Mateo 15

Pjaricheo judiro̧ a̧ra̧ano̧a̧ üdë ji̧mo̧ baädëde Moicherë go̧ȩparërea̧ ma̧ȩ pio ju̧i̧ nö̧ta

Marco 7:1-13

1Ja̧dëa ji̧ pjaricheo judiro̧, ado Moicherë go̧ȩparërea̧ ma̧ȩ oa a̧ra̧ano̧ji̧ri̧ pio judiro̧borë go̧düna̧ra̧rëreji̧ri̧dirȩ Jechu pio ju̧i̧iäpȩ, Jerucharȩräpȩmȩ oa. Ado yo̧rëreji̧ri̧diro̧jo̧ȩ:

2⁠—⁠Danȩ, na̧ jadü judiro̧, ¿tjana̧ japacjivadiro̧? ⁠—⁠iëno̧ë ta̧rëa̧diro̧jo̧ȩ⁠—⁠. ¿Tjana̧ ju̧i̧iä jiadadiro̧jo̧ȩ ütëti̧rea̧ judiro̧ a̧ra̧ano̧rërea̧ ma̧ȩ pio ju̧i̧? Jabechji̧ judiro̧ jibëa̧ ichi oa chjadëri̧ joatärea̧ ji̧, judiro̧ jurabea yaboi̧ chjadëri̧ joatärea̧ ji̧, joadë madirȩ. ¿Tjana̧ japea̧ ju̧i̧iä chjadëri̧ joadë madirȩ? ⁠—⁠iëno̧ë ta̧rëa̧diro̧jo̧ȩ.

3Jabo Jechu judi dëbë yo̧rëremȩdejȩrȩ:

⁠—⁠¿Tjana̧ ju̧i̧iä jo̧rȩta maeanȩrȩ ütëti̧rea̧ judiro̧ a̧ra̧ano̧rërea̧ ma̧ȩ pio ju̧i̧? ⁠—⁠bapë iëno̧ë ta̧rëa̧dejȩ⁠—⁠. ¿Tjana̧ ju̧i̧iä jiadarenȩro̧jo̧ȩ Ütë tjamo̧ ja̧ ma̧ȩ pio ju̧i̧, ütëti̧rea̧ pio judiro̧ yo̧rërea̧ duri pio ju̧i̧ ta̧rëdiäpea̧ oa? 4Danȩrȩ, “Pio dibë nö̧riji̧ri̧ pio ji̧ri̧ ba chia da tjamo̧chji̧jȩrȩ” yo̧diibe Ütë tjamo̧ ja̧ ma̧ȩ üdë. Ado “Chjai̧dëri̧ ni̧bämȩ pio judi, pio jȩa nö̧rimȩ pio ju̧i̧ chjiari chjai̧dëri̧ ni̧bämȩ pio judi, ado pio jȩa arayi̧ pio ji̧ chjiari chjai̧dëri̧ ni̧bämȩ pio judi, jabechji̧ ja̧botäde” yo̧diibe ma̧ȩ üdë. 5Tjamo̧ davä ca̧ pumȩ, uri̧ judiro̧ Ütë tjamo̧ pio judi yo̧a̧mi̧ chjadëri̧ jidatäreji̧ri̧diro̧jȩrȩ pio jibë nö̧riji̧ri̧ pio ji̧ri̧. Chjadëri̧ a̧dotäreji̧ri̧diro̧jȩrȩ. Aja̧, jibëa̧ra̧ pio ju̧ri̧ra̧ chjadëri̧ a̧dotäreji̧ri̧diro̧jȩrȩ. Jabo cjäri̧ manȩrȩ ⁠—⁠yo̧a̧dejȩrȩ⁠—⁠, oëra̧ a̧ra̧ano̧nȩrȩ. Ado oëra̧ a̧ra̧ano̧ji̧ri̧rȩ ja̧di ta̧rëri̧ chi̧dëearenȩro̧jȩrȩ pumȩ ji̧ri̧: “Jabechji̧ eami̧ pumȩ üdë jibëa̧ chëre oa Ütë tjamo̧ ja̧ oa china̧chjari̧ tutirä judi, jibëa̧ pio ju̧i̧ Ütë tjamo̧ ja̧ oa china̧chjari̧ tutirä judi, jabechji̧ pio jȩa nö̧riji̧ri̧ pio ji̧ri̧ a̧dodëpea̧de” yo̧nȩrȩ. 6Jabo cjäri̧ manȩrȩ ⁠—⁠yo̧a̧dejȩrȩ⁠—⁠. Mȩnȩro̧ ja̧di ta̧rëri̧ yo̧a̧ oaiä, jabechji̧ jiadarenȩro̧jo̧ȩ Ütë tjamo̧ ja̧ ma̧ȩ pio ju̧i̧. Jabechji̧ “pio dibë nö̧riji̧ri̧ pio ji̧ri̧ ba chia dachji̧jȩrȩ” yo̧mȩ ma̧ȩ pio ju̧i̧ jiadarenȩro̧jo̧ȩ ja̧di dari̧ japea̧ oaiä. Jaboti̧ri̧ baä jo̧rȩtanȩrȩ. Jabechji̧ mȩnȩro̧ Ütë tjamo̧ ja̧ ma̧ȩ oa ba chia jo̧rȩtatärea̧ ji̧, ütëti̧rea̧ judiro̧ yo̧rërea̧ duri pio ju̧i̧mo̧i̧ ba chia jo̧rȩte chjaonȩrȩ. Ado ja̧di dari̧ jo̧rȩta oaiä, jabechji̧ badëparȩji̧ri̧mi̧ dari̧ japarenȩro̧jo̧ȩ Ütë tjamo̧ ja̧ ma̧ȩ pio ju̧i̧. 7Jabomo̧ quëna̧cji̧ quëna̧ japaji̧ri̧nȩrȩ mȩnȩro̧, Ütë tjamo̧ ja̧ ma̧ȩ oa tjamo̧ri̧ ba chia jo̧rȩtadëji̧ri̧rȩ. Ado danȩrȩ, pio dibë chjiari jabërä chjadëri̧ go̧ȩparëremȩde Ichaia judi. Ta̧rëchji̧vä:

8“Pio jiro pumȩ judiro̧ jibëa̧ ya maeara̧ chacjiamȩri̧ ni̧bädiro̧coe, jibëa̧ chji̧dë maeara̧. 9Jabechji̧ badë jo̧rȩtadiro̧coe, pio coaiäpȩmo̧ chjacjiamȩri̧ jo̧rȩtatärea̧ ji̧. Judiro̧ a̧ra̧ano̧a̧ üdë, teracaba maeade. Jabechji̧ pumȩrȩ a̧ra̧ano̧rërea̧ duri maea oa a̧ra̧ano̧dirȩ, ca̧ ma̧ȩdë maea oa.”

Aja̧, ja̧di ta̧rëri̧ go̧ȩparëremȩde Ichaia judi pjaricheo pio ji̧ri̧ chjiari, Moicherë go̧ȩparërea̧ ma̧ȩ oa a̧ra̧ano̧ji̧ri̧ pio ji̧ri̧ chjiari.

Ibë tjamo̧ri̧ chjai̧dëparȩmȩ pio ju̧i̧ chjiari ni̧bärëremȩdejȩrȩ Jechu judi

Marco 7:14-23

10Ado ja̧dëa ji̧, Jechu judi ëna̧diärëremȩdejȩrȩ pumȩ ji̧ri̧ pio jȩaiäpȩ jana̧tä. Ado yo̧a̧dejȩrȩ:

⁠—⁠Danȩrȩ, acji cjaeä ta̧rëchji̧vä. Mȩnȩro̧ ütëbodärärë acji cjaeä ta̧rëchji̧vä pio coaiäpȩmo̧ bapë ta̧rërea̧mi̧ dari̧ ⁠—⁠yo̧a̧dejȩrȩ⁠—⁠. 11Danȩrȩ, eami̧ pumȩ judi, jënȩ ichi oa joadë ëte jura̧ pio ju̧i̧iä, jabechji̧ pumȩ chjadëdëpe jädëpade Ütë tjamo̧ ju̧i̧iä. Tjamo̧ davä. Eami̧ pumȩ judi, jënȩ jura̧ pio ju̧i̧iä chjadëdëpe jädëpade, jabo jibëa̧ chji̧ri pio judiri cjitëmȩ jo̧rȩtarea̧ pio ju̧i̧iämo̧i̧ chjadëdëpe jäpade ⁠—⁠yo̧a̧dejȩrȩ.

12Jabo Jechu judi pumȩ pio ji̧ri̧iäpȩmo̧ ja̧di ta̧rëri̧ yo̧a̧ oaiä, jibëa̧ jadü judiro̧ yo̧a̧diro̧jo̧ȩ:

⁠—⁠Danȩ, mȩnȩ ja̧di ta̧rëri̧ yo̧a̧ oaiä, ana̧ri̧ jo̧rȩtaji̧ri̧rȩ cjiadiäa̧dirȩ pjaricheo judiro̧. Jabechji̧ mȩnȩ yo̧a̧ üdë goae tjamo̧dërëremȩde pio ji̧ri̧iä.

13Jabo Jechu judi dëbë yo̧a̧dejȩrȩ:

⁠—⁠Danȩrȩ, pumȩ judiro̧ ütëbodärärë tomi̧ da maeadirȩ ⁠—⁠yo̧a̧dejȩrȩ⁠—⁠. Ado eami̧ to üdë, ca̧ Ama̧i̧ Ütë judi na̧ra̧dëa̧ to pio judi, jabechji̧ mitë ëte mu̧i̧ coëmi̧ dari̧ japea̧ oa cjiapade, tacö̧ üdë dairäpȩmo̧ cjiari̧. 14Ado pio ju̧i̧iä yo̧requededibe ⁠—⁠yo̧a̧dejȩrȩ⁠—⁠. Ana̧ri̧ jo̧rȩtadëchji̧vä pjaricheo pio ji̧ri̧ chjiari. Jabechji̧ da cotoji̧ri̧mi̧ dari̧ cjiadirȩ. Ado da cotomȩ pio judi ado cja̧rȩmo̧ da cotomȩ pio ju̧i̧ yabo dariä baärä judi, cjäri̧ madirȩ, yo̧a̧ri̧borë puërä choë cjatäpai̧ datäreji̧ri̧dirȩ. Peaja̧dimi̧ dari̧ japapai̧ dadirȩ pjaricheo pio ji̧ri̧ cho̧rë jäji̧ri̧ judiro̧ ⁠—⁠dëbë yo̧a̧dejȩrȩ.

15Jabo Pedro judi, Jechurë ji̧dë yaboi̧rä yo̧a̧rea̧ pio ju̧i̧ jo̧rȩtamȩrȩ yo̧a̧dejȩ Jechu ju̧i̧:

⁠—⁠Jabo danȩ, mȩnȩ pio yabo yo̧a̧ pio ju̧i̧ chjiari, “Pumȩ judi jibëa̧ ichi oa joadë ëte jura̧ pio ju̧i̧iä chjadëdëpe jädëpade” yo̧mȩ ma̧ȩ pio ju̧i̧ chjiari jabechji̧ dabapa tänȩibe chjadëri̧ ⁠—⁠yo̧a̧dejȩ.

16Ado Jechu judi dëbë yo̧mȩrȩ yo̧a̧dejȩ:

⁠—⁠¿Ado pio mȩnȩborë jabë bapë ta̧rëdënȩ Pedro? 17Danȩ, yo̧requedemȩ ado ⁠—⁠yo̧a̧dejȩ⁠—⁠. Pumȩ judiro̧ eami̧ jurarea̧ oa jurarä, jabechji̧ birade acäräpȩmo̧. Ado judiri icjarari pio judiri go̧düde japamitë chjätä ëte. 18Jabo danȩ Pedro, eami̧ pumȩ ja̧ yari pio judiri go̧dümȩ üdë, ma̧ȩ chjádë yürüpea̧ üdë, ya̧pea̧ üdë, goadi goadi ya̧rea̧ üdë, jabechji̧ jibëa̧ chji̧ri pio judiri cjitëde. Ado pumȩ ja̧ chji̧ri pio judiri cjitëmȩ üdë, dëdë, chjadëdëpe jä tänȩpadejȩ davä pumȩ pio ju̧i̧. 19Jabechji̧ pumȩ ja̧ chji̧ri pio judiri tarupë cjitëde chjai̧dëri̧ jo̧rȩtarea̧ üdë. Tjamo̧ davä. O ji̧ri̧iäpȩmo̧ ja̧bo tänȩrea̧ üdë, ado cja̧rȩmo̧ ja̧ iei̧ ji̧ baë ëba mo̧a̧rea̧ üdë, jabë üi̧ ëbadëyi̧ pio ji̧ baë ëba mo̧a̧rea̧ üdë, garürea̧ üdë, ma̧ȩ chjádë yürürea̧ üdë, o ji̧ri̧iäpȩmo̧ aechide yo̧rea̧ üdë, jabechji̧ pumȩ ja̧ chji̧ri pio judiri tarupë cjitëde. 20Ado pumȩ ja̧ chji̧ri pio judiri go̧dümȩ jo̧rȩtarea̧ pio ju̧i̧iä, dëdë chjadëdëparȩa̧ oa cjiapade pumȩ judi. Jabo jibëa̧ ichi oa joadë ëte jurarä judi, cjäri̧ made, pio ju̧i̧iä chjadëdëpe jädëpade ⁠—⁠yo̧a̧dejȩ.

Aja̧, ja̧di ta̧rëri̧ yo̧mȩrȩ yo̧rëremȩdejȩ Jechu judi Pedro pio ju̧i̧, judi dabadëchea oa pumȩ ja̧ chji̧ pio ju̧i̧ chjiari, ichi joadë ëte jurapea̧ pio ju̧i̧ chjiari.

Judiodërë chjuari̧ quëna̧rëreyi̧nȩjȩ Jechu pio ju̧i̧

Marco 7:24-30

21Ado ja̧dëa ji̧ Jechu judi jibëa̧ jadü pio ji̧ri̧ nö̧ta pio jiro chiri oa a̧dë go̧dü ëte, ano̧ mire järëreji̧ri̧dirȩ Tiro quȩmȩ bë ma̧ri̧rȩ a̧rȩmȩ chiriräpȩ, Chido̧ quȩmȩ bë ma̧ri̧rȩ a̧rȩmȩ chiriräpȩ. 22Ado iei̧ cja̧rȩmȩrȩ, cananeo quȩmȩ pumȩ pio judiri ja̧yi̧ pio jini̧, judiodërë go̧düna̧ra̧rëreyi̧nȩ Jechu pio ju̧i̧iäpȩ. Ado to̧bari̧ ëna̧diäyi̧rȩ yo̧a̧nȩjȩ:

⁠—⁠Ano̧mȩ, cjäri̧ri̧ cjia dacoe ⁠—⁠yo̧a̧nȩjȩ⁠—⁠. Davi pio judiri ja̧mȩ oa yo̧requedemȩ. Danȩ, yaröca üdë ira̧diä cjaeäa̧dejȩ ca̧ jabi boi̧chji̧ ji̧. Ma̧i̧ dari̧ conȩdadejȩ. Cjäri̧ri̧ cjia dacoe ⁠—⁠yo̧a̧nȩjȩ Jechu ju̧i̧.

23Jabo jini̧ to̧bari̧ ëna̧diäa̧räbo, Jechu judi dëbë yo̧dëa̧dejȩ. Cjapi maearë cjiadiäa̧de. Ado ju̧i̧ ja̧ jadü pio judiro̧ yo̧a̧diro̧jo̧ȩ Jechu ju̧i̧:

⁠—⁠Jabechji̧ baä tänȩjȩ. Ji̧dë ma ëna̧diäni̧ibe. Baä tänȩjȩ ibë ji̧dë ma̧ tja̧reparȩchea oa ⁠—⁠yo̧tea̧diro̧jo̧ȩ.

24Jabo ja̧dëa ji̧ japamitë chjätä ëte, Jechu judi dëbë yo̧a̧dejȩ iei̧ pio ji̧iäpȩmo̧, judiodë pio ji̧iäpȩmo̧. Ja̧di ta̧rëri̧ yo̧mȩrȩ dëbë yo̧a̧dejȩ:

⁠—⁠Damȩ, judiodëmȩ ⁠—⁠yo̧a̧dejȩ⁠—⁠. Icharai pio judiri ja̧dëyi̧mȩ. Ado cüdë, jabechji̧ Icharairäpȩ cjo̧ro̧ji̧ri̧ pio ji̧ri̧mo̧i̧ a̧dopea̧ oa chjadüa̧ oa ma̧na̧quë ⁠—⁠yo̧a̧dejȩ⁠—⁠. Tjamo̧ davä. Dabadëpea̧ oa cjiami̧ dari̧ cjiaji̧ri̧ oveja pio ji̧ri̧mo̧i̧ a̧dopea̧ oa chjadüa̧ oa cjiarëremȩquë, Icharai pio judiri ja̧ji̧ri̧ pio ji̧ri̧mo̧i̧. Jabechji̧ Icharai pio judiri ja̧dëji̧ri̧ pio ji̧ri̧iäpȩmo̧ a̧dopea̧ oa chjadüa̧ oa cjiadërëremȩquë. Ado Icharai pio judiri ja̧dëyi̧mȩ mȩnȩ ⁠—⁠yo̧a̧dejȩ.

25Jabo iei̧ jini̧ cjiadiädëyi̧rȩ Jechu ja̧ queri̧räpȩ go̧düna̧ra̧ ëte, ju chatura̧ cjiadärärëreyi̧nȩ. Ado yo̧a̧nȩjȩ:

⁠—⁠Ano̧mȩ, a̧docoe.

26Jabo Jechu judi dëbë yo̧a̧dejȩ:

⁠—⁠Jabo jabechji̧dëdi ⁠—⁠yo̧a̧dejȩ⁠—⁠. Bori̧ ja̧ jurarea̧ oa aure pio ji̧ri̧iäpȩmo̧#15:26 Judio judiro̧ badë darëreji̧ri̧diro̧jȩrȩ judiodë pio ji̧ri̧. ‘Ba chiadëdiro̧da’ quëna̧ jo̧rȩtarëreji̧ri̧diro̧jȩrȩ. Ado pio ju̧i̧iä aure yo̧rëreji̧ri̧diro̧jȩrȩ. Jabechji̧ aure üdë judio pio ji̧ri̧iä badë marëremȩde. Cjari̧darëremȩdejȩrȩ. yürüpea̧ üdë jabechji̧dëdi ⁠—⁠dëbë yo̧a̧dejȩ.

Aja̧, ja̧di ta̧rëri̧ yo̧mȩrȩ dëbë yo̧rëremȩdejȩ iei̧ ji̧iäpȩmo̧ Jechu judi. Judio ja̧ oa judiodë pio ji̧ri̧iäpȩmo̧ yürüdëpea̧de yo̧mȩ ma̧ȩra̧ pio ju̧ri̧ra̧ dëbë yo̧rëremȩdejȩ.

27Jabo iei̧ jini̧ cjiadiädëyi̧rȩ dëbë yo̧a̧nȩjȩ:

⁠—⁠Tjamo̧ yo̧renȩ ca̧ Ano̧mȩ, jabo danȩ, aure pio judiro̧borë jurapai̧ dadiro̧jo̧ȩ a̧dë gu̧ro̧mȩ jurarea̧ oa, jibëa̧ ano̧mȩ ja̧ mechjari pio judiri cjatämȩ oa. Jabechji̧ cjäri̧ri̧ cjia dacoe ⁠—⁠dëbë yo̧a̧nȩjȩ.

28Ado Jechu judi pio ju̧i̧ ta̧rëa̧ oaiä, ja̧di ta̧rëri̧ dëbë yo̧a̧nȩjȩ:

⁠—⁠Dame iei̧, tjamo̧ yo̧ma̧coa. Jabechji̧ a̧dë chjäte ji̧ra̧di mȩnȩ quëna̧ üdë. Ado pio ju̧i̧iä mȩnȩ cjo̧dëa̧mi̧ japë yürüpacama̧ ⁠—⁠yo̧a̧dejȩ.

Ado pio ji̧ ja̧ jojabi pio jini̧ chjaodëri̧ chjapea̧ oa cjiadiärëreyi̧nȩ.

Jechu judi no̧i̧dë tjamo̧ oa chjaparȩrëremȩdejȩrȩ

29Ado Jechu judi pio judiri jämȩrȩ Garirea tja yuroro chjätärëremȩde. Ado judiri ya̧mi̧ uëräpȩ buamȩrȩ buarëremȩde. Ado bua ëte, charëremȩde. 30Ado pumȩ bubarë jädäräa̧diro̧jo̧ȩ ya̧mi̧ uëräpȩ chamȩ oa. Jabechji̧ gito ja̧boji̧ri̧ no̧i̧dë tjamo̧ oa ëba järëreji̧ri̧diro̧jȩrȩ Jechu pio judi chjaparȩpea̧ oa. Tai̧rea̧ chiadëji̧ri̧ pio ji̧ri̧, ju chjerea̧ oa cjiaji̧ri̧ pio ji̧ri̧, dacho cotoji̧ri̧ pio ji̧ri̧, ni̧bärea̧ chiadëji̧ri̧ pio ji̧ri̧, ado dami̧ti̧ gito oa ja̧boji̧ri̧ pio ji̧ri̧ ëba jädärärëreji̧ri̧diro̧jȩrȩ Jechu pio ju̧i̧iäpȩ. Ado ütëbodärä oa chjaparȩa̧dejȩrȩ. 31Ado pumȩ judiro̧ pio ju̧i̧ daea̧ oaiä, jabechji̧ chjacjiamȩri̧ ni̧bäji̧ri̧pea̧diro̧jo̧ȩ Ütë tjamo̧ pio ju̧i̧iäpȩmo̧, Icharai pio judiri ja̧ji̧ri̧ ja̧ Ütë pio ju̧i̧iäpȩmo̧. Jabechji̧ ni̧bärea̧ chiadërëreji̧ri̧ pio ji̧ri̧ ni̧bäji̧ri̧ oa daea̧ oaiä, ju chjerea̧ oa cjiarëreji̧ri̧ pio ji̧ri̧ chjapea̧ oa cjiaji̧ri̧ oa daea̧ oaiä, ado tai̧rea̧ dadërëreji̧ri̧ pio ji̧ri̧ tai̧ji̧ri̧ oa daea̧ oaiä, jabechji̧ chjacjiamȩri̧ jo̧rȩtaji̧ri̧rȩ ni̧bäji̧ri̧pea̧diro̧jo̧ȩ Ütë tjamo̧ pio ju̧i̧.

Jechu judi pumȩ ji̧ra̧ tjamo̧ oa jura tänȩrëremȩdejȩrȩ jibëa̧ jauëchjara̧

Marco 8:1-10

32Ja̧dëa ji̧ Jechu judi ëna̧diärëremȩdejȩrȩ jibëa̧ jadü ji̧ri̧. Ado yo̧a̧dejȩrȩ:

⁠—⁠Danȩrȩ ca̧ jadü, cjäri̧ri̧ cjia jo̧rȩtamȩrȩ darequedejȩrȩ pumȩ buba oa ⁠—⁠yo̧a̧dejȩrȩ⁠—⁠. Jabechji̧ tjarari̧ dori ja̧ ëba cjia̧diro̧coe, jabo eami̧ oa juradëa̧dirȩ. Ado judiro̧ no̧ro ju chiadëji̧ri̧rȩ cjatächea oa, dabadëtä bagami̧ dari̧ a̧rȩdärächea oa, jabechji̧ ta̧mȩcho̧ ja̧boji̧ri̧ oa baä tänȩdëri̧ cjiarequedejȩrȩ ⁠—⁠yo̧a̧dejȩrȩ.

33Jabo jibëa̧ jadü pio judiro̧ iëno̧ë ta̧rëa̧diro̧jo̧ȩ:

⁠—⁠¿Yö̧ta dari̧ ëba juratäreji̧ri̧rea̧ro̧jȩrȩ jiro pumȩ ji̧ri̧? Japarea̧ decjiade. Jabechji̧ pumȩ ji̧ra̧ tjamo̧dirȩ ado chiri tjoräpȩrea̧rȩ ji̧dëri̧. Jabechji̧ pio jiro pumȩ ji̧ri̧ tjamo̧ri̧ ëba jurarea̧mi̧dëde.

34Jabo Jechu judi bapë iëno̧ë ta̧rëa̧dejȩrȩ:

⁠—⁠¿Napai̧ jurarea̧ oa goanȩrȩ? ¿Napai̧ chja̧pe goanȩrȩ?

Ado dëbë yo̧a̧diro̧jo̧ȩ:

⁠—⁠Napai̧dë, ji̧ra̧dëde. Jabechji̧ 7 chja̧pe maea oa goarea̧rȩ. Ado ju̧i̧ uëri cho̧ jabëtari̧mi̧ oa goarea̧rȩ peaja̧di. Jabechji̧ jurarea̧ decjiade ⁠—⁠yo̧a̧diro̧jo̧ȩ.

35Ado ja̧dëa ji̧ daburo chatä yo̧rëremȩdejȩrȩ pumȩ ji̧ri̧ Jechu judi. 36Ado pio jiro chja̧pe 7 oa mitëmȩrȩ, cho̧bo mitëmȩrȩ ni̧bärëremȩdejȩ jibëa̧ Ama̧i̧ ju̧i̧. ‘Aja̧ jurarea̧ oa chjadëri̧ yürüa̧dibëda’ quëna̧ jo̧rȩtamȩrȩ ni̧bäa̧dejȩ. Ado ja̧di dari̧ japa ëte, mu̧i̧ quirëno̧a̧dejȩ chja̧pe oa. Ado ja̧di dari̧ japa ëte, chjarapë yürürëremȩdejȩrȩ jibëa̧ jadü pio ji̧ri̧, pio judiro̧ ano̧ mire chjarapë yürüpea̧ oa pumȩ buba oa. 37Ado ja̧dëa ji̧ pumȩ judiro̧ ütëbodärärë mairi̧ jurarëreji̧ri̧dirȩ. Ado judiro̧ jura̧ duri oa, cjiadiäa̧mȩ jurarea̧ pënȩi̧ oa mitëa̧diro̧jo̧ȩ. Taio ji̧ra̧ oa mitëa̧dirȩ, 7 taiorä tjuri cjia oa. 38Ado mairi̧ jurarëreji̧ri̧ judiro̧, jabechji̧ 4 mil oarirëreji̧ri̧dirȩ. Ado pio ji̧ri̧ uëri peaja̧di jurarëreji̧ri̧ni̧rȩ ivi jini̧ro̧, bori̧borë. 39Ado pumȩ buba pio judiro̧ juradärära̧rä, jabechji̧ baä tänȩrëremȩdejȩrȩ Jechu judi. Ado pio ji̧ri̧ baä tänȩa̧ duri oa, buarëremȩde chara oa. Ado baäa̧de Magada̧ quȩmȩ bë ma̧ri̧rȩ a̧rȩmȩ chiriräpȩ.

Currently Selected:

Mateo 15: Pume

Highlight

Copy