Mateo 21

Jechu judi Jerucharȩräpȩ go̧düdäräa̧mȩ oa, ma̧ chiadëri̧ cjiaji̧ri̧rȩ darëreji̧ri̧diro̧jo̧ȩ pumȩ judiro̧

Marco 11:1-11; Uruca 19:28-40; Juan 12:12-19

1Ado Jechu judi jibëa̧ jadü pio ji̧ri̧ nö̧ta Jerucharȩ bë ma̧ri̧ queri̧räpȩ go̧düdäräa̧rä, judiro̧ Orivo quȩmȩ ya̧mi̧räpȩ go̧düdäräa̧rä, jabechji̧ go̧düdärärëreji̧ri̧dirȩ Betage quȩmȩ bë ma̧ri̧ boi̧chji̧räpȩ. Ado pio judiri jibëa̧ jadü yo̧a̧ri̧ oa yabo jätä eamȩrȩ chjadürëremȩdejȩrȩ Jechu judi. 2Ja̧di ta̧rëri̧ yo̧mȩrȩ chjadürëremȩdejȩrȩ:

⁠—⁠Danȩrȩ, ji̧dë u̧i̧ yabo jächji̧vä ⁠—⁠yo̧a̧dejȩrȩ⁠—⁠. Bë ma̧ri̧ boi̧chji̧räpȩ yabo jächji̧vä. Ado ju̧ri̧pȩ go̧düdärä ëte, chjaodëri̧ daeji̧ri̧renȩro̧jo̧ȩ buro pëi̧ chja oa, yura̧ oa cjiamȩ oa. Arayi̧ yuroro cjiamȩ oa daeji̧ri̧renȩro̧jo̧ȩ. Jabechji̧ yo̧a̧ri̧bo oa jarëno̧ ëte, mu̧i̧ ma̧na̧chji̧jȩrȩ. 3Ado eami̧ pumȩrȩ pio dibëiä iëno̧ë ta̧rërä judi, “¿tjana̧pea̧ oa jare ëte mu̧i̧ baärenȩro̧jȩrȩ buro pio ji̧ri̧?” iëno̧ë ta̧rërä judi, jabechji̧, ja̧di ta̧rëri̧ dëbë yo̧chji̧jo̧ȩ: “Danȩ, Ano̧mȩ pio judi chjadüa̧ oa jana̧rea̧ro̧jȩrȩ buro ji̧ri̧. Eadejȩrȩ.” Aja̧, ja̧di ta̧rëri̧ yo̧eji̧ri̧renȩro̧jo̧ȩ. Ado dibë iëno̧ë ta̧rëmȩ judi pio ju̧i̧ ta̧rëa̧ oaiä, jabechji̧ chjaodëri̧ mu̧i̧ ma̧na̧rea̧ yürüpadidibe. Aja̧ jäeno̧chji̧vä ⁠—⁠yo̧a̧dejȩrȩ.

4Jabechji̧ ja̧di dari̧ japamȩrȩ chjadürëremȩdejȩrȩ Jechu judi jibëa̧ jadü ji̧ri̧, yo̧a̧ri̧ oa. Jabo ¿tjana̧ ju̧i̧iä chjadürëremȩdejȩrȩ? Tjana̧ ju̧i̧iädë, jabechji̧ Ütë tjamo̧ ja̧ ma̧ȩ üdë tjamo̧i̧ cjiari̧ cjiadiäpea̧ oa, chjadürëremȩdejȩrȩ. Danȩrȩ, Ütërë ea jana̧ chjadüa̧ oa ni̧bämȩ pio judi no̧mȩ tjamo̧ri ja̧ go̧ȩparëremȩde Jechu judi burorä buë chapea̧ pio ju̧i̧ chjiari. Ado judi peadëri ja̧ go̧ȩparërea̧ ma̧ȩ pio judi tjamo̧i̧ cjiari̧ cjiadiäpea̧ oa, jabechji̧ ja̧di dari̧ chjadürëremȩdejȩrȩ jibëa̧ jadü ji̧ri̧. Danȩrȩ, ja̧di ta̧rëri̧ jabërä go̧ȩpea̧ oa cjiarëremȩde ma̧ȩ üdë:

5“Yo̧e jächji̧jȩrȩ Jerucharȩräpȩ cjo̧ro̧ji̧ri̧ pio ji̧ri̧. Danȩrȩ, dibëa̧ Ütë pio judi, ütë cjo̧ro̧mȩmi̧ da pio judi ma̧na̧didibe. ‘Bomi̧ daquëda, yaboräpȩmo̧diämȩmi̧ dari̧ japadëmȩquëda, o ji̧ri̧ u̧i̧ ba chiadëquëda’ quëna̧ jo̧rȩtamȩrȩ ma̧na̧didibe buro boi̧chji̧ ja̧ putu juro buë chamȩrȩ, ba chiadëmȩmi̧ darë.”

Aja̧, ja̧di ta̧rëri̧ jabërä go̧ȩpea̧ oa cjiarëremȩde ma̧ȩ üdë Jechu judi buro boi̧chji̧rä buë chapea̧ pio ju̧i̧ chjiari.

6Ado Jechu judi jibëa̧ jadü yo̧a̧ri̧ pio ji̧ri̧iäpȩmo̧ ütarë yo̧a̧mi̧ jäeno̧a̧dirȩ ta̧rë japaji̧ri̧rȩ. 7Jabechji̧ arayi̧bo mu̧i̧ ma̧na̧diro̧jo̧ȩ. Ado ja̧dëa ji̧ jibëa̧ jadü pio judiro̧ jibëa̧ chjibora̧ pio ju̧ri̧ra̧ tjae yürüa̧diro̧jo̧ȩ buro pëi̧ chja ja̧ putu ju oa. Ado Jechu judi buë cha̧dejȩ. 8Ado pumȩ no̧i̧dërë pjatë a̧rȩri̧ mu̧i̧ mu̧i̧ a̧ra̧rëreji̧ri̧diro̧jo̧ȩ jibëa̧ chjibo oa järea̧ no̧ro. Ado o judiro̧ udimi̧ da oa budorëreji̧ri̧diro̧jo̧ȩ. Ado pio ju̧ri̧ra̧ peaja̧di tjaea̧diro̧jo̧ȩ no̧ oa. Aja̧, ja̧di dari̧ japarëreji̧ri̧dirȩ Jechu pio ju̧i̧ ba chia jo̧rȩta̧ tara. 9Ado Jechu ja̧ yaboi̧räpȩ jäji̧ri̧rȩ goae tarari̧ ëna̧diä ëna̧diä ni̧bärëreji̧ri̧dirȩ, duriräpȩ jäji̧ri̧borë. Ja̧di ta̧rëri̧ ëna̧diä ëna̧diä yo̧rëreji̧ri̧dirȩ:

⁠—⁠Pio yoaje chjacjiamȩri̧ ni̧bätäro̧jo̧ȩ, Davi pio judiri ja̧mȩ oa ⁠—⁠ëna̧diäa̧dirȩ⁠—⁠. Aja̧, Ütë tjamo̧ pio judi chjadüa̧ oa ma̧na̧mȩ pio ju̧i̧iäpȩmo̧ chjacjiamȩri̧ ni̧bätäro̧jo̧ȩ. Ado a̧dëräpȩ cjiamȩ Ütë pio judiborë chjacjiamȩri̧ ni̧bäa̧ oa cjiatäde ⁠—⁠ëna̧diäa̧dirȩ.

Aja̧, ja̧di ta̧rëri̧ ëna̧diä chjaorëreji̧ri̧dirȩ, Jechu pio ju̧i̧ ba chia jo̧rȩtaji̧ri̧rȩ.

10Ado Jechu judi Jerucharȩräpȩ yu̧a̧rä, bë nö̧ta oa cjo̧ro̧ji̧ri̧ pio judiro̧ ana̧ri̧ jo̧rȩtaji̧ri̧rpea̧dirȩ. “¿Jabo chjiade yodëje?” iëno̧ iëno̧ ta̧rë cjiarëreji̧ri̧dirȩ. 11Ado Jechu pio ju̧i̧ nö̧ta tai̧ji̧ri̧ pumȩ pio judiro̧ no̧i̧dërë dëbë yo̧rëreji̧ri̧diro̧jȩrȩ:

⁠—⁠Danȩrȩ, Ütërë ea jana̧ chjadüa̧ oa ni̧bämȩ pio judide ⁠—⁠dëbë yo̧a̧diro̧jȩrȩ⁠—⁠. Jechu pio judide. Nachare quȩmȩ bë ma̧ri̧rimȩde, Garirea̧ quȩmȩ chiririmȩ pio judide ⁠—⁠dëbë yo̧a̧diro̧jȩrȩ.

Jechu judi Ütë tjamo̧ ja̧ bëri pio judiri go̧dü tänȩrëremȩdejȩrȩ gatë tänȩji̧ri̧ pio ji̧ri̧

Marco 11:15-19; Uruca 19:45-48; Juan 2:13-17

12Ado Jechu judi yu̧a̧mȩrȩ yu̧a̧rëremȩde Ütë tjamo̧ ja̧ bëräpȩ. Ado gatë tänȩji̧ri̧ pio ji̧ri̧ damȩrȩ chjaodëri̧ baä tänȩrëremȩdejȩrȩ. Ado gatëji̧ri̧ pio ji̧ri̧bo baä tänȩrëremȩdejȩrȩ. Ado chërera̧ ano̧ mireji̧ri̧ pio ji̧ri̧ ja̧ mechja chjö̧na̧i̧ oa baë arë cürërëremȩdejȩrȩ. Ado jotoco pua oa gatë tänȩji̧ri̧ pio ji̧ri̧ ja̧ charea̧ oa peaja̧di baë arë cürërëremȩdejȩrȩ. 13Ado yo̧a̧dejȩrȩ Jechu judi:

⁠—⁠Danȩrȩ, ja̧di ta̧rëri̧ go̧ȩpea̧ oa cjiade ma̧ȩ üdë, Ütë tjamo̧ pio judi yo̧rërea̧ ma̧ȩ üdë. “Ca̧ bë üdë, pio coaiäpȩmo̧ ma ni̧bäpea̧ bëde." Aja̧, ja̧di ta̧rëri̧ yo̧diibe ma̧ȩ üdë ⁠—⁠yo̧a̧dejȩrȩ Jechu judi⁠—⁠. Jabo cjäri̧ manȩrȩ, pio mȩnȩro̧ ma̧i̧ dari̧ japea̧ oaiä, garüji̧ri̧ pio judiro̧ a̧doparea̧ bëmi̧ dapea̧de ⁠—⁠yo̧a̧dejȩrȩ.

14Ado Jechu judi Ütë tjamo̧ ja̧ bëräpȩ cjia̧rä, pumȩ judiro̧ ëba go̧düna̧ra̧ chjaorëreji̧ri̧diro̧jȩrȩ da cotoji̧ri̧ pio ji̧ri̧, tai̧rea̧ chiadëji̧ri̧ pio ji̧ri̧bo. Ado Jechu judi ütëbodärä oa chjaparȩrëremȩdejȩrȩ. 15Jabo tjamo̧ goë tuti ja̧bepaji̧ri̧ pio judiro̧ ërecjiaji̧ri̧rȩ dae cjiarëreji̧ri̧diro̧jo̧ȩ Jechu pio ju̧i̧, Moicherë go̧ȩparërea̧ ma̧ȩ oa a̧ra̧ano̧ji̧ri̧ pio judiro̧borë. Jabechji̧ pumȩ pio ji̧ri̧ jauëchjari̧ cjiari̧ na̧rȩrea̧ra̧ chjadëri̧ na̧rȩa̧ oaiä, chjapea̧ oa cjiaji̧ri̧ oa daea̧ oaiä, ado bori̧ pio judiro̧ Ütë tjamo̧ ja̧ bëräpȩ go̧a̧ji̧ri̧ oa ta̧rëa̧ oaiä, jabechji̧ ërecjia tjamo̧pe bagurarëreji̧ri̧dirȩ. Tjamo̧ davä. Bori̧ pio judiro̧ go̧a̧ oaiä, “Aja̧, Davi pio judiri ja̧mȩ üdë chjacjiamȩri̧ ni̧bäa̧ oa cjiatäde” yo̧ë cji̧däriä go̧a̧ oaiä, jabechji̧ ërecjia tjamo̧ji̧ri̧pea̧diro̧jo̧ȩ. 16Ado pio ju̧i̧iä yo̧a̧diro̧jo̧ȩ Jechu ju̧i̧:

⁠—⁠Danȩ, ¿ta̧rëdënȩ? Bori̧ judiro̧ pio mȩa chjiari go̧a̧ pio ju̧i̧ ¿ta̧rëdënȩ? ⁠—⁠iëno̧ë ta̧rëa̧diro̧jo̧ȩ.

⁠—⁠Dëdë, ta̧rërequedejȩrȩ ⁠—⁠yo̧a̧dejȩrȩ⁠—⁠. Ado mȩnȩro̧ Ütë tjamo̧ ja̧ ma̧ȩrä bori̧ pio ju̧i̧ chjiari cja̧rȩmȩ co ¿go̧ȩ ni̧bädëa̧nȩrȩ? ⁠—⁠dëbë iëno̧ë ta̧rëa̧dejȩrȩ⁠—⁠. Danȩrȩ, ja̧di ta̧rëri̧ yo̧de ma̧ȩ üdë jabërä go̧ȩpea̧ oa cjiarërea̧ ma̧ȩ pio judi:

“Pio mȩnȩ tänȩa̧ oaiä, bori̧ ja̧ yari pio judiri, jabë chuchu yö̧ cö jaraji̧ri̧ pio ji̧ri̧ ja̧ yari pio judiri cjitëpade pio mȩaiäpȩmo̧ chjacjiamȩri̧ ni̧bärea̧ üdë.”

Aja̧, ja̧di ta̧rëri̧ go̧ȩpea̧ oa cjiade ma̧ȩ üdë ⁠—⁠yo̧mȩrȩ dëbë yo̧rëremȩdejȩrȩ Jechu judi.

17Ja̧dëa ji̧ Jechu judi järëremȩde Betania quȩmȩ bë ma̧ri̧räpȩ. Jabechji̧ pio jiro pumȩ pio ji̧ri̧ a̧dë jämȩrȩ, Jerucharȩ quȩmȩ bë ma̧ri̧ri pio judiri go̧dümȩrȩ, mo̧e järëremȩde Betania quȩmȩ bë ma̧ri̧räpȩ, pio ju̧ri̧pȩ ano̧ mire mo̧a̧pea̧ oa.

Jechu judi gaparȩrëremȩdejȩ to oa jurarea̧ chiadë tara

Marco 11:12-14; Marco 11:20-22

18Ado dopea̧rä Jechu judi ado chjereno̧ baärëremȩde Jerucharȩräpȩ. Ta̧mȩcho̧ ja̧bomȩrȩ baärëremȩde. 19Ado jachi chja cjiamȩ to oa daea̧dejȩ, igera quȩmȩ to oa, jurarea̧ to oa. Järea̧ no̧ yuroro cjiamȩ oa daea̧dejȩ. Jabo cjäri̧ made, to queri̧räpȩ go̧düdäräa̧rä, pjö̧da maearë cjiamȩ oa darëremȩdejȩ, jurarea̧ chiadë maea oa. Ado chiadëa̧ oaiä, jabechji̧ ja̧di ta̧rëri̧ yo̧a̧dejȩ:

⁠—⁠Ado judiri jurarea̧ oa chiadëparenȩ bucho ana̧ ⁠—⁠yo̧a̧dejȩ.

Ado chjaodëri̧ gapea̧de to üdë.

20Ado jibëa̧ jadü judiro̧ to pio ju̧i̧ daea̧ oaiä, chjaodëri̧ gapea̧mȩ to pio ju̧i̧ irä daea̧ oaiä, jabechji̧ dacho bëremi̧ cjiami̧ dari̧ jo̧rȩtaji̧ri̧pea̧dirȩ, ana̧ri̧ jo̧rȩtaji̧ri̧rȩ. Ado iëno̧ë ta̧rëa̧diro̧jo̧ȩ Jechu ju̧i̧:

⁠—⁠Chia chia, chjaodëri̧ gapea̧de to üdë. ¿Tjana̧ ju̧i̧iä chjaodëri̧ gaüpea̧ oa cjiadiäa̧de pio jiro to üdë?

21Ado Jechu judi dëbë yo̧a̧dejȩrȩ:

⁠—⁠Tjana̧ ju̧i̧iädë, jabechji̧ pio cüdë quëna̧mȩrȩ yo̧a̧ oaiä, ja̧di dari̧ cjiadiäa̧de ⁠—⁠yo̧a̧dejȩrȩ⁠—⁠. Danȩrȩ, tjamo̧i̧ cjiari̧ yo̧requededibe. Mȩnȩro̧ Ütë tjamo̧ pio ju̧i̧ chjuari̧ quëna̧rä judi, chji̧ chjara chia jo̧rȩtarea̧ decjiari̧ quëna̧rä judi, ‘jabo cjäri̧ madida, tjamo̧ri̧ japadëpa jirodida’ quëna̧dërä judi, peaja̧dimi̧ dari̧ japapai̧ danȩrȩ to oa. Ado ju̧i̧ u̧i̧ ana̧mi̧ dari̧ japapai̧ danȩrȩ peaja̧di ⁠—⁠yo̧a̧dejȩrȩ⁠—⁠. Danȩrȩ, pio yoa ya̧mi̧ üdë ui ana̧räpȩmo̧ ju̧ri̧ aeno̧a̧ oa cjiatä earä judi, peaja̧dimi̧ dari̧ aeno̧a̧ oa cjiapai̧ dade, mȩnȩro̧ tjamo̧ri̧ quëna̧rä judi. 22Jabechji̧ mȩnȩro̧ Ütë tjamo̧ pio ju̧i̧iä eami̧ oa cjo̧dërä judi, ‘tjamo̧ri̧ yürüpadicoada’ quëna̧rä judi, jabechji̧ pio judi yürüa̧ oa mitërea̧ dapai̧ danȩrȩ ⁠—⁠yo̧mȩrȩ ni̧bä chjaorëremȩdejȩrȩ Jechu judi jibëa̧ jadü pio ji̧ri̧iäpȩmo̧, Ütë tjamo̧ pio ju̧i̧iäpȩmo̧ quëna̧ pio ju̧i̧ chjiari.

O judiro̧ dëbëpe chjaomi̧ dari̧ japarëreji̧ri̧diro̧jo̧ȩ Jechu pio ju̧i̧

Marco 11:27-33; Uruca 20:1-8

23Ado Jechu judi Ütë tjamo̧ ja̧ bëräpȩ ado yu̧a̧rä, taruparëremȩde pumȩ pio ji̧ri̧iäpȩmo̧ a̧ra̧ano̧pea̧ ji̧. Ado a̧ra̧ano̧mȩ oa, go̧düna̧ra̧rëreji̧ri̧diro̧jo̧ȩ tjamo̧ goë tuti ja̧bepaji̧ri̧ pio judiro̧, judio ütëti̧ pio judiro̧borë. Ado ja̧di ta̧rëri̧ yo̧ji̧ri̧rȩ iëno̧ë ta̧rëa̧diro̧jo̧ȩ:

⁠—⁠¿Chjia ja̧ ma̧ȩrä go̧dü tänȩremȩrenȩjȩrȩ gatë tänȩji̧ri̧ pio ji̧ri̧? ¿Chjiarë chjadüa̧ oa ja̧di dari̧ japamȩpea̧renȩ mȩnȩ? ⁠—⁠iëno̧ë ta̧rëa̧diro̧jo̧ȩ.

24Jabo Jechu judi dëbë yo̧tärea̧ ji̧ ja̧di ta̧rëri̧ yo̧a̧dejȩrȩ:

⁠—⁠Danȩrȩ, pio cüdëborë iëno̧ë ta̧rëparequededibe ⁠—⁠yo̧a̧dejȩrȩ⁠—⁠. Ado mȩnȩro̧ coa chjadëri̧ dëbë yo̧rä judi, peaja̧di chjadëri̧ dëbë yo̧parequededibe mȩnȩro̧ coa yo̧a̧ pio ju̧i̧. Jabo chjadëri̧ yo̧chji̧coe yaba̧. 25¿Chjia ja̧ ma̧ȩrä go̧ȩ cjaeä chudarëremȩdejȩrȩ pumȩ ji̧ri̧ Juan judi? Jabo Ütë tjamo̧ ja̧ ma̧ȩrä, jabo pumȩ ja̧ ma̧ȩrä? Chjadëri̧ yo̧chji̧coe ⁠—⁠yo̧mȩrȩ iëno̧ë ta̧rërëremȩdejȩrȩ Jechu judi.

Ado Jechu judi pio jibëiä iëno̧ë ta̧rëa̧ oaiä, chjaodëri̧ taruparëreji̧ri̧dirȩ jibëa̧ dëbëti̧ra̧ chia ni̧bä chjaopea̧ ji̧. "Aja̧, a̧ro̧rȩ dëbë yo̧rä judi, 'Aja̧, Juan judi Ütë tjamo̧ pio ju̧i̧ ja̧ ma̧ȩrä go̧ȩ cjaeä chudarëremȩde' dëbë yo̧rä judi, jabo cjäri̧ madiibe, pio ibëiäpȩmo̧ dëbë yo̧pai̧ dadiibe. "Jabo Ütë tjamo̧ ja̧ ma̧ȩrä chuda̧rä judi, ¿tjana̧ japatä Juan pio ju̧i̧ quëna̧dëa̧renȩro̧jo̧ȩ?" yo̧pai̧ da jirodiibe. 26Jabo cjäri̧ marea̧ro̧jo̧ȩ. A̧ro̧rȩ 'pumȩ ja̧ ma̧ȩrä go̧ȩ cjaeä chudarëremȩde' dëbë yo̧rä judi, peaja̧di uapai̧ dade. Jabechji̧ chjaodëri̧ ërecjiape bagapai̧ dadiro̧ibe pumȩ judiro̧. ‘Jabechji̧ Juan judi Ütërë ea jana̧ chjadüa̧ oa ni̧bämȩdida’ quëna̧ maeadiro̧jo̧ȩ pumȩ judiro̧. Pio ju̧i̧iä ja̧di ta̧rëri̧ dëbë yo̧rea̧mi̧dëde ⁠—⁠yo̧ji̧ri̧rȩ ni̧bä chjaorëreji̧ri̧dirȩ jibëa̧ dëbëti̧ra̧ chia.

27Ado judio ütëti̧ judiro̧ ja̧di ta̧rëri̧ ni̧bä chjaoa̧ oaiä, ja̧di ta̧rëri̧ yo̧ji̧ri̧rȩ dëbë yo̧a̧diro̧jo̧ȩ Jechu ju̧i̧:

⁠—⁠Cjäri̧ marea̧rȩ, 'pio ju̧i̧ ja̧ ma̧ȩrä goe cjaeä chudarëremȩdida' quëna̧ dabadërea̧rȩ ⁠—⁠yo̧a̧diro̧jo̧ȩ.

Ado pio ju̧i̧ ta̧rëa̧ oaiä, Jechu judi dëbë yo̧a̧dejȩrȩ:

⁠—⁠Ado mȩnȩro̧ coa chjadëri̧ dëbë yo̧dë tara, jabechji̧ pio cüdëborë chjadëri̧ dëbë yo̧dëparequededibe. “Aja̧, pio ju̧i̧ ja̧ ma̧ȩrä japarequede” yo̧tärea̧ ji̧, jabechji̧ yo̧dëparequededibe ⁠—⁠yo̧a̧dejȩrȩ.

Na̧rȩrea̧ ma̧ȩmi̧ dara̧ ni̧bä chjaorëremȩdejȩrȩ Jechu judi yo̧a̧ri̧ u̧ri̧ ëbamȩ pio ju̧i̧ chjiari

28Ja̧dëa ji̧ Jechu judi na̧rȩrea̧ ma̧ȩmi̧ dara̧ pio ju̧ri̧ra̧ ni̧bä chjaorëremȩdejȩrȩ judio ütëti̧ pio ji̧ri̧iäpȩmo̧, tjamo̧ goë tuti ja̧bepaji̧ri̧ pio ji̧ri̧iäpȩmo̧bo:

⁠—⁠Danȩrȩ, chjadëri ta̧rëchji̧coe, coa chjadëri̧ dëbë yo̧pea̧ oa ⁠—⁠yo̧a̧dejȩrȩ⁠—⁠. Danȩrȩ, cja̧rȩmȩ pumȩ judi jibëa̧ u̧ri̧ yo̧a̧ri̧ oa ëbarëremȩdejȩrȩ. Ado yabomȩ pio ju̧i̧ yo̧a̧dejȩ: "Danȩ ca̧ ja, pio yaba̧ domȩ oa uva tjadoräpȩ ja̧bepae jätä earequedemȩ" yo̧a̧dejȩ. 29Jabo jibëa̧ ja üdë dëbë yo̧mȩrȩ yo̧a̧dejȩ: "Cjäri̧ marequede, ja̧bepe jädëparequede." Aja̧, ja̧di ta̧rëri̧ yo̧mȩrȩ dëbë yo̧rëremȩdejȩ jibëa̧ ama̧i̧ pio ju̧i̧iäpȩmo̧. Jabo ja̧dëa ji̧ japamitë boi̧chji̧ chjätä ëte, jabechji̧ ano̧ mire jo̧rȩtamȩpea̧de. Ado ano̧ mire jo̧rȩta ëte, jabechji̧ ja̧bepaepea̧de jȩa nö̧rimȩ pio judi yo̧a̧mi̧. 30Ado jäjäa judi peaja̧di yo̧a̧dejȩ ado cja̧rȩmo̧ ja oa, durimȩ pio ju̧i̧. "Danȩ ca̧ ja, pio yaba̧ domȩ oa uva tjadoräpȩ ja̧bepae jätä earequedemȩ" yo̧a̧dejȩ. Ado pio ju̧i̧ ta̧rëa̧ oaiä, “Aja̧ ama̧i̧, ja̧bepe jäparequede” yo̧mȩrȩ dëbë yo̧rëremȩdejȩ. Jabo cjäri̧ madejȩ, ya maeara̧ yo̧rëremȩdejȩ. Tjamo̧ri̧ jädëa̧de. "Ja̧bepe jäparequede" yo̧mȩborë jädëa̧de. 31Aja̧ ca̧ pumȩ, pio jiro na̧rȩrea̧ ma̧ȩmi̧ da oa ni̧bä chjaorequededibe ⁠—⁠yo̧a̧dejȩrȩ⁠—⁠. Ado yo̧chji̧coe yaba̧. ¿Chjia tjamo̧rëremȩde jäjäarë yo̧a̧mi̧ tjamo̧i̧ cjiari̧ ta̧rëdiämȩ judi? ¿Jabo jibëa̧ ja yabomȩ pio judi, jabo jibëa̧ ja durimȩ pio judi? Chjadëri̧ yo̧chji̧coe ⁠—⁠yo̧mȩrȩ yo̧a̧dejȩrȩ.

Ado judiro̧ dëbë yo̧a̧diro̧jo̧ȩ:

⁠—⁠Chjia tjamo̧dë, danȩ, judi pearä yo̧a̧ pio judi chjadëri̧ ta̧rëdiäa̧dejȩ jäjäa pio ju̧i̧.

Ado pio ju̧i̧ ta̧rëa̧ oaiä, Jechu judi yo̧a̧dejȩrȩ:

⁠—⁠Aja̧, tjamo̧ri̧ yo̧renȩro̧coe. Ado yaba̧ tjamo̧i̧ cjiari̧ yo̧mȩrȩ yo̧requededibe peaja̧di. Jabechji̧ pio mȩnȩro̧ Ütërë yo̧a̧ chja̧oräpȩ chjaodëri̧ yu̧a̧tärea̧ ji̧, jabechji̧ chjai̧dëri̧ japaji̧ri̧ pio judiro̧ dibëa̧ yaboi̧ yu̧a̧rea̧ dapadirȩ ⁠—⁠yo̧a̧dejȩrȩ⁠—⁠. Jabechji̧ pearä yo̧a̧ joja pio judimi̧ dadirȩ judiro̧. Tjamo̧ davä. Ta̧rëdiäa̧mȩ joja pio judimi̧ dadirȩ. Ado pio ju̧i̧iä jabechji̧, domano̧ ja̧ oa chëre oa boaji̧ri̧ pio judiro̧, ado chjai̧dëri̧ japaji̧ri̧ pio judiro̧, jabechji̧ dibëa̧ yaboi̧ yu̧a̧rea̧ dapadirȩ Ütërë yo̧a̧ chja̧oeräpȩ ju̧ri̧. Ado danȩrȩ, ivi jini̧ro̧, chjai̧dëri̧ japaji̧ri̧ pio ji̧ri̧ro̧, jibëa̧ icjara oa oari pio ji̧ri̧iäpȩmo̧ ji̧dë ma yürü chjaoji̧ri̧ pio jini̧ro̧, chëre boapea̧ oa yürüji̧ri̧ pio jini̧ro̧borë dibëa̧ yaboi̧ yu̧a̧rea̧ dapani̧rȩ ⁠—⁠yo̧a̧dejȩrȩ⁠—⁠. 32Danȩrȩ, Juan judi, uirä go̧ȩ cjaeä chudamȩ pio judi chjadëri̧ dabapa tänȩrëremȩdidibe coëma cjiari̧ cjo̧ro̧pea̧ pio ju̧i̧ chjiari. Jabo cjäri̧ marenȩro̧jo̧ȩ, quëna̧dëa̧renȩro̧jo̧ȩ. Jabo dëdë, chjai̧dëri̧ japaji̧ri̧ pio judiro̧, domano̧ ja̧ oa chëre boareji̧ri̧ pio judiro̧, jabechji̧ ano̧ mire quëna̧ji̧ri̧pea̧diro̧jo̧ȩ. Ado jibëa̧ icjara oa yürü chjaoreji̧ri̧ pio jini̧ro̧borë quëna̧ji̧ri̧pea̧ni̧ro̧jo̧ȩ. Ado mȩnȩro̧ chjai̧dëri̧ japaji̧ri̧ pio ji̧ri̧ irä daea̧räbo, ano̧ mire jo̧rȩtaji̧ri̧ oa irä daea̧räbo, cjäri̧ manȩrȩ, ano̧ mire jo̧rȩtadëri̧ cjiarëreji̧ri̧nȩrȩ. Aja̧, pio mȩnȩro̧borë quëna̧tärea̧ ji̧, ano̧ mire quëna̧dëri̧ cjiarëreji̧ri̧nȩrȩ. Ado pio ju̧i̧iä jabechji̧, dibëa̧ yaboi̧ yu̧a̧rea̧ dapadirȩ ⁠—⁠yo̧mȩrȩ ni̧bä chjaorëremȩdejȩrȩ judio ütëti̧ pio ji̧ri̧iäpȩmo̧ Jechu judi.

Na̧rȩrea̧ ma̧ȩmi̧ dara̧ ni̧bä chjaorëremȩdejȩrȩ tjado oa jidaji̧ri̧ pio ji̧ri̧ chjiari

Marco 12:1-12; Uruca 20:9-19

33Jabo Jechu judi cjiadiädëmȩrȩ pio yoabo a̧de ni̧bä chjaorëremȩdejȩrȩ judio ütëti̧ pio ji̧ri̧iäpȩmo̧, ja̧di ta̧rëri̧ yo̧mȩrȩ:

⁠—⁠Danȩrȩ, ta̧rëchji̧vä ado cja̧rȩmo̧ na̧rȩrea̧ ma̧ȩmi̧ da oa ⁠—⁠yo̧a̧dejȩrȩ⁠—⁠. Danȩrȩ, cjo̧ro̧rëremȩde bë ana̧mȩ judi jibëa̧ chiri oa goamȩrȩ. Ado jiro pumȩ judi ‘jabechji̧ uva tjado oa japatäquëda’ quëna̧ jo̧rȩtamȩrȩ ja̧beparëremȩde. Ado tjado oa chjadëri̧ japa ëte, dai oa chjadëri̧ tüdürëremȩdejȩ ta̧dë ana̧ra̧ pio ju̧ri̧ra̧. Ado ja̧di dari̧ japa ëte, jabechji̧ ta̧dë ana̧ tjamo̧ oa cjarerëremȩdejȩ. Aja̧, puë ana̧pe bagari̧, urëdipe bagarea̧mi̧ dari̧ cjarerëremȩde puë oa. Jabechji̧ uva pio ju̧i̧ ui mape bagari̧ paero paero boa boa cjaeäpea̧ oa, japarëremȩdejȩ. Ado pio ju̧i̧ japa ëte, jabechji̧ uë tjamo̧räpȩ cjiamȩ jo̧ boi̧chji̧ oa cji̧därëremȩdejȩ peaja̧di. Jabechji̧ uë tjamo̧ri pio judiri ëteräpȩmo̧ chjadëri̧ dae cjiapea̧ oa cji̧därëremȩdejȩ. Ado chjö̧na̧i̧ oa chjadëri̧ japadärä ëte, jibëa̧ tjado oa ja̧bepatämi̧ cjiaji̧ri̧ pio ji̧ri̧ jida tänȩrëremȩdejȩrȩ. Jabechji̧ pio judiro̧ chëre boapea̧ oa, uva pio oaiä chëre boapea̧ oa, ado pio jȩaiäpȩmo̧bo uva oa yürüpea̧ oa jida tänȩrëremȩdejȩrȩ. Ado ja̧di dari̧ japa ëte, tjado ana̧mȩ pio judi baärëremȩde jachi tjamo̧ oa, ado cja̧rȩmo̧ chiriräpȩ cjo̧ro̧pea̧ oa. 34Jabo uva oa täarea̧ japamitë üdë ma̧na̧na̧ra̧rä, jabechji̧ jachiri pio judiri chjadürëremȩdejȩrȩ jibëa̧ mu̧i̧tjoi̧ pio ji̧ri̧ tjado ana̧mȩ judi. Aja̧, jibëa̧ tjadoräpȩ jäpea̧ oa, jibëa̧ uva pio ju̧i̧ mitëpea̧ oa, pio jȩaiäpȩmo̧ goa ma̧nȩ yürüpea̧ oa chjadürëremȩdejȩrȩ. 35Jabo cjäri̧ madiro̧jȩrȩ, judi chjadüa̧ mu̧i̧tjoi̧ pio judiro̧ tjadoräpȩ go̧düdäräa̧rä, uva tjado oa jidaji̧ri̧ pio judiro̧ chjadëri̧ jeatärea̧ ji̧, chjuari̧ mitërëreji̧ri̧diro̧jȩrȩ. Ado cja̧rȩmȩ oa ma̧i̧ dari̧ bide cjaeäa̧diro̧jo̧ȩ. Ado cja̧rȩmo̧ oa quȩ ma cjiari̧ ja̧bo tänȩa̧diro̧jo̧ȩ. Ado cja̧rȩmo̧ oa ta̧dëra̧ goae tarari̧ aea̧diro̧jo̧ȩ. 36Jabo tjado ana̧mȩ judi cjiadiädëmȩrȩ ado chjadürëremȩdejȩrȩ jibëa̧ mu̧i̧tjoi̧ pio ji̧ri̧, ado cja̧rȩmo̧ mu̧i̧tjoi̧ pio ji̧ri̧. Judi pearä chjadürërea̧ pio ji̧ri̧iä ji̧dë u̧i̧ ji̧ra̧ oa chjadürëremȩdejȩrȩ. Ado judiro̧ ju̧ri̧pȩ go̧düdäräa̧rä, peaja̧di dari̧ japarëreji̧ri̧diro̧jȩrȩ. A̧dë chjäte ma̧i̧ dari̧ japea̧diro̧jȩrȩ. 37Ado ja̧dëa ji̧ tjado ana̧mȩ judi jibëa̧ mu̧i̧tjoi̧ maea oa chjadürërea̧ ji̧, ano̧ mire chjadürëremȩdejȩ jibëa̧ ja pio ju̧i̧. ‘Jabo cjäri̧ madiro̧da, eami̧ oa japadaeji̧ri̧diro̧ju̧i̧da, jabechji̧ ca̧ ja tara, ba chia daeji̧ri̧diro̧ju̧i̧da’ quëna̧ jo̧rȩtamȩrȩ chjadürëremȩdejȩ. 38Jabo cjäri̧ madiro̧jo̧ȩ, pio ju̧i̧ daea̧rä, järi tjamo̧pea̧dirȩ pio ju̧i̧ ja̧bo tänȩpea̧ ji̧. ‘Jabechji̧ joja pio judidida, uva tjado ano̧ mire mitëmȩ pio judidida, jabechji̧ tjado ano̧mȩ pio judi ja̧boa̧rä, pio judi ano̧ mire mitëpadiji̧da, jabo pio a̧ro̧rȩ ano̧ mire mitërea̧ dapea̧ oa jabechji̧ ja̧bo tänȩtäreji̧ri̧a̧ro̧ju̧i̧da’ quëna̧ jo̧rȩtaji̧ri̧rȩ ni̧bä chjaorëreji̧ri̧dirȩ jibëa̧ dëbëti̧ra̧ chia. “Aja̧, ja̧bo tänȩtäro̧jo̧ȩ’ yo̧ji̧ri̧rȩ acji mitëa̧diro̧jo̧ȩ. 39Ado joja pio ju̧i̧ chjuari̧ mitë ëte, tjado dairäpȩ ëba järëreji̧ri̧diro̧jo̧ȩ. Ado ju̧ri̧pȩ chjaodëri̧ ja̧bo tänȩa̧diro̧jo̧ȩ ⁠—⁠yo̧mȩrȩ ni̧bä chjaorëremȩdejȩrȩ judiro ütëti̧ pio ji̧ri̧iäpȩmo̧ Jechu judi.

40⁠—⁠Ado yaba iëno̧ë ta̧rërequededibe ⁠—⁠yo̧dejȩrȩ⁠—⁠. Danȩrȩ, tjado ana̧mȩ pio judi jibëa̧ tjadoräpȩ ado chjereno̧ baärea̧ darä, ado pio jiro pumȩ chjai̧dë pio ji̧ri̧ darä, ¿tjana̧ japatäremȩdejȩrȩ pio jiro jidaji̧ri̧ pio ji̧ri̧? ⁠—⁠iëno̧ë ta̧rëa̧dejȩrȩ.

41Ado judio ütëti̧ pio judiro̧ dëbë yo̧rëreji̧ri̧diro̧jo̧ȩ Jechu ju̧i̧:

⁠—⁠Tjana̧ japadëtäremȩdejȩrȩ, jabechji̧ a̧dë chjäte chjai̧dëri̧ japaji̧ri̧ pio ji̧ri̧ chjaodëri̧ ja̧bo tänȩtäremȩdejȩrȩ ⁠—⁠dëbë yo̧a̧diro̧jo̧ȩ⁠—⁠. Ado pio ji̧ri̧ ja̧bo tänȩa̧ duri oa, jabechji̧ pumȩ chjadë maea oa ano̧ mire ja̧bepa tänȩtäremȩdejȩrȩ. Tjamo̧ davä. Pio jȩaiäpȩmo̧ chjadëri̧ ja̧bepë yürüpaji̧ri̧ pio ji̧ri̧ ano̧ mire ja̧bepa tänȩtäremȩdejȩrȩ. Aja̧, uva cho üdë joechjapea̧rä pio jȩaiäpȩmo̧ chjadëri̧ yürüpaji̧ri̧ pio ji̧ri̧, uva ba chjö̧na̧i̧ oa baë mitëdëpaji̧ri̧ pio ji̧ri̧, jabo pio jȩaiäpȩmo̧ tjomo̧mi̧ ba ano̧paji̧ri̧ pio ji̧ri̧, uipamȩ nö̧ta, uva ba oa pio jȩaiäpȩmo̧ chjadëri̧ chjarapë yürüpaji̧ri̧ pio ji̧ri̧ ano̧ mire ja̧bepa tänȩtäremȩdejȩrȩ ⁠—⁠yo̧ji̧ri̧rȩ dëbë yo̧a̧diro̧jo̧ȩ Jechu ju̧i̧ judio ütëti̧ pio judiro̧.

42⁠—⁠Aja̧, tjamo̧ri̧ cjiari̧ dëbë yo̧a̧renȩro̧coe ⁠—⁠yo̧a̧dejȩrȩ Jechu judi⁠—⁠. Jabo danȩrȩ, pio ju̧i̧ chjadëri̧ dabarä judi, ¿tjana̧ ju̧i̧iä chjadëri̧ dabadënȩrȩ pio yoa ma̧ȩ pio ju̧i̧ chjiari? ¿Tjana̧ ju̧i̧iä chjadëri̧ dabadënȩrȩ no̧mȩri ja̧ go̧ȩpea̧ oa cjiarërea̧ ma̧ȩ pio ju̧i̧ chjiari? ⁠—⁠iëno̧ë ta̧rëa̧dejȩrȩ⁠—⁠. Danȩrȩ, ja̧di ta̧rëri̧ go̧ȩpea̧ oa cjiarëremȩde ma̧ȩ üdë. Ta̧rëchji̧vä:

"Ta̧dë oa jiadarëreji̧ri̧diro̧jo̧ȩ jo̧ oa cji̧däji̧ri̧ pio judiro̧. Jabo judiro̧ jiadarërea̧ ta̧dë pio judi ba chia tjamo̧de. Jabechji̧ Ano̧mȩ pio judi tänȩa̧ oaiä, a̧dë chjäte ba chia tjamo̧pea̧de. Jabechji̧ tjamo̧ goë chamȩ ta̧dëpea̧de. Ado pio jiro ta̧dë pio ju̧i̧iämo̧i̧ chjua tjamo̧ri̧ cjiade bë üdë. Ado Ano̧mȩ pio judi ja̧di dari̧ japea̧ oaiä, jabechji̧ ya yabë cjiami̧ dari̧ jo̧rȩtarea̧rȩ."

⁠—⁠Aja̧ ca̧ pumȩ, ja̧di ta̧rëri̧ go̧ȩpea̧ oa cjiarëremȩde Ütë tjamo̧ ja̧ ma̧ȩ üdë ⁠—⁠yo̧a̧dejȩrȩ Jechu judi⁠—⁠. Jabo danȩrȩ, ¿tjana̧ oa yo̧rea̧de? ¿Tjana̧ ju̧i̧ chjiari yo̧rea̧de ta̧dë pio ju̧i̧ chjiari yo̧rea̧ ma̧ȩ üdë? 43Tjana̧ ju̧i̧ chjiaridë, jabechji̧ pio ju̧i̧ yo̧parequededibe ⁠—⁠yo̧a̧dejȩrȩ⁠—⁠. Danȩrȩ, mȩnȩro̧ judio pio judiro̧ peadë tjamo̧ri ja̧ mitëa̧ oa cjia marëreji̧ri̧nȩrȩ Ütërë yo̧a̧ chja̧oeräpȩ cjo̧ro̧pea̧ oa. Jabo cjäri̧ manȩrȩ, pio ju̧i̧ ja̧ chja̧oerä cjo̧ro̧dëri̧ cjiarëreji̧ri̧nȩrȩ. Ado pio ju̧i̧iä jabechji̧, ado cja̧rȩmo̧ pumȩ pio ji̧ri̧ ano̧ mire mitërëremȩdejȩrȩ Ütë tjamo̧ judi. Jabechji̧ pio ju̧i̧ ja̧ ma̧ȩrä tjamo̧ri̧ cjo̧ro̧tämi̧ cjiaji̧ri̧ pio ji̧ri̧, chjadë pio ju̧i̧ na̧rȩriä cjo̧ro̧tämi̧ cjiaji̧ri̧ pio ji̧ri̧ ano̧ mire mitërëremȩdejȩrȩ. 44Danȩrȩ, urëdi tjamo̧ oa jo̧rȩtachji̧vä pio yoa ma̧ȩ oa chjadëri̧ bapë ta̧rëpea̧ oa ⁠—⁠yo̧a̧dejȩrȩ⁠—⁠. Jabechji̧ eami̧ pumȩ judi pio jiro ta̧dërä gatëgua china̧därämi̧ dari̧ cjatärä judi, jabechji̧ ana̧ri̧ yarëa̧ oa cjiami̧ dari̧ cjiapade. Ado pio jiro ta̧dë üdë eami̧ pumȩ pio ju̧i̧ acji cjatämi̧ dari̧ japarä judi, pjatë ma cjiadiämi̧ dari̧ cjiadiäpade, pjo̧no̧ mape bagari̧ ⁠—⁠yo̧mȩrȩ ni̧bä chjaorëremȩdejȩrȩ Jechu judi pio jȩa chjiari, uapai̧ da tjamo̧ri̧ cjiapai̧ damȩ pio ju̧i̧ chjiari. Jabechji̧ pio judi ta̧dëmi̧ da tara, jabechji̧ ni̧bä chjaorëremȩdejȩrȩ pio jȩa chjiari.

45Jabo cjäri̧ madiro̧jo̧ȩ, tjamo̧ goë tuti ja̧bepaji̧ri̧ pio judiro̧ pio jiro na̧rȩrea̧ ma̧ȩmi̧ da pio ju̧i̧ ta̧rëa̧ oaiä, pjaricheo judiro̧ pio jiro ma̧ȩ oa ta̧rëa̧ oaiä, 'jabechji̧ pio ibë chjiari ni̧bä jirodiibëda, tjado jidaji̧ri̧ chjai̧dë pio judiro̧ jiroa̧ro̧da’ quëna̧ jo̧rȩtaji̧ri̧pea̧dirȩ. 46Ado pio ju̧i̧iä jënȩro̧ nö̧tarä yuro mitëtä järitarëreji̧ri̧diro̧jo̧ȩ Jechu pio ju̧i̧ chaäpea̧ oa. Jabo mitëtärea̧ ji̧, chjaodëri̧ uapa tjamo̧ji̧ri̧pea̧dirȩ pumȩ buba oaiä. Jabechji̧ Ütërë ea jana̧ chjadüa̧ oa ni̧bämȩrämi̧ cjiarëreji̧ri̧diro̧jo̧ȩ Jechu ju̧i̧. Ado pio ju̧i̧iä duriräpȩmo̧diämi̧ dari̧ cjiadiäa̧dirȩ, Jechu pio ju̧i̧ mitëtärea̧ ji̧.

Currently Selected:

Mateo 21: Pume

Highlight

Copy