Pomulanya 32

Sarita Mangkonong i Yakub Mampakaroso Dayau Simparata Muni Resi i Esau

1Wali payunya i Laban mayoko dayau muni ri lipunya, i Yakub mayoko seja. Ia pasi joanya mampolasaka palinja nsira dayau njo’u lipu mpa’a i Yakub ri tana Kana’an. Wali ri raya mpalinja nsira etu, sira mangkita pomakau-pomakau i mPue Allah yako ri saruga. 2Wali ojo pangkita i Yakub pomakau to malagi etu, ia manganto’o, “Gete, sira semo tentara-tentara to napokau i mPue Allah!” Wali see naka ia mangansangaka lipu etu Mahanaim, batuanginya “Dua kelompok tentara.”

3-5Wali ojo karoonya sira mangkita pomakau i mPue Allah etu, i Yakub mampokio bara sawei mba’a joanya pei mampokau sira, ia manganto’o, “Inta, patiruyu pei kami njo’u tongku-tongku Seir ri pada Edom. Nja’u ria komi dasimparata pei tau puengku, etu semo tukakangku, i Esau. Wali tempo komi mampotango ia, ewa si’i to danuto’oka ngkomi ia. To’oka, ‘Pa’a, kami ma’i napokau ntua’i ngkomi, i Yakub. Ia manganto’oka kami ma’i mampago komi damangansaritaka yami komi mangkonong palaong to roomo mawali resi ia see tuwu-tuwuja ane ratamo temponya komi dua dasimparata wo’u, komi damanoto resi ia. Wali dua mpuyu nto’umo kasaenya ia maroo-roo resi temanuanya, i Laban. Pei ri rayanya ia maroo nja’u ria boros kasugi to ia mangarata, etu semo, sapi, keledai, domba pasi bembe, samparia to etu boros kojo to re’e resi ia. Pasi re’e seja boros to papolaonginya to langkai pasi to we’a. Pei si’i-si’i ia rani kojomo rayanya mawolili muni ri lipu mpa’anya.’ Wali etu semo gombo to danuto’oka ngkomi tukakangku, i Esau.”

Wali ojo karoonya i Yakub manganto’oka sira gombo to etu, ia mampokau sira yau. 6Wali sira yau mangampago i Esau damamporataka resi ia gombo i Yakub etu. Wali sira mangarata i Esau pei mangika palaong to etu, roo see sira mawolili muni resi tau puenya. Ojo karatanya muni resi i Yakub etu, sira manganto’oka ia, to’onya, “Pa’a, kami re’e mampotango tukakamu pei mamporataka ia gombomu etu. Wali tempo ia mangandonge komi re’e ri raya mpalinjamu dayau muni ri lipu, tempo etu ia mangika songka dama’i damantomu komi sinjaya-njaya pei opo atu mba’a joanya.” Etu semo to nasaritaka nto papolaong i Yakub resi ia.

7-8Wali ojo pangandonge i Yakub kareba etu, ia masusa kojo rayanya. Ia meka kojo apa mangendo muni palaong to nawali seore tempo ia mangantipu i Esau. Wali ia mampondayaka i Esau naka pei ma’i mangkeni joanya boros etu apa tiroowa rani mampopate yau ia. Wali see naka i Yakub mangaga’a joa to si ia mangika yau dua kelompok. Pasi ewa see seja inikanya resi samparia dombanya, bembenya, sapinya pasi untanya. Ia mangika seja dua kelompok binatang to etu. Naka pei ia mangika ewa wetu see ane rapanya samba’a kelompok napakaja’aka yau i Esau pasi joanya, tuwu-tuwuja kelompok to kadua etu tiroo maya miyai yau see taa damate yau. Etu semo pampobuuka i Yakub.

9Wali ojo karoonya ia mangaga’a joanya pasi binatanginya mangika yau dua kelompok etu, i Yakub makai-kai resi i Pue Allah, ia manganto’o, “O Pue Allah, Komi to napakabae nu buengku, i Abraham, pasi pa’angku, i Ishak. Wali Komi semo i Pue Yawe to rata resi aku seore pei manganto’oka aku yau muni njo’u lipungku, njo’u lipu to nakaroos mpa’angku pasi ja’ingku. Pasi tempo etu Komi mangika parajanji damangika matao resi aku. 10Wali monso pu’u Komi sangkani mamporayang aku pasi sangkani mangika to Komi roomo manganto’o. Kamonsonya, aku taa masipato, ojo to papolaong ngKomi, pei nempo ewa wetu, Komi tiroo mangika palaong to matao resi aku ewa to room Nuparajanjika ngKomi aku. Apa lo’aja, tempo aku mampiyaika lipungku pei mangawote koro Yordan si’i, tempo etu ojo tokongku to re’e resi aku. Pei tempo si’i, gete, bae kojo kasugi to aku mangkeni muni ri lipungku, see naka gana ratila yau mawali dua kelompok!” Etu semo to nato’oka i Yakub mampokaika i Pue Allah.

11Wali ojo karoonya i Yakub manganto’oka i Pue Allah gombo etu, ia makai-kai wo’u, ia manganto’o, “O Pue, aku mamporapika kojo resi Komi see Komi mampalaes kami! Aku marapi sawang apa meka kojo rayangku mampobuuka tukakangku ia bara darata resi kami pei damampopate yau kami samparia, pasiwa nganangku pei indo nsira. 12Wali aku mamporapika resi Komi mampalaes kami apa Komi roomo mangika parajanji damangika matao resi aku pei mangawaika aku wiyaa to boros kojo ri tempo to darata, ewa bone ri wii ntasi kaborosinya.” Wali ewa wetu pokai-kai i Yakub resi i Pue Allah.

13Wali ojo karoonya i Yakub makai-kai resi i Pue Allah etu, soyomo eo, wali sira yore nja’u ria. Yako etu, ojo kaeonya wo’u rao, ia yau mangampilis binatang-binatang to re’e resi ia nja’u ria. Roo see ia mampasiromunaka binatang etu damawali sora to darawaika resi Esau tempo simparata pei ia. 14Wali binatang to rapasiromunaka etu, etu semo bembe, dua atu mba’a to tina, pei dua mpuyu mba’a to pongka. Pasi re’e seja domba, dua atu mba’a to tina pasi dua mpuyu mba’a to pongka. 15Pasi re’e seja unta to riana, togo mpuyu mba’a pasi ana nu unta etu, pasi ia mampasiromunaka seja sapi, opo mpuyu mba’a to tina pasi sampuyu mba’a to pongka, pasi keledai, dua mpuyu mba’a to tina pasi sampuyu mba’a to pongka. Etu semo binatang to napasiromunaka i Yakub darawaika i Esau.

16Wali ojo karoonya i Yakub mampasiromunaka samparia binatang etu, ia mangantilaraka yau lima kelompok. Wali bembe-bembe etu mawali samba’a kelompok, pasi ewa see seja domba, unta, sapi pasi keledai. Roo mangantilaraka kelompok-kelompok nu binatang etu, ia mansarumakaka resi to papolaonginya mangangkampang. Samparia kelompok nu binatang etu, wungka yusa to pangkampanginya. Roo see ia manganto’oka to pangkampang binatang etu, to’onya, “ Inta komi, patiruyu pei kami, mangangkeni binatang-binatang si’i. Pei ne’e rapasigaloka muni binatang to yusa. Samba’a kelompok rakeni ruyu panewa samba’a wo’u kelompok darakeni ri payunya, pei mamolongko sangkodi ri oyo ngkomi. Panewa ewa see seja raika samparia kelompok binatang si’i.” Etu semo to nato’oka i Yakub to pangkampang binatang-binatang to etu.

17Roo see ia manganto’oka to papolaonginya to damangkeni kelompok to uyunya damayoko, to’onya, “Ane komi simparatamo pei tukakangku, tempo etu ia bara damampotanaka resi komi, ia damanganto’o, ‘Imba nukayako ngkomi?’ Pasi ia damampotanaka, ‘I sema tau pue ngkomi, pasi i sema puenya binatang-binatang to nukeni ngkomi si’i?’ Ewa wetu ia damampotanaka resi komi.

18“Wali tempo ia mampotanaka resi komi ewa wetu, tempo etu komi damangansono damanganto’o, ‘Tua’i ngkomi, i Yakub to manga’angga komi etu, ia semo tau pue nu binatang-binatang si’i. Pei ia rani mangansoraka yau resi komi. Wali ia ma’i seja ri payu mami si’i.’ Etu semo pasono to danuto’oka tukakangku, i Esau.” Wali etu semo to nato’oka i Yakub to pangkampang binatang to uyunya damayoko etu. 19Pasi ojo karoonya ia mampogomboka sira, ia mampogomboka wo’u to pangkampang to mangkeni kelompok to kadua. Sewaju gombo to ia manganto’oka sira. Pasi ewa see seja inikanya manganto’oka to pangkampang to mangkeni kelompok to katogo, to kaopo, pasi to kalima. Wali ponto-ponto kelompok tau to mangkeni binatang etu sewaju songkanya. Etu semo, ane simparata pei i Esau, to pangkampanginya damanganto’oka ia gombo to nato’o i Yakub etu.

20Wali roo see i Yakub manganto’oka wo’u sira, to’onya, “Wali ne’e mangkalingan manganto’oka i Esau aku, tua’inya to manga’angga ia si’i, aku ma’i seja ri payu ngkomi.” Wali ewa wetu patuu i Yakub resi sira to pangkampang binatang-binatang etu. Naka pei ia mampotuunakaka sira ewa wetu, apa ia mampobuuka, “Ane i Esau mangkita sora-sora to rapokatuka ia etu, tuwu-tuwuja ia tamo damaja’a rayanya resi aku. Pasi tempo aku simparata muni pei ia, tempo etu ia tamo damangkitanaka salangku, wali ia dasimparata pei aku ri kasanang ndaya.” Ewa wetu pampobuuka i Yakub.

21Wali yako etu, mayokomo to papolaong i Yakub, sira mangangkeni binatang-binatang to damawali sora resi i Esau. Pei i Yakub pasi joanya to yusa, sira tawa yau. Sira yore ruyu nja’u ria. 22Pei ojo rata ntongo wuri, sira mambangu panewa i Yakub mangkeni indo nu ananya dua mba’a, pasi ngananya sampuyu pei samba’a, pasi to papolaonginya dua mba’a to roomo seja mawali indo nu ananya. Ia mangkeni sira njo’u koro nue to rato’oka Yabok. Wali ia mampokauka sira mangawote koro nue etu. 23Roo see i Yakub mampokauka wo’u to papolaonginya to yusa mangawote seja ue etu mangangkeni samparia to ia puenya. Wali sira mangika palaong to etu.

24Wali yako etu jamo i Yakub semo to re’ewa ri sambote nue Yabok etu. Pei ri raya mburi etu re’e samba’a to langkai to rata resi ia. Wali tau etu mawobo resi i Yakub rataka ri eo rao. 25Pei ojo kaeonya rao, tau rata etu mangansani Ia taa nakoto manganangi i Yakub, wali ri tempo sira mawobo etu, Ia mangajanggur tampinak i Yakub see naka wuku tiwewo yau yako ri wakanya. 26Roo see tau etu manganto’oka i Yakub, Ia manganto’o, “Lapamo Aku! Ne’emo manganta’amaka aku apa daeomo rao.”

Pei i Yakub manganto’oka Ia, to’onya, “Taa! Aku tawa mangalapa Komi. Waika ruyu aku rasi panewa aku damangalapa Komi.”

27Wali tau etu mampotanaka resi ia, to’oNya, “I sema sangamu?”

Sononya, “Sangangku i Yakub.”

28Wali tau to rata etu, kamonsonya i Pue Allah. Wali Ia manganto’oka i Yakub, to’oNya, “Yako tempo si’i, sangamu si’amo i Yakub. Aku mangansangaka wo’u korom i Israel, batuanginya ‘Maroso mangewa i Pue Allah’. Naka pei Aku mangansangaka korom i Israel etu apa lo’a, korom maroso mangewa Aku, i Pue Allah si’i, pei korom semo to manganangi Aku. Pasi ewa see seja nuika ngkorom ane mangewa to lino. Korom semo to manganangi sira.” Etu semo to nato’oka i mPue Allah i Yakub.

29Wali i Yakub mampotanaka seja resi Ia, to’onya, “I sema sanga ngKomi?”

Pei Ia mangansono, to’oNya, “Gete, maka pei korom mampotanaka sema sangangKu?” Roo see Ia mampogomboka wo’u i Yakub mampakasanang katuwunya, panewa Ia mayoko yako nja’u ria.

30Wali yako etu i Yakub manganto’o, “Aku roomo mampotango i Pue Allah pei mangkita lioNya, pei nempo ewa see, aku taa mate yau.” Wali see naka ia mangansangaka tampa etu Peniel, batuanginya “lio i mPue Allah”.

31Wali ojo kaeonya rao, i Yakub mayoko yako Peniel etu. Tempo ia mayoko etu ia kampeo apa maja’a tampinakinya see naka ia mawali yau sampungku. 32Wali apa saba i Yakub napakaja’aka yau i mPue Allah tampinakinya etu, etu semo sabanya naka pei rataka ri temponya aku mangantulis sarita si’i tau Israel taa mangkoni wombo ntampinak nu binatang.

Currently Selected:

Pomulanya 32: WNT

Highlight

Copy