Pomulanya 28

Sarita Tempo i Ishak Mampokau i Yakub Yau ri Lipu i Laban

1Wali yako etu i Ishak mampokio i Yakub damampatiendoka ia pasi damampokaika ia see i Pue Yawe damampakasanang katuwunya. Ojo karata i Yakub etu, i Ishak manganto’oka ia, “Ne’e kojo mangoko tau we’a to Kana’an damawali indo nu anamu. 2Kasimbalinya yako etu, inta pakajoli yau njo’u tana Padan-Aram, nja’u banua i Betuel, pa’a nu indomu. Panewa ane ratamo nja’u ria, oko samba’a ana nu mamamu, i Laban, damawali indo nu anamu. 3Wali aku makai-kai resi i Pue Allah anu Makuasa mamporapika resi Ia see Ia damampakasanang katuwumu pasi see Ia damampakaboros wiyaamu see komi damawali malagi suku. 4Pasi kuporapika resi Ia see Ia damamporataka resi korom pasi resi wiyaamu samparia to iparajanjikaNya yami resi i Abraham, etu semo tana si’i. Ri tempo si’i korom maroo ri tana si’i ewa naika ntau to rata ri tana ntau to yusa, pei kuporapika resi i Pue Allah see tana si’i damawali yau komi sambiyaa puenya.” Etu semo to nato’oka i Ishak i Yakub. 5Wali ojo karoonya i Ishak magombo resi i Yakub etu, ia mampokau ananya etu yau. Wali i Yakub mampiyaika lipu mpa’anya etu pei yau njo’u Padan-Aram, yau mangampago mamanya, i Laban. I Laban etu ia tukaka indo i Yakub, i Ribka.

Sarita Tempo i Esau Mangoko Ana i Ismael Mawali Indo nu Ananya

6Wali yako etu i Esau mangandonge sarita mangkonong tempo i Ishak mampokaika i Yakub panewa mampokau ia yau njo’u Padan-Aram damangaliwu tau we’a nja’u ria. Pasi ia seja mangandonge tempo i Isahk mampokaika i Yakub etu, ia mampatiendoka i Yakub naka ne’e ia mangoko tau we’a nto Kana’an mawali indo nu ananya. 7Pasi i Esau mangansani i Yakub ia re’e mampolaika gombo mpa’anya pei indonya etu pei roomo mayoko dayau njo’u Padan-Aram. 8Wali tempo etu semo panewa manasa resi i Esau pa’anya taa kojo masanang resi indo nu ananya to dua mba’a apa sira dua paka tau we’a nto Kana’an. 9See naka ia yau njo’u lipu nakaroo i Ismael, ana i Abraham, pei mangoko samba’a tau we’a sanganya i Mahalat, damawali seja indo nu ananya. I Mahalat etu ia ana i Ismael pasi tua’i i Nebayot. Wali togo mba’a indo nu ana i Esau etu.

Sarita Mangkonong Pangipi i Yakub Nja’u Betel

10Wali si’i semo sarita mangkonong palaong to mawali resi i Yakub ri raya mpalinjanya yako Bersyeba dayau njo’u kota Haran. 11Ri raya mpalinjanya etu, tawa rata nja’u Haran, dasoyomo eo see naka ia yore ri jaya. Tempo ia dayore etu ia mangoko songu watu to nja’u tampa etu pei ia maturu mangampoyuna watu etu. 12Wali ia yore yau panewa tempo yore etu ia mangipi. Ri raya mpangipinya etu ia mangkita re’e eja to makore yako ri tana pei tomponya rata ndate yangi. Pasi ia mangkita malagi mba’a pomakau i mPue Allah yako ri Saruga, sira mapone-pana’u mapone-pana’u ri eja etu.

13Wali yako etu i Yakub mangkita i Pue Yawe makore ri awenya, i Pue Yawe manganto’o, “Aku semo i Pue Yawe, etu semo Allah to napakabae nu buemu, i Abraham, pasi Aku semo Allah to napakabae seja mpa’amu, i Ishak.” Wali yako etu i Pue Yawe manganto’o wo’u, to’onya, “Tana to kayoremu si’i daKuwaika korom pasi wiyaamu. 14Pasi wiyaamu etu damawali boros, ewa awu ntana kaborosinya. See naka kanjo’u-njo’u kabae-bae tana to danatundang nsira nja’u tondo kasoyo nu eo, pasi tondo mata nu eo, pasi tondo utara pei tondo selatan. Pasi Aku manganto’oka seja korom yako korom pasi wiyaamu, see naka samparia bansa nto lino darapakasanang katuwunya. 15Wali ne’e mangkalingan, Aku re’e siwaka pei korom pasi Aku damangararamaka korom nempo imbare danukanjo’u. Pasi ri tempo to darata Aku damangkeni muni korom ri tana si’i. Wali Aku taa damampiyaika korom. Kasimbalinya yako etu, Aku damangabanang samparia anu to parajanjikangKu korom etu.” Etu semo gombo i mPue Yawe resi i Yakub ri raya mpangipinya etu.

16Wali ojo karoonya i Yakub mangipi etu, ia mangendo muni panewa mampobuuka, “Gete, i Pue Yawe semo to re’e ri tampa to si’i! Ruyu aku taa kunsani Ia bara re’e rire, pei si’i-si’i manasa resi aku monso pu’u Ia re’i!” 17Wali i Yakub ia meka rayanya pei manganto’o, “Gete, tampa si’i masipato rapokeka! Si’i semo tampa to nakaroo i mPue Allah pasi tampa to nakare’e wombo nSaruga.” Etu semo pampobuuka i Yakub roo mangipi etu.

18Wali yako etu, dawuro-wurowa, i Yakub mambangu. Ia mangokotaka watu yunanya etu, pei mampapokore watu etu panewa ia mangawubu indol nsaitun ri wawonya mangika tondong tampa etu i Pue Allah puenya. 19Wali ia mansangaka tampa etu Betel, batuanginya banua i mPue Allah. Pei tempo ruyu kota to nja’u ria sanga ngkota etu Lus.

20Wali ojo karoonya i Yakub mangika palaong to etu, ia mangika nia, ia manganto’oka i Pue Yawe, “Ane Komi damangararamaka aku pasi damangajagai aku ri raya mpalinjangku, pasi ane Komi damangawaika aku pangkoni pasi pakengku 21see aku darata muni nja’u banua mpa’angku tare salaka, ane ewa see, jamo Komi semo to damawali Allahngku. Wali aku tamo damampue mampakabae pue to yusa. 22Pasi tampa to pangampakorengku watu to mawali tondong si’i damawali yau tampa to danapago ntau to rani mampue mampakabae Komi. Pei samparia dale anu Nuwaika ngKomi aku, aku damangika sampuyu ntila to sewaju kabaenya, panewa santila dakuwaika muni resi Komi.” Wali etu semo nia to naika i Yakub nja’u Betel etu.

Currently Selected:

Pomulanya 28: WNT

Highlight

Copy