Mateo 28

Jechu judi ja̧boa̧remȩrȩ bëdürëremȩde ado chjereno̧

Marco 16:1-8; Uruca 24:1-12; Juan 20:1-10

1Ado järätä chjaparea̧ do#28:1 Järätä chjaparea̧ do üdë judio pio ji̧ri̧iä, jabechji̧ Chabado quȩmȩ dorëremȩde. ‘Domingo quȩmȩ do üdë järätä chjaparea̧ dodida’ quëna̧ jo̧rȩtadë marëreji̧ri̧dirȩ. üdë chjätäa̧ duri oa dopea̧rä, Domingo domȩ ju̧i̧iä peadai̧rä, Maria Madarena pio jini̧, ado cja̧rȩmo̧ Maria quȩyi̧ pio jini̧borë järëreji̧ri̧ni̧rȩ ta̧dë cjararäpȩ ju̧ri̧. 2Ado chjaodëri̧ ma̧i̧ da jö̧nö̧jö̧nö̧ai̧ maea cjiari̧ cjiarëremȩde chiri üdë. A̧dë chjäte ma̧i̧ dari̧ japarëremȩde. Jabechji̧ Ano̧mȩ pio ju̧i̧ ja̧ mu̧i̧tjoi̧ üdë a̧dëri pio judiri bira̧ oaiä, ma̧i̧ da jö̧nö̧jö̧nö̧a maeari̧ cjiarëremȩde chiri üdë. Tjamo̧ davä. Judi ta̧dë chacha üdë yuroräpȩmo̧ ano̧ mire cha tänȩa̧ oaiä, ado tuti cararea̧ ta̧dë uëmo̧ ju̧ri̧ chadäräa̧ oaiä, jabechji̧ ma̧i̧ da jö̧nö̧jö̧nö̧a maeari̧ cjiarëremȩde. 3Ado a̧dëri pio judiri biramȩ mu̧i̧tjoi̧ üdë, jabechji̧ a̧dë chjäte tatari̧ cjiamȩrȩ cjiarëremȩde ma̧i̧ dari̧ bërepe chjaomi̧ dari̧. Jabechji̧ tata üdë a̧dë chjäte tata oaiä, pumȩrȩ darea̧mi̧dëri̧ tatari̧ cjiarëremȩde. Ado jibëa̧ chjibo üdë a̧dë chjäte bërebërea tjamo̧rëremȩde. 4Ado guadia judiro̧ pio ju̧i̧ da̧ oaiä, jabechji̧ a̧dë chjäte uapaji̧ri̧pea̧dirȩ, i ma̧na̧gurami̧ dari̧ jo̧rȩtaji̧ri̧rȩ. Ado ja̧boa̧ji̧ri̧mi̧ dari̧ a̧rȩdäräa̧dirȩ daburäpȩmo̧, dabadëtä bagaji̧ri̧rȩ. 5Jabo a̧dërimȩ mu̧i̧tjoi̧ üdë yo̧rëremȩdejȩrȩ ivi pio ji̧ri̧:

⁠—⁠Uapadëchji̧je ⁠—⁠yo̧a̧dejȩrȩ⁠—⁠. Pio dibë chjiari dabaquë. ‘Aja̧, Jechu pio ju̧i̧ na̧tani̧ro̧da, toro cji̧de ja̧bo tänȩa̧ pio ju̧i̧ na̧tani̧ro̧da' quëna̧ dabaquidibë pio dibë chjiari. 6Jabo danȩro̧, pio yidëdi. Jabechji̧ bëdüa̧di, jënȩ yo̧a̧rea̧mi̧ ⁠—⁠yo̧a̧dejȩrȩ⁠—⁠. Jana̧chji̧je. Goëdaera̧chji̧je jënȩ a̧rȩrërea̧räpȩ. 7Ado chjadëri̧ ütarë da ëte, jabechji̧ jäcjiëno̧chji̧ji̧ri̧ Jechu ja̧ jadü pio ji̧ri̧ chjadëri̧ ta̧rë tänȩpea̧ oa. Yo̧e jächji̧ji̧ri̧ Jechurë ja̧boa̧remȩrȩ bëdüa̧ pio ju̧i̧ chjiari. Ado danȩro̧, dibëa̧ yaboi̧ jädi Jechu judi Garirea chiriräpȩ. Ado pio ju̧ri̧pȩ dëbëdiäpanȩro̧ju̧i̧. Aja̧, pio ju̧ri̧pȩ dapanȩro̧ju̧i̧. Jabechji̧ mȩnȩro̧ dabadëchea oa yo̧a̧quidibë ⁠—⁠yo̧mȩrȩ yo̧a̧dejȩrȩ ivi pio ji̧ri̧ a̧dërimȩ mu̧i̧tjoi̧ pio judi.

8Ado ivi jini̧ro̧ ja̧di dari̧ da oaiä oë ja̧boji̧ri̧rȩ ta̧dë cjarari judiri chjaodëri̧ bagureno̧a̧ni̧rȩ. Jabo mu̧i̧tjoi̧ judi yo̧a̧ oaiä, "Aja̧, ja̧boremȩrȩ bëdüa̧di" yo̧a̧ oa ta̧rë oaiä, jabechji̧ a̧dë chjäte ma̧ chiadëri̧ cjiari̧ jo̧rȩtaji̧ri̧rȩ bagureno̧rëreji̧ri̧nirȩ Jechu ja̧ jadü pio ji̧ri̧iäpȩmo̧ ta̧rë tänȩpea̧ oa. 9Ado ji̧ni̧ro̧ baäeno̧ji̧ri̧ oa chjaodëri̧ idëpea̧ oa cjiarëremȩde Jechu judi jibëa̧ yaboräpȩ. Ado jeamȩrȩ yo̧rëremȩdejȩrȩ:

⁠—⁠¿Jabënȩro̧?

Ado ivi jini̧ro̧ pio ju̧i̧iäpȩ jäji̧ri̧rȩ ju chatura̧ cjiadäräa̧ni̧rȩ pio ju̧i̧ ja̧ dëbëräpȩ. Ado jibëa̧ tari mitëji̧ri̧rȩ chjacjiamȩri̧ jo̧rȩtarëreji̧ri̧ni̧ro̧jo̧ȩ.

10Ja̧dëa ji̧ Jechu judi yo̧a̧dejȩrȩ:

⁠—⁠Uapadëchji̧je jabo jabechji̧ jächji̧je ca̧ oti̧ pio ji̧ri̧iäpȩ ⁠—⁠yo̧a̧dejȩrȩ⁠—⁠. Yo̧e jächji̧ji̧ri̧ judiro̧ Garirearäpȩ jätä. Jabechji̧ pio ju̧ri̧pȩ dapadiro̧coa. Aja̧, jäeno̧chji̧ji̧ri̧ ⁠—⁠yo̧mȩrȩ yo̧rëremȩdejȩrȩ ivi pio ji̧ri̧ Jechu judi.

Judio ja̧ ütëti̧ pio judiro̧ chëre oa yürürëreji̧ri̧diro̧jȩrȩ guadia pio ji̧ri̧, ma̧ȩ chjádë yürüpea̧ oa Jechurë bëdüa̧ pio ju̧i̧ chjiari

11Ado ivi jini̧ro̧ Jechu ja̧ jadü pio ji̧ri̧ ta̧rë tänȩpea̧ oa jäa̧ nö̧ta, ta̧dë cjara oa jidarëreji̧ri̧ guadia pio judiro̧ orë järëreji̧ri̧dirȩ bë ma̧ri̧räpȩ ju̧ri̧, tjamo̧ goë tuti ja̧bepaji̧ri̧ pio ji̧ri̧iäpȩmo̧ chjö̧na̧i̧ ta̧rë tänȩpea̧ oa, jënȩro̧ daea̧ pio ju̧i̧. 12Ado pio ju̧i̧ ta̧rë ëte, chjaodëri̧ a̧dopaeno̧rëreji̧ri̧dirȩ judio ütëti̧ judiro̧ ütëbodärärë. Ado judiro̧ ni̧bä chjao ëte, chëre ji̧ra̧ oa yürürëreji̧ri̧diro̧jȩrȩ guadia pio ji̧ri̧. 13Ado yo̧a̧diro̧jȩrȩ:

⁠—⁠Danȩrȩ, ja̧di ta̧rëri̧ yo̧eji̧ri̧renȩro̧jȩrȩ pumȩ pio ji̧ri̧ ⁠—⁠yo̧a̧diro̧jȩrȩ⁠—⁠. “Aja̧, Jechu pio ju̧i̧rea̧ ja̧ jadü pio judiro̧ gȩnȩrä acji jana̧diro̧ibe icjara pio ju̧i̧ baë goa baäpea̧ oa” yo̧eji̧ri̧renȩro̧jȩrȩ ⁠—⁠yo̧a̧diro̧jȩrȩ⁠—⁠. “Aja̧, a̧ro̧rȩ mo̧a̧mi̧ nö̧ta, baë goa baäa̧diro̧jo̧ȩ” yo̧eji̧ri̧renȩro̧jȩrȩ. 14Ado danȩrȩ, chiri tjamo̧ cjo̧ro̧mȩ judi pio dibë chjiari goë ta̧rërä judi, mȩnȩro̧ mo̧a̧ cjia̧ pio ju̧i̧ chjiari goë ta̧rërä judi, jabechji̧ cjatäcjie jo̧rȩtarea̧mi̧ dari̧ tuti ni̧bäparea̧ro̧dibe pio dibë chjiari, judi pio dibë bape chjaochea oa. Jabechji̧ bücjüri̧ cjiadëchji̧vä ⁠—⁠yo̧a̧diro̧jȩrȩ.

15Ado pio ju̧i̧ ta̧rë ëte, mitërëreji̧ri̧dirȩ chëre oa guadia judiro̧ ma̧e chjádë yürüa̧ ba oa. Ado ütëti̧ judiro̧ yo̧a̧mi̧ yo̧rëreji̧ri̧diro̧jȩrȩ pumȩ ji̧ri̧. Ado judiro̧ yo̧rërea̧ üdë no̧mȩ tjamo̧ri ja̧ chjuchjupechäa̧ oa cjiarëremȩde judio ja̧ chjarerä. Jabechi̧ pio yaba̧ domȩ oa cjo̧ro̧ji̧ri̧ pio judiro̧borë goë goë ta̧rëa̧ maeadiro̧jo̧ȩ.

Jechu judi pio jȩaiäpȩmo̧ darea̧ yürürëremȩdejȩrȩ jibëa̧ jadü ji̧ri̧

Marco 16:14-18; Uruca 24:36-49; Juan 20:19-23; Japarea̧ Ma̧ȩ 1:6-8

16Ado Jechu ja̧ jadü judiro̧, 11rë, ivi pio ji̧ri̧iä ta̧rëa̧ oaiä, jabechji̧ järëreji̧ri̧dirȩ Garirea chiriräpȩ ju̧ri̧, Jechurë yo̧rërea̧ ya̧mi̧räpȩ ju̧ri̧. 17Ado Jechu pio ju̧i̧ irä daji̧ri̧rȩ chjacjiamȩri̧ jo̧rȩtarëreji̧ri̧diro̧jo̧ȩ. Jabo o judiro̧, jabechji̧ irä daea̧ji̧ri̧borë tjamo̧ri̧ dabadërëreji̧ri̧dirȩ pio ju̧i̧ chjiari. ‘Aja̧, Jechu pio judi tjamo̧dida, bëdüa̧ oa cjiamȩ Jechu pio judi tjamo̧dida’ quëna̧ jo̧rȩtadërëreji̧ri̧dirȩ, jabo baebaeami̧ dari̧ jo̧rȩtarëreji̧ri̧dirȩ, jaejaeami̧ dari̧.

18Ado Jechu judi jibëa̧ jadü pio ji̧ri̧ ja̧ queri̧ tjamo̧räpȩ jana̧mȩrȩ yo̧rëremȩdejȩrȩ:

⁠—⁠Ütë tjamo̧ pio judi tjamo̧ yo̧rea̧ yürüa̧ oa, jabechji̧ chiri tjamo̧ cjiamȩpea̧requede cüdë ⁠—⁠yo̧a̧dejȩrȩ⁠—⁠. Ado Ütë tjamo̧ pio judi tjamo̧ yo̧rea̧ yürüa̧ oa, peaja̧di a̧dë tjamo̧ cjiamȩpea̧requede, eami̧rȩ coa dëbëparea̧ decjiari̧. 19Ja̧di tara chjadürequededibe ca̧ pumȩ ⁠—⁠yo̧a̧dejȩrȩ⁠—⁠. Jabechji̧ chiriräpȩti̧ oa cjo̧ro̧ji̧ri̧ pumȩ pio ji̧ri̧ a̧ra̧ano̧pea̧ oa, tjaoëpai̧ dari̧ ni̧bäji̧ri̧ pio ji̧ri̧iäpȩmo̧ a̧ra̧ano̧pea̧ oa chjadürequededibe chiri nö̧ta oa. Aja̧, pio ji̧ri̧ dabapa tänȩpea̧ oa, ca̧ jädupe bagarea̧mi̧ dari̧ na̧e chiaparȩpea̧ oa, chjadürequededibe, pio ji̧ri̧ chudapea̧ oa. Aja̧, Ama̧i̧ tjamo̧ ja̧ quȩrä, Ja tjamo̧ ja̧ quȩrä, ado Tjo tjamo̧ ja̧ quȩrä go̧e cjaeä chudapea̧ oa chjadürequededibe. 20Ado pea quëna̧ji̧ri̧ pio ji̧ri̧, jabechji̧ cüdë dibë a̧ra̧ano̧a̧ chjö̧na̧i̧ oa ano̧ mire a̧ra̧ano̧chji̧jȩrȩ, judiro̧ pio jiro ma̧ȩrä chjadëri̧ ta̧rë ta̧rë japariä cjo̧ro̧pea̧ oa. Ado danȩrȩ, mȩnȩro̧ eami̧räpȩ a̧ra̧ano̧e baäji̧ri̧ oa, jabechji̧ ji̧dë ma ëba cjiaparequededibe a̧dë baärea̧ decjiari̧. Jabechji̧ chiri üdë yuropea̧rä yuro ëba cjia maparequededibe. Ja̧ditäde.

Currently Selected:

Mateo 28: Pume

Highlight

Copy