Mateo 3

Juan pio ju̧i̧ chjiari go̧ȩpea̧ oa cjiade pio yoa ma̧ȩ üdë uirä chudarëremȩ pio ju̧i̧ chjiari

Marco 1:1-8; Uruca 3:1-18; Juan 1:19-28

1Ado japamitë ana̧ chjätä ëte, Juan judi, uirä go̧ȩ cjaeä chudamȩ pio judi go̧düdärärëremȩde, Ütë tjamo̧ ja̧ ma̧ȩ oa a̧ra̧ano̧mȩrȩ. Ado chiri tjo maearäpȩ ju̧ri̧ a̧ra̧ano̧rëremȩdejȩrȩ pumȩ ji̧ri̧ Judea quȩmȩ chiriräpȩ. 2Ja̧di ta̧rëri̧ yo̧mȩrȩ a̧ra̧ano̧rëremȩdejȩrȩ:

⁠—⁠Ano̧ mire jo̧rȩtachji̧vä mȩnȩro̧ chjai̧dëri̧ japea̧ pio ju̧i̧ chjiari ⁠—⁠yo̧mȩrȩ a̧ra̧ano̧rëremȩdejȩrȩ⁠—⁠. Jabechji̧ Ütë judi yo̧a̧ chja̧oërä cjo̧ro̧pea̧ üdë ma̧na̧pea̧ ji̧ querediä tjamo̧diibe ⁠—⁠yo̧a̧dejȩrȩ.

3Jabo Juan judi, ¿chjiade? Chjiadëde, pio ju̧i̧ chjiari jabërä ni̧bärëremȩde Ichaia quȩmȩrea̧ judi, Ütërë ea jana̧ chjadüa̧ oa ni̧bämȩ pio judi. Danȩrȩ, ja̧di ta̧rëri̧ yo̧rëremȩde jabërä. Ta̧rëchji̧vä:

"Pio ju̧ri̧pȩ, chiri tjoräpȩ ju̧ri̧ cja̧rȩmȩ üdë to̧bari̧ ëna̧diäde. Ado ja̧di ta̧rëri̧ yo̧de: ‘Ano̧mȩ pio judi ma̧na̧pea̧ ji̧ querediäde. Pio ju̧i̧iä jabechji̧ judi ma̧na̧pea̧ no̧ pio ju̧i̧ chjadëri̧ jëdano̧mi̧ dari̧ japachji̧vä, no̧ coëmape bagarea̧mi̧ dari̧.'"

Aja̧, ja̧di ta̧rëri̧ ni̧bämȩrȩ ni̧bärëremȩde Ichaia quȩmȩrea̧ judi jabërä Juan pio ju̧i̧ chjiari.

4Ado Juan judi cö̧ra̧ aea̧ cjiamȩ ina̧rea̧ oa, putu chocota̧ chamȩ#3:4 Ado 'putu chocota̧ chamȩ' yo̧a̧ ji̧, jabechji̧ 'cameyo' yo̧rea̧de nivë ma̧ȩra̧. cö̧ maeara̧ aea̧ oa ina̧rëremȩde jibëa̧ chjibo oa. Ado i maeara̧ japea̧ oa cjiamȩ cada abürea̧ oa abürëremȩde. Ado jurarëremȩde chiriräpȩ cjo̧ro̧mȩ ȩ oa. Tagara oa peaja̧di jurarëremȩde. 5Ado ju̧ri̧pȩ a̧ra̧ano̧mȩ oa ta̧rëtämi̧ cjiaji̧ri̧rȩ goëdepea̧diro̧jo̧ȩ pumȩ no̧i̧dërë. Jabechji̧ Judea quȩmȩ chiriri pio judiri jäji̧ri̧rȩ goëdepea̧diro̧jo̧ȩ oëra̧ti̧ oa a̧rȩmȩ bë ma̧ri̧ri pio judiri, Jerucharȩ bë ma̧ri̧ri pio judiribo. Ado Joroda̧ quȩmȩ chiriräpȩ cjo̧ro̧ji̧ri̧ pio judiro̧borë goëdepea̧diro̧jo̧ȩ. Aja̧, no̧i̧dë tjamo̧rȩ jäji̧ri̧rȩ goëdepea̧diro̧jo̧ȩ. 6Ado judiro̧ Juan pio ju̧i̧ irä ta̧rëa̧ oaiä, a̧ra̧ano̧mȩ oa ta̧rëa̧ oaiä, jabechji̧ jënȩro̧ chjai̧dëri̧ japea̧ pio ju̧i̧ chjiari goadidëa̧dirȩ, jabo ni̧bärëreji̧ri̧diro̧jo̧ȩ. Ado pio ju̧i̧iä bea Joroda̧ quȩmȩräpȩ go̧ȩ cjaeä chudarëremȩdejȩrȩ ano̧ mire jo̧rȩtaji̧ri̧ oa, “chjai̧dëri̧ japaji̧ri̧rea̧rȩ” yo̧ji̧ri̧ oa.

7Ado pjaricheo pio judiro̧, ado chaducheo pio judiro̧borë go̧düdärärëreji̧ri̧dirȩ Juan pio judi a̧ra̧ano̧mȩräpȩ. Peaja̧di chuda̧ oa cjiatämi̧ cjiaji̧ri̧rȩ go̧düdärärëreji̧ri̧dirȩ. Jabo Juan judi pio ji̧ri̧ chjiari na̧e chiamȩrȩ darëremȩdejȩrȩ. Jabechji̧ tjamo̧ri̧ ano̧ mire jo̧rȩtadëri̧ cjiaji̧ri̧ oa darëremȩdejȩrȩ. Ado pio ju̧i̧iä ja̧di ta̧rëri̧ yo̧mȩrȩ yo̧a̧dejȩrȩ:

⁠—⁠Cjäri̧ manȩrȩ, po pio judimi̧ danȩrȩ ⁠—⁠yo̧a̧dejȩrȩ⁠—⁠. Oëadëji̧ri̧ tjamo̧ tara, po pio judimi̧ danȩrȩ. Dibëa̧ chji̧ra̧ tjamo̧ri̧ ano̧ mire jo̧rȩtadëri̧ cjianȩrȩ jabomo̧ ano̧ mire jo̧rȩtacji̧ quëna̧ japa maeanȩrȩ. Ado pio ju̧i̧iä chudarea̧mi̧dënȩrȩ ⁠—⁠yo̧a̧dejȩrȩ⁠—⁠. Danȩrȩ, iëno̧ë ta̧rërequededibe. ¿Yö̧ta dari̧ jo̧rȩtanȩrȩ? ‘Jaeboquëda, cüdë chuda̧ oa cjia̧ pio ju̧i̧iä Ütë ja̧ ërecjiarea̧ üdë acji cjatädëpa jirodicoada’ quëna̧ jo̧rȩtadënȩrȩ? 8Dëdë, ja̧di dari̧ quëna̧ jo̧rȩtanȩrȩ, jabo cjäri̧ manȩrȩ, oëra̧ jo̧rȩtanȩrȩ ⁠—⁠yo̧a̧dejȩrȩ⁠—⁠. Danȩrȩ, mȩnȩro̧ tjamo̧ri̧ ano̧ mire jo̧rȩtaji̧ri̧pea̧rä judi, jabechji̧ chjadëri̧ na̧rȩriä cjo̧ro̧chji̧vä. Aja̧, jurarea̧mi̧ da oa chjadëri̧ na̧rȩriä cjo̧ro̧chji̧vä. 'Aja̧, tjamo̧ri̧ ano̧ mire jo̧rȩtaji̧ri̧pea̧diro̧da’ quëna̧rea̧mi̧ dari̧ na̧rȩriä cjo̧ro̧chji̧vä pumȩ ütëbo oa. 9Jabo oëra̧ jo̧rȩtadëchji̧vä pio dibë chjiari ⁠—⁠yo̧a̧dejȩrȩ⁠—⁠. ‘Chja jabechji̧ cüdë Abaraa̧rea̧ pio judiri ja̧mȩ tara, Ütë tjamo̧ pio ju̧i̧iä ba chia tjamo̧quëda, jabechji̧ pio judiri ja̧mȩ tara, Ütë ja̧ ërecjiarea̧ üdë pio coaiäpȩmo̧ tjamo̧ri̧ acji cjatädëpadicoada’ quëna̧dëchji̧vä. Jabechji̧ Abaraa̧rea̧ pio judiri ja̧mȩborë bape chjaoa̧ oa cjiapai̧ danȩrȩ. Ado pio ju̧i̧iä yo̧requededibe. ‘Jabechji̧ ba chia tjamo̧quëda, Abaraa̧rea̧ pio judiri ja̧mȩ tara ba chia tjamo̧quëda’ quëna̧ jo̧rȩtadëtäreji̧ri̧nȩrȩ pio dibë chjiari. Danȩrȩ, Ütë tjamo̧ judi Abaraa̧rea̧ pio judiri ja̧ ji̧ri̧ pio ji̧ri̧ cjitë tänȩtämi̧ cjiarä judi, jabechji̧ ta̧dëra̧ pio ju̧ri̧ra̧ cjitë tänȩpai̧ dadejȩrȩ chjaodëri̧, pio yi chamȩ ta̧dëra̧ pio ju̧ri̧ra̧. Tjamo̧ davä. Ja̧di dari̧ japapai̧ dade Ütë tjamo̧ judi, judi ja̧di dari̧ japatämi̧ cjiarä judi. Ado pio ju̧i̧iä oëra̧ jo̧rȩtadëtäreji̧ri̧nȩrȩ pio dibë chjiari. Jabechji̧ Abaraa̧rea̧ pio judiri ja̧ji̧ri̧borë ano̧ mire jo̧rȩtatäreji̧ri̧nȩrȩ. Jabechji̧ Abaraa̧rea̧ pio judiri ja̧mȩrȩ cjo̧ro̧pea̧ üdë, dëdë, ba chiade, jabo ji̧dë u̧i̧ ba chiade ano̧ mire jo̧rȩtapea̧ üdë. Jabo cjäri̧ manȩrȩ, tjamo̧ri̧ ano̧ mire jo̧rȩtadëri̧ cjianȩrȩ. 10Ado pio ju̧i̧iä jabechji̧, pio dibëiäpȩmo̧ acji cjatäpamȩ bape chjaorea̧ üdë, jabechji̧ jibëmi̧ dade. Ado chjaodëri̧ acji cjatäpai̧ dadidibe. Jabechji̧ teracaba tomi̧ da pio ju̧i̧ chjaodëri̧ tuti dea̧ oa cjiami̧ dari̧ cjiapea̧ oa, jurarea̧ chiadëmȩ tomi̧ da pio ju̧i̧ tuti dea̧ oa cjiami̧ dari̧ cjiapea̧ oa, acji cjatäpai̧ dadidibe davä Ütë ja̧ ërecjiarea̧ üdë chjaodëri̧. Ado dea̧ duri oa, jabechji̧ cjo̧dëräpȩ aeno̧pea̧de ⁠—⁠yo̧mȩrȩ ni̧bärëremȩde Juan judi pjaricheo pio ji̧ri̧iäpȩmo̧, chaducheo pio ji̧ri̧iäpȩmo̧bo.

11Ado ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ Juan judi:

⁠—⁠Jabechji̧ pumȩ judiro̧ chjai̧dëri̧ japea̧ pio ju̧i̧ chjiari tjamo̧ri̧ ano̧ mire jo̧rȩtaji̧ri̧pea̧ pio ji̧ri̧ uirä go̧ȩ cjaeä chudarequededibe ⁠—⁠yo̧a̧dejȩrȩ⁠—⁠. Aja̧, ja̧di dari̧ japarequededibe. Jabo danȩrȩ, ca̧ duri oa ma̧na̧pamȩ pio judi, jabechji̧ pio coa u̧i̧ ba chiamȩde. Pio coa u̧i̧ ju chiamȩde. Jabomo̧ mu̧i̧tjoi̧requede cüdë. Nö̧tadëreconȩ ma̧na̧pamȩ ju̧i̧. Jabechji̧ a̧dë chjäte ba chiamȩde. Ado a̧dë chjäte ba chiamȩ tara, jibëa̧ ta joë pio ju̧i̧ mu̧i̧ yürüpea̧ ji̧ nö̧tadërequede. Jabechji̧ boi̧chji̧mi̧ darequede. Borequede. Ado pio judi ma̧na̧rä, Tjo tjamo̧ra̧ pio ju̧ri̧ra̧ go̧ȩ cjaeä chudapadidibe o ji̧ri̧. Jabo o ji̧ri̧, cjo̧dëra̧ pio ju̧ri̧ra̧ go̧ȩ cjaeä chudapadidibe. 12Jabechji̧ yo̧a̧ri̧ bubape bagari̧ tutipadejȩrȩ pumȩ ji̧ri̧. Coëma cjiari̧ cjo̧ro̧ji̧ri̧ pio judiro̧ jibëa̧ buba cjiapea̧ oa tutipadejȩrȩ. Ado coëma cjiari̧ cjo̧ro̧dëji̧ri̧ pio ji̧ri̧ peaja̧di tutipadejȩrȩ jibëa̧ buba cjiapea̧ oa. Jabechji̧ chjai emi̧ da oa pjaepa oaiä, boa chari̧ japami̧ dari̧ japapadejȩrȩ pumȩ ji̧ri̧. Ado ja̧dëa ji̧ chomi̧ da pio ji̧ri̧ chjadëri̧ a̧dopa tänȩpadejȩrȩ chjadëri̧ jidapea̧ oa, chjadëri̧ boeapea̧ oa. Jabo chjai emi̧ da pio ji̧ri̧, jabechji̧ pio ji̧ri̧ caäpadejȩrȩ. Tjamo̧ davä. Coëma cjiari̧ cjo̧ro̧dëji̧ri̧ pio ji̧ri̧ cäapadejȩrȩ ja̧bodëmȩ cjo̧dëra̧ pio ju̧ri̧ra̧, ja̧bo tänȩrea̧mi̧dëmȩ cjo̧dëra̧ pio ju̧ri̧ra̧ ⁠—⁠yo̧mȩrȩ ni̧bä chjaorëremȩdejȩrȩ pumȩ ji̧ri̧ Juan pio judi.

Juan judi go̧ȩ cjaeä chudarëremȩdejȩ Jechu ju̧i̧

Marco 1:9-11; Uruca 3:21-22

13Ado pio jiro japamitërä, Jechu judi go̧düdärärëremȩde Garirea quȩmȩ chiriri pio judiri. Ado bea Joroda̧räpȩ järëremȩde Juan judi pio jȩa go̧ȩ cjaeä chudapea̧ oa. 14Jabo Juan judi yo̧tea̧dejȩ:

⁠—⁠Cjäri̧ marequedemȩ ⁠—⁠yo̧a̧dejȩ⁠—⁠. Cüdë mȩa chudarea̧mi̧dërequedemȩ. Pio mȩnȩ chudatäremȩrenȩque coa. ¿Tjana̧ ju̧i̧iä pio mȩa chudatä earenȩque? ⁠—⁠yo̧mȩrȩ yo̧rëremȩdejȩ Juan judi.

15Jabo Jechu judi cjiadiädëmȩrȩ dëbë yo̧rëremȩdejȩ:

⁠—⁠Jabechji̧ go̧ȩ cjaeä chudacoe ⁠—⁠yo̧a̧dejȩ⁠—⁠. Ja̧di dari̧ japapea̧de. Jabechji̧ ja̧di dari̧ japatä eadimȩ Ütë tjamo̧ judi. Ado Ütë tjamo̧ pio judi yo̧a̧mi̧ japapea̧ üdë, chjadëde. Jabechji̧ pio coa go̧ȩ cjaeä chudacoe ⁠—⁠yo̧a̧dejȩ.

Ado Jechu judi ja̧di ta̧rëri̧ dëbë yo̧a̧ oaiä, jabechji̧ go̧ȩ cjaeä chudarëremȩdejȩ Jechu ju̧i̧. 16Ado Juan judi Jechu pio ju̧i̧ chuda̧ duri oa, jabechji̧ uiri pio judiri go̧düa̧de. Ado chjaodëri̧ areia̧ oa cjiarëremȩde a̧dë üdë, cjürë yape järi̧. Ado Jechu judi uëräpȩmo̧ gatë damȩrȩ daea̧dejȩ Ütë tjamo̧ ja̧ Tjo pio ju̧i̧, pio jȩaiäpȩmo̧ biramȩ oa, jotoco puami̧ dari̧ birana̧ra̧mȩ oa. 17Ado chjaodëri̧ ta̧rëa̧ maeadiro̧jo̧ȩ a̧dëri pio judiri ni̧bämȩ oa. Ja̧di ta̧rëri̧ yo̧a̧mȩ oa ta̧rëa̧diro̧jo̧ȩ: "Ea tjamo̧requedemȩ ca̧ Ja. Ma̧ chiadëri̧ cjia tjamo̧mȩrȩ darequedemȩ." Aja̧, ja̧di ta̧rëri̧ yo̧mȩrȩ yo̧rëremȩde Ama̧i̧ tjamo̧ judi jibëa̧ Ja pio ju̧i̧ chjiari judi uiri pio judiri go̧dürërea̧ ji̧.

Currently Selected:

Mateo 3: Pume

Highlight

Copy