DUUCA 4

Jesuuquidiito wä’yunaacajo’jödö

1Jesuuquidiito cönennacai yaawä Joodadán ñanno, Epíiditu Santo jäduudu ’je. Jata ’jemjönö aca cöntämä yaawä Epíiditu Santo nanontädö woije. 2Yäätä töwö cönä’jaacä aacä soto anooto; odo’sha wwä cönä’yunaacajaacä. Ääwashinchä’da Jesuuquidiito cönä’jaacä yää anooto wadaadäädä. Yää ’jeje ämiije cönä’jaacä. 3Yaawä odo’sha cönä’döaacä chäwwä:

—Wanaadi nnedö neeneje aweiya’jäcä, uuje amoode’näcä edä täju; quee cönä’döaacä odo’sha.

4Jesuuquidiito cönä’döaacä:

—Yääje Wanaadi a’deddu imennaajä nä’döa: “Äwanshi che mma’da weiñä nai, Wanaadi a’deddu que mmajaane;” quee nä’döa imennaajä; quee cönä’döaacä Jesuuquidiito.

5Yaawä odo’sha cönaadäi jöö cawooto de’cäi. Jadheedä cöneenejoi chäwwä tameedä edä nono de’wono jata. 6Töwö odo’sha cönä’döaacä Jesuuquidiito wwa:

—Tameedä mädä iiñataaje naadö äwwä u’jai wa, chäädhajääje meiye; önnödööje u’ajääne yeiyajä; soto wwä utu’se weiya’jäcä, u’jai wa. 7Wa’demeecödööje tä’mudhe äwä’döa’jäcä je’taca, tameedä mädä ännödööje na’de; quee cönä’döaacä odo’sha.

8Jesuuquidiito cöneccujä’acä:

—Äjääne amäädä Caajuushawa. Yääje Wanaadi a’deddu imennaajä nä’döa: “Adheedhajä Wanaadi mmaane ya’deme’jai ma; chäwwä mmaane tödööjai ma;” quee nä’döa Wanaadi a’deddu imennaajä; quee cönä’döaacä Jesuuquidiito.

9Yää ’jeje odo’sha cönaadäi Jeduusadén ña. Wanaadi weichojo judu de’wä cönnöi, cawä; cönä’döaacä chäwwä:

—Wanaadi nnedö neeneje aweiya’jäcä, adhaajanöncä eetonno. 10Wanaadi a’deddu imennaajä yääje nä’döa:

Töwö Wanaadi tamoodedö nanontaato adheedai’chännamooje;

11tönwanno adhaadäaato’de, täju de’cäi mma adheejucca’no; quee imennaajä nä’döa;

quee cönä’döaacä odo’sha Jesuuquidiito wwä.

12Jesuuquidiito cöneccujä’acä:

—Yääje mmaja imennaajä nä’döa dea: “Adheedhajä Wanaadi mma monoonejai;” quee mmaja nä’döa dea; quee cönä’döaacä Jesuuquidiito.

13Yääje mma yaawä, a’que yuunacaadö oneejadö’jo, odo’sha Jesuuquidiito jonno cöntämä, a’dhe’cä.

Jesuuquidiito waajäntä’jödö tötaadawaajui tödöödö

14Yääje mma yaawä Jesuuquidiito cönennacai Caadideea ña, Epíiditu Santo jäduudu ’je. Chääcadö cöneecatai tameedä yää weichö wa’cä. 15Soto tönoowanoomaiñe töweiye cönä’jaacä judhío we’jummato’como waadäi. Tameedä soto aashicha töwa’deuwe cönä’ja’to chääjäcä.

Naasade ña Jesuuquidiito wei’jödö

16Naasade ña Jesuuquidiito cöntämä yaawä, töwennejenca’jödö ña. We’jummatoojo taca cönoomomöi wäädeetatoojo anootoi’chädö awä, töweichö nöngeedä. Töwö cönammöi yaawä Wanaadi a’deddu imennaajä a’de’tädö wetä. 17Tönwanno cuntuicho chäwwä Wanaadi a’deddu ecammanei Isaía nimennä’jödö. Yää jajeeda a’ducaadö’jo, edä imennaajä Jesuuquidiito cöneedantäi,

18Epíiditu Santo ’je wa;

Cajiichaana Wanaadi ye’täne wentumja’como wwäiñe aashichaato wätunnä ecammajä’neije.

Töwö yaanontäne wentumja’como tö’tajäätödö i’wa’täiñe,

jedeesoja’como tö’tajäätödö i’wa’täiñe mmaja,

tänuuquemjöncomo enu’täneichomooje mmaja;

yäntunamjödööcomo i’wa’täneichomooje mmaja töwö yaanontäne dea,

19Cajiichaana wwä aashichaato tödöötojo cu’nädö ecamma mmaja; queeto imennaajä Jesuuquidiito cöna’de’taacä.

20Jajeeda a’dua’jäcä Jesuuquidiito cöniiñacai yaawä we’jummatoojo edhaajä wwä; cönaatajiimai yaawä. Tameedä we’jummatoojo tacancomo yäätäädä Jesuuquidiito cöneene’ma’to. 21Töwö cönaajäntäi yaawä töwa’deuwödö chäwwäiñe:

—Edä anooto awä mädä imennaajä nönge neja’dätäi aneenedööcomooje; quee cönä’döaacä.

22Tönwanno aashicha cöna’deuwa’to chääjäcä yaawä. Yaacö’comje cönäätaacä ya’deuwödö. Tönwanno cönä’döa’to:

—¿Ñäädäjöönö ca määdhä, José nne’jödööjönö?

23Yaawä Jesuuquidiito cönä’döaacä chäwwäiñe:

—Yoowanääcä edääje öwwä äwä’dö’seiñe aweichöcoomo: “Äjiichö’tänei, äwwäädä ääjichö’täcä. Tameedä Cajeedamu ña ännö’jödö ñaa cöneetaichö nönge tödööcäde eetä ajaatawä;” quee äwä’dö’seiñe aweichöcoomo yoowanääcä na; quee cönä’döaacä Jesuuquidiito.

24Edääje cönä’döa’dea:

—Tameedä Wanaadi wa’deuwödö ecammanei töquiiñeme’que töweiye nai ijaatawä. 25Chäänönge yääje wä’döa äwwäiñe, ñäädä Edía, Wanaadi wa’deuwödö ecammaneije yeichö, jooje iiño wä’jajo’jocoomo cönä’ja’to Iisadaaede ña, aacäicheaato wedu annai conoojo iiña’da cönä’ja’dawä, tameedä yeichö wa’cä ämi cönä’ja’dawä. 26Yääje yeichaame Wanaadi Edía anenno’ja’da cöneiyacä ñanno döiñaiñe, Iisadaaede ña cönä’ja’todö döiñaiñe. Sadeeta ña mmaane cönenno’jai, Sidhón ñano jataaca, iiñano iiño wääma’jödö döiña. 27Jooje mmaja töweiye cönä’ja’to dea woi ’ja’como Iisadaaede ña, Eediseeo Wanaadi wa’deuwödö ecammaneije yeichö. Tooni’chä wääjichö’tääje’da cöneiyacä, ñäädä mma, Naamán mma, cönääjichö’täjoi, Siidiya ñano mma; quee cönä’döaacä Jesuuquidiito we’jummatoojo taca.

28Yää eta’jäcä, tameedä we’jummatoojo tacancomo cönäätömaicho yaawä jooje. 29Cönaanömjätöicho yaawä; Jesuuquidiito cönaadoicho jata tö’cäi, jöö wä’jedennacaadö döiña, yää ye’wä jata cönä’ja’dö. Yäätonno adiima’se cönä’ja’to jöö daca, 30töwäädä töwö cöneeja’caiñe’ dhantawonnoiñe. Cöntämä yaawä.

Odo’sha ’jano wei’jödö

31Yaaje mma yaawä Jesuuquidiito cöntämä Cajeedamu ña, Caadideea ñano jataaca. Yäätä töwö soto cönoowanooma’to wäädeetatoojo anooto awä. 32Ñanno soto cöneeta’jöjäätöicho yaawä jäduuje owaanomaadö weijäcä chäwwä, cajiichaana nowaanomaadö nönge.

33Yäätä we’jummatoojo taca cönä’jaacä dhanwa, odo’sha ’jano. Töwö töca’de cöncä’tömöi:

34—Ñaa jäcä’daane eichä. ¿Ane’cotoojo ñaa aquiima’se mannea, amäädä Jesuuquidiito, Naasade ñano? ¿Ñaa acoicha ca meejä? Yoowanääcä dajaane ma, Wanaadi anoonö aashichaatoje aweichö; quee cönä’döaacä ñäädä odo’sha ’jano.

35Jesuuquidiito odo’sha cöneeta’jöichajoi yaawä; cönä’döaacä chäwwä:

—Äucwätä’da eichä; adheeja’cacä dhacanno; quee cönä’döaacä.

Yaawä odo’sha ñäädä dhanwa nono jo cöneemajjoi tameedä ñeenedööcomooje. Dhacanno cöneeja’cai yaawä etuunui’chädööjo’da mma. 36Tameedä soto cönääcatoncaicho yaawä. Tönwannoje dea cönä’döa’to:

—¿Aaqueneeto wätunnä mädä? Mädä wa’cä odo’sha tömja’canö’jo töwö, jäduuje; quee cönä’döa’to.

37Yaawä Jesuuquidiito ecaadö cöneecatai tameedä yää jata weichö wa’cä.

Peedhodo wo’jödö adonca’jödö

38Yääje mma yaawä Jesuuquidiito cönammöi; cöneeja’cai we’jummatoojo tacanno. Simón mmai chaca cöntämä yaawä. Simón wo’jödö cädäije cönä’jaacä jooje, töweedö’que. Tönwanno cönaadoncaja’to Jesuuquidiito wwä. 39Töwö Jesuuquidiito cädäijato ejoodhe cönootommoi yaawä; wedööcö cöneedennanö’joi. Yaawä dea mma eccö’da cönä’döi Peedhodo wo’jödö. Töwö cönammöi yaawä chääwanshiñööcomo ejoodödö wetä.

Jooje soto adonca’jocoomo

40Yaawä cho’momöödawä tameedä cädäija’como cönnejooto Jesuuquidiito wwadäädä, tameedä anejjeja’como chäädäichöcoomo. Jesuuquidiito cönaadoncaicho tameedäädä, ye’wäiñe tamäädö tödöödö que. 41Jooje odo’shancomo mmaja cöneeja’caicho soto acannoiñe, töcä’tömjä’ancädäiñe:

—Wanaadi nnedö amäadä; quee töwä’döancädäiñe.

Töwö Jesuuquidiito cöneeta’jöichaja’to; ana’deujotäiñe’da cönä’jaacä, dhowaanäcäiñe töweijäcä Äwaanacaaneije töweichö.

Caadideea ña ecammajäätö’jödö

42Yaawaana’jäcä Jesuuquidiito cöneeja’cai; töjääcäjeene cöntämä jata tö’cäi. Yaawä soto cunuujiya’to; yöiña cönä’döicho yaawä. Töjonnoiñe iichä’se’da cönä’ja’to. 43Töwö cönä’döaacä chäwwäiñe:

—Aneetajancomo wwäiñe mmaja aashichaato wätunnä Wanaadi töcaajichaanaije tödöödö jäcä täcammamje na dea öwwä, yääjatooje anontaajäje weiyajä; quee cönä’döaacä Jesuuquidiito chäwwäiñe.

44Mädääje Jesuuquidiito cönäämannä’acä yaawä Caadideea ña, we’jummatoojo waadäi ecammajä’ancädä.

Currently Selected:

DUUCA 4: MCH

Highlight

Copy