Mateo 23
23
Jechu judi ni̧bärëremȩde judio tjamo̧ yo̧ji̧ri̧ pio ji̧ri̧ chjiari
Marco 12:38-39; Uruca 20:45-46
1Ja̧dëa ji̧ Jechu judi ni̧bä chjoarëremȩdejȩrȩ pumȩ buba oa. Ado jibëa̧ jadü pio ji̧ri̧bo ni̧bä chjaorëremȩde, ja̧di ta̧rëri̧ yo̧mȩrȩ:
2—Danȩrȩ, Moicherë go̧ȩparërea̧ ma̧ȩ oa a̧ra̧ano̧ji̧ri̧ pio judiro̧, ado pjaricheo pio judiro̧, ‘Aja̧, pio ibë tjamo̧ a̧ra̧ano̧ji̧ri̧ pio judiro̧diro̧da, Moicherë go̧ȩparërea̧ ma̧ȩ pio ju̧i̧ chjiari tjamo̧ a̧ra̧ano̧ji̧ri̧ pio judiro̧diro̧da’ quëna̧ daba maeanȩrȩ mȩnȩro̧. Jabechji̧ pio jiro ma̧ȩ oa tjamo̧ri̧ dabaji̧ri̧ pio judiro̧dirȩ. 3Ado pio ju̧i̧iä pio dibë a̧ra̧ano̧rä, jabechji̧ tjamo̧ri̧ ta̧rë ja̧bochji̧jȩrȩ. Aja̧, ta̧rë japachji̧jȩrȩ, jabo cho̧rë japadë machji̧jȩrȩ jabo. Jabechji̧ judiro̧ a̧ra̧ano̧mi̧ japadë madirȩ. Ya maeara̧ ni̧bädirȩ. Ado pio ju̧i̧iä cho̧rëdiärea̧mi̧dëdirȩ. 4Jabechji̧ judiro̧ Ütë tjamo̧ ja̧ ma̧ȩ maea oa a̧ra̧ano̧tärea̧ ji̧, ji̧dë u̧i̧ a̧de a̧ra̧ano̧ chjaodirȩ ma̧ȩdë maea oa —yo̧a̧dejȩrȩ—. Tjamo̧ davä. Ta̧rëdiärea̧mi̧dë ma̧ȩ oa a̧de a̧ra̧ano̧tadiro̧dibe. Ado judiro̧ ja̧di dari̧ a̧ra̧ano̧a̧ oaiä, jabechji̧ to chacha tjamo̧ra̧ pio ju̧ri̧ra̧ acji are a̧ra̧mi̧ dari̧ japatadiro̧dibe. Ado judiro̧ pio dibë chjadëri̧ ëba arami̧ dari̧ a̧dotärea̧ ji̧, cjäri̧ madiro̧dibe, a̧dodë madiro̧dibe. Jabëtari̧mi̧ a̧dodë madiro̧dibe. 5Jabechji̧ pio jiro a̧ra̧ano̧ji̧ri̧ pio judiro̧ pumȩ ja̧ dachoro cjo̧ro̧rea̧ pio ju̧i̧mo̧i̧ jo̧rȩtariä cjo̧ro̧dirȩ —yo̧a̧dejȩrȩ—. Jabechji̧ pio jibëiäpȩmo̧ ma chjacjiamȩri̧ ni̧bäpea̧ oa, pio jibëiäpȩmo̧ ma ba chia jo̧rȩtapea̧ oa, na̧rȩ chjaoji̧ri̧rȩ cjo̧ro̧dirȩ, jibëa̧ pio ju̧i̧mo̧i̧ jo̧rȩtaji̧ri̧rȩ. Ado pio ju̧i̧iä na̧rȩji̧ri̧rȩ ina̧dirȩ. Jabechji̧, jibëa̧ chjibo pënȩ cotori pio judiri goë cara̧ oa ina̧dirȩ, dairi ina̧rea̧ chjibo ëteri pio judiri. Ado Ütë tjamo̧ ja̧ ma̧ȩ oa yura̧ oa goadirȩ ma̧ȩ chiamȩ jo̧ë oa. Jabechji̧ jibëa̧ ichi taruro yura̧ oa cjiamȩ oa goadiro̧jo̧ȩ mu̧i̧ chjuadëta̧ra̧ri. Ado jibëa̧ daitorobo yura̧ oa cjiamȩ oa goadiro̧jo̧ȩ peaja̧di. Jabo chjadëri̧ jo̧rȩta tänȩpea̧ oa goatärea̧ ji̧, cjäri̧ madirȩ, jabomo̧ na̧rȩpea̧ oa goadiro̧jo̧ȩ, o judiro̧ pio jibëiäpȩmo̧ ba chia dapea̧ oa. Aja̧ o judiro̧ goa̧ pio ju̧i̧ u̧i̧ ana̧ chja oa goadiro̧jo̧ȩ jiro joë oa. ‘Aja̧, pio jiro pumȩ judiro̧ pio ibë u̧i̧ ba chiadiro̧da’ quëna̧ dapea̧ oa, ja̧di dari̧ yura̧ oa goadiro̧jo̧ȩ. Aja̧, ja̧di dari̧ japaji̧ri̧rȩ na̧rȩ chjaodirȩ pjaricheo judiro̧, Moicherë go̧ȩparërea̧ ma̧ȩ oa a̧ra̧ano̧ji̧ri̧ pio judiro̧borë. 6Ado danȩrȩ —yo̧a̧dejȩrȩ—, pio jiro tjamo̧ a̧ra̧ano̧ji̧ri̧ judiro̧ jurapea̧ oa a̧doparä, pumȩ no̧i̧dërë jurapea̧ oa a̧doparä, jabechji̧ judiro̧ eami̧ charea̧räpȩ chjadëri̧ chatärea̧ ji̧, cjäri̧ madirȩ, ba chia tjamo̧räpȩ chapea̧ ji̧ järi tjamo̧dirȩ. Jabechji̧ tjamo̧ cjo̧ro̧ji̧ri̧ pumȩ pio ji̧ri̧ nö̧ta tjamo̧ri̧ chatämi̧ cjiadirȩ. Ado judiro̧ judiorë a̧doparea̧ bëräpȩ a̧doparä, peaja̧di ba chiaräpȩ chatämi̧ cjiadirȩ. Jibëa̧ maea oa jo̧rȩtadirȩ. 7Ado judiro̧ gatë tänȩrea̧ bëräpȩ järä, pio jibëiäpȩmo̧ chjadëri jeatä ea tjamo̧diro̧jȩrȩ pumȩ ji̧ri̧. Jabechji̧ ‘pumȩ ba chia tjamo̧ jirodiro̧da’ quëna̧ji̧ri̧rȩ jeatä eadiro̧jȩrȩ pio jibëiäpȩmo̧. Ado pumȩ judiro̧ pio jibë chjiari ni̧bärä, jabechji̧ "tjamo̧ a̧ra̧ano̧mȩ" yo̧ matä eadiro̧jȩrȩ. Jabechji̧ pio jibë chjiari ja̧di ta̧rëri̧ ni̧bäpea̧ üdë goae tjamo̧dejȩrȩ. 8Jabo danȩrȩ, yo̧requededibe ca̧ pumȩ —yo̧a̧dejȩrȩ—. Dibëa̧ pumȩ pio judiro̧ pio dibë yo̧a̧ ji̧, “Aja̧, tjamo̧ a̧ra̧ano̧mȩrenȩ” yo̧mȩ ma̧ȩ pio ju̧i̧ yo̧dë matäreji̧ri̧diro̧dibe. Jabechji̧ cja̧rȩmȩ pumȩ manȩrȩ. Ji̧mo̧ ja̧ maeanȩrȩ. Ado dibë tjamo̧ a̧ra̧ano̧mȩ pio judi cja̧rȩmȩ maeade. Ado pio judirequede cüdë. Tjamo̧ davä. Pio dibë tjamo̧ a̧ra̧ano̧mȩ pio judirequede. 9Ado danȩrȩ, eami̧ pumȩ oa, dai chirirä cjo̧ro̧mȩ pio ju̧i̧, jabechji̧ "Ama̧i̧ tjamo̧" yo̧rea̧mi̧dëde. Jabechji̧ cja̧rȩmȩ maeade ibëa̧ Ama̧i̧ tjamo̧ judi. Ado a̧dëräpȩ cjiamȩ Ama̧i̧ pio judide. Pio ju̧i̧iä eami̧ pumȩ oa, dai chirirä cjo̧ro̧mȩ pio ju̧i̧, jabechji̧ "Ama̧i̧ tjamo̧" yo̧mȩ ma̧ȩ pio ju̧i̧ yo̧rea̧mi̧dëde. 10Ado danȩrȩ, "tjamo̧ yo̧mȩ" ma̧ȩra̧ pio ju̧ri̧ra̧ peaja̧di yo̧dë matäreji̧ri̧diro̧dibe. Jabechji̧ Tjamo̧ Yo̧mȩ judi cja̧rȩmȩrequede. Ado Ütë tjamo̧ judi mitëa̧ pio judimo̧requede. Tjamo̧ davä. Ütë tjamo̧ judi mitëa̧ Chjätä Tänȩmȩ pio judimo̧requede pio dibë Tjamo̧ Yo̧mȩ judi. 11Jabo danȩrȩ, yo̧chji̧coe —yo̧a̧dejȩrȩ—. ¿Chjia tjamo̧de ba chia tjamo̧mȩ judi? Chjia tjamo̧dë, jabechji̧ o pio ji̧ri̧ ja̧ mu̧i̧tjoi̧mi̧ dari̧ a̧domȩ pio judide. Tjamo̧ davä. Dibëa̧ chjarerä cjo̧ro̧mȩ ba chia tjamo̧mȩ pio judi, jabechji̧ o ji̧ri̧ ja̧ mu̧i̧to̧i̧mi̧ dari̧ cjo̧ro̧mȩ pio judide. 12Jabo eami̧ pumȩ üdë, pio jȩa ba chiaparȩmi̧ dari̧ japamȩ pio judi, jabechji̧ Ütë tjamo̧ tänȩa̧ oa badëparȩa̧ oa cjiadiäpade. Jabo eami̧ pumȩ üdë, jibëa̧ ma̧na̧ri̧ badëparȩmi̧ dari̧ japamȩ pio judi, jabechji̧ Ütë tjamo̧ pio judi tänȩa̧ oa ba chiaparȩa̧ oa cjiami̧ dari̧ cjiadiäpade —yo̧mȩrȩ ni̧bä chjaorëremȩdejȩrȩ Jechu judi tjamo̧ yo̧ji̧ri̧ pio ji̧ri̧ chjiari.
Jechu judi aechide yo̧rëremȩdejȩrȩ pjaricheo pio ji̧ri̧iäpȩmo̧, Moicherë go̧ȩparërea̧ ma̧ȩ oa a̧ra̧ano̧ji̧ri̧ pio ji̧ri̧iäpȩmo̧bo
Marco 12:40; Uruca 11:39-42, 44, 52
13-14Ado Jechu judi ji̧dë u̧i̧ ni̧bämȩrȩ uapai̧ dari̧ aechide yo̧mȩrȩ yo̧rëremȩdejȩrȩ pjaricheo pio ji̧ri̧iäpȩmo̧, Moicherë go̧ȩparërea̧ ma̧ȩ oa a̧ra̧ano̧ji̧ri̧ pio ji̧ri̧iäpȩmo̧bo. Ja̧di ta̧rëri̧ yo̧mȩrȩ yo̧a̧dejȩrȩ:
—Danȩrȩ, Ütë tjamo̧ pio judi tänȩa̧ oa, a̧dë chjäte uapai̧ darea̧ üdë acji cjatäpadidibe pjaricheo pio ji̧ri̧iäpȩmo̧, Moicherë go̧ȩparërea̧ ma̧ȩ oa a̧ra̧ano̧ji̧ri̧ pio ji̧ri̧iäpȩmo̧bo —yo̧a̧dejȩrȩ—. Jabechji̧ Ütë tjamo̧ pio ju̧i̧ quëna̧cji̧ quëna̧ japaji̧ri̧ oa acji cjatäpadidibe. Jabechji̧ mȩnȩro̧ Ütërë yo̧a̧ chja̧oerä yu̧a̧tärea̧ ji̧, yu̧a̧rea̧ dadëpanȩrȩ. Ado pumȩ judiro̧ no̧i̧dërë Ütërë yo̧a̧ chja̧oeräpȩ yu̧a̧tärea̧ ji̧, peaja̧di yu̧a̧rea̧ dadë madirȩ mȩnȩro̧ oëra̧ a̧ra̧ano̧ chjaoa̧ pio oaiä, mȩnȩro̧ yu̧a̧rea̧ joë ya oa tuti carami̧ dari̧ japea̧ oaiä. —yo̧a̧dejȩrȩ.
15Ado ji̧dë u̧i̧ yo̧mȩrȩ a̧de yo̧rëremȩdejȩrȩ:
—Ado danȩrȩ, a̧dë chjäte uapai̧ darea̧ üdë acji cjatäpadidibe pjaricheo pio ji̧ri̧iäpȩmo̧, Moicherë go̧ȩparërea̧ ma̧ȩ oa a̧ra̧ano̧ji̧ri̧ pio ji̧ri̧iäpȩmo̧bo —yo̧a̧dejȩrȩ—. Jabechji̧ Ütë tjamo̧ pio ju̧i̧ quëna̧cji̧ quëna̧ japaji̧ri̧ oa acji cjatäpadidibe. Jabechji̧ oëra̧ti̧ oa a̧rȩmȩ chiri oa chjätäti̧ cjiaji̧ri̧rȩ tai̧nȩrȩ, ui ana̧ oëräpȩ a̧rȩmȩ chiribo. Jabechji̧ pio dibëiä dabapatämi̧ cjiamȩ pio ju̧i̧ dadäräpea̧ oa, cja̧rȩmȩ oa, judiodë pio ju̧i̧ dadäräpea̧ oa, jabechji̧ oëra̧ti̧ oa tai̧ji̧ri̧rȩ jä chjaonȩrȩ. Jabo cjäri̧ marenȩro̧jo̧ȩ, pio dibëiä dabapatämi̧ cjiamȩ pio ju̧i̧ dadäräa̧rä, jabechji̧ pio dibëiä ji̧dë u̧i̧ chjadëdëpe jäde —yo̧a̧dejȩrȩ—. Tjamo̧ davä. Mȩnȩro̧ oëra̧ a̧ra̧ano̧ chjaoa̧ oaiä, jabechji̧ pio dibëiä ji̧dë u̧i̧ chjadëdëpe jäde. Jabechji̧ pio dibëiä ji̧dë u̧i̧ oëra̧ quëna̧mȩpe jäde. Ado mȩnȩro̧, dëdë, cjo̧dë tja ana̧räpȩmo̧ aeno̧rea̧ pio ju̧i̧mo̧i̧ nö̧tanȩrȩ. Jabo cjäri̧ madirȩ, pio dibëiä dabapadäräa̧mȩ pio judi ji̧dë u̧i̧ nö̧tade cjo̧dë tja ana̧räpȩ aeno̧pea̧ ji̧. Tjamo̧ davä. Pio dibëiä dabapea̧ oaiä, pio dibëiä ji̧dë u̧i̧ chjai̧dëpe baga̧ oaiä, jabechji̧ pio dibëiä ji̧dë u̧i̧ nö̧tade cjo̧dë tja ana̧räpȩ aeno̧pea̧ ji̧ —yo̧a̧dejȩrȩ.
16Ado Jechu judi ji̧dë u̧i̧ yo̧mȩrȩ ja̧di ta̧rëri̧ yo̧rëremȩdejȩrȩ:
—Pio mȩnȩro̧, pjaricheo pio judiro̧, Moiche go̧ȩparërea̧ ma̧ȩ oa a̧ra̧ano̧ji̧ri̧ pio judiro̧, jabechji̧ da cotoji̧ri̧mi̧ dari̧ cjianȩrȩ. Jabechji̧ mȩnȩro̧ o ji̧ri̧ chjadëri̧ a̧ra̧ano̧tärea̧ ji̧, chjadëri̧ yabo ëba baämi̧ dari̧ a̧ra̧ano̧tärea̧ ji̧, cjäri̧ marenȩro̧jȩrȩ, no̧dë oa ëba jämi̧ dari̧ a̧ra̧ano̧renȩro̧jȩrȩ, puë ji̧ra̧ tjamo̧räpȩ ëba jäji̧ri̧mi̧ dari̧. Jabechji̧ pio dibëiä dabapea̧ji̧ri̧ pio ji̧ri̧ chjadëri̧ jidatärea̧ ji̧, jidadë marenȩro̧jȩrȩ. Ado pio ju̧i̧iä acji cjatäpadidibe davä uapai̧ darea̧ üdë. Jabechji̧ mȩnȩro̧ dibëa̧ pumȩ pio ji̧ri̧ coëma cjiari̧ a̧ra̧ano̧tärea̧ ji̧, oëra̧ a̧ra̧ano̧ chjaorenȩro̧jȩrȩ —yo̧a̧dejȩrȩ—. Danȩrȩ, mȩnȩro̧ yo̧ë cji̧däpea̧ pio ju̧i̧ chjiari a̧ra̧ano̧ro, “Aja̧, mȩnȩro̧ Ütë tjamo̧ ja̧ bë pio ju̧i̧ chjiari a̧de yo̧ji̧ri̧rȩ yo̧ë cji̧därä judi, ba chiadëde” yo̧renȩro̧jȩrȩ. “Aja̧, mȩnȩro̧ Ütë tjamo̧ ja̧ bë pio ju̧i̧ chjiari a̧de yo̧ji̧ri̧rȩ yo̧ë cji̧därä judi, ado ji̧dë duri oa japadärärea̧ dadërä judi, jabechji̧de” yo̧nȩrȩ. “Uapai̧ dadëde. Ütë tjamo̧ judi bape chjaodëpadidibe mȩnȩro̧ yo̧ë cji̧däa̧mi̧ japadërä judi” yo̧nȩrȩ. “Jabo Ütë tjamo̧ ja̧ bëräpȩ cjiamȩ oro pio ju̧i̧ a̧de yo̧ji̧ri̧rȩ yo̧ë cji̧därä judi, ba chia tjamo̧de” yo̧nȩrȩ. “Aja̧, mȩnȩro̧ oro pio ju̧i̧ a̧de yo̧ji̧ri̧rȩ yo̧ë cji̧därä judi, ba chia tjamo̧de. Ado yo̧ë cji̧däa̧mi̧ japapea̧de, ano̧ mire jo̧rȩtarea̧mi̧dëri̧” yo̧nȩrȩ. “Aja̧, Ütë tjamo̧ pio judi dibë bape chjaochea oa, jabechji̧ mȩnȩro̧ yo̧ë cji̧däa̧mi̧ japapea̧de” yo̧nȩrȩ. “Jabechji̧ Ütë tjamo̧ ja̧ bëräpȩ cjiamȩ oro oa a̧de yo̧ji̧ri̧rȩ yo̧ë cji̧däa̧ üdë, ba chia tjamo̧de” yo̧nȩrȩ. 17Jabo cjäri̧ manȩrȩ —yo̧a̧dejȩrȩ Jechu judi—. Chji̧ cotomi̧ dari̧ cjianȩrȩ. Japë taraji̧ri̧mi̧ dari̧ cjianȩrȩ, da cotoji̧ri̧mi̧ darë. Jabechji̧ Ütë tjamo̧ pio judi jo̧rȩtami̧ dari̧ jo̧rȩtadënȩrȩ. Danȩrȩ, oro üdë, Ütë tjamo̧ ja̧ bëräpȩ cjiamȩ oro üdë, dëdë, ba chiade. Jabo yo̧chji̧coe. ¿Tjana̧ ju̧i̧iä ba chiade? ¿Tjana̧ ju̧i̧iä ji̧dë u̧i̧ ba chiape jäa̧de? Tjana̧ ju̧i̧iädë, jabechji̧ Ütë tjamo̧ ja̧ bërä cji̧däa̧rämo̧ ji̧dë u̧i̧ ba chiape jäa̧de. Ado pio ju̧i̧iä iëno̧ë ta̧rërequededibe. ¿Tjana̧de ji̧dë u̧i̧ ba chiamȩ üdë Ütë tjamo̧ pio ju̧i̧iä? ¿Jabo jibëa̧ bë üdë, jabo jibëa̧ bërä cji̧däa̧ oa cjiamȩ oro üdë? Tjana̧dë, jabechji̧ Ütë tjamo̧ ja̧ bë pio judide. Ji̧dë u̧i̧ ba chiade Ütë tjamo̧ pio ju̧i̧iä. Ado pio ju̧i̧iä jabechji̧, Ütë tjamo̧ ja̧ bërä cjiamȩ oro pio ju̧i̧ a̧de yo̧ji̧ri̧rȩ yo̧ë cji̧därea̧mi̧dëde —yo̧a̧dejȩrȩ.
18Ado ji̧dë u̧i̧ yo̧mȩrȩ yo̧rëremȩdejȩrȩ Jechu judi:
—Ado danȩrȩ, mȩnȩro̧ oëra̧ a̧ra̧ano̧a̧ ji̧, pio yoa ma̧ȩbo yo̧nȩrȩ: “Aja̧, eami̧ pumȩ üdë yürürea̧ mechja pio ju̧i̧ a̧de yo̧mȩrȩ yo̧ë cji̧därä judi, jabechji̧ ba chia tjamo̧dëde” yo̧nȩrȩ. “Ado eami̧ pumȩ üdë yürürea̧ mechja pio ju̧i̧ a̧de yo̧mȩrȩ yo̧ë cji̧däa̧mi̧ japadärärea̧ dadërä judi, jabechji̧de. Uapai̧ dadëde” yo̧nȩrȩ. “Jabechji̧ Ütë tjamo̧ pio judi tänȩa̧ oa bape chjaoa̧ oa cjiadëpade” yo̧nȩrȩ. “Jabo eami̧ pumȩ üdë jënȩ yürüa̧ pio ju̧i̧ a̧de yo̧mȩrȩ yo̧ë cji̧därä judi, judi yürürea̧ mechjarä yürüpea̧ pio ju̧i̧ a̧de yo̧mȩrȩ yo̧ë cji̧därä judi, jabechji̧ ba chia tjamo̧de” yo̧nȩrȩ. “Ado jënȩ yo̧ë cji̧däa̧mi̧ nö̧tadäräri̧ japapea̧de” yo̧nȩrȩ. “Jabechji̧ Ütë tjamo̧ pio ju̧i̧iä bape chjaoa̧ oa cjiachea oa, jabechji̧ jënȩ yo̧a̧mi̧ japadäräpea̧de, ano̧ mire jo̧rȩtarea̧ decjiari̧” yo̧nȩrȩ. 19Jabo cjäri̧ manȩrȩ mȩnȩro̧ —yo̧a̧dejȩrȩ Jechu judi—. Da cotomi̧ dari̧ cjo̧ro̧ tjamo̧nȩrȩ mȩnȩro̧. Ütë tjamo̧ pio judi jo̧rȩtami̧ dari̧ jo̧rȩtadënȩrȩ. Danȩrȩ, yürürea̧ mechja pio oaiä ba chiape jäde yürüpea̧ üdë. Ado pio ju̧i̧iä yürürea̧ mechjarä yürüpea̧ pio ju̧i̧ a̧de yo̧ji̧ri̧rȩ yo̧ë cji̧därea̧mi̧dëde. Danȩrȩ, ¿tjana̧de ji̧dë u̧i̧ ba chiamȩ üdë Ütë tjamo̧ pio ju̧i̧iä? Jabo yürüpea̧ üdë, jabo yürürea̧ mechja üdë? Tjana̧dë, jabechji̧ yürürea̧ mechja pio judide. Ji̧dë u̧i̧ ba chiade Ütë tjamo̧ pio ju̧i̧iä. 20Ado pio ju̧i̧iä yo̧requededibe —yo̧a̧dejȩrȩ—. Eami̧ pumȩ judi yürürea̧ mechja pio ju̧i̧ a̧de yo̧mȩrȩ yo̧ë cji̧dämȩ pio judi, jabechji̧ yürürea̧ mechjarä china̧mȩ pio ju̧i̧bo a̧de yo̧mi̧ dari̧ yo̧ë cji̧därea̧de. Jabechji̧ ji̧mo̧de. Cja̧rȩmȩde. 21Ado Ütë tjamo̧ ja̧ bë pio ju̧i̧ a̧de yo̧mȩrȩ yo̧ë cji̧dämȩ judi, jabechji̧ Ütë tjamo̧ ja̧ bërä bëpea̧mȩ pio ju̧i̧ chjiaribo a̧de yo̧mi̧ dari̧ yo̧ë cji̧därea̧de, Ütë tjamo̧ pio ju̧i̧ chjiaribo. 22Ado a̧dë pio ju̧i̧ a̧de yo̧mȩrȩ yo̧ë cji̧dämȩ judi, jabechji̧ Ütë tjamo̧ pio ju̧i̧ chjiaribo a̧de yo̧mi̧ dari̧ yo̧ë cji̧därea̧de, jibëa̧ charea̧ ba chiaräpȩ chamȩ pio ju̧i̧ chjiaribo. Jabechji̧ ji̧mo̧de. Cja̧rȩmȩde —yo̧a̧dejȩrȩ.
23Ado Jechu judi ji̧dë u̧i̧ yo̧mȩrȩ ja̧di ta̧rëri̧ yo̧rëremȩdejȩrȩ judio ütëti̧ pio ji̧ri̧iäpȩmo̧:
—Danȩrȩ, a̧dë chjäte uapai̧ darea̧ üdë acji cjatäpadidibe pjaricheo pio ji̧ri̧iäpȩmo̧, Moicherë go̧ȩparërea̧ ma̧ȩ oa a̧ra̧ano̧ji̧ri̧ pio ji̧ri̧iäpȩmo̧bo —yo̧a̧dejȩrȩ—. Aja̧, Ütë tjamo̧ pio ju̧i̧ quëna̧cji̧ quëna̧ japaji̧ri̧ oa acji ma̧na̧padidibe. Jabechji̧ mȩnȩro̧ dibëa̧ tjadoro eami̧ jurarea̧ mirerea̧ boi̧chji̧ oa mitërä, piodai̧mi̧ da pio ju̧i̧ mitërä, jabechji̧ järi tjamo̧nȩrȩ davä, o oa china̧chjari̧ tutimi̧ dari̧ tutipea̧ oa, Ütë tjamo̧ pio ju̧i̧iäpȩmo̧ yürümi̧ dari̧ japapea̧ oa. Jabo cjäri̧ manȩro̧jo̧ȩ, ja̧di dari̧ japaji̧ri̧borë ji̧dë u̧i̧ ba chiamȩ ma̧ȩ pio ju̧i̧ a̧dë jo̧rȩte chjaorenȩro̧jo̧ȩ. Dibëa̧ pumȩ pio ji̧ri̧ coëma cjiari̧ ütarë ta̧rëtärea̧ ji̧, japadë manȩrȩ. Tjamo̧ davä. Dibëa̧ pumȩ pio ji̧ri̧ cjäri̧ri̧ cjia datärea̧ ji̧, mȩnȩro̧ Ütërë yo̧a̧mi̧ chjadëri̧ japatärea̧ ji̧, cjäri̧ manȩrȩ, japadë manȩrȩ. Jabechji̧ ji̧dë u̧i̧ ba chiamȩ ma̧ȩ pio ju̧i̧ putu jura̧ a̧dë chami̧ dari̧ jo̧rȩtaji̧ri̧rȩ cjo̧ro̧nȩrȩ ba chiadëmi̧ da pio ju̧i̧ japadäräpea̧ oa. 24Jabechji̧ da cotomi̧ dari̧ cjo̧ro̧ tjamo̧nȩrȩ mȩnȩro̧ —yo̧a̧dejȩrȩ—. Tjamo̧ davä. Pio mȩnȩro̧, pjaricheo pio judiro̧, Moiche go̧ȩparërea̧ ma̧ȩ oa a̧ra̧ano̧ji̧ri̧ pio judiro̧ da cotomi̧ dari̧ cjo̧ro̧ tjamo̧nȩrȩ. Jabechji̧ mȩnȩro̧ o ji̧ri̧ chjadëri̧ a̧ra̧ano̧tärea̧ ji̧, chjadëri̧ yabo ëba baämi̧ dari̧ a̧ra̧ano̧tärea̧ ji̧, cjäri̧ marenȩro̧jȩrȩ, no̧dë oa ëba jämi̧ dari̧ a̧ra̧ano̧renȩro̧jȩrȩ. Ado pio ju̧i̧iä uapai̧ darea̧ üdë acji cjatäpadidibe —yo̧a̧dejȩrȩ—. Tjamo̧ davä. Pio dibëiä dabapea̧ji̧ri̧ pio ji̧ri̧ chjadëri̧ jidadëji̧ri̧ oa acji cjatäpadidibe. Ado danȩrȩ, mȩnȩro̧ pio dibë chjiari dabadëchea oa, jabechji̧ na̧rȩrea̧ ma̧ȩmi̧ da oa ni̧bä chjaotämi̧ cjiarequededibe —yo̧a̧dejȩrȩ—. Danȩrȩ, mȩnȩro̧ dibëa̧ jararea̧ oa jararä, ado dibëa̧ jararea̧rä eami̧ pjurëmȩ oa darä judi, mȩ pio ju̧i̧ darä judi, bücjüri̧ cjia tjamo̧nȩrȩ. Ado pio ju̧i̧iä chjaodëri̧ pjurë ma̧ȩrenȩro̧jo̧ȩ. Chjaodëri̧ chjätä tänȩrenȩro̧jo̧ȩ chjibora̧ mȩ decjiape bagari̧. Jabechji̧ tjamo̧ri̧ tjürüdëri̧ cjiarenȩro̧jo̧ȩ mȩ pio ju̧i̧. Jabo cjäri̧ manȩrȩ —yo̧a̧dejȩrȩ—. Mȩnȩro̧ ja̧dimi̧ dari̧ japea̧räbo, a̧dë chjäte ma̧i̧ damȩ pio ju̧i̧ a̧dë daji̧ri̧mi̧ dari̧ japanȩrȩ. Tjamo̧ davä. Mȩ pio ju̧i̧ bücjüri̧ cjiari̧ jo̧rȩtaji̧ri̧borë putu chocota̧ chamȩ codë oa a̧dë dami̧ dari̧ japarenȩro̧jo̧ȩ. Ado pio ju̧i̧iä chjaodëri̧ tjürümi̧ dari̧ japarenȩro̧jo̧ȩ. Jabechji̧ järi tjamo̧nȩrȩ davä piodai̧mi̧ da pio ju̧i̧ ta̧rë japadäräpea̧ oa, jabo ji̧dë u̧i̧ ba chiamȩ ma̧ȩ pio ju̧i̧bo japadärätärea̧ ji̧, cjäri̧ manȩrȩ, pio ju̧i̧ a̧dë jo̧rȩtarenȩro̧jo̧ȩ. Putu chocota̧ chamȩ pio ju̧i̧ a̧dë dami̧ dari̧ a̧dë jo̧rȩtarenȩro̧jo̧ȩ ji̧dë u̧i̧ ba chiamȩ ma̧ȩ pio ju̧i̧ —yo̧a̧dejȩrȩ Jechu judi.
25Ado Jechu judi ji̧dë u̧i̧ yo̧mȩrȩ ja̧di ta̧rëri̧ a̧de yo̧rëremȩdejȩrȩ:
—Danȩrȩ, a̧dë chjäte uapai̧ darea̧ üdë acji cjatäpadidibe pjaricheo pio ji̧ri̧iäpȩmo̧, Moicherë go̧ȩparërea̧ ma̧ȩ oa a̧ra̧ano̧ji̧ri̧ pio ji̧ri̧iäpȩmo̧bo —yo̧a̧dejȩrȩ—. Jabechji̧ Ütë tjamo̧ pio ju̧i̧iäpȩmo̧ quëna̧cji̧ quëna̧ japaji̧ri̧ oa acji ma̧na̧padidibe. Jabechji̧ pio mȩnȩro̧ ji̧dë ma järinȩrȩ davä dibëa̧ ichi oa joapea̧ ji̧. Jabo cjäri̧ manȩrȩ, jëdërea̧ oa jabomo̧ apëri joami̧ dari̧ japanȩrȩ. Ae jararea̧ oa jabomo̧ dairi joami̧ dari̧ japanȩrȩ. Mȩnȩro̧ tjori ja̧bo chjadëri̧ joami̧ dari̧ japatärea̧ ji̧, japadë manȩrȩ. Ado pio ju̧i̧iä mȩnȩro̧ pumȩ chjadë tjamo̧mi̧ dari̧ cjo̧ro̧räbo, cjäri̧ manȩrȩ, a̧dë chjäte cjari̧dami̧ dade dibëa̧ tjo üdë. Ma̧i̧ da i gȩrȩ chiami̧ dari̧ cjiade. Ado pio ju̧i̧iä järi tjamo̧nȩrȩ chjai̧dë pio ju̧i̧ japapea̧ ji̧, dibëa̧ pumȩ pio ji̧ri̧iä baë mitëpea̧ ji̧. Tjamo̧ davä. Dami̧ti̧ oa baë mitërea̧ pio ju̧i̧mo̧i̧ jo̧rȩtaji̧ri̧rȩ garü chjaonȩrȩ davä, dibëa̧ pumȩ pio ji̧ri̧iä. Jabechji̧ dairi daea̧ ji̧mo̧ chjadëmi̧ dade ma̧i̧ da cjari̧darea̧ üdë. 26Aja̧, pio dibëiäpȩmo̧ ni̧bä chjaorequededibe, pjaricheo pio ji̧ri̧iäpȩmo̧, da cotomi̧ dari̧ jo̧rȩtaji̧ri̧ pio ji̧ri̧iäpȩmo̧. Aja̧, mȩnȩro̧ chjadëri̧ dami̧ dari̧ cjo̧ro̧tärea̧ ji̧, da cotomi̧ dari̧ jo̧rȩtaji̧ri̧nȩrȩ. Jabechji̧ i gȩrȩ chiamȩ ae jararea̧ pio ju̧i̧ tjori ja̧bo chjadëri̧ joami̧ dari̧ japachji̧vä. I gȩrȩ chiamȩ jëdërea̧ tjori ja̧bo chjadëri̧ joami̧ dari̧ japachji̧vä. Ado ja̧dimi̧ dari̧ japea̧ oaiä, jabechji̧ dai oa cjiamȩ üdë peaja̧di chjadëri̧ joa̧ oa cjiami̧ dari̧ cjiapade —yo̧mȩrȩ yo̧rëremȩdejȩrȩ Jechu judi.
27Ado Jechu judi ji̧dë u̧i̧ aechide yo̧mȩrȩ ja̧di ta̧rëri̧ yo̧rëremȩdejȩrȩ judio tjamo̧ yo̧ji̧ri̧ pio ji̧ri̧iäpȩmo̧:
—Danȩrȩ, a̧dë chjäte uapai̧ darea̧ üdë acji cjatäpadidibe pjaricheo pio ji̧ri̧iäpȩmo̧, Moicherë go̧ȩparërea̧ ma̧ȩ oa a̧ra̧ano̧ji̧ri̧ pio ji̧ri̧iäpȩmo̧bo —yo̧a̧dejȩrȩ—. Jabechji̧ Ütë tjamo̧ pio ju̧i̧ quëna̧cji̧ quëna̧ japaji̧ri̧ oa acji ma̧na̧padidibe. Jabechji̧ ja̧boa̧mȩ ja̧ icjara pio judimi̧ danȩrȩ. Ta̧dë cjararäpȩ ju̧ri̧ idë a̧ra̧mȩ icjarami̧ danȩrȩ. Ado danȩrȩ, pio jiro ta̧dë cjara pio ju̧i̧, na̧ra̧rea̧ ta̧dë cjara pio ju̧i̧, jabechji̧ bërebërea mape bagari̧ joa madiro̧jo̧ȩ pumȩ judiro̧. Tjamo̧ davä. Dairi pio judiri joa madiro̧jo̧ȩ chjacjiamȩri̧ cjiarea̧mi̧ dari̧. Ado ja̧di dari̧ japea̧ oaiä, dëdë, chjacjiamȩri̧ cjiade dairi daea̧ ji̧mo̧, jabo tjoräpȩ ju̧ri̧ ja̧boa̧mȩ pio ju̧i̧rea̧ ja̧ ju maeade. A̧dë chjäte pjȩa̧pe baga̧de. Ju̧i̧rea̧ ja̧ go̧a̧ üdë chjuadëpe baga̧de. Jere mape baga̧de Cjari̧dape baga̧de. Ado mȩnȩro̧ peaja̧dimi̧ dari̧ cjianȩrȩ —yo̧a̧dejȩrȩ—. Chjacjiamȩri̧ cjianȩrȩ davä dairi daea̧ ji̧mo̧, jabo dibëa̧ tjoro ja̧ üdë, a̧dë chjäte pjȩa̧mi̧ dade. Ja̧boa̧mi̧ dari̧ cjiade ma̧i̧ da jere chiami̧ dari̧. 28Jabo dëdë, pumȩ chjadëmi̧ dari̧ cjo̧ro̧nȩrȩ. Pumȩ ja̧ dachoro coëma cjiari̧ cjo̧ro̧mi̧ dari̧ cjo̧ro̧nȩrȩ, jabo cjäri̧ manȩrȩ. Jabomo̧ chjaocjiami̧ dari̧ japanȩrȩ, dibëa̧ ya maeara̧ jo̧rȩtaji̧ri̧rȩ. Jabechji̧ dibëa̧ tjoro ja̧ üdë a̧dë chjäte jiadarea̧ chiade —yo̧a̧dejȩrȩ.
29Ado Jechu judi ji̧dë u̧i̧ aechide yo̧mȩrȩ ja̧di ta̧rëri̧ yo̧rëremȩdejȩrȩ judio tjamo̧ yo̧ji̧ri̧ pio ji̧ri̧iäpȩmo̧:
—Danȩrȩ, a̧dë chjäte uapai̧ darea̧ üdë acji cjatäpadidibe pjaricheo pio ji̧ri̧iäpȩmo̧, Moicherë go̧ȩparërea̧ ma̧ȩ oa a̧ra̧ano̧ji̧ri̧ pio ji̧ri̧iäpȩmo̧bo —yo̧a̧dejȩrȩ—. Jabechji̧ Ütë tjamo̧ pio ju̧i̧ quëna̧cji̧ quëna̧ japaji̧ri̧ oa acji ma̧na̧padidibe. Jabechji̧ ta̧dë cjara pio ju̧i̧ chjadëri̧ jëdano̧nȩrȩ —yo̧a̧dejȩrȩ—. Ütërë ea jana̧ chjadüa̧ oa ni̧bärëreji̧ri̧ pio ji̧ri̧ ja̧ icjara üdë idë a̧ra̧ ta̧dë cjara oa chjadëri̧ jëdano̧nȩrȩ. Ado coëma cjiari̧ cjo̧ro̧rëreji̧ri̧ pio ji̧ri̧ ja̧ icjara üdë idë a̧ra̧ oa cjiamȩräpȩ peaja̧di chjacjiamȩri̧ jëdano̧renȩro̧jo̧ȩ. Jabechji̧ pio jiro pumȩ chjö̧na̧i̧ oa ba chia jo̧rȩtaji̧ri̧mi̧ dari̧ jëdano̧renȩro̧jo̧ȩ pio ji̧ri̧ idë a̧ra̧rea̧räpȩ. 30Jabo cjäri̧ manȩrȩ —yo̧a̧dejȩrȩ—. Pio ji̧ri̧ tjamo̧ri̧ ba chia jo̧rȩta ma ja̧didë, jabomo̧ goaeri̧ na̧rȩnȩrȩ. Ado peaja̧di goaeri̧ yo̧nȩrȩ. “Aja̧, goe chiari̧ ja̧bo tänȩdëa̧täreji̧ri̧rea̧ro̧jȩrȩ” yo̧nȩrȩ. “A̧ro̧rȩ no̧mȩ tjamo̧ri ja̧ cjo̧ro̧a̧rä judi, ibëa̧ ütëti̧rea̧ pio judiro̧ cjo̧ro̧rërea̧rä cjo̧ro̧a̧rä judi, cjäri̧ marea̧rȩ, ibëa̧ ütëti̧rea̧ pio judiro̧ ma̧i̧ dari̧ japarërea̧mi̧ japadëa̧täreji̧ri̧rea̧ro̧jȩrȩ Ütërë ea jana̧ chjadüa̧ oa ni̧bäji̧ri̧ pio ji̧ri̧iäpȩmo̧” yo̧nȩrȩ. “Aja̧, pio ji̧ri̧ nö̧ta ëba ja̧bo tänȩdëa̧täreji̧ri̧rea̧ro̧jȩrȩ” yo̧nȩrȩ. 31Jabo cjäri̧ manȩrȩ —yo̧a̧dejȩrȩ—. Mȩnȩro̧ ja̧di ta̧rëri̧ yo̧a̧ oaiä, jabechji̧ pio dibë chjiari chjai̧dëri̧ ni̧bäji̧ri̧mi̧ dari̧ ni̧bänȩrȩ —yo̧a̧dejȩrȩ—. ‘Aja̧, no̧mȩ tjamo̧ri ja̧ cjo̧ro̧rëreji̧ri̧ pio judiri ja̧ji̧ri̧a̧ro̧da, Ütërë ea jana̧ chjadüa̧ oa ni̧bärëreji̧ri̧ pio ji̧ri̧ ja̧bo tänȩji̧ri̧ pio judiri ja̧ji̧ri̧a̧ro̧da’ quëna̧rea̧mi̧ dari̧ ni̧bänȩrȩ ja̧di ta̧rëri̧ yo̧a̧ oaiä. Ado pio judiri ja̧ji̧ri̧rȩ pio judiro̧ jo̧rȩtarërea̧mi̧ jo̧rȩtanȩrȩ peaja̧di. Peaja̧di ja̧bo tänȩrea̧ chianȩrȩ pio mȩnȩro̧. 32Ado pio ju̧i̧iä yo̧requededibe —yo̧a̧dejȩrȩ—. Goë jaechji̧vä. Jabechji̧ japadäräeno̧chji̧vä. Dibëa̧ ütëti̧rea̧ pio judiro̧ taruparërea̧ pio ju̧i̧ japadärächji̧vä ja̧bo tänȩrea̧ pio ju̧i̧. 33Jabechji̧ pomi̧ danȩrȩ —yo̧a̧dejȩrȩ—. Mȩnȩro̧ u̧i̧papea̧ ji̧ oëadëji̧ri̧ tjamo̧ tara, jabechji̧ pomi̧ danȩrȩ. Jabo cjäri̧ manȩrȩ, Ütë tjamo̧ pio ju̧i̧ u̧i̧parea̧mi̧dëde. Ado pio ju̧i̧iä iëno̧ë ta̧rërequededibe. ¿Yö̧ta dari̧ goadirea̧ dapanȩrȩ? Pio dibë cjo̧dë tja ana̧räpȩ aeno̧a̧ oa cjiachea oa, ¿yö̧ta dari̧ goadirea̧ dapanȩrȩ. Jabo cjäri̧ manȩrȩ, goadirea̧ dadëpanȩrȩ. 34Jabo danȩrȩ, dibë chjadëri̧ a̧dopaji̧ri̧ pio ji̧ri̧ chjadüparequededibe ji̧ra̧ tjamo̧ oa, pio dibë chjadëri̧ a̧dopea̧ oa. Aja̧, Ütërë ea jana̧ chjadüa̧ oa ni̧bäji̧ri̧ pio ji̧ri̧, ado urëdi tjamo̧ oa jo̧rȩtaji̧ri̧ pio ji̧ri̧, ado Ütë tjamo̧ ja̧ ma̧ȩ oa a̧ra̧ano̧ji̧ri̧ pio ji̧ri̧ chjadëri̧ chjadüparequededibe. Jabo cjäri̧ marenȩro̧jȩrȩ —yo̧a̧dejȩrȩ—. O ji̧ri̧ toro cji̧dä ëte, ja̧bo tänȩparenȩro̧jȩrȩ. Ado o ji̧ri̧ judiorë a̧doparea̧ bëräpȩ ju̧ri̧ ji̧ra̧ co bide cjaeä chjaoparenȩro̧jȩrȩ. Ado o ji̧ri̧, jabechji̧ oëra̧ti̧ oa cjiamȩ bë ma̧ri̧ oa cho̧rë jä chjaoparenȩro̧jȩrȩ pio ji̧ri̧ conȩdapea̧ oa. 35Ado mȩnȩro̧ ja̧di dari̧ japea̧ pio ju̧i̧iä jabechji̧ bape chjaoa̧ oa cjiapanȩrȩ coëma cjiari̧ cjo̧ro̧rëreji̧ri̧ pio ji̧ri̧rea̧ ja̧ goe pio oaiä. Jabechji̧ Aberea̧ judi chjai̧dëri̧ japadëa̧ ba oa, goe gu̧rori̧ ja̧bo tänȩa̧ oa cjiarëremȩde. Ado Aberea̧ pio judiri yurori coëma cjiari̧ cjo̧ro̧rëreji̧ri̧ pio judiro̧ no̧i̧dë tjamo̧rȩ peaja̧di ja̧bo tänȩa̧ oa cjiarëreji̧ri̧dirȩ Chararia quȩmȩrea̧ üdë cjo̧ro̧a̧rä yuro. Ado pio judiro̧ ja̧bo tänȩa̧ ba oa, pio mȩnȩro̧ bape chjaoa̧ oa cjia mapanȩrȩ. Tjamo̧ davä. Danȩrȩ, Chararia quȩmȩrea̧ pio ju̧i̧bo ja̧bo tänȩa̧ oa cjiarëremȩde Berequia quȩmȩrea̧ pio ju̧i̧rea̧ ja̧ joja pio ju̧i̧bo. Jabechji̧ Ütë tjamo̧ ja̧ bë, ado gu̧na̧rea̧ mechja tjoro ju̧ri̧ ja̧bo tänȩrëreji̧ri̧diro̧jo̧ȩ. Ado pio ju̧i̧ ja̧bo tänȩa̧ babo bape chjaoa̧ oa cjiapanȩrȩ pio mȩnȩro̧. 36Tjamo̧i̧ cjiari̧ yo̧requededibe —yo̧a̧dejȩrȩ—. Dibëa̧ ütëti̧rea̧ judiro̧ coëma cjiari̧ cjo̧ro̧rëreji̧ri̧ no̧i̧dë tjamo̧ oa ja̧bo tänȩa̧ ba oa bape chjaoa̧ oa cjiapanȩrȩ mȩnȩro̧, pio yaba̧mȩ yoaiä cjo̧ro̧ji̧ri̧ pio judiro̧ —yo̧mȩrȩ cjiadiärëremȩde Jechu judi tjamo̧ yo̧ji̧ri̧ pio ji̧ri̧iäpȩmo̧ ya̧mȩmi̧ ta̧rëri̧ ni̧bä chjaorërea̧ ji̧.
Gitori̧ jo̧rȩtamȩrȩ darëremȩdejȩrȩ Jechu judi Jerucharȩräpȩ cjo̧ro̧ji̧ri̧ pio ji̧ri̧
Uruca 13:34-35
37Ado Jechu judi gitori̧ jo̧rȩtamȩrȩ ni̧bä chjaorëremȩdejȩrȩ Jerucharȩräpȩ cjo̧ro̧ji̧ri̧ pio ji̧ri̧:
—Chia chia, Jerucharȩräpȩ cjo̧ro̧ji̧ri̧ pio ji̧ri̧ cjäri̧ri̧ cjia jo̧rȩtamȩrȩ ni̧bärequededibe —yo̧a̧dejȩrȩ—. Gito ana̧ri̧ jo̧rȩtamȩrȩ jo̧rȩtarequededibe. Jabechji̧ Ütë tjamo̧ judi pio dibëiäpȩmo̧ chjadüa̧ pumȩ pio ji̧ri̧ ji̧dë ma ja̧bo tänȩrenȩro̧jȩrȩ. Tjamo̧ davä. Ütërë ea jana̧ chjadüa̧ oa ni̧bäji̧ri̧ pio ji̧ri̧ ji̧dë ma ja̧bo tänȩrenȩro̧jȩrȩ. Ado o ji̧ri̧, Ütë tjamo̧ judi pio dibëiäpȩmo̧ chjadüa̧ pio ji̧ri̧ peaja̧di ta̧dëra̧ ae ja̧bo tänȩnȩro̧jȩrȩ. Danȩrȩ, ji̧ra̧ co a̧dopa tänȩa̧täremȩrequededibe pio dibë chjadëri̧ jidapea̧ oa. Jabechji̧ ocararo iei̧ jini̧ jibëa̧ bori̧ pio ji̧ri̧ pjö̧dato ëtemo̧ a̧dopa tänȩmi̧ dari̧ japea̧täremȩrequededibe babui̧ra̧, jabo cjäri̧ marenȩro̧coe, jiada̧renȩro̧coe —yo̧a̧dejȩrȩ—. 38Ado pio ju̧i̧iä Ütë tjamo̧ judi, jabechji̧ a̧dë baämi̧ dari̧ japadidibe. Aja̧, dibëa̧ cjo̧ro̧rea̧ bëremȩ üdë, Jerucharȩ quȩmȩ bë mari̧ üdë, bë cjaramape bagarea̧mi̧ dari̧ japapadidibe pio dibë a̧dë baämi̧ dari̧ japea̧ oaiä. 39Ado yaba̧ pio yoa ma̧ȩ oa yo̧requededibe mȩnȩro̧ dabadëchea oa —yo̧a̧dejȩrȩ—. Danȩrȩ, ado chjereno yu̧a̧dëparequede dibëa bë ma̧ri̧ oa pio yaba̧. Jabechji̧ ado judiri dadëparenȩro̧coe. Jabo cüdë ado chjereno̧ ma̧na̧rä, dëdë, daparenȩro̧coe. Ado coa darä, jabechji̧ ja̧di ta̧rëri̧ yo̧parenȩrȩ pio coa chjiari: “Aja̧, chjacjiamȩri̧ ni̧bätäro̧jo̧ȩ Ano̧mȩ judi chjadüa̧ pio ju̧i̧” yo̧mȩ ma̧ȩ pio ju̧i̧ yo̧parenȩro̧coe cüdë ado chjereno̧ ma̧na̧mȩ oa —yo̧rëremȩdejȩrȩ.
Ado Jechu judi ja̧di ta̧rëri̧ yo̧ ëte, jabechji̧ cjiadiärëremȩde.
Currently Selected:
Mateo 23: Pume
Highlight
Share
Copy
Want to have your highlights saved across all your devices? Sign up or sign in
©2021 Global Partners, All Rights Reserved
