MAADOCO 11
11
Jeduusadén ña Jesuuquidiito wä’dö’jödö
1Yaawä Wetaajé ña, Wetaaniya ña mmaja ä’döjai töwä’döa’comjäcä, amoinche’da cönä’ja’to Jeduusadén ñano jäcä, Odiiwo ’jödö je’taca. Yaawä Jesuuquidiito cönaanontoicho aacä tönoowanoomadö. 2Töwö cönä’döaacä chäwwäiñe:
—Ojoncomo jataaca, mädä cöje’tacaiñe nääneaadö aca. Iiña äwä’döa’comjäcä cawaayu nnedö’cä i’wadö’taajä medantaato’de, ta’cu’täjöönö. I’wadööcatääcä’de, sadäädä mene’täiye. 3Anejja wwä adheecamma’ja’comjäcä, “ ¿Ane’cotoojo mi’wadööcaato;” ca’jäcä, edääje caichäcä’de chäwwä: “Ñaa edhaajä nijumma; eduuwa mma nene’ja dea;” quee caichäcä’de; quee cönä’döaacä Jesuuquidiito ñanno aaco’como wwäiñe.
4Ñanno cöntonto yaawä. Jödo’na cawaayu nnedö’cä i’wadö’taajä cöneedantoicho yaawä mönaatajo, ääma dö’tä. Tönwanno cöni’wadööcaicho. 5Yaawä anejjacoomo yäätoncomo cönä’döa’to chäwwäiñe:
—¿Ane’cäämö mödööato? ¿Ane’cotoojo mi’wadööcaato dea mä’dä cawaayu nnedö’cä? quee.
6Ñanno cöneccujä’a’to yaawä Jesuuquidiito necamma’jödö nönge dea. Yaawä ñanno soto cönaadojoicho chäwwäiñe. 7Ñoowanoomadö cönaadoicho yaawä Jesuuquidiito döiña. Töwoomöcoomo cönnöicho ye’wä. Yaawä Jesuuquidiito cönäncui ye’wä. 8Jooje soto töwoomöcoomo cönaajujiiñajäätöicho ääma tai, yäätajaatojooje. Anejjacoomo chuu adö cönaacä’jätöicho; yää mmaja ääma tai cönnöicho dea.
9Awa’de’como wötäädö, möcääcä’ja’como mmaja cöncä’tömjä’a’to; cönä’döa’to:
—Aashichaato nä’döi. Aashichaato määdhä, Cädhaajotoncomo eetö joiño we’ajä. 10Aashicha na’de cadai’choncomo Dawí cajiichaanaje yeichojo ne’a’dedö. Aashichaato ñäädä Wanaadi; quee cöncä’tomjä’a’to.
11Jesuuquidiito cönä’döi yaawä Jeduusadén ña. Wanaadi weichojo taca cönoomomöi. Tameedäädä töwwä emmenca’jäcä Wetaaniya ña cöntämä yaawä ñanno amoojadooto de’wä aaco’como tönoowanoomadö jadäiñe, co’mannäje yeijäcä.
Waju’nä täjössemjönö euwö’jödö
12Yää jenamma naadöje, Wetaaniya ñanno töweejödaawäiñe, Jesuuquidiito ämiije cönä’jaacä. 13Amoinchenno waju’nä ñaatö’taajä cöneedantäi; taque cönä’jaacä. Töwö cöntämä chäwwadäädä täjösse yeichö ene. Yöiña töwä’döa’jäcä täjösse’da cöneedantäi, dhadö’jödö mma jooje, yeejössataatojo cu’nädööjönö yeijäcä. 14Yaawä Jesuuquidiito cönä’döaacä waju’nä wwä:
—Adheejedöödö anaame’da soto naato’de yeichöje; quee cönä’döaacä.
Ñoowanoomadö cöneetaicho yääje yä’dödö.
Wanaadi weichojo tacanno töwäätätöijaamo ija’canö’jo’jödö
15Yääje mma yaawä Jeduusadén ña cönä’döicho. Wanaadi weichojo taca töwoomonga’jäcä Jesuuquidiito cönaajäntäi yaawä töwäätätöijaamo ija’canö’jodööcomo. Jödaata chamjiyaacannamo meesaichomo cönaawotönnacaajätöi, jaduuma ejeemajonnamo a’täichomo mmaja. 16Mösooma anaadojo’da töwö cönä’jaacä yaawä Wanaadi weichojo tai. 17Edääje töwö cönoowanooma’to:
—Wanaadi a’deddu imennaajä jäcä yääje nä’döa: “Ömmai nätä’täja’de tameedä soto Wanaadi wwä ya’deuto’comooje;” quee nä’döa imennaajä. Änwanno ’quene mödööato tämeena’como weicho’comooje; quee cönä’döaacä Jesuuquidiito.
18Yääje yä’dödö cöneetaicho ñanno Wanaadi wwä töwa’deuwaamo edhaajotoncomo, judhío owaanomannamo mmaja. Tönwanno Jesuuquidiito emaatojo töntö’tamme’que cönä’ja’to tönnontä töweijäcäiñe, tameedä soto ñeecammajäätödö jooje eta’se yeichomjäcä mmaja. 19Yaawä cho’monga’jäcä Jesuuquidiito cöntämä Jeduusadén ñanno.
Waju’nä yu’ta’jödö
20Yää jenamma jenaadäne ääma tai töötädaawäiñe, yää waju’nä, Jesuuquidiito neuwö’jödö cöneedantoicho tuyu’ta yeichö, imiichö jadäädä. 21Peedhodo cöntö’tai yaawä waju’nä wwä Jesuuquidiito wa’deuwö’jödö jäcä. Töwö cönä’döaacä Jesuuquidiito wwä:
—Eneecä’ma, Owaanomaanei, mädä waju’nä aneuwö’jödö tuyu’ta naadö.
22Jesuuquidiito cöneccujä’acä; cönä’döaacä chäwwä:
—Wanaadi ecaanö’täcä. 23Chäänönge yääje wä’döa äwwäiñe, edääje anejja wä’döa’jäcä naadö naane’ edä jöö wwä: “Ääsecaacä dama ’cwaca;” ca’jäcä, chäwwä ecaanö’a’jäcä ya’deuwö’jödö nönge nä’döa’de yaawä, yääje töwä’dö’jödö nönge ä’döjai yeichö aneecamjö’da’da yeiya’jäcä mmaja. 24Yääje yeijäcä yääje wä’döä äwwäiñe, tameedä Wanaadi wwä ane’catäädöcoomo ecaanö’täcä utuudu; yaawä äwwäiñe nä’tua’de. 25Wanaadi wwä awa’deuwödaawäiñe encwanno’jotääcä anejja jäcä cone’da aweichöcoomo. Yaawä Oomotoncomo caju ñano encwanno’jojai ña änwanno ocoone’nadiiyöcoomo. 26Änwanno anencwanno’jo’da aweiya’comjäcä, Oomotoncomo caju ñano anencwanno’jo’da mmaja na’dede ocoone’nadiiyöcoomo; quee cönä’döaacä Jesuuquidiito.
¿Anääcö woije mädä tönnöe määnene?
27Yääje mma yaawä Jeduusadén ña cönennacaicho dea. Wanaadi weichojo taca Jesuuquidiito wäämannäjöödawä yöiña cöneejoto Wanaadi wwä töwa’deuwaamo edhaajotoncomo, judhío owaanomannamo mmaja, inchoncomo mmaja. 28Tönwanno cöneecamma’joicho:
—¿Änääcö woije tönnöe määnene? ¿Änääcö cuntui mädä tödöötojo äwwä? quee cönä’döa’to.
29Jesuuquidiito cöneccujä’a’to; cönä’döaacä chäwwäiñe:
—Öwö maneecamma’joto’ñojo awa’de. Äwwäiñe yeccujä’a’jäcä öwö wecamma’de yaawä mädä dödö jäcä yaanontänei’jödö. 30¿Änääcö woije Juan wautisaaje soto tönnöeiñe cönä’jaacä? ¿Wanaadi woije ’ja, soto woijeene? Ecammatääcä; quee cönä’döaacä Jesuuquidiito.
31Yaawä ñanno judhío tönwannoje dea cönäätäccujä’a’to; cönä’döa’to:
—¿Aaquene queccujä’ato? “Wanaadi woijato cönä’jaacä;” ca’jäcä cöwwäiñe, töwö yääje ä’döjai ña yaawä: “ ¿Ane’que’nei dha’deddu aneecamjö’da meiya’quene, yääje yeiya’jäcä:” quee. 32Yaawääne’ soto woijatooje e’täjai’cha mmaja caato dea; quee cönä’döa’to.
Tönwanno soto woijatooje e’tä’se’da cönä’ja’to soto tönnontä töweichomjäcä, Wanaadi wa’deuwödö ecammaneije Juan Wautiita töneecanö’e soto weichomjäcä. 33Yaawä Tönwanno cönä’döa’to Jesuuquidiito wwä:
—Ñaa owaanäcä’da na; quee.
Jesuuquidiito cönä’döaacä chäwwäiñe:
—Öwö mmaja aneecamma’da wa dea edä tödöödö jäcä yaanontänei’jödö; quee cönä’döaacä.
Currently Selected:
MAADOCO 11: MCH
Highlight
Share
Copy
Want to have your highlights saved across all your devices? Sign up or sign in
© 2014 Reservados todos los derechos
