DOSECHO 1

Epíiditu Santo ecamma’jödö

1Edääje wä’dö’se wa äwwä amäädä Teoojido, aashichaato: Awa’deene ömmennä’jödö jäcä wimennäne tameedä yaajäntä’jödö jonnoto’jödöödä Jesuuquidiito nödö’jödö jäcä, ñeecammajäätö’jödö jäcä mmaja, 2caju ña töötädö wa’cä. Caju ña töötädö owaajo tönaanontädö cöneicho; Epíiditu Santo woije töwö cönaanontoicho chäwwäiñe tödööemö jäcä. 3Yaawä töwääma’jeje töwö Jesuuquidiito nudä cönäänejoi chea chäwwäiñe aacä soto anooto, dhowaanäcäiñe yeichö wetä nudä töweichö. Chäwwäiñe töwa’deuwe cönä’jaacä Wanaadi töcaajichaanaije weiña jäcä.

4Chääjadäiñe töweichö dea Jesuuquidiito cönä’döaacä ñanno anonta’como wwäiñe:

—Mötäätäi’che Jeduusadén ñanno. Yäätä yoomo’täcä’de äwwäiñe Jaaja necamma’jödö, yää äwwäiñe töneecammajä’e wä’jaaquennö. 5Juan Wautiita wautisaaje tönnöe cönä’jaacä tuna que; änwanno mmaane wautisaaje mä’döjaato’de Epíiditu Santo queene, wanna anoototo ai’cha mma; quee cönä’döaacä Jesuuquidiito chäwwäiñe.

Caju ña Jesuuquidiito wäncu’jödö

6Tujuumä töweichöcoomo ñanno anonta’como Jesuuquidiito cöneecamma’joicho:

—Cajiichaana, ¿eduuwaane ca iisadaaediitacoomo jäduuje mödööanto, anejjacoomo sotoije’da? quee cönä’döa’to.

7Jesuuquidiito cönä’döaacä chäwwäiñe:

—Änwanno odhoowanääcäiñe eijai’cha na yää cu’nädö, dhanootoi’chädö mmaja. Jaaja yää cuncu’nä’täi tumjummadö woije. 8Änwanno äjääduduucomo na’de Epíiditu Santo yä’ta’jäcä äjääcäiñe. Yaawä cäcammajä’ato’de Jeduusadén ña, tameedä Judheea ña mmaja, Samaadiya ña mmaja, tameedä yeichö wa’cä edä nono de’wä; quee cönä’döaacä Jesuuquidiito.

9Yääje töwa’deuwö’jeje Jesuuquidiito cönäncui caju ña ñeenedööcomooje. Yaawä ca’dutu cöna’dui; ääne’da cönä’jaacä yaawä. 10Töwwäiñe caju ña iichädö ene’madaawä jadheedä aacä dhanwaacomo tödö’täiñe cöneedantoicho tajääde’dato awäiñe. 11Ñanno dhanwaacomo cönä’döa’to anonta’como wwäiñe:

—Änwanno Caadideea ñancomo, ¿ane’que’nei caju ña mene’maato? Ñäädä dea Jesuuquidiito, ojonnoiñe caju ña nötännö, ne’a’dede caju ña aneenedööcomooje nötännöje mmaja; quee cönä’döa’to.

Juudha nwacaanoje Matía ewaaca’jödö

12Yääje mma yaawä Odiiwo ’jödö ñanno anonta’como cönennacaicho Jeduusadén ña. Yää jöö amoinche’da cönä’jaacä Jeduusadén ñano jäcä, wäädeetatoojo anooto awä wötootojo ecammaajä ’cäwa’cä mma. 13Yaawä jataaca töwä’döa’comjäcä taawa de’cäi cönäncuicho, yää ä’sa chaaca töwä’döa’como cönä’ja’todö döiña. Chääjadäiñe cönä’ja’to Peedhodo; Jacoowo mmaja; Juan mmaja; Antedé mmaja; Jediipe mmaja; Tomá mmaja; Waadotoodomé mmaja; Mateo mmaja; Jacoowo mmaja, ñäädä Aadeujeeo nnedö; Simón mmaja chääjadäiñe cönä’ja’dea, ñäädä jäduujato dha’deddu. Juudha mmaja cönä’ja’dea, ñäädä Jacoowo acoono. 14Tameedä ñanno weiñäje töwe’jumma cönä’ja’to Wanaadi wwä töwa’deuwödööcomo wetä Jesuuquidiito acontomo jadä, yeenö Madía jadä mmaja, anejjacoomo wodiiñamo jadäiñe mmaja.

15Yaawä Peedhodo cönammöi quedeiyente antawäiñe; ñanno cönä’ja’to ijaatoodea sotooto de’wä tooni soto. Töwö Peedhodo cönä’döaacä chäwwäiñe:

16—Änwanno jimmä, jenaadä Epíiditu Santo woije Dawí cöna’deuwöi Juudha weichojo jäcä, ñäädä Jesuuquidiito ajäiñamo adääneichomo’jödö. Mädääje nä’döa Wanaadi a’deddu imennaajä jäcä. Yääje yeijäcä yää imennaajä wä’dödö nönge yeeja’do’tojo cönä’jaacä. 17Ñäädä Juudha cöjimmotoncomooje cönä’jaacä; cöjaadäiñe töwäämannä’e cönä’ja’dea. 18Töwö nono cöneejemai yaawä jödaata conemjönö tönnö’jödö eje’jödö que; yää ’jeje tuju’sudiiche cöneejuccai, ijootö cönäätäncai yaawä. 19Jeduusadén ñancomo wwä eta’jäcä yää nono cöne’toicho Aseedamaaje; Munu Wei’jödö, quee töwä’dö’se yeichö dha’deucweiñe. 20Edääje nä’döa Saadomo jäcä, yää wecanta’ñotoojo imennaajä jäcä:

Tasse’da immai nei’ñojo,

anejja mma iiña ei’che;

quee.

Edääje mmaja imennaajä nä’döa dea:

Anejjaane inwacaanoje

nääwaaca’ñojo; quee

nä’döa Saadomo jäcä.

21“Yääje yeijäcä anejja ewaacajai caato eduuwa Juudha nwacaanoje. Ñäädä täwaacaamö eijai ña cöjaadoncomo’jödö dea Jesuuquidiito cöjaadäiñe cönä’ja’dö wadaadäädä; 22Juan wwä wautisaaje Jesuuquidiito wä’döjo’jödö jonnoto’jödöödä cäju ña iichä’jödö jona tödööene cöjaadoncomo’jödö dea eijai ña. Yaawä ñäädä cöjaadäiñe eijai ña töwäämaajo jonno Jesuuquidiito waadonca’jödö jäcä ecammajä’neije; quee cönä’döaacä Peedhodo quedeiyente wwäiñe.

23Aacä tömencaamo cöneecammaicho yaawä: José, ñäädä Waasawaaje töne’tä cönä’ja’todö. Juusutuuje mmaja chäätö cönä’ja’dea. Yeichacoono cönä’jaacä Matía. 24Edääje Wanaadi wwä cöna’deuwa’to yaawä ñanno quedeiyentecoomo:

—Cajiichaana Wanaadi, amäädä odhoowanääcä na tameedä soto tö’tajäätödööcomo. Amäädä ämjummadö eneejocä ñaa wwä, canno aacä tömencaamo naatoodö, 25Juudha nwacaanoje anontaajäje eiye yaawä. Ñäädä Juudha conemjönö tödö’jödö jo’tädööje anontaajäje töweichö jonno cönäätu’cajoi, töweichojo döiña töötädö wetä; quee Wanaadi wwä cöna’deuwa’to.

26Yaawä wä’cana’canä tödöödö’jo Matía anontaajäje yääwaacatoojo cönoojodöi. Anonta’como jadäiñe töwö cönä’jaacä yaawä, ñanno amoojadooto de’wä tooni’chomo jimmäje.

Currently Selected:

DOSECHO 1: MCH

Highlight

Copy