Juan 13

Jechu judi joë yürürëremȩdejȩrȩ jibëa̧ jadü ja̧ ta oa

1Ado uëmo̧ a̧dë chjätärea̧ do üdë ma̧na̧pea̧ ji̧ querediä tjamo̧rëremȩde. Cja̧rȩmȩ do chjätä ëte tarupapea̧ jabërëremȩde do chjätärea̧ do üdë. Ado Jechu judi, jabechji̧ dabarëremȩde pio jȩa chjiari. ‘Aja̧, cüdë pio yoa chiri oa a̧dë baäpea̧ ji̧ querediäquëda, ca̧ Ama̧i̧ pio ju̧i̧iäpȩ baäpea̧ ji̧ querediäquëda yaba̧’ quëna̧ dabarëremȩde. Ado jibëa̧pea̧ji̧ri̧ pio ji̧ri̧ peadëri ja̧ ea tjamo̧rëremȩdejȩrȩ jibëa̧ jadü pio ji̧ri̧, dai chirirä cjo̧ro̧ji̧ri̧ pio ji̧ri̧. Jabechji̧ eadëpe bagarea̧ decjiari̧ earëremȩdejȩrȩ.

2Ado gȩnȩpea̧rä Jechu judi ëba jurarëremȩdejȩrȩ jibëa̧ jadü pio ji̧ri̧ nö̧ta. Ado Ichiae judi peadë jo̧rȩta tänȩrëremȩdejȩ Juda ju̧i̧, Jechu pio ju̧i̧ u̧i̧pë gatë tänȩpea̧ pio ju̧i̧ chjiari. Tjamo̧ davä, Chimo̧ Icariote quȩmȩ pio ju̧i̧ ja̧ joja pio ju̧i̧ peadë jo̧rȩta tänȩa̧dejȩ. 3Ado Jechu judi Ama̧i̧rȩ pio jȩaiäpȩmo̧ jauëchja oa yürüa̧ pio ju̧i̧ chjiari dabarëremȩde. ‘Aja̧, jibëa̧ jauëchjarea̧ chjö̧na̧i̧ oa yürüa̧dicoada, a̧dë chjäte ji̧ra̧ri̧ cjiamȩ jauëchjarea̧ pio ju̧i̧ yürüa̧dicoada’ quëna̧ dabarëremȩde. Ado jënȩ a̧dëri jana̧pea̧ pio ju̧i̧ chjiari, ado jënȩ ado chjereno̧ baäpea̧ pio ju̧i̧ chjiari peaja̧di dabarëremȩde. ‘Aja̧, Ütë tjamo̧ pio judiri birë ma̧na̧quëda, ado pio ju̧i̧iäpȩ ado chjereno̧ baäpaquëda’ quëna̧ dabarëremȩde. 4Ado pio ju̧i̧ daba oaiä, jabechji̧ jura charemȩrȩ cjitëno̧a̧de. Ado cjitë ëte, jibëa̧ chjibo oa, dai oa ina̧rea̧ chjibo pio ju̧i̧ cjüëno̧a̧dejȩ. Ado bubëguarea̧ pio ju̧i̧ mitë ëte yureno̧a̧dejȩ jibëa̧ cadarä. 5Ja̧dëa ji̧ ui oa arë cjareno̧a̧dejȩ tachja pjatërä. Ado ja̧di dari̧ japa ëte, taruparëremȩde jibëa̧ jadü pio ji̧ri̧ ja̧ ta oa joapea̧ ji̧. Ado cja̧rȩmȩ ja̧ ta oa joa ëte, bubëgua̧dejȩ bubëguarea̧ra̧, jibëa̧ cadarä yura̧rea̧ra̧ pio ju̧ri̧ra. Ja̧di dari̧ japa ëte, ano̧ mire joarëremȩde ado cja̧rȩmo̧ ja̧ oa. 6Ado ja̧dëa ji̧ Pedro pio ju̧i̧ ja ta oa joapea̧ oa tarupatea̧rä, Chimo̧ Pedro judi yo̧a̧dejȩ:

—¿Pio mȩnȩ ca̧ ta oa joaparenȩ Ano̧mȩ? Cjäri̧ marenȩ. Jabomo̧ pumȩrequede. Mȩnȩ ca̧ ta oa joarea̧mi̧dërenȩ —yo̧a̧dejȩ.

7Jabo Jechu judi dëbë yo̧a̧dejȩ:

—Cjäri̧ marenȩ, chjadëri̧ dabadërenȩ —yo̧a̧dejȩ—. Cüdë japapea̧ ji̧ chjadëri̧ dabadërenȩ jabo japamitë chjätä ëte, chjadëri̧ dabarea̧ daparenȩ. Na̧e chiaparenȩ —yo̧a̧dejȩ.

8Jabo Pedro judi yo̧a̧dejȩ:

—Cjäri̧ marenȩ, mȩnȩ ca̧ ta oa cja̧rȩmȩ co joarea̧ yürüdëparequedemȩ jabechji̧ —yo̧a̧dejȩ.

Ja̧dëa ji̧ Jechu judi dëbë yo̧a̧dejȩ:

—Danȩ, cüdë na̧ ta oa joarea̧ dadërä judi, ca̧ jadüdëpe bagamȩrȩ cjiadiäparenȩ —yo̧a̧dejȩ.

9Pio ju̧i̧ ta̧rëa̧ oaiä, Chimo̧ Pedro judi yo̧a̧dejȩ:

—Ja̧dirä judi Ano̧mȩ, jabechji̧ ca̧ ta maea oa joadëvä, jabo ca̧ icjara nö̧ta oa chjadëri̧ joë yürücoe. Ca̧ ichibo, ca̧ tjübëbo, ca̧ icjara codë oa jabechji̧ joavä —yo̧a̧dejȩ.

10Jabo Jechu judi yo̧a̧dejȩ:

—Danȩ, eami̧ pumȩ üdë jibëa̧ icjara codë oa chjadëri̧ joarä judi, jabechji̧ igȩrȩ chiadëde. Joa̧ oa cjiade. Jibëa̧ ta pio ju̧i̧mo̧i̧ joapea̧de. Ado mȩnȩro̧ ütëborë peaja̧di dari̧ cjianȩrȩ. Icjara codë oa joa̧ oa cjiami̧ dari̧ cjianȩrȩ. Jabo cjäri̧ made, cja̧rȩmȩrȩ joa̧ oa cjiami̧ dari̧ cjiadëde —yo̧a̧dejȩ Jechu judi.

11Jabechji̧ jabërä dabarëremȩde Jechu judi pio jȩaiäpȩmo̧ u̧i̧pë gatë tänȩpamȩ pio ju̧i̧ chjiari. Pio ju̧i̧iä “Mȩnȩro̧ cja̧rȩmȩrȩ joa̧ oa cjiami̧ dari̧ cjiadëde” yo̧rëremȩdejȩrȩ.

12Ado Jechu judi jibëa̧ jadü ja̧ ta oa joa ëte, ado chjereno̧ ina̧dejȩ jibëa̧ chjibo oa, dai oa ina̧rea̧ chjibo oa. Ado jënȩ mechja yuroro cha̧rea̧räpȩ ado chjereno̧ chamȩpea̧de. Ja̧dëa ji̧ iëno̧ë ta̧rëa̧dejȩrȩ jibëa̧ jadü ji̧ri̧:

—Danȩrȩ, cüdë dibë pea japea̧ pio ju̧i̧ chjiari ¿chjadëri̧ dabadënȩrȩ? —iëno̧ë ta̧rëa̧dejȩrȩ—. 13Danȩrȩ, “A̧ra̧ano̧mȩ” yo̧renȩro̧coe. “Ano̧mȩ” yo̧renȩro̧coe peaja̧di. Ado jabechji̧de, pio judi tjamo̧requede cüdë. 14Ado dibëa̧ Ano̧mȩ pio judimȩborë, dibë a̧ra̧ano̧mȩborë, jabechji̧ pea joa̧requededibe dibëa̧ ta oa. Jabechji̧ cüdë a̧dë chjäte ba chiamȩborë ba chiadëmȩmi̧ darë japea̧requededibe dibëa̧ mu̧i̧tjoi̧mi̧ darë. Ado peaja̧dimi̧ dari̧ japatäreji̧ri̧nȩrȩ dibëa̧ dëbëti̧ra̧ chia. 15Jabechji̧ na̧rȩa̧requededibe mȩnȩro̧ o ji̧ri̧iäpȩmo̧ peaja̧dimi̧ dari̧ japapea̧ oa. 16Danȩrȩ, tjamo̧i̧ cjiari̧ yo̧requededibe. Eami̧ mu̧i̧tjoi̧ üdë jibëa̧ ano̧mȩ ju̧i̧ u̧i̧ ba chiadëde. Ado chjadüa̧ oa cjiamȩ judi peaja̧di nö̧tadëdejȩ jȩa chjadüa̧mȩ ju̧i̧. Jabechji̧, chjadüa̧mȩ judi ji̧dë u̧i̧ ba chiade. Danȩrȩ, dibëa̧ Ano̧mȩborë mu̧i̧tjoi̧mi̧ dari̧ cjo̧ro̧rëremȩrequede dibëa̧ chjarerä, mȩnȩro̧ peaja̧dimi̧ dari̧ japapea̧ oa dibëa̧ pumȩ pio ji̧ri̧. 17Jabechji̧ cüdë dibë uira̧ japea̧ pio ju̧i̧ chjiari tjamo̧ri̧ dabapea̧rä judi, pio ju̧i̧ tjamo̧ri̧ japarä judi, jabechji̧ ma̧ chiadëri̧ cjiaji̧ri̧rȩ cjo̧ro̧rea̧ dapanȩrȩ —yo̧mȩrȩ ni̧bä chjaorëremȩdejȩrȩ jibëa̧ jadü ji̧ri̧ Jechu judi.

18Ado Jechu judi ji̧dë u̧i̧ yo̧mȩrȩ a̧de ni̧bä chjaorëremȩdejȩrȩ jibëa̧ jadü ji̧ri̧, jabë mechjaräpȩ chaji̧ri̧ oa:

—Danȩrȩ ca̧ jadü, cüdë dibë ütëbo oa jo̧rȩtamȩrȩ yo̧dërequededibe, jabo cja̧rȩmȩ pio ju̧i̧mo̧i̧ jo̧rȩtamȩrȩ yo̧requededibe —yo̧a̧dejȩrȩ—. Jabechji̧ pio dibë mitëa̧requededibe. Ado pio dibë chjiari tjamo̧ri̧ dabarequede. Jabo danȩrȩ, cja̧rȩmȩ üdë, pio ibë nö̧ta tai̧mȩ pio judi chjai̧dëri̧ japapadique. Ado pio ju̧i̧ chjiari go̧ȩpea̧ oa cjiade ma̧ȩ üdë. Ja̧di ta̧rëri̧ yo̧diibe: “Aja̧, pio coa nö̧ta ëba juraremȩ pio judi putu jura̧ a̧dë chami̧ dari̧ japapadique”. Aja̧, ja̧di ta̧rëri̧ go̧ȩpea̧ oa cjiade ma̧ȩ üdë. 19Ado pio ibë nö̧ta tai̧mȩ pio ju̧i̧ chjiari ma̧ȩ üdë tjamo̧i̧ cjiari̧ cjiabea yaboi̧, jabërä yo̧requededibe mȩnȩro̧ pio coa chjiari coëma cjiari̧ quëna̧pea̧ oa, ‘Cüdërequede quȩmȩ pio judi tjamo̧dida’ quëna̧ dabapea̧ oa. 20Ado cja̧rȩmȩ üdë cjiadiäa̧räbo, jabechji̧ mȩnȩro̧ orë chjadürequededibe ca̧ea̧ pio ju̧i̧ ja̧bepapea̧ oa. Ado tjamo̧i̧ cjiari̧ yo̧requededibe. Eami̧ pumȩ üdë, cüdë chjadüa̧ pio ju̧i̧ ba chia darä judi, pio coabo ba chia dami̧ dari̧ japadique. Ado eami̧ üdë pio coa ba chia dami̧ dari̧ japamȩ judi, coa chjadüa̧mȩ pio ju̧i̧bo ba chia dami̧ dari̧ japadejȩ Ütë tjamo̧ pio ju̧i̧ —yo̧mȩrȩ ni̧bä chjaorëremȩdejȩrȩ Jechu judi jibëa̧ jadü ji̧ri̧ Juda Icariote pio ju̧i̧ chjiari.

Ji̧dë u̧i̧ ni̧bärëremȩde Jechu judi pio jȩa u̧i̧pë gatë tänȩpamȩ pio ju̧i̧ chjiari

Mateo 26:20-25; Marco 14:17-21; Uruca 22:21-23

21Jechu judi jibëa̧ jadü pio ji̧ri̧ ja̧di ta̧rëri̧ ni̧bä chjao ëte, gito ana̧ tjamo̧ri̧ jo̧rȩtaremȩrȩ yo̧a̧dejȩrȩ areiëmi̧ dari̧:

—Danȩrȩ, mȩnȩro̧ cja̧rȩmȩrȩ u̧i̧pë gatë tänȩpadique —yo̧a̧dejȩrȩ—. Tjamo̧ davä. Mȩnȩro̧ cja̧rȩmȩrȩ pio coa u̧i̧pë gatë tänȩpadique coa goëdëri̧ cjiaji̧ri̧ pio ji̧ri̧iäpȩmo̧. Tjamo̧i̧ cjiari̧ yo̧requededibe —yo̧a̧dejȩrȩ.

22Ado pio ju̧i̧ ta̧rëa̧ oaiä, Jechu ja̧ jadü judiro̧ jibëa̧ dëbëti̧ra̧ chia dëbë dae chaji̧ri̧rȩ ana̧ri̧ jo̧rȩtaji̧ri̧pea̧dirȩ, ¿Chjia ju̧i̧ chjiari ni̧bäcjivadi? quëna̧ jo̧rȩtaji̧ri̧rȩ. 23Ado Jechu ja̧ jadü üdë cja̧rȩmȩrȩ, Jechurë ea̧ jadü pio judi pio ju̧i̧ ja̧ yuroro charemȩde. 24Ado pio ju̧i̧iä Chimo̧ Pedro judi, jibëa̧ ichira̧ goë mitëmȩrȩ yo̧a̧dejȩ Jechu ja̧ yuroro chamȩ pio ju̧i̧iäpȩmo̧:

—Danȩ, chjadëri̧ iëno̧ë ta̧rëjo̧ȩ na̧ yuroro chamȩ ju̧i̧, a̧ro̧rȩ ‘pio judi tjamo̧dida’ quëna̧ dabapea̧ oa —yo̧a̧dejȩ.

25Ado pio ju̧i̧iä pio jiro jadü üdë jachidai̧ ano̧ mire chadäräa̧mȩrȩ iëno̧ë ta̧rëa̧dejȩ Jechu ju̧i̧:

—¿Chjiade mȩa ja̧di dari̧ japajamȩ judi Ano̧mȩ —iëno̧ë ta̧rëa̧dejȩ—. Chjadëri̧ yo̧ibe.

26Ado Jechu judi dëbë yo̧a̧dejȩ:

—Danȩ, chja̧pe pio ju̧i̧ chuda ëte, yürüpareconȩ. Pio judide.

Ado chja̧pe oa mitë ëte, chuda ëte, yürüa̧dejȩ Juda ju̧i̧, Chimo̧ Icariote joja pio ju̧i̧iäpȩmo̧.

27Ado Juda judi chja̧pe oa mitëa̧rä, chjaodëri̧ ira̧diä cjaeärëremȩdejȩ Ichiae judi. Ado Jechu judi yo̧a̧dejȩ:

—Jaevä. Mȩnȩ jo̧rȩta̧mi̧ japeno̧vä jo̧ȩra̧pe —yo̧a̧dejȩ.

28Jabo Jechu judi Juda pio ju̧i̧iäpȩmo̧ yo̧a̧ ji̧, tjamo̧ri̧ daba ta̧rëdëa̧dirȩ jibëa̧ jadü judiro̧. 29Jabechji̧ Juda judi ütëbo ja̧ chëre oa tjamo̧ jidamȩrȩ cjo̧ro̧a̧ oaiä, ado uëmo̧ a̧dë chjätärea̧ do üdë ma̧na̧na̧ra̧ oaiä, jabechji̧ ‘jurarea̧ oa gatëtä yo̧a̧ jirodiji̧da, pio a̧ro̧rȩ jurapea̧ oa, ado chjö̧na̧i̧ti̧ oa cjäri̧ ja̧boji̧ri̧ pio ji̧ri̧iäpȩmo̧ yürüpea̧ oa gatëtä yo̧a̧ jirodiji̧da’ quëna̧ jo̧rȩtaji̧ri̧rȩ ta̧rërëreji̧ri̧diro̧jo̧ȩ.

30Jabo Juda judi chja̧pe oa mitë ëte, chjaodëri̧ go̧deno̧rëremȩde. Gȩnȩpea̧rä go̧düa̧de.

Tüdüa̧mi̧ darä cjo̧ro̧pea̧ ma̧ȩ peaja̧ oa yürürëremȩdejȩrȩ Jechu judi

31Ado Juda judi go̧düa̧ duri oa, Jechu judi yo̧a̧dejȩrȩ jibëa̧ jadü ji̧ri̧:

—Danȩrȩ, Pumȩrȩ Ara̧ Tjamo̧ pio ju̧i̧ ja̧ chjacjiamȩrea̧ üdë chjadëri̧ na̧rȩa̧ oa cjiape jäde yaba̧. Ado Ütë tjamo̧ ja̧ chjacjiamȩrea̧ pio judiborë chjadëri̧ na̧rȩa̧ oa cjiapade pio coaiä, Pumȩrȩ Ara Tjamo̧ pio ju̧i̧iä. 32Ado Ütë tjamo̧ pio ju̧i̧ ja̧ chjacjiamȩrea̧ üdë pio coaiä chjadëri̧ na̧rȩa̧ oa cjiarä, ca̧ chacjiamȩrea̧ üdë peaja̧di chjadëri̧ na̧rȩa̧ oa cjiapade Ütë tjamo̧ pio ju̧i̧iä. Jabechji̧ ca̧ chjacjiamȩrea̧ üdë chjaodëri̧ na̧rȩa̧ oa cjiapade Ütë pio judi tänȩa̧ oa —yo̧a̧dejȩrȩ—. 33Ado yaba̧ ca̧ u̧ri̧, japamitë boi̧chji̧ chjätä ëte, a̧dë baäparequededibe. Na̧taparenȩro̧coe, jabo dadärädëparenȩro̧coe. Jabechji̧ tjamo̧ yo̧ji̧ri̧ judio pio ji̧ri̧ yo̧rërea̧mi̧ yo̧requededibe peaja̧di. Cüdë baäpea̧räpȩ baärea̧mi̧dënȩrȩ. 34Jabo danȩrȩ, ma̧ȩ peaja̧ oa yürürequededibe yaba̧. Tüdüa̧mi̧ darä cjo̧ro̧pea̧ ma̧ȩ peaja̧ oa yürürequededibe. Dibëa̧ dëbëti̧ra̧ chia eachji̧vä. Cüdë dibë eami̧ eachji̧vä dibëa̧ dëbëti̧ra̧ chia. 35Ado mȩnȩro̧ dibëa̧ dëbëti̧ra̧ chia ea̧ oaiä, jabechji̧ ütëbodärärë na̧e chia tjamo̧padirȩ pio dibë chjiari. ‘Aja̧, Jechu ja̧ jadü pio judiro̧diro̧da, jibëa̧ dëbëti̧ra̧ chia ea tjamo̧ji̧ri̧rȩ cjo̧ro̧diro̧da’ quëna̧ dapadiro̧dibe. Pio ju̧i̧iä yo̧requededibe ado. Dibëa̧ dëbëti̧ra̧ chia eachji̧vä —yo̧mȩrȩ ma̧ȩ peaja̧ oa yürürëremȩdejȩrȩ Jechu judi, tüdüa̧mi̧ darä cjo̧ro̧pea̧ ma̧ȩ peaja̧ oa.

Pedro judi ma̧ȩ chjádë yürüpea̧ pio ju̧i̧ chjiari jabërä ni̧bärëremȩde Jechu judi

Mateo 26:31-35; Marco 14:27-31; Uruca 22:31-34

36Jabo pio ju̧i̧ ta̧rëa̧ oaiä, Chimo̧ Pedro judi iëno̧ë ta̧rëa̧dejȩ Jechu ju̧i̧:

—¿Tjana̧räpȩ baäparenȩ mȩnȩ baärä? ¿Tjana̧ ju̧i̧iä cho̧rë järea̧ dadëparequedemȩ? —yo̧a̧dejȩ.

Ado Jechu judi dëbë yo̧a̧dejȩ:

—Danȩ, cüdë baäpea̧räpȩ cho̧rë järea̧mi̧dërenȩ yaba̧, jabo dëdë, ji̧dë duri oa cüdë baärä, cho̧rë baärea̧ daparenȩque.

37Jabo Pedro judi cjiadiädëmȩrȩ dëbë yo̧a̧dejȩ:

—Jabo Ano̧mȩ, pio yaba̧ cho̧rë jätämi̧ cjiarequedemȩ. ¿Tjana̧ ju̧i̧iä cho̧rë järea̧ yürüdëparenȩque? Jabechji̧ pio mȩa chjiari ano̧ mire ja̧bopea̧ oa chjaodëri̧ yürütäremȩrequede ca̧ icjara oa —yo̧a̧dejȩ.

38Jabo Jechu judi dëbë yo̧mȩrȩ yo̧a̧dejȩ:

—¿Tjamo̧ri̧ yo̧nȩ? Coa a̧dopea̧ oa ¿tjamo̧ri̧ ano mire ja̧botäremȩrenȩ? Danȩ Pedro, tjamo̧i̧ cjiari̧ yo̧requedemȩ. Ocararo üi̧ üdë jabë eadëa̧rä, pio coa chjiari ma̧ȩ chjádë yürüparenȩ tjarari̧ co —yo̧a̧dejȩ—. Tjamo̧ davä. Mȩnȩ, “Aja̧ Jechu pio ju̧i̧ tjamo̧ri̧ dabadëreconȩ” yo̧mȩrȩ ma̧ȩ chjádë yürüparenȩ pio coa chjiari —yo̧mȩrȩ yo̧rëremȩdejȩ Pedro ju̧i̧ Jechu judi.

Currently Selected:

Juan 13: Pume

Highlight

Copy