Pomulanya 27

Sarita Tempo i Yakub Mangantipu Pa’anya

1Wali yako etu i Ishak mawali tu’a kojomo. Pasi matanya mawali maja’a see naka ia tamo mayoasinya mangkita rao. Wali ri katawanya ia mate yau ia mangansani ratamo temponya ia mangaluluka ewa wimba ada nsira pei mampokaika i Esau, ananya to tu’anginya. Ia damamporapi resi i Pue Allah see Ia damampakasanang katuwu nu ananya etu pasi see Ia mangika resi ia samparia anu to matao to masipato Ia mangika resi ana to tu’anginya etu. Wali see naka i Ishak manganto’oka tau yau mangalo’a i Esau pei mangangkeni resi ia. Wali tau etu yau mangalo’a i Esau, panewa ojo karatanya i Esau resi ia, i Ishak manganto’o, “Anangku!”

Panewa i Esau mangansono, “Seijare aku, Pa’a.”

2Wali i Ishak manganto’o, “Aku si’i tau tu’a kojomo. Taa kunsani aku bara mpia temponya damate yau. Pei ri tempo aku tawa mate si’i, re’e to kuporapika resi korom. 3Etu semo, oko panamu pasi matanya pei inta njo’u pada pei panaka aku binatang to maila. 4Panewa ane korom mangarata binatang etu, keni muni pei tunuka aku ewa mananya nuika ngkorom. Wali pasigenaka aku nae to manami kuepe mangkoni etu pei kenika aku see aku maya mangkoni. Roo aku mangkoni etu aku damakai-kai resi i Pue Yawe. Aku damampokaika korom see i Pue damampakasanang katuwu ngkorom pasi see i Pue damangika resi korom samparia anu to matao to masipato Ia mangika resi ana to tu’anginya.” Etu semo to nato’oka i Ishak resi i Esau. 5Pei tempo i Ishak mampogomboka i Esau etu, i Ribka ia re’e mangandonge gombonya etu.

Wali yako etu i Esau ia mayoko dayau mangaliwu binatang darakeni muni ewa nato’o mpa’anya etu. 6Payunya ia yau, i Ribka yau mampogomboka i Yakub, ia manganto’o, “Anangku, aku owo room mangandonge pa’amu mampogomboka tukakamu, i Esau. 7Wali ia manganto’oka i Esau, to’onya, ‘Liwuka aku binatang to maila pei pasigenaka aku nae to manami kuepe mangkoni. Panewa ane roo mangkoni aku maya makai-kai resi i Pue Yawe. Aku damampokaika korom see i Pue damampakasanang katuwu ngkorom pasi see i Pue damangika resi korom samparia anu to matao to masipato Ia mangika resi ana to tu’anginya.’ 8Etu semo gombo mpa’amu. Wali anangku, padongeka kojo to aku manganto’oka korom si’i pei luluka. 9Inta njo’u tondok nu bembe pei okoka aku dua mba’a bembe to mangurawa pei to maboko. Kenika aku see aku maya mampasigenaka pa’amu nae to manami naepe mangkoni. 10Panewa ane mananamo, kenika pa’amu danapangkoni see ia damampokai-kaika korom re’e katawanya ia mate yau. Ane ewa see, korom semo to danapakasanang i mPue Yawe katuwumu, pasi korom semo to damangarata samparia anu to matao etu.” Etu semo songka i Ribka to ia manganto’oka i Yakub.

11Pei i Yakub manganto’oka indonya, ia manganto’o, “Gete Indo! Taa mawali, apa tukakangku, i Esau, ia tau to makambuyu koronya, pei pela to si aku mapose! 12Wali wimba ane pa’angku mampotaka korongku si’i? Ane ewa see ia damangansani aku si’a i Esau. Wali ia damaja’a rayanya mampobuuka aku rani mangakal ia, see naka ia taa damamporapika resi i Pue Yawe see Ia mangika matao resi aku. Kasimbalinya yako etu ia damantanaa yau aku!”

13Pei indonya manganto’oka ia, “Anangku, ane pa’amu mantanaa yau korom, biakamo aku semo to kono tanaa etu. Taa mawei. Ojo ika to aku manganto’o. Inta okoka aku bembe etu.”

14Wali i Yakub yau mangoko dua mba’a bembe yako ri tondoknya panewa mansambale yau bembe etu. Roo see ia mangangkenika indonya. Wali indonya mampasigena nae to manami ewa to naporani i Ishak. 15Roo see i Ribka mangoko pake i Esau. Pake etu pakenya to magaya kojo to ia mangkalisoka ri tenda nu indonya. Wali pake to etu i Ribka mangoko pei mampaposunsuka i Yakub. 16Roo see i Ribka mangoko seja pela nu bembe itununya etu pei manganso’o ri pale pasi ri le’e i Yakub see tamo mapose. 17Yako etu ia mangawaika i Yakub nae to manami pasi roti to inikanya.

18Wali i Yakub ia yau resi pa’anya pei manganto’o, “Pa’angku, si’imo aku.”

I Ishak mangansono, “Iya, anangku. I sema korom?”

19Panewa i Yakub manganto’o, “Aku si’i i Esau, ana ngkomi to tu’anginya. Aku roomo mangika ewa nuto’o ngkomi, wali patunda ruyu pei koni sangkodi nae to keningku si’i, see komi maya mampokai-kaika aku see aku danapakasanang i mPue Yawe katuwungku.”

20Pei i Ishak mampotanaka resi ananya etu, ia manganto’o, “Gete anangku! Wimba pei majoli kojo nurata binatang si’i?”

Sono i Yakub, “I Pue Yawe, etu semo Pue Allah to napakabae ngkomi, Ia semo to mangawaika aku dale.”

21Wali yako etu i Ishak manganto’oka i Yakub, “Mai ri awengku si’i, anangku, see aku maya mampotaka pela ngkorom. Apa aku rani manasa bara monso pu’u korom i Esau, bara si’a.”

22Wali i Yakub yau ri awe mpa’anya, i Ishak, panewa i Ishak mampotaka ia apa matanya maja’amo, tamo mayoas mangkita rao. Roo mampotaka i Yakub, ia manganto’o, “Gete, ane loomu, ewa loo i Yakub, pei ane palemu, pale i Esau semo.” 23Naka pei i Ishak taa nansani bara pale i Yakub semo to ia mampotaka apa ri pale i Yakub re’e pela nu bembe re’e ria see naka makambuyu ewa pale ntukakanya, i Esau. Wali i Ishak ia rani mampokai-kaikamo ananya etu see ia danapakasanang i mPue Yawe katuwunya. 24Pei ri katawanya ia mampokaika ananya etu ia mampotanaka wo’u ruyu, ia manganto’o, “Wimba, bara monso-monso pu’u korom anangku, i Esau?”

Sono i Yakub, “Monso.”

25Wali yako etu i Ishak manganto’o, “Anangku, kenika aku sangkodi nae dakukoni. Ojo karoonya aku mangkoni aku maya mampokai-kaika korom see korom danapakasanang i mPue Yawe katuwumu.”

Wali i Yakub mangangkenika pa’anya nae pei ia mangkoni. Pasi ia mangkenika seja pa’anya tule anggur danainu i Ishak. 26Wali ojo karoonya pa’anya mangkoni pasi manginu etu ia manganto’oka i Yakub, “Mai rire, anangku, pei nengu aku.”

27Wali i Yakub yau manganengu pa’anya. Tempo ia manganengu pa’anya etu, i Ishak mangepe wau mpakenya, wau i Esau semo, wali see naka ia makai-kai resi i Pue Yawe see Ia damampakasanang katuwu nu ananya etu pasi see Ia damangika resi ia samparia anu to matao to masipato i Pue mangika resi ana to tu’anginya. Panewa ia mampogomboka ananya etu, ia manganto’o, “Magaya kojo wau nu anangku si’i, ewa wau nja’u pada to napakaboko i mPue Yawe tananya. 28Wali aku re’e mamporapika resi i Pue Allah see Ia damampakasanang katuwu ngkorom, anangku. Aku marapi resi Ia see Ia mantudumakaka korom ondu damangarinis nawumu, pasi aku marapi resi i Pue see Ia mampakaboko kojo tana ri nawumu etu see gana kojo wea pasi tule to re’e resi korom.

29“Pasi aku marapi seja resi i Pue Allah see tuwu-tuwuja tau to malagi bansa pasi to malagi suku to damangantabe korom pei mawali to papolaongimu. Pasi ane mangkonong ja’imu, tuwu-tuwuja sira damangantabe korom pasi korom semo to damangkuasang sira. Pasi aku mampokaika seja wiyaa ngkorom see ri tempo to darata wiyaa ngkorom etu damangkuasang wiyaa nu ja’imu.

“Pasi re’e wo’u to kuporapi resi i Pue Allah. Etu semo i sema-sema tau to mantanaa yau korom, tau etu semo to dakono tanaa. Pei i sema-sema tau to mangika matao resi korom, tau etu danawaika seja i mPue Allah anu to matao.” Etu semo gombo to naporata i Ishak resi ananya mangkonong anu to matao to danaika i mPue Yawe resi ia ri tempo to darata.

Sarita Mangkonong Palaong to Mawali Tempo Karata Muni i Esau

30Wali ojo karoonya i Ishak mampokaika pasi mampogomboka i Yakub etu, i Yakub miyai yako resi ia. Pei ojo piyainya etu, rata muni tukakanya, i Esau, mangangkeni binatang to iratanya. 31Ojo karatanya muni etu, ia mampasigena seja pangkoni to manami panewa mangkenika pa’anya. Ia manganto’o, “O, Pa’angku, patunda ruyu pei koni sangkodi nae ikeningku si’i see komi maya mampokaika aku see aku danapakasanang i mPue Yawe katuwungku.”

32Wali pa’anya, i Ishak, kiyopo mangandonge loonya pei mampotanaka resi ia, to’onya, “I sema korom?”

Wali ia manganto’o, “Gete, aku i Esau, anamu to tu’anginya.”

33Wali ojo pangandonge i Ishak pasono i Esau etu, ia ipu kojo rayanya panewa mapari kojo karongko-rongkonya. Ia manganto’o, “Ane monso pu’u korom i Esau, ane ewa see, i sema tau to owo room mampiyaika aku ngena see? Tau etu nangantunu seja nae pei nangkenika aku, see naka aku mangkoni. Roo see aku mampokaika ia see i Pue Yawe damampakasanang katuwunya pasi aku mampokaika ia see i Pue mangika resi ia samparia anu to matao to masipato i Pue mangika resi ana to tu’anginya. Wali tau etu semo to damangarata samparia to etu apa tamore jaya aku mangawali yau palaong to aku room mangika etu.”

34Wali ojo pangandonge i Esau gombo mpa’anya etu ia maroso kojo loonya kaboo apa mawo kojo rayanya. Ia ngasa tumangi manganto’oka pa’anya, “Gete, Pa’a, aku parluu seja! Pakaika aku see aku damangarata seja anu to matao etu!”

35Pei i Ishak manganto’o, “Taa mawali, apa a’imu ma’i mangantipu aku see naka anu to masipato rawaika resi korom to tu’anginya, roomo rawaika yau resi ia.”

36Wali i Esau ia masusa rayanya, pasi apa saba sanga i Yakub mosu sewaju ewa santaa to batuanginya “to pantipu”, see naka ia manganto’o, “Masipato pu’u ia rasangaka i Yakub, apa monso pu’u ia to pantipu! Apa dua ngkanimo ia mangantipu aku. Seore ia mangoko yau panta to masipato rawaika resi aku, to tu’anginya, damangantima. Panewa seo si’i ia mangantipu wo’u aku apa ia roomo mangoko seja samparia to masipato i Pue Yawe mangika resi aku! Gete, Pa’a, bara tare yusa to maya nuporapika ngkomi resi i Pue Yawe see Ia damampakasanang seja katuwu to si aku?”

37Pei i Ishak manganto’o, “Tamo re’e! Samparia roomo rawaika yau resi a’imu. Apa aku roomo makai-kai see i Pue Yawe damangokotaka ia see ia semo to damangkuasang korom. Pasi samparia ja’inya damawali yau to papolaonginya. Pasi aku room makai-kai seja see ia darawaika wea pasi tule to gana kojo. Wali samparia to etu roomo rawaika yau resi i Yakub, see naka tamo re’e pasi kesaa to aku maya mangawaika resi korom, anangku!”

38Pei i Esau ia tiroo mamporapika resi pa’anya, ia manganto’o, “Wimba bara tamo re’e to yusa to maya darawaika resi aku? Kuporapika resi komi, pokaika seja aku see aku damangarata seja anu to matao yako resi i Pue Yawe!” Etu semo to naporapi i Esau. Roo see ia ngasa tumangi.

39Wali pa’anya, i Ishak manganto’oka ia gombo si’i, ia manganto’o, “Ewa si’i to damawali. Tana to danukaroos ngkorom, tana etu longko yako ri tana to maboko, pasi nja’u ria tare ondu yako ndate yangi to mangarinis lipu etu, see naka taa mawali kalingaa. 40Wali see naka korom damangamusu sa’e see mangarata anu to danupake ri raya ngkatuwumu. Pasi korom damawali to papolaong ntua’imu, i Yakub. Pei yako etu korom damangewa ia panewa korom damiyai yako ri ara ngkuasa ntua’imu etu.” Ewa wetu gombo i Ishak resi i Esau.

Sarita Tempo i Esau Mangika Songka Damampopate Yau i Yakub

41Wali yako etu i Esau maja’a nakita i Yakub apa anu to matao to masipato nawaika mpa’anya resi ia to tu’anginya roomo rawaika yau resi i Yakub etu. Wali saba etu see naka i Esau mangansongka, ia mampobuuka, “Tamo masae pa’angku damate yau panewa aku damangika ada ntau mate ri raya ngkamawo ndaya. Panewa roo etu aku damampopate yau i Yakub.” Etu semo songka i Esau.

42Pei yako etu re’e tau to mangansaritaka resi i Ribka mangkonong songka i Esau etu, see naka i Ribka mansaka manganto’oka tau yau mangalo’a i Yakub. Wali ojo karata i Yakub, i Ribka manganto’oka ia, “Polaika gombongku si’i! Apa tukakamu, i Esau, ia re’e mangansongka damamponsawak palaong ngkorom. Ia rani mampopate yau korom. 43Wali anangku, ika to aku manganto’o si’i. Pakajoli piyai mangampago tukakangku, i Laban, nja’u kota Haran. 44Rata nja’u ria, karoo resi mamamu etu sangkodi temponya mangampeas i Esau tamo maja’a rayanya resi korom. 45Panewa ane ia tamo maja’a rayanya pasi roomo mangkalingan yau palaong to nuika ngkorom resi ia etu, tempo etu aku damampokau tau yau mangansale muni korom. Ika ewa wetu apa ane i Esau mampopate yau korom, ane ewa see ia darahuku mate seja. Wali ane ewa see, pura yaumo anangku ri rayanya seo. Gete, bo’ongku ewa wetu!”

46Wali ojo karoonya i Ribka mampogomboka i Yakub etu, ia yau magombo wo’u resi pa’a nu ananya, i Ishak. Ia mamporani i Yakub mampiyaika tana etu, wali ia manganto’oka pa’a nu ananya, to’onya, “Aku mosam apa to Het to dua mba’a to naoko i Esau mawali indo nu ananya etu, sira mampakasusa katuwungku. Wali ane i Yakub mangoko seja tau we’a ri tana si’i, ewa to Het etu, ane ewa see tamo re’e batuanginya katuwungku si’i! Wali to tao-tao ne’e kita mangabiaka i Yakub mangoko tau we’a ri tana si’i.” Etu semo to nato’oka i Ribka i Ishak.

Currently Selected:

Pomulanya 27: WNT

Highlight

Copy