JUAN 13
13
Tönoowanoomadö ’judu chocca’jödö Jesuuquidiito wwä
1Tooni anooto mmädä a’que cönä’jaacä Weja’dätä’jä anooto comjedensiyai’chädö tödöötojo cu’nädö aca yä’dötoojo. Yaawä Jesuuquidiito dhowaanäcä cönä’jaacä chu’nädö aca yä’dödö Tumö döiña töötotoojo edä nono de’wonno. Yääje yeichaame töjaadoncomo jäcäiñe tötö’tajä’e dea cönä’jaacä, ñanno edä nono de’woncomo; ijummadööcomooje dea cönä’jaacä, tumjummaiñe cönä’ja’döje dea.
2-4Yaawä odo’sha cönääwaacai Juudha Icaadiyoote tö’tajäätödö aca, ñäädä Simón nnedö, Jesuuquidiito utuudu jäcä chö’tamme’jodö wetä chäwwä. Jesuuquidiito dhowaanäcä cönä’jaacä Wanaadi jonno töweejö’jödö, Wanaadi döiña töötotoojo mmaja; dhowaanäcä cönä’ja’dea Tumö nutuudu töwwä tameedä o’jodhe töweichojo. Yaawä töwääwashinchädaawäiñe Jesuuquidiito cönammöi meesa dö’tonno. Töwoomö de’wono cunu’cai; tö’dhau’cwäcä jaañu que cönä’möi yaawä. 5Yaawä tuna cönaccai jinsheeda aca. Cönaajäntäi yaawä tönoowanoomadö ’juduucomo coccadö; yää jaañu, tö’dhau’cwäcä cönä’ja’dö que cönsede’nanö’jätöi chea.
6Yaawä Simón Peedhodo döiña yä’döa’jäcä Peedhodo cönä’döaacä chäwwä:
—Owaanomaanei, ¿amäädäde’ca u’judu michoccaanä?
7Jesuuquidiito cöneccujä’acä:
—Mädä wödööaadö odhoowanääcä’da na eduuwa; äcuude odhoowanääcä na’de; quee cönä’döaacä.
8Yaawä Peedhodo cönä’döaacä:
—U’judu choccajai’cha ma; quee.
Jesuuquidiito cönä’döaacä chäwwä:
—Oncocca’da weiya’jäcä jaadonooje eijai’cha ma; quee.
9Yaawä Simón Peedhodo cönä’döaacä:
—Yääje yeiya’jäcä u’judu mma’da choccacä, yaamädö, ju’jä mmajaane; quee cönä’döaacä.
10Jesuuquidiito cönä’döaacä:
—Ñäädä yeecoccaajä i’judu mma töcoccamje na, tameedä töcocca yeijäcä. Änwanno töcocca maato, tameedä’daane; quee cönä’döaacä Jesuuquidiito.
11Töwö dhowaanäcä cönä’jaacä tu’nei; yääje yeijäcä yääje cönä’döaacä: “Tameedä’daane töcocca maato;” quee.
12Yää ’jeje i’juduucomo choccajäätö’jeje, Jesuuquidiito cöneewontäi chea töwoomö de’wono que. Cönaatajiimai chea yaawä meesa dö’tä; cönä’döaacä tonoowanoomadö wwäiñe:
—¿Odhoowanääcäiñe’ nai äjääcäiñe wödöichö? 13Änwanno odhoowanoomaneichomooje cä’taato, adheedhajootoncomooje mmaja; chäänönge yääje äwä’dödööcomo, ñäädääne weiyajä. 14Öwö odhoowanoomaneichomooje weichaame, adheedhajootoncomooje weichaame mmaja, ä’juduucomo wichoccai; töwaacö’je änwanno choccajai maato äjimmotoncomo ’judu. 15Mädä äjääcäiñe wödöichö äwwäiñe tödööemö weneejoi, önnö’jödö nönge mmaja tödöödö wetä äwwäiñe. 16Chäänönge yääje wä’döa äwwäiñe, dhanoonö tädhaajä e’jodhe’da na, anontaajä tanontänei’jödö e’jodhe’da mmaja. 17¿Odhoowanääcäiñe jönca näätaanä? Ta’cwaiñe eijai maato mädä tödööajäcä äwwäiñe.
18“Tameedä’da äwwäiñe ya’deuwa; öwö yoowanääcä naato neichö. Yääje yeichaame Wanaadi a’deddu imennaajä naadöje dea neja’dä’a’de. Edääje nä’döa yää imennaajä: “Ñäädä jaadono wääwashinchädö dea yeema’se na;” quee imennaajä nä’döa. 19Dhowaajodä dea wecamma äwwäiñe, yaawä neecamma’jödö nönge yeeja’dä’a’jäcä änwanno ecaanö’jai maato chäänöngatooje weichö. 20Chäänönge yääje wä’döa äwwäiñe, yaanonö aashicha tödöödö, aashicha yöödödö wa’cä mmaja na dea. Ñäädä aashicha yöödönei, yaanontänei’jödö aashicha tödöödö wa’cä mmaja na dea; quee cönä’döaacä Jesuuquidiito.
Juudha wwä tutuudu jäcä Jesuuquidiito necamma’jödö
21Yääje töwa’deuwödö’jo Jesuuquidiito cone’da cönä’döjoi jooje. Töwö cönä’döaacä:
—Chäänönge yääje wä’döa äwwäiñe, töweiye na adhantawäiñe yu’nei; quee.
22Yaawä ñoowanoomadö cönääne’ma’to tönwannoje dea. Tönwanno cöntö’tajä’a’to: ¿Änääcö ja’dha? quee. 23Tooni ñoowanoomadö cönä’jaacä Jesuuquidiito dö’tä yaatajiimaajä; ñäädä cönä’jaacä Jesuuquidiito nijummadö. 24Ñäädä wwadäädä Simón Peedhodo cöneenejoojä’acä, “Ecamma’jocä, ¿änääcö jäcä mädääje nä’döaanä?” quee töucwadööje. 25Yaawä ñäädä Jesuuquidiito dö’tono Jesuuquidiito wwadäädä cönootommoi; cönä’döaacä chäwwä:
—Owaanomaanei, ¿änääcö ecammancädä yääje mä’döaanä? quee cönä’döaacä chäwwä.
26Jesuuquidiito cöneccujä’acä:
—Ñäädä uu i’jiyaajä chäwwä wu’a’dedö, ñäädä ñäädä; quee cönä’döaacä.
Yaawä uu cöni’ji; cuntui yaawä Juudha Icaadiyoote wwä, ñäädä Simón nnedö wwä. 27Yaawä uu enaajödö ncäcäädä Caajuushawa cönääwaacai Juudha aca. Yaawä Jesuuquidiito cönä’döaacä Juudha wwä:
—Ma’da’cä tödööcä mädä äwwä tödööemö; quee cönä’döaacä.
28Ñanno meesa dö’toncomo towoinchadäiñe cönä’ja’to; dhowaanäcäiñe’da cönäätaacä Jesuuquidiito wa’deuwödö. 29Ñäädä Juudha cönä’jaacä töjöödataichomo edhaajäje ñeewaacadööcomo; yääje yeijäcä anejjacoomo cöntö’tajä’a’to äwanshi ejeema anontaatäi jeiñe mma, wentumja’como wwä jödaata u’jaatäi jeiñe mma. 30Yaawä uu enaajö’jeje Juudha cöneeja’cai. Coijai cönä’jaacä yaawä.
Eduuwaato waanontänä
31Yaawä Juudha weja’ca’jeje Jesuuquidiito cönä’döaacä:
—Eduuwa näänea aashicha Soto nnedö weichö; aashicha Wanaadi weichö mmaja näänea dea Soto nnedö jäcä. 32Aashicha Wanaadi weichö töneenejo weijäcä eduuwaiche mma töwö neneeja dea aashicha öwö weichö. 33Önnacoomo’cä, numa’da mma ajaadäiñe weichojo na eduuwa. Änwanno a’que cujiiyato’de; judhío wwäiñe wä’döaaquennöje mmaja wä’döa dea äwwäiñe: Öwö öötotoojo döiña änwanno täjai’cha maato; quee. 34Eduuwaato waanontänä wecamma äwwäiñe: Ä’jummatääcä; änwanno mämjummaatoodöje mmaja ajimmotoncomo ijummajai maato. 35Äwä’jumma’comjäcä tameedä soto dhowaanäcäiñe eijai ña yaawä sootoije aweichöcoomo; quee cönä’döaacä Jesuuquidiito.
Peedhodo wwä töjoome’dotoojo Jesuuquidiito necamma’jödö
36Yaawä Simón Peedhodo Jesuuquidiito cöneecamma’joi:
—Owaanomaanei, ¿äsha mötäätai’che? quee cönä’döaacä.
Jesuuquidiito cöneccujä’acä:
—Öwö öötotoojo döiña täjai’cha maato eduuwa; äcuude’cä jeene mötaato’de; quee cönä’döaacä.
37Yaawä Peedhodo cönä’döaacä:
—Owaanomaanei, ¿ane’que’nei ajaadä täjai’cha wanä eduuwa? Äämajai chajaane wa ajunnei; quee.
38Jesuuquidiito cöneccujä’aca:
—¿Äämajai ätö’taanä öwö junnei? Chäänönge yääje wä’döa äwwä, wameedi wetöömödö owaajo amäädä cöjoome’da’de aaduwaawäde.
Currently Selected:
JUAN 13: MCH
Highlight
Share
Copy
Want to have your highlights saved across all your devices? Sign up or sign in
© 2014 Reservados todos los derechos
