JUAN 21

Aacä amoojato’como tönoowanoomadö wwäiñe Jesuuquidiito wäänejo’jödö

1Yääje mma yaawä Jesuuquidiito cönäänejoi chea tönoowanoomadö wwäiñe, Tiweediya cu’jäi jawä, sa’dada de’wä. Edääje töwö cönäänejoi: 2Tujuumä cönä’ja’to Simón Peedhodo, Tomá mmaja, ñäädä Canaacu täätö; Nataanaeede mmaja cönä’ja’dea, ñäädä Caná ñano, Caadideea ñano jataawono; Seewedheeo nnacoomo cönä’ja’to dea; aacä mmaja anejjacoomo Jesuuquidiito nowaanomaadö. 3Simón Peedhodo cönä’döaacä chäwwäiñe:

—Wani’yäta’ñojo; quee.

Ijimmä cönä’döa’to yaawä:

—Ajaadä ñaa nöto’ñojo.

Cöntonto yaawä; cönä’toicho cudiiyada aca. Yää coijai chawä ani’yä’da cöneiya’to. 4Yaawä yaawaanadaawä Jesuuquidiito tuna jawä cönä’jaacä; tönwanno dhowaanäcäiñe’da cönä’jaacä ñäädäje yeichö. 5Yaawä Jesuuquidiito cönä’döaacä chäwwäiñe:

—¿Ani’yä’da mmädä ca meiyato, mudeeshi?

Tönwanno cönä’döa’to:

—Ng’jn, a’que na; quee.

6Yaawä Jesuuquidiito cönä’döaacä:

—Ämu’demjönö dö’se ajaajiyööcomo emaatäcä eduuwa, maneejodöötäiye yaawä.

Tönwanno töjaajiyööcomo cöneemaicho; ijiiñäjai’cha cönä’ja’to yaawä na’cwacancomo que tu’que yeijäcä. 7Yaawä ñäädä Jesuuquidiito nijummadö cönä’döaacä Peedhodo wwä:

—Owaanomaanei chajaane mä’dä; quee.

Peedhodo wwä Jesuuquidiitoje yeichö eta’jäcä töwö cöneewontäi yaawä töwoomö de’wono awä, töwonque’da toweijäcä. Töwö cöne’duccai yaawä na’cwaca. 8Yää ’jeje anejjacoomo Jesuuquidiito nowaanomaadö cöneejoto cudiiyada awä, jaji ijiiñadööje; amoinche’da cönä’ja’to nono jäcä, ijaatoodea soto meetodo mma. 9Yaawä töwaajäiya’comjäcä wa’to cadainchudu tänne cöneedantoicho, na’cwacaano ye’wä tödööajä, uu mmaja. 10Jesuuquidiito cönä’döaacä chäwwäiñe:

—Na’cwacancomo ene’täcä, eduuwaato ani’yädööcomo; quee.

11Yaawä Simón Peedhodo cönä’täi cudiiyada aca; jaji cömjiñai yaawä sa’dada de’wä. Tu’que cönä’jaacä na’cwacancomo dhaca; aacä amoojato sotooto de’wä amoojadä cönä’ja’to ñanno na’cwacancomo, adai’jocoomo dea. Wanna yeichaameiñe jaji eshiicha’da cöneiyacä. 12Yaawä Jesuuquidiito cönä’döaacä chäwwäiñe:

—Ä’täcä, määwashinchätäiye; quee.

Tönwanno ecamma’jo’se’da cönä’ja’to, ¿änääcö ämäädä? quee töwä’dö’seiñe’da, dhowaanäcäiñe yeijäcä Jesuuquidiitoje yeichö. 13Yaawä Jesuuquidiito cönannäjöi yää uu; cuntui chäwwäiñe; yääje mmaja na’cwacancomo.

14Yää cönä’jaacä aaduwaawädeeto Jesuuquidiito wäänejoodö tönoowanoomadö wwäiñe töwäämaajo jonno töweeja’ca’jeje.

Simón Peedhodo wwä Jesuuquidiito wa’deuwö’jödö

15Yaawä töwääwashincha’comjäcä Jesuuquidiito cönä’döaacä Simón Peedhodo wwä:

—Simón, Joná nnedö, ¿cujummaanä amäädä canno e’jodhe’cä?

Peedhodo cönä’döaacä:

—Ee, Cajiichaana, odhoowanääcä ajummatä weichö; quee.

Jesuuquidiito cönä’döaacä chäwwä:

—Yääje yeiya’jäcä sootoi ewanshinchocooto’de, ñanno oweeja nnacoomo’cä nönga’como; quee.

16Yää ’jeje Jesuuquidiito cöneecamma’joi chea:

—Simón, Joná nnedö, ¿cujummaanä amäädä? quee cönä’döaacä.

Yaawä Simón cönä’döaacä:

—Ee, Cajiichaana, odhoowanääcä ajummatä weichö.

Jesuuquidiito cöneccujä’acä:

—Yääje yeiya’jäcä sootoi edai’chäcooto’de, ñanno oweeja nönga’como; quee cönä’döaacä.

17Yaawä Jesuuquidiito cöneecamma’joi chea aaduwaawädeeto ai:

—Simón, Joná nnedö, ¿cujummaanä amäädä? quee cönä’döaacä chäwwä.

Peedhodo wentumje cönä’döjoi yaawä aaduwaawäde täcamma’jo’jödö weijäcä, “ ¿cujummaanä?” quee. Töwö cönä’döaacä:

—Cajiichaana, amäädä tameedä odhoowanääcä na; odhoowanääcä ajummatä weichö; quee cönä’döaacä Peedhodo.

Yaawä Jesuuquidiito cönä’döaacä:

—Yääje yeiya’jäcä sootoi ewanshinchocooto’de, ñanno oweeja nönga’como. 18Chäänönge yääje wä’döa äwwä, mude’cäje aweichö töwääma’tä mä’jaaquene ämjummadö woije äätädö wetä. Inchomje äwä’döa’jäcä mmaane maajäsaaca’de, anejjaane adheema’täneije na’de; ämjummadö woije’da adhaadäa’de; quee cönä’döaacä Jesuuquidiito Peedhodo wwä.

19Töwö yääje cöna’deuwöi o’jodhe Wanaadi weichö eneejotoojoje Peedhodo wäämadö ecammancädä. Yaawä töwö cönä’döaacä Peedhodo wwä:

—Waanontädö woije eichä’de; quee.

Jesuuquidiito nijummadö

20Yaawä töwä’jedennaca’jäcä Peedhodo Jesuuquidiito nijummadö cöneeneaacä we’näje töncäcäiñe. Ñäädä dea cönä’jaacä töwääwashinchädaawäiñe Jesuuquidiito nnäcä yaatajiimaajä cönä’ja’dö dea, cöneecamma’joichö dea: “Owaanomaanei, ¿änääcö ayu’tai?” quee cönä’döa’dö dea. 21Ñäädä eneea’jäcä Peedhodo wwä töwö cönä’döaacä Jesuuquidiito wwä:

—¿Määdhä ’na; aaquene määdhä weichojo nai? quee.

22Yaawä Jesuuquidiito cönä’döaacä chäwwä:

—Öwö weejödö wa’cä ääma’da tödö’se weiya’jäcä, cone’da tödööjai’cha ma. Amäädä mmaane waanontädö woije eichä’de; quee.

23Yäätonno ñäädä ääma’da yeichojo töneecamma töweiye cönä’ja’to Quidiito sotoi. Jesuuquidiito ääma’da yeichojo aneecamma’da yei’jödö weichaame. Edääje mmaane cönä’döaacä: “Öwö weejödö wa’cä ääma’da tödö’se weiya’jäcä cone’da tödööjai’cha ma;” queene cönä’döaacä.

24Öwö ñäädä Jesuuquidiito necamma’jödö. Öwö mädä wecammajä’a, mädä ömmennädö naadö. Owaanäcä na chäänönge ömmennädö yeichö.

25Töweiye mmaja na dea jooje anejja Jesuuquidiito nödööjätö’jödö. Tameedä iiñö’jödö weichö wa’cä imenna’jäcä jajeeda que edä nono chu’camjai chö’tödö na. Amén.

Currently Selected:

JUAN 21: MCH

Highlight

Copy