Taruparea̧ Ma̧ȩ 31

Jacobo judi goadi a̧dë baärëremȩdejȩ joja̧ȩtȩ oa

1Ado cja̧rȩmo̧ doremȩrä Jacobo judi goadi ta̧rërëremȩdejȩrȩ Aba̧ ja̧ u̧ri̧ pio ji̧ri̧ ni̧bä chjaoji̧ri̧ oa. Ja̧di ta̧rëri̧ ni̧bä chjaoji̧ri̧ oa goadi ta̧rëa̧dejȩrȩ:

—Aja̧, Jacobo judi ji̧ra̧ri̧ goamȩpea̧de ibëa̧ ama̧i̧ pio ju̧i̧iä. Ibëa̧ ama̧i̧ pio ju̧i̧iä bae mitëa̧ oa goamȩpea̧de. Aja̧, ibëa̧ ama̧i̧ ja̧remȩ pio ju̧i̧ bae mitëa̧dejȩ. Aja̧, garümȩmi̧ darë bae mitëa̧de chjö̧na̧i̧ oa, ibëa̧ ama̧i̧ ja̧remȩ pio ju̧i̧ —ni̧bä chjaoji̧ri̧ oa goadi ta̧rëa̧dejȩrȩ Jacobo judi.

2Ado ju̧i̧ ta̧rëa̧ oaiä ana̧ri̧ jo̧rȩtamȩpea̧de. 'Jabo Aba̧ judi, cjäri̧ madida, judi pearärëremi̧dëri̧ japadicoada, jamai̧datä cjiamȩrȩ dadicoada, jadü cjiarea̧mi̧dëri̧ jo̧rȩta jirodicoada' quëna̧ jo̧rȩtamȩpea̧de Jacobo judi. 3Ado Jeova pio judi yo̧rëremȩdejȩ Jacobo ju̧i̧:

—Danȩ, cuchupa baävä na̧ chiriräpȩ, na̧ ama̧i̧rȩ cjo̧ro̧mȩräpȩ, na̧ pumȩrȩ cjo̧ro̧mȩräpȩ cuchupa baävä. Pio meadiparequede —yo̧mȩrȩ yo̧rëremȩdejȩ Jacobo ju̧i̧ Jeova pio judi.

4Ja̧dëa ji̧ Jacobo judi ma̧ȩ chjadürëremȩdejȩrȩ jibëa̧ ivi ji̧ri̧ pio jȩaiäpȩ jana̧tä, ovejarë cjo̧ro̧mȩräpȩ jana̧tä. Raque ji̧, Dea ji̧ ma̧ȩ chjadüa̧dejȩrȩ. 5Ado ja̧dëa ji̧ jini̧ro̧ jana̧rä yo̧rëremȩdejȩrȩ:

—Danȩro̧, dibëa̧ ama̧i̧ judi pearärëremi̧dëri̧ japadicoa yaba̧. Ba chia darërea̧ ji̧, jadü cjiarea̧ darërea̧ ji̧, ja̧di dari̧ dadëdicoa yaba̧. Jabo judi pio coa ba chia dadëräbo, jabechji̧ ca̧ ama̧i̧ ja̧ Ütë pio judi ji̧dë ma chjadëri̧ ëba cjiadicoa. 6Ado danȩro̧, pio coa chjiari tjamo̧ri̧ dabanȩro̧. Jabechji̧ dibëa̧ ama̧i̧ ja̧ oa ja̧bepe yürüa̧ ji̧, jabechji̧ chjadëri̧ dabanȩro̧coa. 'Aja̧, ibëa̧ üi̧ judi, ibëa̧ ama̧i̧ ja̧ oa chjadëri̧ ja̧bepë yürü chjaoa̧diji̧da, jënȩ nö̧tarä yuro goae tarari̧ ja̧bepë yürüa̧diji̧da' quëna̧ dabanȩro̧coa. 7Ado judi coa u̧i̧pe chjaoa̧ pio ju̧i̧bo chjadëri̧ dabanȩro̧coa. Aja̧, judi coa yo̧a̧räbo, “Aja̧, ja̧di dari̧ ba ano̧parequedemȩ” yo̧ chjaoa̧räbo, jabechji̧ ji̧dë ma ano̧ mi̧re jo̧rȩtamȩrȩ tjaoëpai̧ dari̧ ba ano̧a̧dicoa nö̧tadärädëri̧. Jabechji̧ ichi ütëbo co ano̧ mire ba ano̧a̧dique chjadëri̧ ba ano̧tärea̧ ji̧. Jabechji̧ jënȩ yo̧a̧mi̧ ba ano̧dë madicoa. Badëri̧ ma̧diä ma̧diä tänȩdicoa. Aja̧, ja̧di dari̧ jape chjaoa̧dicoa davä babui̧ra̧. Jabo chjadëri̧ jida̧dicoa jabo Ütë tjamo̧ judi. Tjamo̧ davä. Dibëa̧ ama̧i̧ judi pio coaiäpȩmo̧ conȩdarea̧mi̧dëri̧ jida̧dicoa. 8Ado danȩro̧, dibëa̧ ama̧i̧ judi yo̧a̧ ji̧, 'Aja̧, oveja bori̧ joarijoaria maea oa mitëparenȩ' yo̧a̧ ji̧, joarijoaria maea oa araji̧ri̧pea̧ni̧ro̧. Ado ji̧dë duri oa dibëa̧ ama̧i̧ judi ano̧ mire jo̧rȩtamȩrȩ yo̧a̧ ji̧, 'Aja̧, cada budo chia maea oa mitëparenȩ' yo̧a̧ ji̧, jabechji̧ oveja bori̧ cada budo chia maea oa ano̧ mire araji̧ri̧pea̧ni̧ro̧. 9Aja̧, ja̧di dari̧ japamȩrȩ chjadëri̧ jida̧dicoa Ütë tjamo̧ judi. Jabechji̧ Aba̧ ja̧remȩ pio ju̧i̧ yürüa̧dicoa pio coaiäpȩmo̧. Ado chjadëri̧ dabanȩro̧ ca̧ ivi —yo̧mȩrȩ yo̧rëremȩdejȩrȩ jibëa̧ ivi ji̧ri̧iäpȩmo̧.

10Ado Jacobo judi jibëa̧ ivi ji̧ri̧ ji̧dë uëri ni̧bämȩrȩ ja̧di ta̧rëri̧ a̧de ni̧bä chjaorëremȩdejȩrȩ:

—Ado danȩro̧, canȩjä mo̧a̧remȩquë. Tjamo̧ davä. No̧mȩ judi oveja judiro̧, ado chivo judiro̧ ivi pio ji̧ri̧ boa chjaoa̧ domȩ ju̧i̧iä, jabechji̧ canȩjä mo̧a̧remȩquë. Aja̧, chivo oari ji̧ri̧, joarijoaria maea oa darämi̧ cjiaremȩquiji̧ri̧ boa chjaoji̧ri̧ oa. 11Ado cüdë canȩjä mo̧a̧remȩrȩ ta̧rërämi̧ cjiaremȩquë Ütë tjamo̧ ja̧ mu̧i̧tjoi̧ ju̧i̧. Aja̧, ca̧ quȩ oa ëna̧diäa̧mȩ oa ta̧rërämi̧ cjiaremȩquë. Ado cüdë dëbë yo̧a̧ ji̧, “Aja̧, pio yirequede” dëbë yo̧a̧cuni̧. 12Ado ja̧dëa ji̧ yo̧a̧dicoa: “Danȩ, chjadëri̧ daba davä chivo oari ji̧ri̧. Joarijoaria maea oa dajȩrȩ boa chjaoji̧ri̧ oa. Jabechji̧ pio cüdë tänȩa̧ oa, peaja̧di da cjia maea oa arapani̧ro̧jȩrȩ bori̧ ji̧ri̧. Jabechji̧ dabarequede davä Aba̧ judi pio mȩaiäpȩmo̧ chjai̧dëri̧ jape chjaoa̧ pio ju̧i̧ chjiari. Aja̧, pio ju̧i̧ chjiari tjamo̧ri̧ dabarequede. Ado pio ju̧i̧iä tuti japamȩrȩ a̧dorequedemȩ. 13Jabechji̧ cüdë mȩa Bete quȩmȩräpȩ na̧rȩrëremȩ Ütë pio judirequede cüdë. Aja̧, mȩnȩ ta̧dë jujua oa uëräpȩmo̧ cjiari̧ arë cji̧däa̧mȩ oa, mȩnȩ yo̧ oa ta̧dërä arë cjaräa̧mȩ oa, mȩnȩ coa tjamo̧i̧ yo̧rea̧ ma̧ȩ oa yo̧a̧mȩ oa na̧rȩrëremȩ Ütë pio judirequede cüdë. Ado yaba̧ baäa̧mi̧ baätä earequedemȩ mȩa ararërea̧ chiriräpȩ. Pio yoa chiri oa a̧dë baätä earequedemȩ.” Aja̧ ca̧ ivi, ja̧di ta̧rëri̧ ta̧rërämi̧ cjiamȩrȩ ta̧rëa̧cuni̧ Ütë tjamo̧ ja̧ mu̧i̧tjoi̧ oa, pio coaiäpȩmo̧ ma̧ȩ yürüa̧mȩ oa —yo̧mȩrȩ yo̧rëremȩdejȩrȩ Jacobo judi jibëa̧ ivi ji̧ri̧.

14Ado Raque jini̧, Dea pio jini̧borë dëbë yo̧ji̧ri̧rȩ yo̧rëreji̧ri̧ni̧ro̧jo̧ȩ Jacobo ju̧i̧:

—Aja̧, jabechji̧de ibëiä. Mȩnȩ jo̧rȩta̧mi̧ japavä. Jabechji̧ ibëa̧ ama̧i̧ judi mö̧na̧pea̧ tara, judi bë maeapea̧ tara, eami̧ oa yürüdëpadiibe. Jabechji̧ jibëa̧remȩ pio ju̧i̧ pio ibëiäpȩmo̧ yürüpea̧ oa goë boea̧ oa goa ma ja̧didë. Ado judi ja̧boa̧rä, eami̧ oa a̧dë ja̧bodëpadiibe. 15Ado danȩ, pio ibë cjäri̧ri̧ cjia darërea̧ ji̧, jabechji̧ tjaoëriji̧ri̧mi̧ da oa ano̧ mire dae chjaodiibe yaba̧. Cjäri̧ri̧ cjia dadëmȩpea̧diibe. Ado eami̧ oa yürüdëpadiibe ji̧dëri̧. Danȩ, gatë tänȩa̧diibe pio mȩaiäpȩmo̧. Ado mȩnȩ ibë gatëpea̧ oa yürüa̧ üdë peaja̧di aeno̧a̧ oa cjia maeade yaba̧. Chjö̧na̧i̧ oa aeno̧a̧dejȩ. Mö̧na̧pea̧de. 16Ibëa̧ ama̧i̧ judi ji̧ra̧ tjamo̧ri̧ goarëremȩde. Jabo ju̧i̧ ja̧rëremȩ pio ju̧i̧ chjö̧na̧i̧ oa yürüa̧diibe Ütë tjamo̧ judi. Ibëa̧pea̧de. Ibëa̧ u̧ri̧ ja̧pea̧de. Ja̧di tara jabechji̧, Ütë tjamo̧ judi mȩa yo̧a̧mi̧ japavä —yo̧ji̧ri̧rȩ yo̧rëreji̧ri̧ni̧ro̧jo̧ȩ Jacobo ju̧i̧ jibëa̧ ivi jini̧ro̧.

Jacobo judi Padanarama quȩmȩ chiri oa a̧dë baärëremȩdejȩ

17-18Ja̧dëa̧ ju̧i̧ Jacobo judi jëdano̧rëremȩde jibëa̧ oa goa baäpea̧ oa. Jibëa̧ ama̧i̧rȩ cjo̧ro̧mȩräpȩ baäpea̧ oa, Icharë cjo̧ro̧mȩräpȩ baäpea̧ oa jëdano̧rëremȩde. Ja̧dëa ji̧ jibëa̧ ivi ji̧ri̧, jibëa̧ bori̧ ji̧ri̧ cameyo putu juro uë buë cha tänȩa̧ duri oa, jabechji̧ baärëreji̧ri̧dirȩ Canaa̧ quȩmȩ chiriräpȩmo̧. Jënȩ Padanarama quȩmȩ chiriräpȩ ja̧bepamȩrȩ boarërea̧ pio ju̧i̧ chjö̧na̧i̧därä oa goa baärëremȩde. Jibëa̧ oveja oa, jibëa̧ chivo oa, jibëa̧ baca oa, jibëa̧ buro oa, chjö̧na̧i̧ oa ma̧ȩ baärëremȩdejȩrȩ.

Currently Selected:

Taruparea̧ Ma̧ȩ 31: Pume

Highlight

Copy