DUUCA 5

Jooja’como na’cwacancomo ajäi’jocoomo

1Jeneesade cu’jäi jawä Jesuuquidiito weichö, jooje soto cönä’döicho yöiña, Wanaadi a’deddu eta’se töweijäcäiñe. Tönwanno Jesuuquidiito cönanwacö’ja’to, yeichojo ’je’da tödööene. 2Yaawä Jesuuquidiito cöneedantäi aacä cudiiyada ije’waca, tasseiñe’da. Ñanno dhacancomo’jödö, na’cwacancomo i’yännamo, töwä’täjä’e cönä’ja’to; töjaajiyööcomo cöncoccajä’a’to. 3Jesuuquidiito cönä’täi yää cudiiyada aca, Simón cudiiyadai aca. Simón wwä joojede’da’cä cudiiyada cönaadimaajoi annaca. Cönaatajiimai yaawä. Dhacanno soto cönoowanooma’to yaawä. 4Yaawä töwa’deuwödö töwä’ca’jäcä töwö cönä’döaacä Simón wwä:

—Annacaane adiimacä, ajaajiyööcomo memaatäiye, na’cwacancomo mani’yätäiye; quee cönä’döaacä Jesuuquidiito.

5Simón cöneccujä’acä, cönä’döaacä:

—Owaanomaanei, coijaicho wadaadä ñaa netaadawa’cajoi ajäiyeeje’da. Yääje yeichaame amäädä adha’deddu woije mma jaji wema’ñojo; quee.

6Yääje chäwwäiñe tödööa’jäcä, na’cwacancomo cöni’yäicho jooje, ijaajiyööcomo töshiichajoone. 7Yaawä töjimmotoncomo wwadäädä cönaata’shajäätöicho, ñanno yeichacoono cudiiyada awoncomo; tö’wa’tännamooje cöna’dejjaicho. Ñanno cöneejoto yaawä. A’nädäncädä cuntu’camöi cudiiyada, ñaadöjai tödööene. 8Yää eneea’jäcä Simón Peedhodo wwä, töwö tä’mudhe cönä’döi Jesuuquidiito je’taca; cönä’döaacä:

—Cösancwacä amäädä Cajiichaana, conemjönö öwö; quee cönä’döaacä.

9Ñanno na’cwacancomo ajäi’jocoomo weijäcä jooje töwääcatonca Simón cönä’jaacä, tameedä chääjadoncomo mmaja. 10Yääje mmaja cönä’ja’to dea Jacoowo, Juan, Seewedheeo nnacoomo, ñanno Peedhodo jimmä. Jesuuquidiito cönä’döaacä Peedhodo wwä:

—Ääcatonca’da eichä. Eduuwa naadö jonno soto owaanomaaneichomooje ma’de; quee cönä’döaacä.

11Yaawä töwaajäiya’comjäcä, tönwanno tameedä tötaadawaajuichomo cöne’nomjaicho, Jesuuquidiito jadä töötädööcomo wetä.

Woi ’jano ejiichö’tä’jödö

12Anejja jataawä Jesuuquidiito weichö, dhanwa woi ’jano yäätä cönä’jaacä. Jesuuquidiito töwwä eneea’jäcä, tä’mudhe cönä’döi ije’taca; chäwwä cönääjichö’täjaacä; cönä’döaacä:

—Cajiichaana, yeejichö’tä’se aweiya’jäcä, yeejichö’täjai ma; quee cönä’döaacä.

13Yaawä Jesuuquidiito tamäädö que cönaajojoi; cönä’döaacä chäwwä:

—Adheejichö’tä’se wa; nännamjö’ñojo mädä owoichö; quee cönä’döaacä.

Yaawä dea mma yoichö cöne’jöi. 14Jesuuquidiito cönwätuujai yaawä soto wwäiñe yää aneecammajäätö’da yeichö wetä. Töwö cönä’döaacä chäwwä:

—Wanaadi wwono wa’deuwödö wwä mmaane äänejoota. Moisé necamma’jödö nönge Wanaadi wwä tu’emö änu’cä’de, töwääjichö’tä aweichö ene’ju’to’me, soto dhowaanäcäiñe yeichö wetä yaawä töwääjichö’tä aweichö; quee cönä’döaacä Jesuuquidiito.

15Töwääcadeeme’jo’se’da Jesuuquidiito weichaame jooje’cä mma chääcadö cöneecatai. Jooje soto töwe’jumma cönä’ja’to ñeecammajäätödö etaadö wetä, töwääjichö’täjoodöcoomo wetä mmaja. 16Töwö Jesuuquidiito töötä töweiye cönä’jaacä chö’cäi, soto ’jemjönö ña, Wanaadi wwä a’deuwe.

Secumjato adonca’jödö

17Aneedawä anooto awä Jesuuquidiito cönä’jaacä owaanomaadöje. Yäätä cönä’ja’to jaadiseeo wataajima’como, judhío owaanomannamo mmaja, tameedä Caadideea ñano jataawoncomo we’a’como, Judheea ñano jataawoncomo we’a’como mmaja, Jeduusadén ñancomo we’a’como mmaja. Wanaadi jäduudu ’je Jesuuquidiito cönä’jaacä yaawä, soto adoncatoojo. 18Yaawä anejjacoomo dhanwaacomo cönä’döicho, secumjato dha’me, ä’wato jo. Tönwanno ä’saca töwoomomö’seiñe cönä’ja’to Jesuuquidiito je’taca ñäädä cädäijato tödöödö wetä. 19A’que cönoonejaicho amonno’jodö, jooje soto weijäcäiñe. Yääje yeijäcä maa de’cäi cönäncuicho yaawä. Maa inwa’tocaadö’jo ñäädä secumjato cöneenö’toicho yää ai, chä’wötö joodä. Soto antacaiñe cönnöicho yaawä, Jesuuquidiito ecaatajo. 20Chäwwäiñe täcamjödö eneea’jäcä, Jesuuquidiito cönä’döaacä cädäijato wwä:

—Ocoone’nadiiyö täncwanno’jo na; quee cönä’döaacä.

21Yääje mma yaawä ñanno judhío owaanomannamo, jaadiseeocoomo mmaja, cöntö’tajä’a’to: “ ¿Änääcöömä mä’dä, mädä wa’cä cone’da na’deuwanä Wanaadi jäcä? Anejja conemjönö encwanno’jojai’cha na, Wanaadi mmaane;” quee cöntö’tajä’a’to.

22Jesuuquidiito dhowaanäcä cönä’jaacä yääje chö’tajäätödööcomo. Töwö cönä’döaacä chäwwäiñe:

—¿Ane’que’nei mädääje ätö’tajä’ato dea? 23¿Äshono ätääcammacoije nai: “Ocoone’nadiiyö täncwanno’jo na;” quee ’ja? ¿Edääjeene’: “Aanöncä, oojoimacä;” queene’ ? 24Edä wödööa odhoowanääcäiñe yeichö wetä Soto nnedö soto cone’nadiiyö encwanno’jojai yeichö edä nono de’wä; quee cönä’döaacä Jesuuquidiito.

Yaawä töwö cönä’döaacä secumjato wwä:

—Edääje wä’döa äwwä, aanöncä; adhe’wötö adääcä; ämmai chaca äjääne; quee cönä’döaacä.

25Yaawä dea mma ñäädä dhanwa cönammöi ñeenedööcomooje. Tä’wötö cömmomöi yaawä, yää choojo cönä’ja’dö. Tömmai chaca cöntämä yaawä, aashicha töwa’deuwancädä Wanaadi jäcä. 26Tameedä ñanno soto cönääcatoncaicho. Aashicha Wanaadi jäcä cöna’deuwa’to yaawä. Töwääcatoncadööcomooje cönä’döa’to:

—Tönoiñato queeneto eduuwa; quee cönä’döa’to.

Dewí a’dejja’jödö

27Yää ’jeje Jesuuquidiito cöneeja’cai. Töötädaawä töwö cöneeneaacä acu’shänä jödaatai i’jummanei, chäätö Dewíije. Shuucu ñäädä cönä’jaacä acu’shänä jödaatai i’jummannamo weicho’como taca. Jesuuquidiito cönä’döaacä chäwwä:

—Ma’che jaadä.

28Dewí cönammöi yaawä. Tameedä tötaadawaajui cöne’nomjai yaawä Jesuuquidiito jadä töötädööje mma.

29Yaawä Dewí soto cöneewashincha’to tömmai chaca. Jooje soto cönä’ja’to, acu’shänä jödaatai i’jummannamo mmaja, anejjacoomo mmaja. Jesuuquidiito jadä cönääwashincha’to. 30Yaawä jaadiseeocoomo, judhío owaanomannamo mmaja, ñanno jaadiseeoje mmaja cönä’ja’todö, Jesuuquidiito nowaanomaadö jäcäiñe cönenta’me’ca’to; cönä’döa’to:

—¿Ane’que’nei mmaja määwashinchaato dea acu’shänä jödaatai i’jummannamo jadäiñe, conemjönö dönnamo jadäiñe mmaja? quee cönä’döa’to.

31Jesuuquidiito cöneccujä’acä; cönä’döaacä chäwwäiñe:

—Cädäijemjönö täjiichö’tänei ämjumma’da töweiye nai; cädäijato mmaane tumjumma. 32Chäänönga’como a’dejja’da we’ne, conemjönö dönnamoone, tötö’tajäätödööcomo sha’duminchaiyeto; quee cönä’döaacä Jesuuquidiito.

Wäänemaanä jäcä Jesuuquidiito ecamma’jo’jödö

33Yaawä tönwanno cönä’döa’to Jesuuquidiito wwä:

—Juan nowaanomaadö töwäänema weneeneto, Wanaadi wwä töwa’deuwe weneeneto dea; jaadiseeo nowaanomaadöcomo yääje mmaja. Amäädä onoowanoomadö mmaane äänema’da; töwääwashinchä dea weneeneto; quee.

34Jesuuquidiito cönä’döaacä chäwwäiñe:

—¿Aaquene mmaja jötaanä enennamo maneenemaajodööto deeade’, töjöötaamö chääjadäiñe yeichaame? 35Aneedawä anooto na’de choojonnoiñe töjöötaamö wataadojootojo; yaawä näänemaato’de; quee cönä’döaacä Jesuuquidiito jaadiseeo wwäiñe.

36Edääje mmaja cönä’döa’dea Jesuuquidiito, yö’seeno joi:

—Töwoomö eduuwaato änshiicha’da weiñä nai jenaado’jä töwoomö a’totoojoje. Mädääje tödööa’jäcä töwoomö eduuwaato nichoone’ma ñäädä. Jenaado’jä to’nase’ne’da eijai ña dea eduuwaato sedeimjödö que a’taajä. 37Eduuwaato chääjedöödö eccudu döaajä anacca’da weiñä nai jenaado’jä iji’jä döaajä aca. Mädääje tödööa’jäcä iji’jä neshiicha yaawä; chääjedöödö eccudu töweemacuudä yaawä, iji’jä mmaja. 38Eduuwaato iji’jä acaane chääjedöödö eccudu eduuwaato döaajä shoomadö. Mädääje a’nädä emaacudä’da eijai ña, chääjedöödö eccudu, iji’jä mmaja. 39Jenaado’jä chääjedöödö eccudu döaajä oneeja’jäcä, eduuwaato döaajä enö’se’da weiñä nai. Edääje soto ä’döjai ñaadö naane’ yaawä: “Chaasantadööne caado na;” quee ä’döjai ña; quee cönä’döaacä Jesuuquidiito.

Currently Selected:

DUUCA 5: MCH

Highlight

Copy