Mateo 22

Pumȩ judiro̧ jurera̧tä yo̧mȩ na̧rȩrea̧ ma̧ȩra̧ pio ju̧ri̧ra̧ ni̧bä chjaorëremȩdejȩrȩ Jechu judi, Ütërë yo̧a̧ chja̧oeräpȩ yu̧a̧pea̧ pio ju̧i̧ chjiari ni̧bä chjaopea̧ oa

Uruca 14:15-24

1Ado Jechu judi ji̧dë u̧i̧ ni̧bämȩrȩ ado ni̧bä chjaorëremȩdejȩrȩ na̧rȩrea̧ ma̧ȩmi̧ dara̧ jibëa̧ jädu ji̧ri̧, pjaricheo pio ji̧ri̧bo. Ja̧di ta̧rëri̧ yo̧mȩrȩ yo̧a̧dejȩrȩ:

2⁠—⁠Danȩrȩ, Ütërë yo̧a̧ chja̧oerä cjo̧ro̧pea̧ japamitë pio ju̧i̧ chjiari ni̧bä chjaotämi̧ cjiarequededibe ado ⁠—⁠yo̧a̧dejȩrȩ⁠—⁠. Danȩrȩ, cjo̧ro̧rëremȩde chiri ütë cjo̧ro̧mȩ judi. Ado jibëa̧ ja judi iei̧ ji̧ ëbapea̧ querediäa̧ oaiä, jabechji̧ ütëbodärärë airi̧ cjia airi̧ cjia juraji̧ri̧rȩ a̧dopatä eamȩrȩ jëdano̧rëremȩde. 3Ado pio ju̧i̧iä chiri ütë pio judi yo̧ chjadürëremȩdejȩrȩ jibëa̧ mu̧i̧tjoi̧ pio ji̧ri̧ pumȩ pio ji̧ri̧iäpȩmo̧. Jabechji̧ judi jabërä ma̧ȩ chjadüa̧ pumȩ pio ji̧ri̧iäpȩmo̧ ado chjereno̧ ta̧rë tänȩno̧pea̧ oa chjadüa̧dejȩrȩ. Aja̧, jibëa̧ ja üdë ëbapea̧ pio ju̧i̧ chjiari a̧dopera̧tä eamȩrȩ ma̧ȩ chjadüa̧dejȩrȩ pumȩ ji̧ri̧iäpȩmo̧. Jabo cjäri̧ madirȩ, jädëri̧ cjiarëreji̧ri̧dirȩ. 4Ado pio ju̧i̧iä ado cja̧rȩmo̧ mu̧i̧tjoi̧ pio ji̧ri̧bo chjadürëremȩdejȩrȩ jädëri̧ cjiaji̧ri̧ pio ji̧ri̧iäpȩmo̧ ado chjereno̧ ma̧ȩ yürüpea̧ oa. Ja̧di ta̧rëri̧ yo̧mȩrȩ chjadürëremȩdejȩrȩ jibëa̧ mu̧i̧tjoi̧ ji̧ri̧ pumȩ pio ji̧ri̧ chjadëri̧ ta̧rë tänȩpea̧ oa: "Danȩrȩ, cüdë jabërä ma̧ȩ chjadüa̧ pio ji̧ri̧iäpȩmo̧ ado chjadëri̧ yo̧e jächji̧jȩrȩ" yo̧a̧dejȩrȩ. 'Danȩrȩ, ca̧ ja üdë jibëa̧ iei̧ ji̧ ëbapa tara, jabechji̧ jurarea̧ üdë jëdano̧a̧ oa cjiade' yo̧eji̧ri̧renȩro̧jȩrȩ. 'Jabechji̧ bacarë, baca bori̧borë peadë gu̧na̧ oa cjiadirȩ, yo̧ maearë' yo̧eji̧ri̧renȩro̧jȩrȩ. 'Jabechji̧ jo̧ȩra̧pe jächji̧vä pio ji̧ri̧ nö̧ta ëba jurapea̧ oa. Chjoea̧pea̧ oa cjiade jurarea̧ üdë. Pio ji̧ri̧ nö̧ta ëba juraji̧ri̧rȩ a̧dopapea̧ oa jäȩno̧chji̧vä, judiro̧ ëba̧ pio ju̧i̧ irä dapea̧ oa' yo̧eji̧ri̧renȩro̧jȩrȩ" yo̧mȩrȩ yo̧rëremȩdejȩrȩ chiri ütë pio judi jibëa̧ mu̧i̧tjoi̧ pio ji̧ri̧iäpȩmo̧. 5Jabo cjäri̧ madirȩ. Mu̧i̧tjoi̧ judiro̧ ma̧ȩ oa chjadëri̧ ma̧ȩ yürepea̧räbo, jabechji̧ ta̧rë ja̧bodëa̧diro̧jȩrȩ. Jabechji̧ judiro̧ chjaodëri̧ jätärea̧ ji̧, jibëa̧ maea oa jo̧rȩtaji̧ri̧rȩ cjiadiärëreji̧ri̧dirȩ ado cja̧rȩmo̧räpȩmo̧ ma jo̧rȩtaji̧ri̧rȩ. Cja̧rȩmȩ üdë järëremȩde jibëa̧ tjadoräpȩ. Jabechji̧ ma̧ȩ yürera̧pea̧ji̧ri̧ pio ji̧ri̧ä ta̧rë ëte a̧dë järëremȩdejȩrȩ jibëa̧ tjadoräpȩ ja̧bepapea̧ oa. Ado cja̧rȩmo̧ üdë järëremȩde jënȩ gatë tänȩrea̧ bëräpȩ. Jabechji̧ a̧dopapea̧ pio ju̧i̧ chjiari ta̧rë ëte jätärea̧ ji̧, cjäri̧ made, jädëa̧de, jabo jënȩ gatë tänȩrea̧ bëräpȩ järëremȩde. 6Ado o judiro̧, cjäri̧ madiro̧jȩrȩ, ji̧dë u̧i̧ ma̧i̧ dari̧ japarëreji̧ri̧diro̧jȩrȩ chiri ütë cjo̧ro̧mȩ ja̧ mu̧i̧tjoi̧ pio ji̧ri̧. Jabechji̧ pio ji̧ri̧iäpȩmo̧ chjuari mitë ëte, pio ji̧ri̧iäpȩmo̧ chjai̧dëri̧ ni̧bä ëte, ja̧bo tänȩrëreji̧ri̧diro̧jȩrȩ. Jabechji̧ airi̧ cjia airi̧ cjia juraji̧ri̧rȩ a̧doparea̧räpȩ tjamo̧ri̧ jädëri̧ cjiarëreji̧ri̧dirȩ. 7Jabo chiri ütë cjo̧ro̧mȩ pio judi pio ju̧i̧ ta̧rëa̧ oaiä, ërecjia tjamo̧pea̧de. Ado chjaodëri̧ chjadürëremȩdejȩrȩ jibëa̧ guadia pio ji̧ri̧ jibëa̧ mu̧i̧tjoreji̧ri̧ pio ji̧ri̧ ja̧bo tänȩa̧ji̧ri̧ pio ji̧ri̧ jabo tänȩpea̧ oa. Ado jënȩro̧ cjo̧ro̧mȩ bë ma̧ri̧ pio ju̧i̧ baë acjürüa̧diro̧jo̧ȩ. 8Ado chiri ütë ja̧ guadia üdë ja̧di dari̧ japa ëte, ado ëna̧diärëremȩdejȩrȩ jibëa̧ mu̧i̧tjoi̧ pio ji̧ri̧. Ado cja̧rȩmo̧ mu̧i̧tjoi̧ pio ji̧ri̧ ëna̧diärëremȩdejȩrȩ. Ado yo̧a̧dejȩrȩ: "Danȩrȩ, ca̧ ja judi jibëa̧ iei̧ pio ji̧ ëbapea̧ ji̧ querediä tjamo̧ tara, jabechji̧ chjaodëri̧ tarupaparea̧rȩ airi̧ cjia airi̧ cjia juraji̧ri̧rȩ a̧dopapea̧ ji̧. Jabo cüdë ibë nö̧ta ëba a̧dopatä eatea̧ pumȩ pio judiro̧ badë marëreji̧ri̧dirȩ. Ado pio ju̧i̧iä tjamo̧ri̧ nö̧tadë marëreji̧ri̧dirȩ pio ibë nö̧ta ëba a̧dopapea̧ ji̧. 9Ado pio ju̧i̧iä jabechji̧, oëra̧ti̧ oa jächji̧vä bë ma̧ri̧räpȩ ju̧ri̧ järea̧ no̧ chjö̧na̧i̧ oa jämȩrȩ. Pumȩ judiro̧ dëbëdiärea̧räpȩ ju̧ri̧ jächji̧vä dami̧ti̧ järea̧ no̧ boi̧chji̧ oa mitëji̧ri̧rȩ. No̧i̧dë tjamo̧ oa ëba jana̧chji̧jȩrȩ pumȩ ji̧ri̧, cja̧rȩmȩrȩ a̧dë cjiadiärea̧ decjiari̧ "yo̧a̧dejȩrȩ. 10Ado chiri ütë ja̧ mu̧i̧tjoi̧ judiro̧ pio ju̧i̧ ta̧rëa̧ oaiä, oëra̧ti̧ oa järëreji̧ri̧dirȩ pumȩ no̧i̧dë tjamo̧ oa ëba jana̧pea̧ oa. Jabechji̧ chjadëri̧ cjo̧ro̧ji̧ri̧ pio ji̧ri̧ ëba go̧düdärärëreji̧ri̧diro̧jȩrȩ, chjai̧dëri̧ cjo̧ro̧ji̧ri̧ pio ji̧ri̧bo. Ado no̧i̧dë tjamo̧rëreji̧ri̧dirȩ a̧dopera̧pea̧ji̧ri̧ pio judiro̧. Jabechji̧ judiro̧ ütëbodärärë a̧dopea̧rä a̧dë chjäte ji̧ra̧rëreji̧ri̧dirȩ. Tjamo̧ davä. Judiro̧ ütëbodärärë ëbapea̧ jo̧ tjo ana̧rä a̧dopea̧rä, jabechji̧ a̧dë chjäte ji̧ra̧ tjamo̧rëreji̧ri̧dirȩ. 11Jabo chiri ütë cjo̧ro̧mȩ pio judi yu̧a̧däräa̧rä, a̧dopera̧pea̧ji̧ri̧ pio ji̧ri̧ dapea̧ oa yu̧a̧däräa̧rä, cja̧rȩmȩ pumȩ üi̧ pio ju̧i̧ darëremȩdejȩ chjadëri̧ ina̧ oa cjiadëmȩ oa. Jabechji̧ a̧dopapea̧ oa chjadëri̧ ina̧ oa cjiatärea̧ ji̧, chjadëri̧ ina̧ oa cjiadërëremȩde. Jabechji̧ chiri ütë pio ju̧i̧ ja̧ ja üdë jibëa̧ iei̧ pio ji̧ ëbapea̧ do tara, jabechji̧ jibëa̧ chjibo chjadë oa chjadëri̧ ina̧ oa cjia̧täremȩde pio jiro pumȩ üi̧ üdë. Jabo cjäri̧ made, chjadëri̧ ina̧ oa cjiadërëremȩde. 12Ado pio ju̧i̧iä chiri ütë judi pio ju̧i̧ damȩrȩ iëno̧ë ta̧rëa̧dejȩ: "Jabo danȩ, chjibo chjadë oa ina̧ oa cjiadërenȩ. ¿Tjana̧ri yu̧a̧rea̧ daea̧renȩ mȩnȩ?" iëno̧ë ta̧rëa̧dejȩ. Jabo pumȩ judi dëbë yo̧tärea̧ ji̧, dëbë yo̧rea̧ dadëmȩrȩ cjapiri̧ cjiadiäa̧de. 13Ado pio ju̧i̧iä chiri ütë cjo̧ro̧mȩ pio judi yo̧rëremȩdejȩrȩ jibëa̧ mu̧i̧tjoi̧ pio ji̧ri̧: "Danȩrȩ, mitëchji̧jo̧ȩ pio yoaje" yo̧a̧dejȩrȩ. "Ado chjuari̧ yura̧chji̧jo̧ȩ jibëa̧ ichi oa, jibëa̧ tabo. Ado ja̧dëa ji̧ aeno̧chji̧jo̧ȩ ma̧i̧ da bagönȩräpȩ ju̧ri̧. Aja̧, a̧dë chjäte ejaro cjiarea̧räpȩ ju̧ri̧, ma̧i̧ dari̧ gito oaiä a a ma cjiarea̧räpȩ ju̧ri̧ aeno̧chji̧jo̧ȩ" yo̧a̧dejȩrȩ jibëa̧ mu̧i̧tjoi̧ judi chiri ütë cjo̧ro̧mȩ judi ⁠—⁠yo̧mȩrȩ ni̧bä chjaorëremȩdejȩrȩ Jechu judi na̧rȩrea̧ ma̧ȩmi̧ dara̧. 14Jabo ja̧dëa ji̧ pio yoa ma̧ȩbo a̧de yo̧rëremȩdejȩrȩ:

⁠—⁠Danȩrȩ, Ütë tjamo̧ judi pumȩ no̧i̧dë tjamo̧ oa ëna̧diärëremȩdejȩrȩ pio jënȩ yo̧a̧ chja̧oeräpȩ yu̧a̧rea̧ dapea̧ oa. Jabo yu̧a̧paji̧ri̧ judiro̧ ji̧ra̧ tjamo̧dëdirȩ. Judi mitëa̧ pumȩ pio judiro̧, ji̧ra̧ tjamo̧dëdirȩ ⁠—⁠yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧, pjaricheo pio ji̧ri̧bo.

Pjaricheo judiro̧ Jechu judi puërä choë cjätämi̧ dari̧ cjiapea̧ oa iëno̧ë ta̧rërëreji̧ri̧diro̧jo̧ȩ chirirä cjo̧ro̧a̧ ba oa ba ano̧pea̧ pio ju̧i̧ chjiari

Marco 12:13-17; Uruca 20:20-26

15Ado pjaricheo judiro̧ Jechu pio ju̧i̧ ta̧rëa̧ duri oa, ado jäeno̧rëreji̧ri̧dirȩ a̧dopapea̧ oa, Jechu pio ju̧i̧ u̧i̧papea̧ pio ju̧i̧ chjiari ana̧ri̧ ni̧bä chjaopea̧ oa. ‘Aja̧, u̧i̧papea̧ chiaa̧ro̧ju̧i̧da, puëräpȩ choë cjatämi̧ dari̧ cjiapea̧ oa ütarami̧ dari̧ u̧i̧papea̧ chiaa̧ro̧ju̧i̧da, jabechji̧ iëno̧ë ta̧rëpea̧ chiaa̧ro̧ju̧i̧da, judi oëra̧ jo̧rȩtamȩmi̧ dari̧ dëbë yo̧pea̧ oa iëno̧ë ta̧rëpea̧ chiaa̧ro̧ju̧i̧da, a̧ro̧rȩ pio ju̧i̧iäpȩmo̧ goae tarari̧ aechide yo̧rea̧ dapea̧ oa u̧i̧papea̧ chiaa̧ro̧ju̧i̧da’ quëna̧ jo̧rȩtaji̧ri̧rȩ jäeno̧rëreji̧ri̧dirȩ a̧dopapea̧ oa. 16Ado a̧dopa ëte, pjaricheo pio judiro̧ chjadürëreji̧ri̧diro̧jȩrȩ jibëa̧ jadü pio ji̧ri̧, pio jibëiä dabapea̧ji̧ri̧ pio ji̧ri̧. Ado Erode quȩmȩ ütë pio ju̧i̧ eaji̧ri̧ pio ji̧ri̧bo chjadürëreji̧ri̧diro̧jȩrȩ, Erode ja̧ jadü pio ji̧ri̧. Aja̧, yo̧a̧ri̧ bubami̧ dari̧ cjo̧ro̧ji̧ri̧ pio ji̧ri̧ chjadürëreji̧ri̧diro̧jȩrȩ Jechu pio ju̧i̧ u̧i̧pe iëno̧ë ta̧rëpea̧ oa. Ado judiro̧ Jechu pio ju̧i̧iäpȩ go̧düdäräa̧rä, ja̧di ta̧rëri̧ yo̧rëreji̧ri̧diro̧jo̧ȩ:

⁠—⁠Danȩ a̧ra̧ano̧mȩ, pio mȩa chjiari dabarea̧ro̧mȩ ⁠—⁠yo̧a̧diro̧jo̧ȩ⁠—⁠. ‘Aja̧, judi a̧ra̧ano̧a̧ üdë tjamo̧i̧ cjiari̧ cjiadida, Ütë tjamo̧ judi ütarë jo̧rȩta̧ pio ju̧i̧ chjiari coëma cjiari̧ a̧ra̧ano̧dida, ado pumȩ ütëbodärä oa cja̧rȩmȩ ba chia maeara̧ dadiji̧ri̧da’ quëna̧ dabarea̧ro̧mȩ pio mȩa chjiari. 17Ado pio ju̧i̧iä iëno̧ë ta̧rëtämi̧ cjiarea̧ro̧mȩ chirirä cjo̧ro̧a̧ ba oa ba ano̧pea̧ pio ju̧i̧ chjiari ⁠—⁠yo̧a̧diro̧jo̧ȩ⁠—⁠. Danȩ, ¿yö̧ta jo̧rȩtarenȩ mȩnȩ? ¿Domano̧ ja̧ ütë Checha pio ju̧i̧iäpȩmo̧ ba ano̧pea̧de? ¿Jabo Checha pio ju̧i̧iäpȩmo̧ ba ano̧pea̧de, jabo ba ano̧dëpea̧de? ¿Yö̧ta japapea̧de? ⁠—⁠yo̧ji̧ri̧rȩ iëno̧ë ta̧rërëreji̧ri̧diro̧jo̧ȩ Jechu ju̧i̧ judi oëra̧ ni̧bämi̧ dari̧ dëbë yo̧pea̧ oa.

18Jabo Jechu judi pio ji̧ri̧ ja̧ chji̧ oa cjacjarë damȩrȩ, pio jȩaiäpȩmo̧ chjai̧dëri̧ japatämi̧ cjiaji̧ri̧ pio ji̧ri̧ chjiari dabamȩrȩ, chjaodëri̧ dëbë yo̧rëremȩdejȩrȩ:

⁠—⁠Jabo cjäri̧ marenȩro̧coe ⁠—⁠yo̧a̧dejȩrȩ Jechu judi⁠—⁠. Ütë tjamo̧ pio ju̧i̧ tjamo̧ quëna̧cji̧ quëna̧ japaji̧ri̧rȩ u̧i̧patarenȩro̧coe. 19Jabo goë na̧rȩno̧chji̧coe chëre pio ju̧i̧, pio yoa chirirä cjo̧ro̧a̧ ba oa ba ano̧pea̧ chëre oa ⁠—⁠yo̧a̧dejȩrȩ.

Ado Jechu judi chëre oa cjo̧dëa̧ oaiä, yürüa̧diro̧jo̧ȩ.

20Ado Jechu judi yo̧a̧dejȩrȩ:

⁠—⁠Danȩrȩ, chjadëri̧ yo̧chji̧coe. ¿Chjia ja̧ dacho chiade chëre üdë?

21Ado pio ju̧i̧ ta̧rë oaiä dëbë yo̧a̧diro̧jo̧ȩ:

⁠—⁠Chjia ja̧ dacho chiadë, jabechji̧ domano ja̧ ütë pio ju̧i̧ ja̧ dacho chiade, Checha quȩmȩ pio ju̧i̧ ja̧ dacho chiade ⁠—⁠yo̧ji̧ri̧rȩ dëbë yo̧a̧diro̧jo̧ȩ.

Ja̧dëa ji̧ Jechu judi dëbë yo̧a̧dejȩrȩ:

⁠—⁠Jabechji̧ Checha pio ju̧i̧ ja̧ oa pio ju̧i̧iäpȩmo̧ yürüpea̧de. Ado Ütë tjamo̧ pio ja̧ oa Ütë tjamo̧ pio ju̧i̧iäpȩmo̧ yürüpea̧de ⁠—⁠yo̧mȩrȩ yo̧a̧dejȩrȩ.

22Ado Jechu judi yo̧a̧ oa ta̧rëa̧ oaiä, dacho bëremi̧ cjiami̧ dari̧ jo̧rȩtaji̧ri̧pea̧dirȩ, ana̧ tjamo̧ri̧ jo̧rȩtaji̧ri̧rȩ. ‘Chia chia, Jechu judi dabamȩ tjamo̧dida’ quëna̧ jo̧rȩtaji̧ri̧rȩ ana̧ri̧ jo̧rȩtarëreji̧ri̧dirȩ. Ado chjaodëri̧ a̧dë baäeno̧rëreji̧ri̧diro̧jo̧ȩ.

Ja̧boa̧ duri oa bëdüpea̧ pio ju̧i̧ chjiari iëno̧ë ta̧rërëreji̧ri̧diro̧jo̧ȩ Jechu ju̧i̧

Marco 12:18-27; Uruca 20:27-40

23Ji̧dë duri oa pio jiro doro, Chaducheo pio judiro̧borë iëno̧ë ta̧rëtämi̧ cjiarëreji̧ri̧diro̧jo̧ȩ Jechu ju̧i̧. Ado Chaducheo judiro̧, ¿chjiadirȩ? Chjiadëdirȩ, jabechji̧ judio maeadirȩ. Jabo danȩrȩ, ado cja̧rȩmo̧ quëna̧rea̧ chiadirȩ. 'Ja̧boa̧ji̧ri̧ pio judiro̧ ado chjereno̧ bëdürea̧ dadëpadiro̧da, jabechji̧ bucho ana̧ ja̧boa̧mi̧ ja̧boa̧ maeadiro̧da’ quëna̧ jo̧rȩtaji̧ri̧ pio judiro̧dirȩ. Ado ja̧di dari̧ quëna̧ oaiä, 'jabechji̧ bedürea̧ decjiadida' quëna̧ jo̧rȩtaji̧ri̧rȩ a̧ra̧ano̧diro̧jȩrȩ pumȩ ji̧ri̧. Aja̧, pio jiro oari judiro̧dirȩ Jechu pio ju̧i̧ goëdepea̧ji̧ri̧ judiro̧. 24Ado ja̧di ta̧rëri̧ yo̧ji̧ri̧rȩ iëno̧ë ta̧rëa̧diro̧jo̧ȩ:

⁠—⁠Danȩ a̧ra̧ano̧mȩ, Moicherea̧ pio judi no̧mȩ tjamo̧ri ja̧ go̧ȩparëremȩde ibëa̧ pio ju̧i̧. Ado ja̧di ta̧rëri̧ go̧ȩparëremȩde: “Aja̧, eami̧ pumȩ üi̧ judi jibëa̧ iei̧ pio ji̧ a̧dë ja̧borä judi, jabo jibëa̧ bori̧ pio ji̧ri̧ nö̧ridë ëte a̧dë ja̧boa̧rä judi, jabechji̧ ju̧i̧rea̧ ja̧ jadü pio judi ano̧ mire ëbatäremȩdejȩ iei̧ ji̧. Ado ja̧boa̧mȩ pio judi jibëa̧ u̧ri̧ pio ji̧ri̧ ëbarea̧ dadëa̧räbo, jabechji̧ ja̧ omȩ pio ju̧i̧iä ëbamȩmi̧ dari̧ cjiadiäpade.” Aja̧, ja̧di ta̧rëri̧ go̧ȩparëremȩde Moicherea̧ pio judi. 25Ado yaba̧ jabechji̧, ëbapea̧ pio ju̧i̧ chjiari iëno̧ë ta̧rëtämi̧ cjiarea̧ro̧mȩ a̧ra̧ano̧mȩ ⁠—⁠yo̧a̧diro̧jo̧ȩ⁠—⁠. Danȩ, no̧mȩ judi cjo̧ro̧rëreji̧ri̧dirȩ 7 oari judiro̧, oti̧ maearë, cja̧rȩmȩ chuchurämo̧ jaraji̧ri̧ pio judiro̧. Ado yabomȩ pio judi, jabechji̧ ëbarëremȩdejȩ jibëa̧ iei̧ ji̧. Jabo cjäri̧ made, judi cja̧rȩmȩ oa nö̧ritärea̧ ji̧, bori̧ ji̧ri̧ nö̧ridëmȩrȩ a̧dë ja̧boa̧dejȩ jibëa̧ iei̧ ji̧. Ado pio ju̧i̧iä jabechji̧, ju̧i̧rea̧ ja̧ durimȩ pio judi ano̧ mire ëbarëremȩdejȩ. 26Aja̧, jibëa̧ omȩrea̧ judi a̧dë ja̧boa̧ pio ju̧i̧iä, jabechji̧ ano̧ mire ëbarëremȩdejȩ iei̧ ji̧. Jabo ju̧i̧rea̧ ja̧ durimȩ pio judiborë a̧dë ja̧boa̧dejȩ iei̧ ji̧. Bori̧ ji̧ri̧ nö̧ritärea̧ ji̧, nö̧ridëmȩrȩ a̧dë ja̧boa̧dejȩ. Ado peaja̧di dari̧ japarëremȩde pio ju̧i̧rea̧ ja̧ durimȩ pio judiborë. Ja̧di ma, ja̧di ma ano̧ mire ëbarëreji̧ri̧dirȩ pio jiro oari judiro̧, 7rë. Ado judiro̧ cja̧rȩmȩrȩ jibëa̧ u̧ri̧ pio ji̧ri̧ nö̧ritärea̧ ji̧, jabechji̧ nö̧rirea̧ dadë maearë ja̧bo ga̧re baärëreji̧ri̧dirȩ. 27Ado judiro̧ ütëborë ja̧boa̧ duri oa, jabechji̧ pio ji̧ri̧ ano̧ mire ëbarëreyi̧ pio jini̧borë ja̧boa̧nȩ. 28Ado yaba̧ chjadëri̧ yo̧ibe a̧ra̧ano̧mȩ ⁠—⁠yo̧a̧diro̧jo̧ȩ Jechu ju̧i̧⁠—⁠. Bëdürea̧ dobearä, ja̧boa̧ji̧ri̧ pio judiro̧ ütëborë bëdürea̧ dabearä, ¿chjia ja̧ iei̧panȩ pio jiro iei̧ jini̧? Jabechji̧ 7 oari pio ji̧ri̧ ëbarëreyi̧nȩ, jabo ¿chjia tjamo̧de iei̧ ano̧mȩ judi? ⁠—⁠yo̧ji̧ri̧rȩ u̧i̧pe iëno̧ iëno̧ ta̧rërëreji̧ri̧diro̧jo̧ȩ Jechu ju̧i̧, judi puëräpȩ choë cjatämi̧ dari̧ cjiapea̧ oa.

29Jabo Jechu judi dëbë yo̧rëremȩdejȩrȩ:

⁠—⁠Oëra̧ jo̧rȩtanȩrȩ ⁠—⁠yo̧a̧dejȩrȩ⁠—⁠. Jabechji̧ mȩnȩro̧, Ütë tjamo̧ judi go̧ȩpa tänȩrërea̧ ma̧ȩ pio ju̧i̧ coëma cjiari̧ dabadë tara, Ütë tjamo̧ ja̧ jauëchja pio ju̧i̧ chjiaribo dabadë tara, jabechji̧ oëra̧ jo̧rȩtanȩrȩ ⁠—⁠yo̧a̧dejȩrȩ⁠—⁠. 30Danȩrȩ, ja̧borëreji̧ri̧ pio judiro̧ bëdürä, jabechji̧ ëbarea̧ dadëpadirȩ. Tjamo̧ davä, judiro̧ bëdüa̧ pio judiri yurori ëbadë mapadirȩ. Jabechji̧ a̧dëriji̧ri̧ mu̧i̧tjoi̧mi̧ pio judiro̧mi̧ dari̧ cjiadiä mapadirȩ ëbarea̧ decjiari̧. 31Danȩrȩ, ja̧borëreji̧ri̧ pumȩ pio judiro̧ ado chjereno̧ bëdüpea̧ pio ju̧i̧ chjiari go̧ȩparëremȩde ibëa̧ taru judi, Moicherea̧ pio judi. ¿Naparä go̧ȩparëremȩde? Naparädë, jabechji̧ Ütë tjamo̧ judi Moiche pio ju̧i̧iäpȩmo̧ ma̧ȩ yürürërea̧ ji̧, ibëa̧ Ano̧mȩ Ütë pio ju̧i̧ chjiari go̧ȩparëremȩde. Danȩrȩ, ja̧di ta̧rëri̧ ni̧bärëremȩdejȩ Moiche pio ju̧i̧iäpȩmo̧: 32Ta̧rëchji̧vä: “Abaraa̧ pio ju̧i̧ ja̧ Ütë pio judirequede cüdë. Ado Icha pio ju̧i̧ ja̧ Ütë pio judirequede. Ado Jacobo pio ju̧i̧ ja̧ Ütë pio judirequede cüdë.” Aja̧, ja̧di ta̧rëri̧ yo̧mȩrȩ yo̧rëremȩde Ütë tjamo̧ judi. Jabechji̧ cjo̧ro̧ji̧ri̧ pio ji̧ri̧ ja̧ Ütëde Ütë tjamo̧ judi. Ado Abaraa̧ judi ja̧boa̧ oa cjiadëde, jabo bëdüa̧ oa cjiade. Ja̧borëremȩrȩ bëdüa̧ oa cjiade. Ado Icha judi, ado Jacobo pio judiborë peaja̧di bëdüa̧ oa cjia maeadirȩ. Cjo̧ro̧dirȩ davä ja̧boa̧ji̧ri̧borë. Pio ju̧i̧iä, 'Abaraa̧ pio ju̧i̧ ja̧ Ütë pio judirequede' yo̧rëremȩde Ütë tjamo̧ judi. Jabechji̧ bëdüa̧ oa cjiadëji̧ri̧ pio ji̧ri̧ ja̧ Ütëdëde, jabo bëdüa̧ oa cjiaji̧ri̧ pio ji̧ri̧ ja̧ Ütëde. Ja̧di tara yo̧requededibe ⁠—⁠yo̧a̧dejȩrȩ⁠—⁠. Oëra̧ jo̧rȩta tjamo̧nȩrȩ ja̧boa̧ji̧ri̧ pio ji̧ri̧ chjiari. Ja̧boa̧mi̧ ja̧bodë madirȩ, jabo ja̧borëreji̧ri̧borë cjo̧ro̧dirȩ. Bëdürea̧ chia maearë ja̧boa̧dirȩ ⁠—⁠yo̧mȩrȩ dëbë yo̧rëremȩdejȩrȩ Jechu judi chaducheo pio ji̧ri̧iäpȩmo̧, pumȩ judiro̧ bëdürea̧ pio ju̧i̧ chjiari.

33Ado pumȩ bubarë pio ju̧i̧ ta̧rëa̧ oaiä, dacho bëremi̧ cjiami̧ dari̧ jo̧rȩtaji̧ri̧pea̧dirȩ, Jechurë a̧ra̧ano̧a̧ pio ju̧i̧ chjiari.

A̧dë chjäte ba chiamȩ ma̧ȩ pio ju̧i̧ chjiari ni̧bärëremȩde Jechu judi

Marco 12:28-34; Uruca 10:27

34Jabo pjaricheo judiro̧ chaducheo pio ji̧ri̧ chjiari ta̧rëa̧rä, Jechu judi pio ji̧ri̧iäpȩmo̧ cjapiri̧ cjia tänȩa̧ pio ju̧i̧ chjiari ta̧rëa̧rä, dëbëpe chjaomi̧ dari̧ ni̧bä chjaoa̧ pio ju̧i̧ chjiari ta̧rëa̧rä, a̧dopeno̧rëreji̧ri̧dirȩ ado. Ado a̧dopeno̧a̧ ëte, ado jäeno̧rëreji̧ri̧dirȩ Jechu pio ju̧i̧iäpȩ. 35Ado ja̧dëa ji̧ pjaricheo üdë, cja̧rȩmȩ pio judi, Moicherë go̧ȩparërea̧ ma̧ȩ oa tjamo̧ a̧ra̧ano̧mȩ pio judi iëno̧ë ta̧rërëremȩdejȩ Jechu ju̧i̧. Jabechji̧ pio ju̧i̧ ütarami̧ dari̧ japapea̧ oa, pio judi oëra̧ dëbë yo̧ro ta̧rëpea̧ oa, pio judi puëräpȩ choë cjätämi̧ dari̧ cjiadiä tänȩpea̧ oa, iëno̧ë ta̧rërëremȩdejȩ. 36Ja̧di ta̧rëri̧ yo̧mȩrȩ iëno̧ë ta̧rëa̧dejȩ:

⁠—⁠A̧ra̧ano̧mȩ ⁠—⁠yo̧a̧dejȩ⁠—⁠. Danȩ, Moicherea̧ judi go̧ȩparërea̧ ma̧ȩ üdë ji̧ra̧ tjamo̧de. Tüdüa̧mi̧ darä cjo̧ro̧pea̧ ma̧ȩ üdë ji̧ra̧ tjamo̧de. Jabo yo̧coe, ¿tjana̧ ma̧ȩde o ji̧ri̧ u̧i̧ ba chia tjamo̧mȩ judi? Pio ju̧i̧ chjadëri̧ yo̧coe ⁠—⁠yo̧a̧dejȩ.

37Ado Jechu judi dëbë yo̧mȩrȩ yo̧rëremȩdejȩ:

⁠—⁠O ji̧ri̧ u̧i̧ ba chia tjamo̧mȩ pio ju̧i̧ yo̧parequededibe ⁠—⁠yo̧a̧dejȩrȩ⁠—⁠. Danȩrȩ, dibëa̧ Ano̧mȩ Ütë pio ju̧i̧ ea tjamo̧chji̧jo̧ȩ urëdi tjamo̧ oa jo̧rȩtaji̧ri̧rȩ. Jabechji̧ dibëa̧ jo̧rȩtarea̧ chji̧ codëmi̧ dara̧ pio ju̧ri̧ra̧ ea tjamo̧chji̧jo̧ȩ, chji̧ pënȩmi̧ dadë maeara̧. Jabechji̧ mȩnȩro̧ nö̧tarä yuro ea tjamo̧chji̧jo̧ȩ, dibëa̧ yadë maeara̧. Jabechji̧ dibëa̧ tjo codëmi̧ dara̧ pio ju̧ri̧ra̧ ea tjamo̧chji̧jo̧ȩ. Tjamo̧ davä. Dibëa̧ icjara oa nȩmȩparea̧ decjiari̧, dibëa̧ icjara oa ja̧bopea̧ oa yürürea̧mi̧ dari̧ ea tjamo̧chji̧jo̧ȩ dibëa̧ tjo codëmi̧ dara̧ pio ju̧ri̧ra̧. 38Aja̧, pio jiro ma̧ȩ üdë, a̧dë chjäte ba chiade ⁠—⁠yo̧a̧dejȩrȩ⁠—⁠. Jabechji̧ o ji̧ri̧ u̧i̧ ba chiade. Tjamo̧ baämȩmi̧ da ma̧ȩ pio judide. Yabo baämȩ ma̧ȩmi̧ dade. 39Ado pio yoa ma̧ȩbo a̧de yo̧requededibe ba chia tjamo̧ oa ⁠—⁠yo̧a̧dejȩrȩ⁠—⁠. Danȩrȩ, dibëa̧ pumȩ pio ji̧ri̧, jabechji̧ dibëa̧ icjarami̧ da oa ea tjamo̧chji̧jȩrȩ. Dibëa̧ imi̧ da oa ea tjamo̧chji̧jȩrȩ. Pio jiro ma̧ȩ yo̧a̧ri̧borë o ji̧ri̧ u̧i̧ a̧dë chjäte ba chiade. 40Jabechji̧ pio jiro ma̧ȩ yo̧a̧ri̧ üdë jo̧ taru yuimi̧ dade. Jo̧ taru cjiamȩmi̧ dade. Jabechji̧ Moicherë go̧ȩparërea̧ ma̧ȩ chjö̧na̧i̧rȩ are a̧ra̧ oa cjiami̧ dari̧ cjiade pio jiro ma̧ȩ pio oaiä. Chjuari̧ cjiami̧ dari̧ cjiade. Ado Ütërë ea jana̧ chjadüa̧ oa ni̧bäji̧ri̧ pio judiro̧ go̧ȩparërea̧ ma̧ȩ üdë, peaja̧di pio jiro ma̧ȩ oaiä are a̧ra̧ oa cjiami̧ dari̧ cjiade, Ütë tjamo̧ ju̧i̧ ea tjamo̧chji̧jo̧ȩ yo̧mȩ ma̧ȩ pio ju̧i̧iä. Pio jiro ma̧ȩ yo̧a̧ri̧ oaiä chjuari̧ cjiade chjuari̧ cjiarea̧mi̧ dari̧. Jabechji̧ pio jiro ma̧ȩ ba chia tjamo̧ oaiä, chjuari̧ cjia maeade ma̧ȩ chjö̧na̧i̧rȩ ⁠—⁠yo̧mȩrȩ ni̧bä chjaorëremȩdejȩrȩ Jechu judi.

Ütërë mitëa̧ Chjätä Tänȩmȩ pio judi, ¿chjia ja̧ Jojade? yo̧mȩrȩ iëno̧ë ta̧rërëremȩdejȩrȩ pjaricheo pio ji̧ri̧ Jechu judi

Marco 12:35-37; Uruca 20:41-44

41Ado pjaricheo pio judiro̧ Jechu ja̧ queri̧räpȩ a̧dopea̧ oa cjiaji̧ri̧ oa, iëno̧ë ta̧rërëremȩdejȩrȩ Jechu judi. Aja̧, ja̧di ta̧rëri̧ yo̧mȩrȩ iëno̧ë ta̧rëa̧dejȩrȩ pio jȩa chjiari:

42⁠—⁠Danȩrȩ, ¿yö̧ta jo̧rȩtanȩrȩ Ütërë mitëa̧ Chjätä Tänȩmȩ pio ju̧i̧ chjiari? ⁠—⁠iëno̧ë ta̧rëa̧dejȩrȩ⁠—⁠. ¿Chjia ja̧ Jojade? ¿Yudirimȩde? ⁠—⁠iëno̧ë ta̧rëa̧dejȩrȩ.

Ado judiro̧ dëbë yo̧ji̧ri̧rȩ ja̧di tärëri̧ yo̧a̧diro̧jo̧ȩ:

⁠—⁠Yudirimȩdëde, danȩ, Davirea̧ pio judiri ja̧ tarumȩde. Ibëa̧ tarurea̧ Davi quȩmȩrea̧ pio judirimȩde ⁠—⁠dëbë yo̧a̧diro̧jo̧ȩ.

43Ado Jechu judi dëbë yo̧mȩrȩ yo̧a̧dejȩrȩ:

⁠—⁠Aja̧, tjamo̧ri̧ dëbë yo̧a̧nȩro̧coe. Jabo pio yoa ma̧ȩbo chjadëri̧ a̧de yo̧chji̧coe. Danȩrȩ, Chjätä Tänȩmȩ pio judi Davirea̧ pio judiri ja̧mȩrä judi, ¿tjana̧ ju̧i̧iä ‘ca̧ Ano̧mȩdida’ quëna̧ jo̧rȩtarëremȩde Davirea̧ judi jibëa̧ri ja̧mȩ pio ju̧i̧ chjiari? Tjamo̧ davä. Tjo tjamo̧ pio judi ma̧ȩ yürüa̧ oaiä, jibëa̧ri ja̧mȩ pio ju̧i̧ chjiari go̧ȩparëremȩde, Chjätä Tänȩmȩ ju̧i̧ chjiari, jënȩ “Ca̧ Ano̧mȩ” yo̧rërea̧ pumȩ pio ju̧i̧ chjiari. 44Danȩrȩ, ta̧rëchji̧vä Davirea̧ judi jabërä go̧ȩparërea̧ pio ju̧i̧:

“Ado Ütë tjamo̧ judi yo̧rëremȩdejȩ ca̧ Ano̧mȩ ju̧i̧. Pio yi chavä, ca̧ mu̧i̧ chjua cotoro, a̧dë chjäte ba chiaräpȩ ju̧ri̧. Jabechji̧ pio yi chatä earequedemȩ cüdë mȩa eadëji̧ri̧ pio ji̧ri̧ ütëbodärä oa boadäräa̧rä yuro.”

Aja̧, ja̧di ta̧rëri̧ go̧ȩparëremȩde Davirea̧ judi Chjätä Tänȩmȩ pio ju̧i̧ chjiari jabërä. 45Jabo yo̧chji̧coe ⁠—⁠yo̧a̧dejȩrȩ⁠—⁠. ¿Tjana̧ ju̧i̧iä jabërä ja̧di ta̧rëri̧ go̧ȩparëremȩde pio jibëa̧ri ja̧mȩ pio ju̧i̧ chjiari? ¿Tjana̧ ju̧i̧iä 'ca̧ Ano̧mȩdida' quëna̧ jo̧rȩtarëremȩdejȩ Davirea̧ judi pio judiri ja̧mȩ pio ju̧i̧ chjiari? Yo̧chji̧coe ⁠—⁠yo̧a̧dejȩrȩ Jechu judi.

46Jabo Jechu judi ja̧di ta̧rëri̧ dëbë yo̧a̧ oaiä, cjäri̧ madirȩ, dëbë yo̧tärea̧ ji̧ dëbë yo̧rea̧ dadëji̧ri̧rȩ cjapi maearë cjiadiärëreji̧ri̧dirȩ. Ado pio jiro dori pio judiri yurori, jabechji̧ pumȩ ütëborë uapaji̧ri̧pea̧dirȩ ado chjereno̧ iëno̧ë ta̧rëpea̧ ji̧. Jabechji̧ eami̧rȩ ado chjereno̧ puëräpȩ choë cjatämi̧ dari̧ cjiapea̧ oa iëno̧ë ta̧rëtärea̧ ji̧, cjäri̧ madirȩ, iëno̧ë ta̧rëdëri̧ cjiaji̧ri̧pea̧diro̧jo̧ȩ, jabo cjapi̧ maeari̧ cjiadiärëreji̧ri̧dirȩ.

Currently Selected:

Mateo 22: Pume

Highlight

Copy