Juan 14

Jechu pio ju̧i̧iämo̧i̧ go̧düdärärea̧mi̧ dade Ama̧i̧ tjamo̧ ju̧i̧iäpȩ

1Ado Jechu judi, jibëa̧ jadü pio ji̧ri̧ ji̧dë u̧i̧ ni̧bä chjaomȩrȩ ja̧di ta̧rëri̧ a̧de yo̧rëremȩdejȩrȩ jabë mechjaräpȩ chaji̧ri̧ oa:

—Danȩrȩ, dibëa̧ chji̧ra̧ bücjüri̧ cjiadëchji̧vä —yo̧a̧dejȩrȩ—. Jabechji̧ Ütë tjamo̧ pio ju̧i̧ quëna̧chji̧jo̧ȩ. Pio coabo quëna̧chji̧coe. 2Danȩrȩ, ca̧ Ama̧i̧ ja̧ bë ana̧räpȩ ju̧ri̧ jo̧ tjo ji̧ra̧de. Ja̧di dari̧ cjiadërä judi, yo̧dëtäremȩrequededibe. Ado pio mȩnȩro̧ pio ju̧ri̧pȩ chjadëri̧ cjo̧ro̧pea̧ oa, jabechji̧ baärequede dibëa̧ jo̧ tjo pio ju̧i̧ chjadëri̧ jëdane yürüpea̧ oa. 3Ado cüdë dibëa̧ pio ju̧i̧ jëdano̧a̧ oa goarä, ado chjereno̧ jana̧parequede pio dibë ëba baäpea̧ oa, mȩnȩro̧ pio coadi cjiapea̧ oa, mȩnȩro̧ cüdë cjiamȩräpȩ cjiapea̧ oa. 4Dabanȩrȩ davä cüdë baäpea̧räpȩ. Ja̧dira̧ baämȩ no̧ pio ju̧i̧ dabanȩrȩ —yo̧a̧dejȩrȩ Jechu judi jibëa̧ jadü ji̧ri̧.

5Ja̧dëa ji̧ Toma judi yo̧a̧dejȩ:

—Ano̧mȩ, a̧ro̧rȩ dabadërea̧rȩ mȩnȩ baäpea̧räpȩ. Ado dabadë tara, ¿yö̧ta dari̧ go̧düdärärea̧ daparea̧rȩ?

6Ado Jechu judi ütëbo oa yo̧a̧dejȩrȩ:

—Danȩrȩ, Ütë tjamo̧ pio ju̧i̧iäpȩ baärea̧ no̧mi̧ darequede —yo̧a̧dejȩrȩ—. Pio coaiä tarupade coëma cjiari̧ jo̧rȩtarea̧ üdë. Cjo̧ro̧rea̧ yürümȩ pio judirequede. Pio coaiämo̧ go̧düdärärea̧mi̧ dade ca̧ Ama̧i̧rȩ cjiamȩräpȩ —yo̧a̧dejȩrȩ—. 7Mȩnȩro̧ pio coa tjamo̧ri̧ daba̧rä judi, daba̧täreji̧ri̧renȩro̧jo̧ȩ ca̧ Ama̧i̧ pio ju̧i̧bo. Jabo yaba̧ domȩri ja̧, cüdë dibë na̧e chiaparȩa̧ oaiä, jabechji̧ ca̧ Ama̧i̧ pio ju̧i̧bo dabarenȩro̧jo̧ȩ yaba̧. Peaja̧di daea̧renȩro̧jo̧ȩ.

8Jabo Pjeripe judi yo̧a̧dejȩ:

—Ano̧mȩ, chjadëri̧ na̧rȩibe Ama̧i̧ tjamo̧ pio ju̧i̧. Pio ju̧i̧mo̧i̧ japatä earea̧ro̧mȩ.

9Jabo Jechu judi dëbë yo̧a̧dejȩ:

—Chia chia, cüdë mȩa nö̧ta no̧mȩ tjamo̧ri ja̧ ëba cjo̧ro̧räbo, jabë tjamo̧ri̧ dabadërenȩque —yo̧a̧dejȩ—. Danȩ Pjeripe, pio coa daea̧mȩ judi, Ama̧i̧ tjamo̧ pio ju̧i̧bo daea̧dejȩ. Pio ju̧i̧iä, “Chjadëri̧ na̧rȩibe Ama̧i̧ pio ju̧i̧” yo̧rea̧mi̧dëde. 10Danȩ Pjeripe, ¿coa chjiari tjamo̧ri̧ quëna̧dënȩ? Danȩ, cja̧rȩmȩrequede ca̧ Ama̧i̧ pio ju̧i̧ nö̧ta. Ji̧mo̧ cjiaji̧ri̧rȩ cja̧rȩmȩrea̧rȩ. Ado pio ju̧i̧iä ca̧ea̧ ma̧na̧ri̧ jo̧rȩtamȩrȩ ni̧bädërequededibe. Jabechji̧ cüdë dibë ni̧bä chjaoa̧ üdë, ca̧ Ama̧i̧ pio judiri ma̧na̧mȩ ma̧ȩ maeade. Jabechji̧ ca Ama̧i̧ judi pio coadi cjiamȩrȩ ja̧bepade pio coaiä, jibëa̧ ma̧na̧ri̧ jo̧rȩtamȩrȩ. 11Jabechji̧ tjamo̧ri̧ quëna̧chji̧coe. Cüdë dibë yo̧a̧ ji̧, “Aja̧, ca̧ Ama̧i̧ pio ju̧i̧ nö̧ta cja̧rȩmȩrequede” yo̧a̧ ji̧, “Ji̧mo̧ cjiarea̧rȩ” yo̧a̧ ji̧, jabechji̧ quëna̧chji̧coe. Ado ca̧ ma̧ȩ oa quëna̧dërä judi, cüdë yo̧a̧ pio ju̧i̧iä quëna̧dërä judi, jabechji̧ cüdë dibë jauëchja cjiari̧ na̧rȩ chjaoa̧ pio ju̧i̧iä quëna̧täreji̧ri̧nȩrȩ. 12Danȩrȩ, tjamo̧i̧ cjiari̧ yo̧requededibe ca̧ pumȩ —yo̧a̧dejȩrȩ—. Pio coaiäpȩmo̧ quëna̧ji̧ri̧ judiro̧ pio cüdë japea̧mi̧ japarea̧ dapadirȩ. Ado cüdë japea̧ ju̧i̧ u̧i̧ ba chia oa japarea̧ dapadirȩ peaja̧di. Tjamo̧ davä. Cüdë japea̧ ju̧i̧ u̧i̧ ji̧ra̧ oa japarea̧ dapadirȩ. Jabechji̧ cüdë ca̧ Ama̧i̧ pio ju̧i̧iäpȩ baäpa tara, cüdë japea̧ ju̧i̧ u̧i̧ ba chia oa japarea̧ dapadirȩ. 13Ado mȩnȩro̧ pio coaiä eami̧ oa cjo̧dërä, ca̧ quȩrä cjo̧dërä, jabechji̧ japaparequededibe. Dëdë, ja̧di dari̧ japaparequede pumȩ judiro̧ Ama̧i̧ tjamo̧ pio ju̧i̧iäpȩmo̧ chjacjiamȩri̧ ni̧bäpea̧ oa. 14Jabechji̧ mȩnȩro̧ pio coaiä ca̧ quȩrä eami̧ oa cjo̧dërä judi, japajarequededibe —yo̧mȩrȩ ni̧bä chjaorëremȩdejȩrȩ Jechu judi jibëa̧ jadü pio ji̧ri̧iäpȩmo̧.

Jechu judi ni̧bärëremȩdejȩrȩ jibëa̧ jadü ji̧ri̧ Tjo tjamo̧ judi ma̧na̧pea̧ pio ju̧i̧ chjiari

15Ado Jechu judi jibëa̧ jadü pio ji̧ri̧ ji̧dë u̧i̧ ni̧bä chjaomȩrȩ ja̧di ta̧rëri̧ a̧de yo̧rëremȩdejȩrȩ:

—Danȩrȩ, mȩnȩro̧ pio coa earä judi, ta̧rëdiäpanȩrȩ cüdë yo̧a̧ pio ju̧i̧ —yo̧a̧dejȩrȩ—. 16Ado cjo̧dëparequede Ama̧i̧ tjamo̧ pio ju̧i̧iä pio dibëiäpȩmo̧ yürüpea̧ oa. Aja̧, ado cja̧rȩmo̧ a̧domȩ pio ju̧i̧ yürüpea̧ oa, pio cüdëmi̧ damȩ pio ju̧i̧ yürüpea̧ oa cjo̧dëpareconȩ. Ado pio jiro a̧domȩ pio judi bucho ana̧ ëba cjiapadidibe, dibë a̧dë baärea̧ decjiari̧. 17Danȩrȩ, Tjo tjamo̧ pio ju̧i̧ chjiari yo̧requededibe —yo̧a̧dejȩrȩ—. Jabechji̧ daba tänȩmȩde. Aja̧, Ütë tjamo̧ pio ju̧i̧ chjiari tjamo̧i̧ cjiari̧ baämȩ ma̧ȩ pio ju̧i̧ daba tänȩmȩde. Jabo chiriräpȩti̧ oa cjo̧ro̧ji̧ri̧ judiro̧ Tjo tjamo̧ ju̧i̧ chiarea̧mi̧dëdiro̧jo̧ȩ. Dabadëdiro̧jo̧ȩ. Jabechji̧ 'pio judi tjamo̧dida' quëna̧ dabadëdiro̧jo̧e. Ado pio ju̧i̧iä chiarea̧mi̧dëdiro̧joȩ. Jabo ja̧didënȩrȩ mȩnȩro̧. Jabechji̧ dabarenȩro̧jo̧ȩ pio dibëdi cjia tara. Jabo japamitë chjätä ëte, bëpapade dibëa̧ icjararä. 18Ado cüdë dibë a̧dë baärä, jabechji̧ dibëa̧ma̧i̧ cjiaji̧ri̧ oa a̧dë baädëparequededibe. Jabechji̧ dibë nö̧riji̧ri̧ pio ji̧ri̧ ëbadëji̧ri̧mi̧ dari̧ cjiaji̧ri̧ oa a̧dë baädëparequededibe jabo jabechji̧ ado chjereno̧ jana̧parequededibe. Aja̧, ji̧dë duri oa japamitë chjätä ëte ado chjereno̧ jana̧parequededibe. 19Ado ji̧dë duri oa jana̧mȩ oa, japamitë boi̧chji̧ chjätä ëte jana̧mȩ oa, dadëpadiro̧coe dai chirirä ja̧ jo̧rȩtarea̧ra̧ jo̧rȩtaji̧ri̧ judiro̧. Aja̧, pio coa quëna̧dëji̧ri̧ pio judiro̧ dadëpadiro̧coe, jabo mȩnȩro̧, dëdë, daparenȩro̧coe ado chjereno̧. Jabechji̧ japamitë boi̧chji̧ chjätä ëte, ado chjereno̧ daparenȩro̧coe. Jabechji̧ cüdë ja̧bo ëte bëdüa̧ oa cjo̧ro̧pa tara, peaja̧di bëdüa̧ oa cjo̧ro̧panȩrȩ —yo̧a̧dejȩrȩ— 20Ado pio jiro do üdë ma̧na̧na̧ra̧rä, jabechji̧ coëma cjiari̧ dabarea̧ dapanȩrȩ. ‘Aja̧ Jechu judi jibëa̧ Ama̧i̧ pio ju̧i̧ nö̧ta cja̧rȩmȩdida, ji̧mo̧ cjiadiro̧da, ado peaja̧dia̧ro̧da, Jechu pio ju̧i̧ nö̧ta cja̧rȩmȩa̧ro̧da, ji̧mo̧ cjiaa̧ro̧da’ quëna̧ dabarea̧ dapanȩrȩ. 21Danȩrȩ, cüdë yo̧a̧ pio ju̧i̧ ta̧rë ja̧boji̧ri̧rȩ ta̧rëdiäji̧ri̧ pio judiro̧ eadiro̧coe. Ado coa eaji̧ri̧ pio ji̧ri̧ eapadejȩrȩ ca̧ Ama̧i̧ judi. Ado cüdë peaja̧di eaparequedejȩrȩ. Ado pio coa chjiari ana̧ri̧ na̧rȩparequedejȩrȩ, are iëmi̧ dari̧ daba tänȩmȩrȩ —yo̧a̧dejȩrȩ.

22Ja̧dëa ji̧ Juda judi, jabo Juda Icariotedërë, jabo ado cja̧rȩmo̧ Juda quȩmȩ pio judi yo̧a̧dejȩ Jechu ju̧i̧:

—Ca̧ Ano̧mȩ, ¿yö̧ta dari̧ japaparenȩibe? —iëno̧ë ta̧rëa̧dejȩ—. ¿Yö̧ta dari̧ japaparenȩ pio ibëiäpȩmo̧ ma na̧rȩpea̧ oa. Dai chirirä cjo̧ro̧ji̧ri̧ pio judiro̧borë ¿dadëpadiro̧mȩ? —iëno̧ë ta̧rëa̧dejȩ.

23Ado Jechu judi dëbë yo̧a̧dejȩ:

—Danȩ, pio coa eaji̧ri̧ judiro̧ cüdë a̧ra̧ano̧a̧ pio ju̧i̧ ta̧rëdiäpadiro̧jo̧ȩ —yo̧a̧dejȩrȩ—. Ado ca̧ Ama̧i̧ pio judiborë eapadejȩrȩ. Ado pio ji̧ri̧iäpȩ go̧düdäräparequede ca̧ Ama̧i̧ pio ju̧i̧ nö̧ta, pio ji̧ri̧ ja̧ icjararä bëpapea̧ oa bucho ana̧. 24Jabo coa eadëji̧ri̧ pio judiro̧ ta̧rëdiädëdiro̧coe. Cüdë a̧ra̧ano̧a̧ pio ju̧i̧ ta̧rëdiädëdirȩ. Ado danȩrȩ, cüdë dibë a̧ra̧ano̧a̧ üdë, jabechji̧ ca̧ chji̧ri pio judiri cjitëdëa̧de jabo Ama̧i̧ tjamo̧ pio judiri ja̧de. Aja̧, coa chjadüa̧mȩ pio judiri ja̧de. Jabechji̧ ca̧ Ama̧i̧ judi jo̧rȩta̧ pio ju̧i̧mo̧i̧ a̧ra̧ano̧requededibe —yo̧a̧dejȩ.

25—Danȩrȩ —yo̧a̧dejȩrȩ Jechu judi—. Ja̧di ta̧rëri̧ yo̧mȩrȩ ni̧bä chjaorequededibe cüdë dibë jabë ëba cjo̧ro̧a̧ nö̧ta. 26Jabo cüdë dibë a̧dë baäpa tara, ca̧ Ama̧i̧ judi ado cja̧rȩmo̧ oa chjadüpadidibe ano̧ mire a̧dopea̧ oa. Aja̧, Tjo tjamo̧ pio ju̧i̧ chjadüpadejȩ, tjamo̧ a̧domȩ pio ju̧i̧. Ado jabechji̧ dami̧ti̧ oa a̧ra̧ano̧padidibe. Ado cüdë dibë ni̧bä chjaoa̧ chjö̧na̧i̧ oa chjadëri̧ jo̧rȩta tänȩpadidibe peaja̧di —yo̧a̧dejȩrȩ Jechu judi.

27Ado Jechu judi ji̧dë u̧i̧ yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧:

—Danȩrȩ, cüdë dibë a̧dë baäpa tara, jabechji̧ ma̧ chjupi̧ cjiari̧ jo̧rȩtarea̧ yürürequededibe, chji̧ goaera̧ jo̧rȩtarea̧mi̧ dari̧. Peaja̧di jo̧rȩtarequede cüdë. Chji̧ goaera̧ jo̧rȩtarequede. Ado ca̧ jo̧rȩtarea̧ pio ju̧i̧ yürürequededibe pio dibëiäpȩmo̧. Jabo danȩrȩ, dai chirirä cjo̧ro̧ji̧ri̧ pio judiro̧ yürümi̧ dari̧ yürüdërequededibe. Dai chirirä ja̧ jo̧rȩtarea̧ oa yürüdërequededibe, jabo tjaoëpai̧ dari̧ jo̧rȩtarea̧ pio ju̧i̧ yürürequededibe. Pio ju̧i̧iä yo̧requededibe. Bücjüri̧ cjiadëchji̧vä —yo̧a̧dejȩrȩ—. Uapadëchji̧vä. 28Danȩrȩ, peadë yo̧a̧requededibe cüdë dibë a̧dë baäpea̧ pio ju̧i̧ chjiari. Ado dibë yo̧a̧mi̧ ado yo̧requededibe. Danȩrȩ, cüdë ca̧ Ama̧i̧ pio ju̧i̧iäpȩ baäa̧ duri oa, jabechji̧ ado chjereno̧ jana̧parequededibe. Jabo yabochja baäparequede ca̧ Ama̧i̧ ju̧i̧iäpȩ. Ado mȩnȩro̧ coa ea tjamo̧rä judi, jabechji̧ ma̧ chiadëri̧ cjiari̧ jo̧rȩtapanȩrȩ, cüdë pio ju̧i̧iäpȩ baärea̧ da tara. Jabechji̧ coa u̧i̧ ba chiade ca̧ Ama̧i̧ judi —yo̧a̧dejȩrȩ—. Ado pio ju̧i̧iäpȩ tjamo̧ri̧ baätämi̧ cjiarequede. 29Jabechji̧ mȩnȩro̧ dabadëchea oa, jabërä yo̧requededibe, cüdë dibë a̧dë baäpea̧ pio ju̧i̧ chjiari. Ado ja̧dëa ji̧ cüdë baäa̧rä, ‘Aja̧ tjamo̧ri̧ yo̧a̧diibëda, jabërä chjadëri̧ yo̧a̧diibëda’ quëna̧rea̧ dapanȩrȩ. 30Jabo yaba̧ dibë ana̧ri̧ ni̧bä chjaorea̧ dadërequededibe —yo̧a̧dejȩrȩ—. Jabechji̧ yaröca pio ji̧ri̧ ja̧ ütë üdë, Ichiae pio judi jana̧pea̧ ji̧ querediä tjamo̧de. Dai chirirä ja̧ jo̧rȩtarea̧ra̧ jo̧rȩtaji̧ri̧ pio judiro̧ pio ju̧i̧ ja̧ chja̧oerä cjo̧ro̧dirȩ. Jabo ja̧didërequede cüdë. Pio ju̧i̧ ja̧ chja̧oerä cjo̧ro̧dërequede. 31Ca̧ Ama̧i̧ pio ju̧i̧ ja̧ chja̧oerämo̧ cjo̧ro̧requede. Ado pio ju̧i̧iä nö̧tadäräri̧ ta̧rëdiäreconȩ. Aja̧, dai chirirä cjo̧ro̧ji̧ri̧ judiro̧ pio coa chjiari chjadëri̧ dabapea̧ oa, pio ji̧ri̧iäpȩmo̧ chjadëri̧ na̧rȩpea̧ oa, jabechji̧ chjadëri̧ ta̧rëdiäreconȩ ca̧ Ama̧i̧ ju̧i̧. ‘Aja̧, Jäjäa pio ju̧i̧ ea tjamo̧diji̧da, jibëa̧ Ama̧i̧ pio ju̧i̧ tjamo̧ri̧ eadiji̧da, ado pio ju̧i̧iä ji̧dë ma ta̧rëdiädiji̧da’ quëna̧ dabapea̧ oa na̧rȩrequedejȩrȩ, ca̧ Ama̧i̧ pio ju̧i̧ ji̧dë ma ta̧rëdiäa̧ oaiä. Jabo danȩrȩ, jaechji̧ibe. Pio yudiri baätärȩ —yo̧mȩrȩ ni̧bä chjaorëremȩdejȩrȩ Jechu judi jibëa̧ jadü ji̧ri̧ mechjaräpȩji̧ri̧ oa, jënȩ ja̧bopea̧ ji̧ querediä tjamo̧mȩrȩ.

Currently Selected:

Juan 14: Pume

Highlight

Copy