MAADOCO 12

Conemjöncomo töweetadaawa’cajaamo’jödö dö’seeno

1Yaawä Jesuuquidiito cönaajäntäi yö’seeno joi töwa’deuwödö chäwwäiñe; cönä’döaacä:

—Dhanwa tönaudäcaato chääjedöödö cönnatö’täi tönaudä’jödö awä; cuncudaadai’chäi yaawä. Chääjedöödö eccucaatojo cönnöi chea. Edai’chänei weichojo cönaamäi chea.

“Yaawä anejjacoomo wwäiñe edai’chojoodö’jo anejja nono de’cäi cöntämä. 2Yaawä yeejössataatojo cu’nädö aca yä’döa’jäcä töwö tanoonö cönaanontäi tönaudädö edai’chännamo wwadäädä, tönaatödö ejeedödö wetä. 3Ñanno edai’chännamo dhanoonö cönaajoicho; cönaiju’jätöicho yaawä. Tänwase’da cöniiñacaanö’joicho yaawä. 4Yää ’jeje ñäädä audaajä edhaajä anejja tanoonö daja cönaanontäi chea. Ñäädä täju que cönwäjäätöicho; iju’jä jäcä cöneetunui’chajäätöicho. Jooje cone’da cöna’deuwöicho chäwwä. 5Anejja daja cönaanontäi chea yaawä. Ñäädä cöneemaicho. Yää ’jeje audaajä edhaajä anejjacoomo tanoonö daja cönaanontoicho dea yaawä, wanna’cä jeene. Ñanno mmaja yääje cönä’döjoicho dea audaajä edai’chännamo wwäiñe; dhantai taiju’jä’e, dhantai ’chene täma.

6“Iiñedö mma cönä’jaacä yaawä, tooniyaano, töwö imjummadö. Ñäädä cönaanontäi chea yaawä, yä’cadööje. “ ¿Önnedö jaiñoone ca ñontäjai ñaicho?” quee cöntö’tajä’acä. 7Yaawä ñanno audaajä edai’chännamo tönwannoje dea cönä’döa’to: “Määdhä ñäädä tumö ca’semjödö töwwä tödöönei. Queematäiye ja, cönaudädööcomooje eiye yaawä edä;” quee cönä’döa’to. 8Tönwanno cönaajoicho yaawä emaadöje mma. Audaajä tö’cäi chääquejöödö cöneemaicho yaawä.

9“ ¿Ane’cäämö tödööjai ñai ñäädä audaajä edhaajä, quee ’ja? Töwö ne’a ñanno audaajä edai’chännamo töja’eiñe; anejjacoomo wwä audaajä edai’chojoodö wetä.

10“ ¿Ana’de’tä’da ca meiya’quene Wanaadi a’deddu imennaajä? Edääje nä’döa:

Yää täju, maa amännamo cönquiiñemeecöichodö,

anno’tojooje na eduuwa.

11Cädhaajotoncomo mädääje cönnöi; aashicha cöwwäiñe chö’tadö na; quee imennaajä wä’dödö na; quee cönä’döaacä Jesuuquidiito.

12Yaawä ñanno judhío edhaajotoncomo Jesuuquidiito ajäi’she cönä’ja’to towaanäcäiñe yeijäcä töjääcäiñe yö’seenoje ya’deuwödö. Yaawääne’, soto nontädööcomooje anaajäi’cha cöneiya’to. Cöntonto yaawä etöömadööje mma.

Acu’shänä wwä jödaata utuudu

13Yääje mma yaawä ñanno jaadiseeo tösootoichomo cönenno’jaicho Jesuuquidiito döiña, Edoodhe sotoi jadäiñe. Tönwanno cone’da Jesuuquidiito a’deudeme’jo’se cönä’ja’to, chääjäcä cone’da töwa’deuwödööcomo wetä yaawä. 14Jesuuquidiito döiña töwä’döa’comjäcä ñanno cönä’döa’to chäwwä:

—Owaanomaanei, ñaa owaanäcä chäänöngatooje aweichö. Ooto’jodhe soto ännö’da ma amäädä, ye’wono woije mma anemmenca’da aweijäcä. Wanaadi a’deddu jäcä chäänönge tönoowanooma amäädä. Edääje adheecamma’jo’se ñaa na: ¿Aashicha eijai ñai jödaata utuudu acu’shänä wwä, cone’daane? ¿Aaquene eijai ñai, tu’e, tu’e’daane? quee cönä’döa’to Jesuuquidiito wwä.

15Jesuuquidiito dhowaanäcä cönä’jaacä yäätäncu’tädööcomo. Töwö cönä’döaacä chäwwäiñe:

—¿Ane’cotoojo cuyuunacaato? Jödaata änne’täcä tooni, weneiye.

16Tönwanno jödaata cuntuicho chäwwä. Yää eneea’jäcä töwö cönä’döaacä chäwwäiñe:

—¿Änääcö imennaajä mä’dä chääjäcä naadö; änääcö eetö imennaajä mmaja?

Tönwanno cönä’döa’to:

—Acu’shänä imennaajä mä’dä, töwö chäätö mmaja; quee.

17Yaawä Jesuuquidiito cönä’döaacä chäwwäiñe:

—Acu’shänä wwä u’täcä töwö chowwono. Wanaadi wwono mmaane Wanaadi wwä u’täcä; quee cönä’döaacä Jesuuquidiito.

Tönwanno cöneeta’jöjäätöicho yaawä Jesuuquidiito wa’deuwödö eta’jäcä.

Töwäämaajo jonno waadoncanä jäcä Jesuuquidiito ecamma’jo’jödö

18Yääje mma yaawä Jesuuquidiito döiña cöntonto anejjacoomo saadhuseeo, ñanno töwäämaajo jonno waadoncanä aneecanö’jöncomo. Tönwanno cöneecamma’joicho; cönä’döa’to:

19—Owaanomaanei, edääje Moisé cömmennäi cöwwoncomooje: “Dhanwa enneca’da yääma’jäcä, töjiiñamo owoinchadööje, dhacoonomjödö ijiiñamomjödö dö’tä ä’döjai ña yaawä, töweichacoono atöödö tödöödö wetä;” quee cömmennäi Moisé. 20Aacä amoojato dhanwaacomo cönä’ja’to, ñanno dea. Yuichoncomo cömjötai. Cönäämai yaawä enneca’dadä. 21Yaawä dhacoonomjödö tudui jiñamomjödö dö’tä cönä’döi. Ñäädä cönäämai chea, enneca’da mmaja. Yääje mmaja aaduwaawoto. 22Tameedä ñanno aacä amoojato’como ñäädä wodi jadä cönä’ja’to; tameedä enneca’da cöneiya’to. Yaawä jeene ñäädä wodi cönäämai. 23¿Aaquene eichai’che yaawä töwäämaajo jonno waadoncanaawä? ¿Äshono jiñamooje nai’che ñäädä wodi, ñanno aacä amoojato’como ijiiñantoncomo’jödö? quee cönä’döa’to ñanno saadhuseeo.

24Yaawä Jesuuquidiito cöneccujä’a’to; cönä’döaacä:

—Änwanno chäänönge’da adha’deuwato odhoowanääcäiñe’da yeijäcä Wanaadi a’deddu imennaajä, Wanaadi jäduudu odhoowanääcäiñe’da yeijäcä mmaja. 25Töwäämaajo jonno waadoncanaawä jötaanä ’je’da na’de, wodiiñamo ätöiñono’da mmaja naato’dede. Amoode caju ñancomo nönge mma naato’de yaawä. 26¿Yä’ja’a’como töwaadonca yeichöcoomo jäcä ana’de’tä’da ca meiya’quene Moisé nimennä’jödö jäcä? Töwö Moisé cömmennäi chuuta wätuucadö do’tacanno töwwä Wanaadi wa’deuwö’jödö jäcä. Edääje Wanaadi cönä’döaacä chäwwä: “Öwö ñäädä Aawadán Waanadiyö, Isaaca Wanaadiyö mmaja, Jacoowo Wanaadiyö mmaja;” quee cönä’döaacä Wanaadi Moisé wwä. 27Ñanno Aawadán töwä’jajo’jocoomo weichaame nudä naato. Dha’da ei’jo Wanaadi chäädhajootoncomooje ätä’tä’da eichöne’. Chäänönge’da ätö’tajäätödööcomo na; quee cönä’döaacä Jesuuquidiito saadhuseeo wwäiñe.

Waanontänä cho’jodha’como

28Yääje mma yaawä judhío owaanomannamo jimmä cöneejä Jesuuquidiito döiña. Ñäädä cönä’jaacä saadhuseeo jadäiñe yäätäccujäätödööcomo etaanei’jödö. Chäänönge Jesuuquidiito neccujäätö’jödö eta’jäcä töwö Jesuuquidiito cöneecamma’joi:

—¿Äshono yää waanontänä cho’jodha’como jaiñoone? quee cönä’döaacä.

29Jesuuquidiito cöneccujä’acä:

—Edä yää waanontänä cho’jodha’como jaiñoone: “Etaatäcä änwanno iisadaaediitacoomo, ñäädä mma Cajiichaanaje na, Cädhaajotoncomo Wanaadi mma. 30Adheedhajä Wanaadi ijummacä adheewanö jadäädä, odo’tadö jadäädä mmaja, ätö’tajäätödö jadäädä mmaja, äjäädudu jadäädä mmaja;” quee. Mädä yää waanontänä cho’jodha’como jaiñoone. 31Edä yää yää ’jejaato waanontänä, mädä nöngato mmaja: “Aweichacoono ijummacä amäädä äwä’jummadö nönge dea;” quee. Mädä waanontänä e’jodhaato ’je’da na; quee cönä’döaacä Jesuuquidiito.

32Yaawä ñäädä judhío owaanomaaneichomo cönä’döaacä Jesuuquidiito wwä:

—Owaanomaanei, chäänönge yääje mä’döaanä, tooni chämma Wanaadi ña, yäätonno ’je’da. 33Täwaanö jadäädä ijummadö tujunne na, tötö’tajäätödö jadäädä mmaja, tödo’tadö jadäädä mmaja, töjäädudu jadäädä mmaja. Töwä’jummadö nönge dea töweichacoono ijummadö tujunne na dea, saaquidiijiisiyo tödöödö e’jodhe’cä, Wanaadi wwä yau’cwaajä utuudu e’jodhe’cä mmaja; quee cönä’döaacä ñäädä judhío owaanomaaneichomo.

34Chäänönge ñeccujäätödö eta’jäcä Jesuuquidiito cönä’döaacä chäwwä:

—Amoinche’da ma Wanaadi sotoije eijai aweichö jäcä; quee cönä’döaacä Jesuuquidiito.

Yää ncäcäädä tönwanno Jesuuquidiito cönnonta’to, ane’cä’cä jäcä ecamma’jo’se’da.

¿Änääcö weichö ñäädä Äwaanacaanei?

35Yaawä Wanaadi weichojo taca töwwä owaanomaadawä Jesuuquidiito cönä’döaacä:

—¿Ane’que’nei Dawí weichöje Äwaanacaanei töne’tä weneeneto ñanno owaanomannamo? 36Epíiditu Santo woije yääje Dawí cönä’döa’dö naane’:

Cajiichaana cönä’döaacä Yeedhajä wwä:

“Önnäcä ataajimaacä, ämu’demjönö dö’se,

odho’cäi ätu’de’tännamo tödöödö wa’cä öwwä;”

quee Cajiichaana cönä’döaacä; quee cönä’döaacä Dawí.

37¿Aaquene mmaja Dawí nnedööje Äwaanacaanei eijai ñai chea, töwö Dawí tädhaajäje töne’tä yei’jödö weichaame mmaja? quee cönä’döaacä Jesuuquidiito.

Ñanno jooja’como soto töwaacö’comje töneeta cönä’ja’to Jesuuquidiito necammajäätödö.

Jesuuquidiito wwä Judhío owaanomannamo ijiiyemeecö’jödö

38Yaawä soto owaanomaadawäiñe Jesuuquidiito cönä’döaacä:

—Odhoowoinchadäiñe’da eichäcä owaanomannamo jäcäiñe, ñanno nuwe töwoomöcoomo yaacötööcomo. Tönwanno yaacö’comje tönoiñe täne’madööcomo que soto wwäiñe ta’dejjadööcomo jata antawä. 39Täneejuca’como a’täi ye’wä töwei’sheiñe weneeneto we’jummanaawä, wääwashinchänaawä mmaja. 40Tönwanno iiño wääma’jödö nödöödö töneijä’e weneeneto. Yää encwanno’jodööje nuwe Wanaadi wwä töwa’deuwe yaawä. Tönwanno jooje’cä nätä’maminchajaato’de; quee cönä’döaacä Jesuuquidiito.

Iiño wääma’jödö wwä jödaata utu’jödö

41Yaawä Jesuuquidiito shuucu cönä’jaacä Wanaadi weichojo taca, jödaata ewöötö je’taca. Töwö cöneene’maacä soto wwäiñe jödaata tödöödö yää aca. Dhantai töjöödataicha’como jooje jödaata cönnöa’to. 42Iiño wääma’jödö wentumjato cöneejä yaawä. Töwö cönnöi aacä jödaata’cä, täjemjönö’cä. 43Jesuuquidiito tönoowanoomadö cöna’dejjaicho; cönä’döaacä chäwwäiñe:

—Chäänönge yääje wä’döa äwwäiñe, määdhä iiño wääma’jödö’cä nödöi anejjacoomo tödönnamo’jödö e’jodhe’cä. 44Tameedä canno töjöödataichomo nödöicho yä’cä mmajöönö. Määdhä wentumjato’cä mmaane tameedä töwwä nä’jannö nutui, täwanshiñö ejeematoojojaato’jödö jadäädä; quee cönä’döaacä Jesuuquidiito.

Currently Selected:

MAADOCO 12: MCH

Highlight

Copy