DOSECHO 5

Aananía acä Saujiida conemjönö iiñö’jocoomo

1Anejja dhanwa mmaja tönaudädö cöneejemaajoi chea. Ñäädä cönä’jaacä Aananíaje chäätö; ijiiñamo eetö ’quene Saujiida. 2Ñäädä Aananía cönäätäncu’täi yää töneejemaajo’jödö jäcä. Töwö anonta’como wwä cuntui yaato mma, tameedäädotooje e’tancädä; yaato mmaane töwwä cönnoi. Ijiiñamo dhowaanäcä cönä’jaacä yäätäncu’tädö. 3Yaawä Peedhodo cönä’döaacä Aananía wwä:

—Aananía, ¿aaquene Caajuushawa ätö’tajäätödö aca nä’döi chea Epíiditu Santo encu’tädo wetä äwwä anaudä’jödö eje’jödö jäcä? 4Awa’de ännödööje yää cönä’jaacä. Yää ’jeje, ejeemaja’jäcä, ännödööje dea cönä’jaacä yää jödaata chääje’jödö. ¿Ane’que’nei mädääje ätö’tajä’anä? Sotoojönö mencu’ta, Wanaadiiñe; quee cönä’döaacä Peedhodo Aananía wwä.

5Yää eta’jäcä Aananía cöne’duccai töwäämadööje mma. Tameedä yää jäcä etannamo’jödö cönääcatoncaicho jooje. 6Yaawä chääquejöödö yontädö’jo ääjömannamo cönaadoicho ewaacadö wetä.

7Yääje mma yaawä aaduwaawä shii wä’seca’jödö yeichö Aananía jiñamomjödö cönoomomöi yaawä. Töwö dhowaanäcä’da cönä’jaacä töiño wääma’jödö. 8Yaawä Peedhodo ñäädä cöneecamma’joi:

—¿Yää ’cäwa’cä dämma cönä’jaacä anaudo’jocoomo eje’jödö? quee cönä’döaacä.

Ñäädä wodi cöneccujä’acä:

—Ee, yää ’cäwa’cä mma’ne; quee cönä’döaacä.

9Yaawä Peedhodo cönä’döaacä chäwwä:

—¿Ane’que’nei adha’deutäne Epíiditu Santo oneejadö wetä? Canno ñanno oiño jaano ewaacannamo’jödö; amäädä daja adhaadäaato dea eduuwa; quee Peedhodo cönä’döaacä.

10Yaawä dea mma ñäädä wodi cöne’duccai Peedhodo o’wawä, töwäämadööje mma. Ñanno ääjömannamo womonga’comjäcä yäämaajä cöneedantoicho; cönaadoicho yaawä iiño’jödö nnäcä ewaacadö wetä. 11Tameedä quedeiyentecoomo, anejjacoomo yää jäcä etannamo mmaja, cönääcatoncaicho jooje.

Anonta’como wwä ene’ju’tojo tödö’jödö

12Ñanno anonta’como jooje aashichaato tönnöe cönä’ja’to, ene’ju’tojo mmaja. Tameedä quedeiyentecoomo töwe’jumma cönä’ja’to Saadomón Jesai’chädö tawä. 13Anejjacoomo soto mmaane tösaade töweiye cönä’ja’to, chääjadäiñe töwoojodö’seiñe’da. Yääje yeichaame tameedä soto wacö’comje ñanno quedeiyentecoomo cönä’ja’to. 14Jooje töwääwaaca cönä’ja’to quedeiyenteje, dhanwaacomo, wodiiñamo mmaja. 15Ñanno soto cädäija’como tömja’ca cönä’ja’to jödo’na; ääma taawä tönnöe cönä’ja’to chä’wötööcomo jo, Peedhodo owaajo, yeeja’dätäädawä chääcato ajoojodö wetä. 16Anejjacoomo amoinchemjöncomo ijaatadööcomo töwe’e cönä’ja’to Jeduusadén ña, cädäija’como dha’me, odo’sha ’ja’como dha’me mmaja. Tameedä töwaadonca cönä’ja’to.

Peedhodo, Juan imaamincha’jocoomo

17Yaawä Wanaadi wwä töwa’deuwaamo edhaajotoncomo, ijimmotoncomo saadhuseeo mmaja, tö’neiñe cönä’ja’to. 18Yääje yeijäcä tönwanno anonta’como cönaajoicho; jedeeso ewöötö’tädö taca cöneewaacaicho yaawä. 19Yaawä, coijai, Cajiichaana Jesuuquidiito amoodedö mönaatata cöna’ducai anonta’como wwäiñe; cönä’döaacä chäwwäiñe:

20—Ojoncomo Wanaadi weichojo taca; soto wwäiñe ecammajä’tantäcä edä eduuwaato weichojo jäcä; quee cönä’döaacä amoode chäwwäiñe.

21Yää eta’jäcä ñanno anonta’como cöneeja’caicho. Jenamma naadöje tönwanno cöntonto yaawä Wanaadi weichojo taca, jenaadäne; yäätä soto cönoowanooma’to.

Yaawä Wanaadi wwä töwa’deuwaamo edhaajotoncomo, chääjadoncomo mmaja, cöni’jummaicho tameedä äcamma’jonnamo, ñanno iisadaaediitacoomo ntonta’como. Yää ’jeje jedeeso ewöötö’tädö tacanno anonta’como cönne’ja’to. 22Waadiya cöntonto yaawä ñanno wetäiñe; a’que cöneedantoicho. Tanontännamo’jödö döiña cönennacaicho dea yaawä; 23cönä’döa’to:

—Yää jedeeso ewöötö’tädö ñaa nedantäi ta’duqueedä; tajoijo nä’jaanä. Yäätä suddau nä’janto, mönaatata edai’chännamo. Yaawä ñaa wwä a’duca’jäcä tasse’da ñaa nedantäi; soto ’je’da nä’jaanä chaaca; quee cönä’döa’to ñanno waadiya.

24Yää eta’jäcä Wanaadi wwä töwa’deuwaamo edhaajotoncomo wwä, Wanaadi weichojo edai’chännamo edhaajotoncomo wwä mmaja, anejjacoomo Wanaadi wwä töwa’deuwaamo wwäiñe mmaja, tönwanno cöntö’tajä’a’to: “ ¿Aaquene töwä’döeemö mädä?” quee. 25Yaawä dhanwa cönä’döi yöiñaiñe; cönä’döaacä:

—Ñanno dhanwaacomo mujiiyatoodö Wanaadi weichojo taca naato, soto owaanomaadöcoomoje; quee cönä’döaacä.

26Waadiya edhaajotoncomo cöntonto yaawä suddau jadäiñe ñanno anonta’como wetäiñe. Cönaadoicho yaawä imaaminchancädäiñe’da soto wwäiñe täju que töwääjätöödöcoomo queiñe. 27Yaawä adääa’comjäcä äcamma’jonnamo je’tacaiñe cönnöicho. Ñäädä Wanaadi wwä töwa’deuwaamo edhaajotoncomo cönä’döaacä chäwwäiñe:

28—“Jesuuquidiito jäcä soto monoowanoomatäi’che eduuwa;” que jönca ñaa cönä’döaacä äwwäiñe. Yääje yeichaame tameedä Jeduusadén ñancomo mi’jedaato äwäätunnäichomo que. Ñaa woijatooje töne’tä määnetääne ñäädä Jesuuquidiito ema’jödö; quee cönä’döaacä.

29Yaawä Peedhodo, anejjacoomo anonta’como mmaja, cöneccujä’a’to; cönä’döa’to:

—Wanaadi woijeene eijai ñaa na, soto woije’daane. 30Cadai’choncomo Wanaadiyö Jesuuquidiito cönaadoncai yäämaajo jonno, ñäädä cuduusa jäcä ajoijodö que memaatäneedö. 31Ñäädä Wanaadi Jesuuquidiito cönnöi tönnäcä, ämu’demjönö dö’se; o’jodhe cönnöi, Cajiichaanaje mmaja, Äwaanacaaneije mmaja, tötö’tajäätödööcomo sha’duminchadö wetä iisadaaediitacoomo wwä, choone’nadiiyöcoomo ätäncwanno’joiye yaawä. 32Mädä jäcä ecammajä’neije ñaa na, Epíiditu Santo mmaja. Wanaadi Epíiditu Santo tunu’e weneene tameedä töwoije tödöönei wwä; quee Peedhodo cönä’döa’to äcamma’jonnamo wwä.

33Yää eta’jäcä ñanno wwäiñe jooje cönäätömaicho yaawä, anonta’como ema’seiñe tödööene. 34Yaawä äcamma’jonnamo antawäiñe cönä’jaacä jaadiseeo, Camaadiyeede täätö. Töwaanojo’ne töwö cönä’jaacä jenaado’jä waanontänä owaanomaadö jäcä. Tameedä soto tönoiñe töneene cönä’ja’to. Ñäädä Camaadiyeede cönammöi yaawä; anonta’como jödo’na cömja’canö’joicho a’dhe. 35Yaawä töwö cönä’döaacä ñanno cajiichaanacoomo wwäiñe:

—Änwanno iisadaaediitacoomo; odhoowadäädäiñe eichäcä, canno dhanwaacomo jäcä conemjönö männöto’no. 36Odhoowanääcäiñe na eduuwaiche mma Teuda wei’jödö, ñäädä täneejucaatoje töwäätä’tä cönä’ja’dö. Jooje shootoi cönä’ja’to, tooni soto soto. Ñäädä Teuda cönäätämaajoi yaawä; ñanno shootoi’jödö cönäämecantoicho yaawä, a’que tödööene. 37Yää ’jeje yaawä soto ime’cu’tädööcomo awä Juudha cönä’ja’dea, ñäädä Caadideea ñano. Jooje cönä’ja’to dea shootoi. Ñäädä mmaja cönäätämaajoi chea yaawä; shootoi’jödö cönäämecantoicho dea. 38Yääje yeijäcä edääje wä’döa äwwäiñe: Canno dhanwaacomo jäcä’daane eichäcä; conemjönö männötäi’che chääjäcäiñe. Soto woijato mma yeiya’jäcä mädä naatoodö nataamea’de. 39Dha’da ’quene Wanaadi woijato yeiya’jäcä änwanno acoichajoojai’cha maato mädä. Odhoowadäädäiñe eichäcä, Wanaadi jäcä mma conemjönö männöto’no; quee cönä’döaacä Camaadiyeede chäwwäiñe.

40Ñanno cöneeta’to dha’deddu. Anonta’como cöna’dejjaicho yaawä; taiju’jä’e mma cönaiju’jätöicho; cönä’döa’to chäwwäiñe:

—Jesuuquidiito jäcä mma maneecammajä’täi’che eduuwa; quee cönä’döa’to.

Cönenno’jaicho yaawä. 41Ñanno anonta’como cöntonto yaawä täcamma’jonnamo jonnoiñe. Tönwanno ta’cwaiñe cönä’ja’to Jesuuquidiito ecamjödö jo’tädööje töwäntunamjödööcomo weijäcä, Wanaadi woije dea. 42Tönwanno ane’nomja’da cöneiya’to anooto waadäi Jesuuquidiito jäcä ecammajäätödö, chääjäcä soto owaanomaadöcoomo mmaja Wanaadi weichojo taca, immaichomo waadäi mmaja.

Currently Selected:

DOSECHO 5: MCH

Highlight

Copy