DOSECHO 6

Aacä amoojato diyaacono ewaaca’jocoomo

1Yaawä quedeiyentecoomo cöneejanga’to jooje. Ñanno quidiiyeeco a’deucwa’como cönenta’me’ca’to yaawä judhío a’deucwa’como jäcä. Tönwanno cönä’döa’to:

—Anooto waadäi äwanshi ecaamodaawä chääwa’cä ä’tu’da weneene ñaa jimmä iiño wääma’jödö wwäiñe; quee cönä’döa’to.

2Yaawä ñanno amoojadooto de’wä aaco’como anonta’como tameedä quedeiyentecoomo cöni’jummaicho; cönä’döa’to chäwwäiñe:

—Wanaadi a’deddu ecammajäätödö e’nomjajai’cha ñaa na äwanshi ecaamodö wetä. 3Yääje yeijäcä ajimmotoncomo aneedantätääcä aacä amoojato dhanwaacomo, aashicha’como chääcadö dea, towaanojo’na’como, Epíiditu Santo jäduudu ’ja’como mmaja. Ñanno wwäiñe mädä tödööjotääcä. 4Ñaa mmaane Wanaadi a’deddu ecammajäätödö jäcä eijai ñaa na, Wanaadi wwä wa’deunä jäcä mmaja; quee cönä’döa’to anonta’como quedeiyente wwäiñe.

5Yääje ya’deuwödööcomo yaacö’comje cönä’jaacä ñanno. Yaawä tönwanno cöneewaacaicho Eteewa; ñäädä cönä’jaacä Epíiditu Santo jäduudu ’je; jooje töneecanö’e cönä’jaacä. Jediipe mmaja cöneewaacaicho dea; Podoocodo mmaja; Niicanoodo mmaja; Timón mmaja; Paadameena mmaja; Niicodá mmaja, ñäädä Antiyooquía ñano, judhíoje yääwaacaajä. 6Yaawä anonta’como döiñaiñe cönaadoicho. Ñanno anonta’como tamäädöcoomo cönnöicho ye’cäcäiñe; Wanaadi wwä cöna’deuwöicho chääjäcäiñe.

7Yaawä Cajiichaana Jesuuquidiito a’deddu jooje cöneejangacä. Wanna soto quedeiyenteje cönä’döjoicho Jeduusadén ña; Wanaadi wwä töwa’deuwaamo jadä’jödöödä cöneecamjöicho.

Eteewa ajäi’jödö

8Eteewa wwä cönä’jaacä Wanaadi nutuudu ecaanö’tojo; Wanaadi jäduudu ’je cönä’ja’dea. Töwö soto neneedöcoomoje aashichaato tönnöe cönä’jaacä, ene’ju’tojo mmaja. 9Yaawä anejjacoomo judhío we’jummato’como tacancomo Eteewa jadä cönäätäccujä’a’to. Ñanno cönä’ja’to tanontäjä’aamo wätu’ca’como. Sideene ñancomo mmaja cönäätäccujä’a’to dea Eteewa jadä, Aadejantidía ñancomo mmaja, Sidiisiya ñancomo mmaja. 10Tönwanno chaana’cajai’cha cönä’ja’to Epíiditu Santo nutuudu sejje que Eteewa wa’deuwödö weijäcä. 11Yaawä tönwanno cöneejemaicho anejjacoomo dhanwaacomo Eteewa jäcä cone’da ya’deuwödööcomo wetä. Ñanno dhanwaacomo Eteewa cöneementa’to; cönä’döa’to:

—Ñaa cöneetaacä cone’da Eteewa wa’deuwödö Moisé jäcä, Wanaadi jäcä mmaja; quee cönä’döa’to.

12Yääje töwa’deuwödööcomo que Eteewa jäcä soto cöneetömaajoicho, inchoncomo mmaja, judhío owaanomannamo mmaja. Yaawä Eteewa maminchadö’jo ñanno cönaajoicho, cönaadoicho yaawä äcamma’jonnamo döiñaiñe. 13Tönwanno Eteewa ementännamo cöneejodöicho; ñanno cönä’döa’to:

—Määdhä dhanwa cone’da töwa’deuwe weneene Wanaadi weichojo amääajä jäcä, jenaado’jä waanontänä jäcä mmaja. 14Edääje yä’dödö ñaa cöneetaacä: “Jesuuquidiito Naasade ñano Wanaadi weichojo nichaadaca’de, Moisé waanontä’jödö ninwacaama’dede;” quee yä’dö’jödö ñaa cöneetaacä; quee cönä’döa’to ñanno Eteewa ementännamo.

15Yaawä tameedä ñanno cajiichaanacoomo, anejjacoomo yaatajiima’como mmaja, cöneene’ma’to Eteewa jedö; Wanaadi amoodedö jedö nönge ijeedö cönä’jaacä.

Currently Selected:

DOSECHO 6: MCH

Highlight

Copy