Mateo 20

Ni̧bärëremȩde Jechu judi tjadoro ja̧bepaji̧ri̧ pio ji̧ri̧ chjiari

1Ado Jechu judi ji̧dë u̧i̧ ni̧bä chjaomȩrȩ ja̧di ta̧rëri̧ a̧de ni̧bärëremȩdejȩrȩ jibëa̧ jadü pio ji̧ri̧iäpȩmo̧:

⁠—⁠Pio yoa na̧rȩrea̧ ma̧ȩmi̧ da oa ni̧bä chjaotämi̧ cjiarequededibe Ütërë yo̧a̧ chja̧oerä cjo̧ro̧pea̧ japamitë pio ju̧i̧ chjiari ⁠—⁠yo̧a̧dejȩrȩ⁠—⁠. Danȩrȩ, chiri ana̧ oa goamȩ judi peadai̧rä cjitë ëte, järëremȩde ja̧bepaji̧ri̧ pio ji̧ri̧ na̧pea̧ oa, jibëa̧ uva tjadoro ja̧bepapea̧ oa. 2Ado ja̧bepaji̧ri̧ pio ji̧ri̧ dadäräa̧rä, ni̧bä chjaorëremȩdejȩrȩ ba ano̧pea̧ pio ju̧i̧ chjiari. Ado ni̧bä chjaoa̧ oaiä, ‘Aja̧ jabechji̧dida, do nö̧ta ja̧bepea̧ ba oa cja̧rȩmȩ chëre üdë, jabechji̧dida’ quëna̧ oaiä, jabechji̧ chjadürëremȩdejȩrȩ jibëa̧ tjadoräpȩ ja̧bepapea̧ oa. 3Ado tjado ana̧mȩ pio judi do üdë pea uëpea̧rä, ado järëremȩde. Ado gatë tänȩrea̧räpȩ jäa̧ ji̧, jabechji̧ dëbëdiärëremȩdejȩrȩ ado cja̧rȩmo̧ pumȩ ji̧ri̧, eami̧ oa japadëji̧ri̧ oa. 4Ado pio ji̧ri̧ daea̧ oaiä, yo̧a̧dejȩrȩ: "Danȩrȩ, mȩnȩro̧ ca̧ tjadoräpȩ ja̧bepatämi̧ cjiarä judi, jabechji̧ jächji̧vä" yo̧a̧dejȩrȩ. "Jabechji̧ pio mȩnȩro̧ ja̧bepea̧ ba oa, jabechji̧ chjadëri̧ ba ano̧parequededibe. Jächji̧vä" yo̧a̧dejȩrȩ. Ado judiro̧ pio ju̧i̧ ta̧rëa̧ oaiä, pio judiro̧borë jäeno̧a̧dirȩ ja̧bepapea̧ oa. 5Ado tjado ana̧mȩ judi ado chjereno̧ järëremȩde dorë tjomo̧ro. Ado ja̧dëa ji̧ ji̧dë duri oa ado chjereno̧ järëremȩde peaja̧di chjiaräpȩmo̧diäa̧rä, a las 3rä. Ado judi jäa̧rä, jabechji̧ daea̧dejȩrȩ ado cja̧rȩmo̧ pumȩ ji̧ri̧ gatë tänȩrea̧räpȩ ju̧ri̧. Eami̧ oa japadëji̧ri̧ oa, ja̧bepadëji̧ri̧ oa daea̧dejȩrȩ. Ado ja̧dëa ji̧ yo̧a̧dejȩrȩ: "Danȩrȩ, mȩnȩro̧ ca̧ tjadoräpȩ ja̧bepatämi̧ cjiarä judi, jabechji̧ jächji̧vä. Ado pio mȩnȩro̧ ja̧bepea̧ ba oa jabechji̧ chjadëri̧ ba ano̧parequededibe. Jächji̧vä" yo̧a̧dejȩrȩ. Ado judiro̧ pio ju̧i̧ ta̧rëa̧ oaiä, jäeno̧a̧dirȩ peaja̧di ja̧bepapea̧ oa. 6Ado ji̧tärä ado cja̧rȩmo̧ co järëremȩde tjado ana̧mȩ judi. Jabechji̧ ado cuchupë järëremȩde gatë tänȩrea̧ bëräpȩ. Ado pumȩ ji̧ri̧ daea̧ oaiä, ado cja̧rȩmo̧ pumȩ ji̧ri̧ daea̧ oaiä, eami̧ oa japadëji̧ri̧ oa daea̧ oaiä, ja̧di ta̧rëri̧ yo̧mȩrȩ iëno̧ë ta̧rëa̧dejȩrȩ: "Danȩrȩ, mȩnȩro̧ ja̧bepatärea̧ ji̧, jabomo̧ dae cjianȩrȩ. ¿Tjana̧ ju̧i̧iä do yoa eami̧ oa japarea̧ dadënȩrȩ mȩnȩro̧?" 7Ado dëbë yo̧a̧diro̧jo̧ȩ: "Jabechji̧ eami̧ tjado ana̧mȩ pio judi ibë tänȩdëa̧ oaiä, ibë ja̧beparea̧ yürüdëa̧ oaiä, jabechji̧ jabomo̧ dae cjiarea̧rȩ" dëbë yo̧a̧diro̧jo̧ȩ. Ado pio ju̧i̧ ta̧rëa̧ oaiä ja̧di ta̧rëri̧ yo̧a̧dejȩrȩ: "Ja̧dirä judi jabechji̧ ca̧ tjadoräpȩ ja̧bepapea̧ oa jäeno̧chji̧vä, uva tjadoräpȩ ju̧ri̧" yo̧a̧dejȩrȩ. Ado chjaodëri̧ jäeno̧a̧dirȩ. 8Ado ja̧dëa ji̧ gȩnȩpea̧rä, tjado ana̧mȩ judi yo̧rëremȩdejȩ jibëa̧ mu̧i̧tjoi̧ tjamo̧ pio ju̧i̧: "Danȩ, ëna̧diäeno̧jȩrȩ ja̧bepaji̧ri̧ pio ji̧ri̧" yo̧a̧dejȩ. "Ado ütëbodärä oa ba ano̧jȩrȩ. Tarupë ba ano̧jȩrȩ pio yabo ja̧bepareji̧ri̧ pio ji̧ri̧. Ji̧tärä tarupareji̧ri̧ pio ji̧ri̧ yabochja tarupë ba ano̧jȩrȩ. Ado pio ji̧ri̧ ba ano̧a̧ duri oa, pio ji̧ri̧ ja̧ yaboi̧ jana̧reji̧ri̧ pio ji̧ri̧ ba ano̧jȩrȩ. Ado pio ji̧ri̧ ba ano̧a̧ duri oa, pio ji̧ri̧ ja̧ yaboi̧ jana̧reji̧ri̧ pio ji̧ri̧ ba ano̧jȩrȩ. Ja̧di ma ja̧di ma ba ano̧tä earequedemȩ. Jaevä" yo̧a̧dejȩ. 9Ado tjado ana̧mȩ pio judi yo̧a̧mi̧ ütarë ba ano̧a̧dejȩrȩ ja̧bepaji̧ri̧ pio ji̧ri̧ jibëa̧ mu̧i̧tjoi̧ tjamo̧ judi. Ado ji̧tärä tarupë ja̧bepareji̧ri̧ pio judiro̧ cja̧rȩmȩ chëre mitërëreji̧ri̧dirȩ. 10Ado peadai̧rä tarupë ja̧bepareji̧ri̧ pio judiro̧ pio ju̧i̧ daea̧ oaiä, ‘Aja̧, ji̧tärä ja̧bepea̧ji̧ri̧ pio ji̧ri̧ cja̧rȩmȩ chëre oa yürüa̧diji̧ri̧da, ado pio a̧ro̧rȩ peadai̧rä jana̧ oaiä, jabechji̧ ji̧dë u̧i̧ yürüpa jiroibëda’ quëna̧ jo̧rȩtaji̧ri̧rȩ ma̧ chiadëri̧ cjiape baga̧dirȩ. Jabo cjäri̧ madejȩrȩ, tjado ana̧mȩ pio ju̧i̧ ja̧ mu̧i̧tjoi̧ tjamo̧ judi peadai̧rä tarupë ja̧bepareji̧ri̧ pio ji̧ri̧ ba ano̧a̧rä, peaja̧di cja̧rȩmȩ chëre maea oa ba ano̧rëremȩdejȩrȩ. 11Ado pio ju̧i̧ mitëa̧ oaiä, ana̧ri̧ jo̧rȩtaji̧ri̧pea̧dirȩ. Ado tjado ana̧mȩ pio ju̧i̧ ma̧ȩ goaedëti̧ oa ni̧bäji̧ri̧rȩ ja̧di ta̧rëri̧ ni̧bärëreji̧ri̧diro̧jo̧ȩ: 12"Jabo cjäri̧ marenȩibe" yo̧a̧diro̧jo̧ȩ. "Chjadëri̧ ba ano̧tärea̧ ji̧, chjadëri̧ ba ano̧dëa̧renȩibe. Danȩ, o judiro̧ ibëa̧ duri oa tarupea̧dirȩ. Pio a̧ro̧rȩ ja̧bepea̧mi̧ ja̧bepadëa̧dirȩ. Cja̧rȩmȩ ora maea oa ja̧bepea̧dirȩ, jabo a̧ro̧rȩ do yoa ja̧bepareji̧ri̧rea̧rȩ mo̧ërä. Jabo a̧ro̧rȩ ja̧di dari̧ ja̧bepea̧räbo, o ji̧ri̧iäpȩmo̧ ba ano̧a̧mi̧ ba ano̧a̧renȩibe. ¿Jabo tjana̧ ju̧i̧iä ji̧dë u̧i̧ ba ano̧dëa̧renȩibe? Jabechji̧ pio a̧ro̧rȩ a̧dë chjäte japamitë ana̧ri̧ ja̧bepea̧ oaiä, ji̧dë u̧i̧ ba ano̧a̧täremȩrenȩibe pio ji̧ri̧iä" yo̧a̧diro̧jo̧ȩ. 13Jabo tjado ana̧mȩ judi dëbë yo̧mȩrȩ yo̧a̧dejȩ tjamo̧ ni̧bämȩ pio ju̧i̧: "Danȩ omȩ, chjai̧dëri̧ japadëa̧requedemȩ" yo̧a̧dejȩ. "Jabechji̧ cüdë dibë pearä ja̧bepa tänȩa̧rä, jabërä ni̧bä chjaoa̧rea̧rȩ davä ba ano̧pea̧ pio ju̧i̧ chjiari. Ado mȩnȩro̧ coa yo̧a̧mi̧, cja̧rȩmȩ chëre maea oa yürüa̧requededibe. ‘Aja̧, cja̧rȩmȩ chëre üdë jabechji̧dida’ quëna̧ji̧ri̧rȩ yo̧a̧renȩro̧coe a̧ro̧rȩ pearä ni̧bä chjaoa̧rä. Ado pio ju̧i̧iä jabechji̧ ba ano̧a̧requededibe pio mȩnȩro̧ coa jabërä yo̧a̧mi̧. 14Jabechji̧ dibëa̧ chëre oa chjadëri̧ mitë ëte, baächji̧vä. Jabechji̧ pio dibë ba ano̧a̧mi̧ ba ano̧tämi̧ cjiarequedejȩrȩ o ji̧ri̧, ji̧dë duri oa tarupë ja̧bepareji̧ri̧ pio ji̧ri̧. 15Ado cüdë jo̧rȩtami̧ japapea̧ üdë ¿jabechji̧dëde? Cüdë ca̧ chërera̧ ca̧ea̧ ma̧na̧ri̧ jo̧rȩta̧mi̧ japarä judi, ¿jabechji̧ chjadëdëde? Dëdë, jabechji̧ chjadëde. Ado pio ju̧i̧iä cüdë o ji̧ri̧iäpȩmo̧ chjamȩrȩ yürürä judi, a̧dë chjäte ji̧ra̧ra̧ ba ano̧rä judi, jabechji̧ goëdëri̧ cjiape bagadëtäreji̧ri̧renȩro̧coe. Jabechji̧ ca̧ chëre tara, cüdë jo̧rȩtami̧ japarea̧ darequede" dëbë yo̧a̧dejȩ tjado ana̧mȩ judi ⁠—⁠yo̧mȩrȩ ni̧bä chjaorëremȩdejȩrȩ Jechu judi jibëa̧ jadü ji̧ri̧ na̧rȩrea̧ ma̧ȩmi̧ dara̧.

16Ado Jechu judi cjiadiärea̧ ma̧ȩ pio ju̧i̧ yo̧mȩrȩ ja̧di ta̧rëri̧ a̧de yo̧rëremȩdejȩrȩ:

⁠—⁠Ado pio ju̧i̧iä yo̧requededibe ⁠—⁠yo̧a̧dejȩrȩ⁠—⁠. Jabechji̧ duriräpȩ cjiami̧ dari̧ cjiaji̧ri̧ pio judiro̧ yaboräpȩmo̧ ano̧ mire cjiadiämi̧ dari̧ cjiapadirȩ. Ado yaboräpȩ cjiaji̧ri̧ pio judiro̧ duriräpȩmo̧ ano̧ mire cjiadiämi̧ dari̧ cjiadiäpadirȩ. Jabechji̧ ba chiadëmi̧ dari̧ cjiarëreji̧ri̧ pio judiro̧ ano̧ mire ba chiaji̧ri̧mi̧ dari̧ cjiapadirȩ. Ado ba chiami̧ dari̧ cjiarëreji̧ri̧ pio judiro̧ ano̧ mire ba chiadëpe bagami̧ dari̧ cjiadiäpadirȩ. ⁠—⁠yo̧mȩrȩ a̧de yo̧rëremȩdejȩrȩ Jechu judi na̧rȩrea̧ ma̧ȩmi̧ dara̧ pio ju̧ri̧ra̧.

Jechu judi ado ni̧bärëremȩdejȩrȩ jënȩ ja̧bopea̧ pio ju̧i̧ chjiari

Marco 10:32-34; Uruca 18:31-34

17Ado Jechu judi Jerucharȩ bë ma̧ri̧räpȩmo̧ baämȩrȩ baärëremȩde jibëa̧ jadü pio ji̧ri̧ nö̧ta, pumȩ buba pio ji̧ri̧ nö̧ta. Jabo jibëa̧ jadü pio ji̧ri̧mo̧i̧ ni̧bä chjaotämi̧ cjiamȩrȩ yabo a̧dë järëreji̧ri̧diro̧jȩrȩ o ji̧ri̧, pio judiro̧mo̧rȩ ni̧bä chjaopea̧ oa. Jabechji̧ 12 pio ji̧ri̧mo̧i̧ ni̧bä chjaotämi̧ cjiarëremȩdejȩrȩ. Ado ji̧dë u̧i̧ jachi chja oa baäji̧ri̧rȩ ja̧di ta̧rëri̧ ni̧bä chjaorëremȩdejȩrȩ:

18⁠—⁠Danȩrȩ, Jerucharȩräpȩ baäparea̧rȩ ⁠—⁠yo̧a̧dejȩrȩ⁠—⁠. Ado ju̧ri̧pȩ mitëpadiro̧coe, Pumȩrȩ Ara̧ Tjamo̧ pio ju̧i̧. Tjamo̧ davä, mitëpadiro̧coe tjamo̧ goë tuti ja̧bepaji̧ri̧ pio ji̧ri̧ ja̧ dëbëräpȩ cjiapea̧ oa, Moicherë go̧ȩparërea̧ ma̧ȩ oa a̧ra̧ano̧ji̧ri̧ pio ji̧ri̧ ja̧ dëbëräpȩ cjiapea̧ oa. Jabechji̧ pio coa ütarë dapea̧ oa mitëpadiro̧coe, pio coa ütarë ta̧rëpea̧ oa. Ado pio coa ütara̧ duri oa, jabechji̧ ‘ja̧bo tänȩpea̧dida’ quëna̧ jo̧rȩtaji̧ri̧rȩ yo̧padirȩ pio coa chjiari. 19Jabechji̧ yürüpadiro̧coe judiodë pio ji̧ri̧iäpȩmo̧ judiro̧ pio coaiäpȩmo̧ airi̧ cjia airi̧ cjia chjaocjiapea̧ oa. Tjamo̧ davä. Judiodë pio judiro̧ coa babui̧ra̧ bide cjaeäpea̧ oa, judiro̧ pio coa toro cji̧dä ëte ja̧bo tänȩpea̧ oa, yürüpadiro̧coe pio ji̧ri̧iäpȩmo̧. Jabo danȩrȩ, tjarari̧ do chjätä ëte, ado chjereno̧ bëdüparequede ⁠—⁠yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi, jënȩ ja̧bopea̧ pio ju̧i̧ chjiari.

Chebedeo ja̧ iei̧ pio jini̧ cjo̧dera̧tea̧nȩjȩ Jechu pio ju̧i̧iä jibëa̧ u̧ri̧ pio ji̧ri̧ chjiari

Marco 10:35-45

20Ja̧dëa ji̧ Chebedeo ja̧ u̧ri̧ pio judiro̧, Santiago pio judi, ado Juan pio judi go̧düdärärëreji̧ri̧dirȩ Jechu pio ju̧i̧iäpȩ. Pio jibë arayi̧ pio ji̧ nö̧ta go̧düdäräa̧dirȩ. Ado pio ji̧ri̧ arayi̧ pio jini̧ Jechu pio ju̧i̧iäpȩmo̧ ba chia daea̧ oaiä, ju chatura̧ cjiadärärëreyi̧nȩ ju̧i̧ ja̧ dëbëräpȩ. Ado ju chatura̧ cjiadäräa̧yi̧rȩ cjo̧dëtämi̧ cjiarëreyi̧nȩjȩ.

21Ado pio jȩaiä cjo̧dëtämi̧ cjiayi̧ pio ji̧ damȩrȩ yo̧a̧dejȩ Jechu judi:

⁠—⁠¿Tjana̧ eamȩ?

Ado ja̧di ta̧rëri̧ yo̧a̧nȩjȩ Jechu ju̧i̧:

⁠—⁠Tjana̧ eadë, jabechji̧ cjiadiäa̧ japamitërä mȩnȩ tjamo̧ yo̧mȩrȩ cjo̧ro̧rä, pumȩ judiro̧ ütëbodärärë na̧ chja̧oerämo̧ cjo̧ro̧rä, jabechji̧ ca̧ u̧ri̧ yo̧a̧ri̧borë na̧ yuroro chatä earequedejȩrȩ ⁠—⁠yo̧a̧nȩjȩ⁠—⁠. Cja̧rȩmȩ üdë na̧ mu̧i̧ chjuari pio judiri chatä eareconȩ. Ado cja̧rȩmo̧ üdë, jabechji̧ cja̧ȩta̧ra̧ pënȩri chatä eareconȩ. Pio ju̧i̧ jo̧rȩtayi̧rȩ cjo̧dërequedemȩ ⁠—⁠yo̧a̧nȩjȩ.

22Jabo Jechu judi pio ji̧iä ta̧rëa̧ oaiä, jabechji̧ iei̧ pio ji̧iäpȩmo̧ dëbë yo̧dëa̧dejȩ. Jabechji̧ arayi̧ ja̧ u̧ri̧ pio ji̧ri̧ chjiari goë cjo̧dë yürüyi̧ pio ji̧iäpȩmo̧ dëbë yo̧dëa̧dejȩ, jabo ja̧ u̧ri̧ pio ji̧ri̧iäpȩmo̧ yo̧a̧dejȩrȩ Juan pio ju̧i̧iäpȩmo̧, Santiago pio ju̧i̧iäpȩmo̧bo, ja̧di ta̧rëri̧ yo̧mȩrȩ:

⁠—⁠Jabo cjäri̧ manȩrȩ ⁠—⁠dëbë yo̧a̧dejȩrȩ⁠—⁠, dibëa̧ ai̧ jini̧ pio coaiä goë cjo̧dë yürüa̧ pio ju̧i̧ chjiari tjamo̧ri̧ dabadëji̧ri̧nȩrȩ. Danȩrȩ, a̧dë chjäte ji̧ra̧ri̧ conȩda̧ oa cjiaparequede. Ado ca̧ yuroro chapaji̧ri̧ pio judiro̧borë ana̧ri̧ tarapadirȩ. ¿Ado ana̧ri̧ tarapea̧ ji̧ nö̧tanȩrȩ? ¿Dami̧ti̧ chjai̧dë oa chjätäpea̧ ji̧ nö̧tanȩrȩ? ¿Ju chianȩrȩ mȩnȩro̧ pio cüdë chjai̧dë oa chjätämi̧ dari̧ chjätäpea̧ oa? ⁠—⁠yo̧mȩrȩ iëno̧ë ta̧rëa̧dejȩrȩ Jechu judi.

Ado dëbë yo̧a̧diro̧jo̧ȩ Jechu ju̧i̧:

⁠—⁠Dëdë, pio mȩnȩ chjai̧dë oa chjätämi̧ dari̧ chjätäpai̧ darea̧rȩ peaja̧di ⁠—⁠dëbë yo̧a̧diro̧jo̧ȩ.

23Ado Jechu judi dëbë yo̧a̧dejȩrȩ:

⁠—⁠Jabechji̧ pio cüdë chjai̧dë oa chjätämi̧ dari̧ chjätäpanȩrȩ peaja̧di, gito ana̧ri̧ taraji̧ri̧rȩ. Jabo danȩrȩ, ütëbodärärë ca̧ chja̧oerä cjo̧ro̧pea̧ japamitërä, jabechji̧ cüdë pio dibë ca̧ yuroro cha tänȩrea̧mi̧dërequededibe ⁠—⁠yo̧a̧dejȩrȩ⁠—⁠. Jabechji̧ pio cüdë ma ja̧didë jabo ca̧ Ama̧i̧ pio judide. Aja̧, pio judimo̧rȩ tänȩa̧ oa chapadirȩ ca̧ yuroro chapaji̧ri̧ judiro̧. Jabechji̧ ca̧ Ama̧i̧ judi jibëa̧ ma̧na̧ri̧ jo̧rȩtamȩrȩ mitëa̧ pio judiro̧mo̧rȩ chapadirȩ ca̧ yuroro ⁠—⁠yo̧mȩrȩ yo̧a̧dejȩrȩ.

24Ado japamitë chjätä ëte Jechu ja̧ jadü judiro̧ orë jibëa̧ pumȩ pio ji̧ri̧iäpȩmo̧ goëdëri̧ cjiape bagarëreji̧ri̧diro̧jȩrȩ. Jabechji̧ judiro̧ japea̧ pio ju̧i̧ chjiari ta̧rëa̧ oaiä, arayi̧ pio jini̧ Jechu pio ju̧i̧iä ja̧ u̧ri̧ pio ji̧ri̧ chjiari goë cjo̧dë yürütea̧ pio ju̧i̧ chjiari ta̧rëa̧ oaiä, goëdëri̧ cjiape bagarëreji̧ri̧diro̧jȩrȩ. Aja̧, Juan judi, Santiago judi, jibëa̧ cotoro chatä cjo̧dëa̧ yo̧a̧ oa ta̧rëa̧ oaiä, dëdë, goëdëri̧ cjiapea̧diro̧jȩrȩ jibëa̧ jadü judiro̧. 25Jabo pio ji̧ri̧ daea̧ oaiä, Jechu judi pio jȩaiäpȩ jana̧tä eamȩrȩ ëna̧diäa̧dejȩrȩ. Ado jana̧ji̧ri̧ oa ja̧di ta̧rëri̧ yo̧mȩrȩ ni̧bä chjaorëremȩdejȩrȩ:

⁠—⁠Danȩrȩ ca̧ pumȩ, dabanȩrȩ judiodë ütëti̧ pio ji̧ri̧ chjiari ⁠—⁠yo̧a̧dejȩrȩ⁠—⁠. Jabechji̧ jibëa̧ maea oa jo̧rȩtadirȩ. Jibëa̧ chja̧oerämo̧ cjo̧ro̧ tänȩtadiro̧jȩrȩ pumȩ ji̧ri̧, pio jibë jiade ta̧rërea̧ decjiari̧. Ado guardia tjamo̧ yo̧ji̧ri̧ pio judiro̧ peaja̧dimi̧ dari̧ japadirȩ. Jabechji̧ ta̧rëdiä tänȩtadiro̧jȩrȩ pumȩ ji̧ri̧, tüdüa̧mi̧ darä cjo̧ro̧ tänȩji̧ri̧rȩ. Ado pio jibë jiadaji̧ri̧ ji̧ri̧, jabechji̧ conȩdapai̧ dadiro̧jȩrȩ. Aja̧, ja̧di dari̧ cjo̧ro̧dirȩ judiodë ütëti̧ pio judiro̧. 26Jabo danȩrȩ, ja̧di dari̧ jo̧rȩtaji̧ri̧rȩ cjo̧ro̧dëtäreji̧ri̧nȩrȩ jabo jabechji̧, tjaoëpai̧ dari̧ cjo̧ro̧täreji̧ri̧nȩrȩ. Ado pio ju̧i̧iä yo̧requededibe ⁠—⁠yo̧a̧dejȩrȩ⁠—⁠. Eami̧ pumȩ judi tjamo̧ yo̧mȩmi̧ dari̧ cjo̧ro̧tämi̧ cjiarä judi, jabechji̧ jibëa̧ pumȩ pio ji̧ri̧ ja̧ mu̧i̧tjoi̧mi̧ dari̧ cjo̧ro̧täremȩde. 27Ado eami̧ pumȩ judi yabo baämȩmi̧ dari̧ cjo̧ro̧tämi̧ cjiarä judi, jabechji̧ gatëa̧ mu̧i̧tjoi̧mi̧ dari̧ cjo̧ro̧täremȩde. 28Danȩrȩ, pio coa cho̧rëdiä matäreji̧ri̧renȩro̧coe, Pumȩrȩ Ara̧ Tjamo̧ pio ju̧i̧. Ado cüdë a̧dëri pio judiri birë ma̧na̧rä, jabechji̧ pumȩ pio judiro̧ ca̧ mu̧i̧tjoi̧mi̧ da maearë cjo̧ro̧pea̧ oa birë ma̧na̧dërëremȩrequede. Pio judiro̧ coa ji̧dë ma a̧dopea̧ oa birë ma̧na̧dëa̧requede, jabo jabechji̧ pio ji̧ri̧ ja̧ mu̧i̧tjoi̧mi̧ dari̧ cjo̧ro̧pea̧ oa birë ma̧na̧requede cüdë. Tjamo̧ davä. Pio ji̧ri̧ chjadëri̧ a̧dopea̧ oa birë ma̧na̧requede. Ado pio ju̧i̧iä ca̧ icjara pio ju̧i̧ yürüparequede pumȩ ja̧ oa. Tjamo̧ davä. Pumȩ pio ji̧ri̧ chjiari ano̧ mire ja̧bopea̧ oa, pio judiro̧ chjai̧dëri̧ japea̧ pio ju̧i̧ chjiari tuti ba ano̧a̧ cjiapea̧ oa, jabechji̧ ca̧ icjara oa yürüparequede ⁠—⁠yo̧a̧dejȩrȩ.

Aja̧, ja̧di ta̧rëri̧ yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi Ütë tjamo̧ pio ju̧i̧ ja̧ mu̧i̧tjoi̧mi̧ dari̧ cjo̧ro̧pea̧ pio ju̧i̧ chjiari.

Da cotoreji̧ri̧ yo̧a̧ri̧ oa chjaparȩrëremȩdejȩrȩ Jechu judi

Marco 10:46-52; Uruca 18:35-43

29Ado Jechu judi jibëa̧ jadü pio ji̧ri̧ nö̧ta Jerico quȩmȩ bë ma̧ri̧ri pio judiri go̧düa̧rä, pumȩ bubarë cho̧rë järëreji̧ri̧diro̧jo̧ȩ. 30Ado da cotoji̧ri̧ pio judiro̧ yo̧a̧ri̧rȩ järea̧ no̧ yuroro charëreji̧ri̧dirȩ. Jabo yo̧a̧ oa ta̧rëa̧ oaiä, “Aja̧, Jechu judi no̧ oa chjätäde” yo̧a̧ oa ta̧rëa̧ oaiä, chjaodëri̧ taruparëreji̧ri̧dirȩ goae tarari̧ ëna̧diäpea̧ ji̧.

⁠—⁠Ano̧mȩ, cjäri̧ri̧ cjia daibe. Cjäri̧ri̧ cjia daibe Davi quȩmȩrea̧ ütë pio judiri ja̧mȩ pio ju̧i̧ ⁠—⁠yo̧ji̧ri̧rȩ ëna̧diäa̧dirȩ.

31Jabo pumȩ no̧i̧dërë cjapiri̧ cjiatä yo̧tea̧diro̧jȩrȩ, jabo cjäri̧ madiro̧jȩrȩ, ta̧rë ja̧bodëa̧diro̧jȩrȩ. Jabechji̧ ji̧dë u̧i̧ järipea̧ji̧ri̧rȩ to̧bari̧ ëna̧diä ëna̧diä cjiaji̧ri̧pea̧dirȩ:

⁠—⁠Ano̧mȩ, cjäri̧ri̧ cjia daibe ⁠—⁠ëna̧diäa̧dirȩ⁠—⁠. Jabechji̧ cjäri̧ri̧ cjia daibe ibë a̧dopea̧ oa. Davi quȩmȩrea̧ ütë pio judiri ja̧mȩ pio ju̧i̧iäpȩmo̧ yo̧rea̧ro̧mȩ ⁠—⁠yo̧ji̧ri̧rȩ ëna̧diäa̧dirȩ.

32Ado Jechu judi ëna̧diäa̧ji̧ri̧ pio ji̧ri̧ ta̧rëa̧ oaiä, cjiadiäa̧mȩrȩ dëbë ëna̧diäa̧dejȩrȩ:

⁠—⁠¿Tjana̧ oa japatä earenȩro̧coe? ⁠—⁠iëno̧ë ta̧rëa̧dejȩrȩ.

33Ado dëbë yo̧a̧diro̧jo̧ȩ:

⁠—⁠Danȩ Ano̧mȩ, areië yürüibe ibëa̧ dacho oa a̧ro̧rȩ chjadëri̧ darea̧mi̧ dari̧.

34Ado Jechu judi pio jiro oari pio ji̧ri̧ cjäri̧ri̧ cjia damȩrȩ pio ji̧ri̧iäpȩmo̧ jäeno̧a̧de. Ado ga̧re tara̧dejȩrȩ jibëa̧ dacho oa. Ado chjaodëri̧ chjapea̧ oa cjiadiäa̧dirȩ. Ado chjaodëri̧ daji̧ri̧pea̧dirȩ. Ado chjapea̧ oa cjiadiäa̧ oaiä, jabechji̧ cho̧rë järëreji̧ri̧diro̧jo̧ȩ pio jibë chjaparëremȩ pio ju̧i̧.

Currently Selected:

Mateo 20: Pume

Highlight

Copy