatä earequedemȩ. Jabechji̧ pumȩ judi chjapea̧ oa cjiarä yürüpea̧ pio ju̧i̧ goe gu̧rori̧ cäë yürütä earequedemȩ. Jabechji̧, mȩnȩ ja̧di dari̧ japea̧ oaiä chjadëri̧ na̧rȩparenȩjȩrȩ o ji̧ri̧iäpȩmo̧ mȩnȩ chjadëri̧ chjapea̧ pio ju̧i̧ chjiari —yo̧a̧dejȩ.

45Jabo chjapea̧ oa cjiamȩ pio judi cjapiri̧ baätärea̧ ji̧, cjapiri̧ baädërëremȩde, jabo pio jȩa dëbëdiäa̧ nöta yo̧rëremȩdejȩrȩ. Ado pio ju̧i̧iä chjaodëri̧ chjuchjupechärëremȩde ma̧ȩ üdë. Ado pio ju̧i̧iä pumȩ no̧i̧dërë jä chjaorëreji̧ri̧diro̧jo̧ȩ Jechu pio ju̧i̧iäpȩ. Ja̧di tara Jechu judi pumȩ ja̧ dachoro tai̧mȩrȩ cjo̧ro̧rërea̧ ji̧, bë ma̧ri̧räpȩ goadidëmȩrȩ tai̧rërea̧ ji̧, jabechji̧ pumȩ decjiaräpȩmo̧ ano̧ mire tai̧mȩpea̧de. Jabo chiriräpȩ tai̧mȩbo cho̧rë järëreji̧ri̧diro̧jo̧ȩ.

Currently Selected:

Marcos 1: Pume

Highlight

Copy