DOSECHO 2

Epíiditu Santo weejö’jödö

1Yaawä Pentecoté anootoi’chädö wä’döa’jäcä, yäätä dea cönä’ja’to tameedä quedeiyentecoomo, tujuumä. 2Yaawä jadheedä cadeemedu nöngato cönäätai caju ña, jejeichä joojato wä’dödö nönge. Maa weichö wa’cäädä cönäätai, shuucu chaawä cönä’ja’todö. 3Chäwwäiñe cönäämecantäi yaawä wa’to wätuudinchädö nönge. 4Tameedä tönwanno Epíiditu Santo jäduudu ’je cönä’döicho yaawä; cönaajäntoicho yaawä anejja a’deucwe töwa’deuwödööcomo, Epíiditu Santo nutuudu woije.

5Yaawä Jeduusadén ña cönä’ja’to jooje judhíocoomo, tameedä edä nono de’wono jata waadoinchomo we’a’como. Ñanno cönä’ja’to chäänönge judhío wätunnäichomo tödönnamo. 6Yää cadeemedu nöngato wääta’jäcä tameedä soto cöne’jummaicho yaawä. Tönwanno cönääcatoncaicho töwaadäiñe ta’deucweiñe wa’deunä eta’jödö weijäcä. 7Tönwanno cönääwammajoicho töweicho’como ’je’da tödööene. Tönwannoje dea cönä’döa’to yaawä:

—¿Caadideea ñancomo jönca canno tameedä na’deuwaatoodö? 8¿Aaquene mmaja cöwaadäiñe queetaato dea ca’dedducoomo? 9Eetä töweiye naato Paadatiiya ñancomo, Meediya ñancomo mmaja, Edan ñancomo mmaja, Meesopootaamiya ñancomo mmaja, Judheea ñancomo mmaja, Caapadoosiya ñancomo mmaja, Ponto ñancomo mmaja, Aasiya ñancomo mmaja. 10Töweiye mmaja naato dea Jidiijiya ñancomo, Pamjiidiya ñancomo mmaja, Ejiito ñancomo mmaja, Aujidiica ñancomo mmaja, yää Sideene ñano mänseedono. Dooma ñancomo mmaja eetä naato dea; dhantai judhíocoomo, dhantai ’chene judhíoje yääwaaca’como. 11Quedeeta ñancomo mmaja eetä naato dea, Adaawiya ñancomo mmaja. Cöwaadäiñe ca’deucweiñe ya’deuwödööcomo queetaato Wanaadi nödöödö aashichaato jäcä; quee cönä’döa’to ñanno judhío.

12Tönwanno töwääcatonca cönä’ja’to töweicho’como ’je’da tödööene; tönwannoje dea cönä’döa’to:

—¿Aaquene töwä’dö’se yeicho mädä? quee.

13Anejjacoomo mmaane cönenno’jä’a’to; cönä’döa’to:

—Töwä’dau’cwe dajaane naato; quee cönä’döa’to ñanno quedeiyentecoomo jäcä.

Soto wwäiñe Peedhodo necammajäätö’jödö

14Yääje mma yaawä Peedhodo cönammöi töjimmä jadäiñe, ñanno amoojadooto de’wä tooni’chomo anonta’como. Töwö töcä’de cöna’deuwacä; cönä’döaacä soto wwäiñe:

—Änwanno Judheea ñancomo, tameedä Jeduusadén ñancomo mmaja, edääje wä’dö’se wa äwwäiñe; aashicha etaatäcä ya’deddu. 15Canno dhanwaacomo ä’dacu’da naato ätö’tajä’atoodöje’da, anunnaque ä’dö’jai’cha deaane yeiyajä. 16Edä meneeatoodö jäcä Joweede cöneecammai, ñäädä Wanaadi wa’deuwödö ecammanei’jödö. Edääje ñäädä cönä’döaacä:

17Wanaadi yääje nä’döa: Anooto ataamejai yä’döa’jäcä Epíiditu Santo wu’a’de tameedä soto wwäiñe;

iiñacoomo untudu woije necammajä’aato’de, dhanwaacomo, wodiiñamo mmaja;

ääjömannamo töwäänemjönö neneeaato’de;

inchoncomo niwäänetööaato’de.

18Yaawä Epíiditu Santo wu’a’de yaanonö wwäiñe, dhanwaacomo, wodiiñamo wwä mmaja;

tönwanno necammajä’aato’de öwö untudu woije.

19Täneemö wännöa’de caju ña;

nono de’wä mmaja ene’ju’tojo wännöa’dede:

munu, wa’to mmaja, wedeinchä mmaja.

20Shii nichööjanga’de yaawä,

nuunä naquiicha’dede,

Cajiichaana weejödö owaajo,

yää aashicha yäänejootojo anootoi’chädö, o’jodhe yäänejootojo mmaja.

21Ñäädä Cajiichaana ecaanö’nei nääwanaaca’de; quee cöneecammajäätöi Joweede.

22“Yääje yeijäcä ya’deddu etaatäcä änwanno iisadaaediitacoomo. Ñäädä Jesuuquidiito Naasade ñano cönä’jaacä dhanwa chäänöngato. Äwwäiñe Wanaadi cöneene’ju’joi yääje yeichö täneemö tödööjodö que, ene’ju’tojo tödööjodö que mmaja, aashichaato tödööjodö que mmaja, yää Wanaadi chäwwä tönnöjo cönä’ja’dö aneenedööcomooje. Änwanno odhoowanääcäiñe na yääje yeichö. 23Yääje yeichaame äwwäiñe yä’tua’jäcä änwanno majäichäne; cuduusa jäcä ajoijodö que memaajotääne yaawä conemjöncomo wwä. Tameedä yää cönä’jaacä jenaadä Wanaadi nichö’tammecö’jödö woije, imjummadö woije mmaja. 24Wanaadi cönaadoncai yaawä yäämaajo jonno. Mädääje Wanaadi wäämanä cöne’jodheinchai, töwö Jesuuquidiito wäämanä wwä oto’jodheinchajoojai’cha yei’jödö weijäcä. 25Jenaadä edääje cajiichaana Dawí cönä’döaacä Jesuuquidiito jäcä:

Jaadä dea töneene wä’jaaquene Cajiichaana;

töwö önnäcä weneene, ämu’demjönö dö’se, ejääduqueejö’da weichö wetä.

26Yääje yeijäcä ta’cwaiñe wä’jaaquene yeewanö jäcä; aashicha ya’deune dea.

Täncanoode’da wäädeeta dea,

27yä’ja’a’como weicho’como ña näämä’da aweijäcä,

adhaanonö ämjummadö äncä’nojo’da aweijäcä mmaja.

28Amäädä weichojo meneejone öwwä;

ajaadä weichö que ca’cwaima’de;

quee Dawí cöneecammai Jesuuquidiito wa’deuwö’jödö.

29“Jimmä, cönwanno cowaanäcäiñe na cöjimmotoncomo Dawí wääma’jödö, ewaaca’jödö mmaja; eduuwa jona tödööene cowaanäcäiñe na chääwadö. 30Töwö Dawí cönä’jaacä Wanaadi a’deddu ecammaneije; töwö dhowaanäcä cönä’jaacä töwwä Wanaadi necamma’jödö tatöödöje Äwaanacaanei weichojo, tönwacaanoje cajiichaanaje yeichojo mmaja. 31Yääje yeijäcä dhowaajo eneedö’joto wa’cä Dawí cöneecammajäätöi töwäämaajo jonno Quidiito waadoncatoojo jäcä, yä’ja’a’como weicho’como ña ei’cha yeichojo jäcä mmaja, chääta’de yeichojo jäcä mmaja. 32Ñäädä dea Jesuuquidiito Wanaadi cönaadoncai yäämaajo jonno; tameedä ñaa owaanäcä yääje yeichö, eneetö’da. 33Töwö Jesuuquidiito caju ña cönaatannä’joi yaawä; Wanaadi nnäcä na eduuwa, ämu’demjönö dö’se. Yuumö cuntui chäwwä Epíiditu Santo, ñäädä töneecamma’jödö dea. Tameedä mädä mene’maatoodö, metaatoodö mmaja, Jesuuquidiito nutuudu woije na. 34Dawíijönööne caju ña cönäncui; töwö dea cönä’döaacä:

Cajiichaana cönä’döaacä Yeedhajä wwä:

“Önnäcä ataajimaacä, ämu’demjönö dö’se,

35odho’cäi ätu’de’tännamo tödöödö wa’cä öwwa;”

quee Cajiichaana cönä’döaacä; quee

Dawí cönä’döaacä.

36“Yääje yeijäcä tameedä iisadaaediitacoomo chäänönge towaanäcäiñe tödööjai ñaato ñäädä dea Jesuuquidiito cajiichaanaje tödö’jödö yeichö Wanaadi wwä, Äwaanacaaneije mmaja, ñäädä cuduusa jäcä majoijotäänedö dea; quee cönä’döaacä Peedhodo soto wwäiñe.

37Yää se’ne cöneetaicho ñanno soto; tönwanno Peedhodo cöneecamma’joicho yaawä, anejjacoomo anonta’como mmaja:

—¿Ane’cäämö tödööjai ñaa nai, jimmä? quee cönä’döa’to.

38Yaawä Peedhodo cönä’döaacä chäwwäiñe:

—Ätö’tajäätödööcomo sha’duminchatääcä; wautisaaje ä’döjootäcä Jesuuquidiito eetö joi, ocoone’nadiiyöcoomo ätäncwanno’joiye. Yaawä Wanaadi nu’a’de Epíiditu Santo äwwäiñe. 39Änwanno owwoncomooje na yää Wanaadi necamma’jödö, ännacontoncomo wwoncomooje mmaja, tameedä amoincha’como wwoncomooje mmaja, tameedä Cajiichaana Cöwaanadiiyöcoomo na’dejjadööje töweiyaamo wwoncomooje mmaja; quee cönä’döaacä Peedhodo.

40Mädääje Peedhodo cöna’deuwöi chäwwäiñe. Anejja jäcä mmaja töwö cöneecammajäätöi chea chäwwäiñe. Edääje töwö cönwätuujaicho yaawä:

—Ääwanaacatääcä edä weiñä conemjönö jonno; quee cönä’döaacä Peedhodo.

41Yaawä ñanno dha’deddu ecaanö’nnamo wautisaaje cönä’döjoicho. Yää anooto awä aaduwaawä miide quedeiyenteje cönä’döicho. 42Ñanno chäänönge tönnöe cönä’ja’to anonta’como wwä towaanomaadöcoomo; aashicha töweiye cönä’ja’to tönwannoje dea. Töwe’jumma töweiye cönä’ja’to Wanaadi wwä töwa’deuwödööcomo wetä, Santa Seena tödöödö weta mmaja.

Awa’deena’como quedeiyentecoomo wei’jödö

43Tameedä ñanno quedeiyentecoomo tönoiñe äneetä cönä’ja’to. Anonta’como tönnöe cönä’ja’to jooje aashichaato, ene’ju’tojo mmaja. 44Ñanno ecaanö’nnamo aata’deucwe töweiye cönä’ja’to; tameedäädotooje tönnödööcomo tönnöe cönä’ja’to. 45Tönwanno tönsomaadöcoomo töneejemaajo cönä’ja’to, tameedä töwwäiñe cönä’ja’dö; yaawä chääje’jödö töneecamo cönä’ja’to anejjacoomo wwä, a’que yeichö woije. 46Anooto waadäi töwe’jumma töweiye cönä’ja’to Wanaadi weichojo taca. Tömmaichomo waadäi Santa Seena tönnöe cönä’ja’to; tujuumä töwääwashinchä cönä’ja’to dea, ta’cwaiñe töweiyancädäiñe, o’jodhe tötö’tajä’ancädäiñe’da mmaja. 47Aashicha töwa’deuwe cönä’ja’to Wanaadi jäcä. Tameedä soto ta’cwaiñe töweiye cönä’ja’to chääjäcäiñe. Anooto waadäi Cajiichaana Wanaadi ñanno täcaanö’nnamo jadäiñe töneejodööjoiñe cönä’jaacä ñanno yääwanaaca’como.

Currently Selected:

DOSECHO 2: MCH

Highlight

Copy