Lucas 9

Jesúsnö cama 12 ebä

lä shömöleno wei tä a̦

1Ö̦jö däjä, cama 12 ebä lä nocamabono wei bä lä cui, Jesúsnö bä nacaa fa ajedealalönö, fecula bä bluca yashubeje bä tablamalema. Jalili bä jalomabeje bä ca̦i tablamaö mö fedua showalayoma. 2Ö̦jö däjä, Yai Bada tänö cama ebä ca̦i lä cuo wei tä a̦ wäyäö cuaabeje bä shömölema, bä lä jalili wei bä ca̦i jalomaö cuaaö showadaobeje.

3Abinaja bä nowa tama.

—Wamacö lä jublole däjä, shinoco wamacö nia juu. Fii wama defibä nia bofälöimi. Wama täbä didibofälöbä, wama täbä nia däboimi. Wamacö iyafälöbä, nii wama bä nia yefiboimi. Wama täbä lulafälöbä, wama bä nia blada boimi. Camishi wama bä nia bolacafälöimi. 4Wamacö shifilimou mlai, wamacö nia lä cuo wei a yafi ja, bä da yanöcöicu. Wamacö juu co̦fälöö ja, ö̦jamö lä culanö wamacö nia jocäö co̦o.

5’¿Ö̦jö tawä? —a cuma—. Wamacö juu lä cuaaimadi jamö, wamacö bälömabou bufiomije ja, abinaja wamacö nia cuaaö. Ö̦jö wama bä tabi feiaö yalo wamacö sibolanö, bei wamacö mamicö busi jamö bä libu libu lä sudile, wama ebä nia yaösöblalefälöö. Ö̦jö tänö bä nö nia lä bleaaö wei wama tä nia jömaö —a cuma.

6Bä aa fa showalöfälönö, bluca täbä shabonobö jamö, Yai Bada tänö cama ebä ca̦i lä cuo wei tä a̦ wäyäö cuaamaje. Jalili bä ca̦i jalomaö cuaaö showaomaje.

Bada tä Elode a bufi lä

wedinajamono wei tä a̦

7Jesús a lä cuaano wei, bada tä Elode ma cuinö tä a̦ ji̦lilema. Ai bä a̦ ja, a bufi ca̦i wedinajamoma. Fe ojomalewä Juan a ma shämono wei ma cui, ö̦jö a fa bufijenö, a wa̦ demi täo co̦omaje. 8Ai bä mö feduwä lä cuinö, Yai Bada a wa̦no jaba lä wäyäno wei, Elia a bufidaö mö fedulayomaje. Ai bä showawä lä cui, abinaja bä bufi cuma. “Yai Bada a wa̦no wäyälewä bä jaba lä cuono wei, ai a demi jocädou fa co̦onö, ö̦jö a jo̦wa”, bä bufi cuu mö feduoma.

9Abinaja Elode a cuma.

—Camiyänö Juan ya fe bäblamalema. Ei a wa̦fa bluca lä wäyälajei, ¿wedi bei a jo̦wa li majöwä? —a cuma.

Inaja a bufi cuma yalo, Jesús a möö bufi doblaoma.

Jesúsnö 5.000 bä

lä iyamaleno wei tä a̦

10Jesúsnö bä lä shömöleno wei bä co̦blou fa co̦lonö, bä lä cuaano wei tä a̦fa bluca wäyäö co̦ojolomaje. Ö̦jö däjä, Besaidateli bä ulifibö jamö bä yamili cuo balöobä, bä lululefälöma. 11Ö̦jö ma cui, bä lä co̦camono wei bänö, ö̦jamö bä a̦fa juu fa ji̦liläjenö, a nosi däbofälömaje. Jesús nijamö bä waloa fa jeicunö, bä dodijidawä walomaquema. Ö̦jö däjä, Yai Bada tänö cama ebä ca̦i lä cuo wei tä a̦ ja, bä bluca yömölama. Bä lä jaliliono wei bä ca̦i jalomama.

12Motoca a yajadodoaö däjä, Jesús nija cama 12 ebä fa icuicunö, abinaja a nowa tamaje.

—Fei bä bluca lä co̦camole bä shömöa da co̦lu, bä bälöblawä fe lä fa̦yoblai bä nija bä cuo fe jalubä. Ö̦jö bä nija bä nii luluabeje. ¿Ö̦jö tawä? Ei tä ulifi bloque malä cui —a nowa tamaje.

13Ö̦jö ma cui, Jesús a wa̦ läoma.

—Ma. Cafä wamacönö wama bä yai iyamabä.

Abinaja cama bä cuu nomöjöoma.

—Nii yama bä bluca luluadayou mlao däjä, ei yama bä bluca nia lä iyamaö wei tä cuami waiquiwä. Nii 5 yama bä wai tabou bädaa lä cule. Yuli bolacabö cäcö ca̦i —bä cuma.

14¿Ö̦jö tawä? Täbä malä blucaono wei. Wa̦lo bä shino jai 5.000 cuoma.

Cama ebä lä nocamabono wei bä nija bä loo toujamaö bufima.

—Jai 50 täbä bluca cudale, bä da loamaboduje —a cuma.

15Inaja bä cuaaö fa showadaonö, bä bluca loamabodayomaje. 16Ö̦jö däjä, nii 5 bä lä cuono wei bä dälema, yuli bolacabö cäcö ca̦i. Ö̦jö bä fa dälönö, fedu jamö a mö fa nonoicunö, bä nia lä iyano wei tä ja, Yai Bada nija a bufi a̦fa doblalou wäyämoma. Ö̦jö däjä, bä nii fa cälalönö, cama ebä lä nocamabono wei bä nija bä jöböquema, bä lä co̦camono wei bä nija bä jöböaö cuaaö nomöjöobeje.

17¿Ö̦jö tawä? Bä bluca fa iyaolalunö, bä bädöolaliyoma. Ö̦jö däjä, Jesús ebä lä cuinö bä nii sheje co̦a fa co̦abodujenö, wöö 12 bä jamö bä fe nii shee lajomalalemaje.

Pedronö Jesús a nö

yai lä ö̦jöböleno wei tä a̦

18Ai däjä, Yai Bada nija Jesús a no bayeli nacao däjä, cama ebä lä nocamabono wei ebä ca̦i yami culanö, bä wa̦lima.

—¿Wedinaja bei wale nofi jo̦wa yai li tabou dodijiaje? Camiyä ¿wedi bei ya jo̦wa?

19Abinaja ebä cuma.

—Fe ojomalewä Juan bei wa jo̦wa fa talei. Ai bä mö feduwä lä cuinö, Yai Bada a wa̦no wäyälewä Elia a cuo lä balöono wei, ö̦jö wa jo̦wa bufidaö talajei. Ai bä a̦ showawä ja, Yai Bada a wa̦no wäyälewä ai a demi jocädou fa co̦lonö, ö̦jö bei wa jo̦wa co̦dawä fa talei —bä cuma.

20Abinaja e cuma.

—Ö̦jö ma cui, cafä wamacö lä cuinö, ¿wedinaja bei wamale nofi li tabou dodijia cule? —a cuma.

Pedro a wa̦ juoma.

—Yai Bada tänö a shömabä a lä yaileno wei, ö̦jö cafä bei wa dodijiwä —bei e cuma.

21Ö̦jö ma cui, bä lä nocamabono wei bä a̦ wasöma. Bä nowa taö dodijioma, tä a̦ wäyäö showadao mlaobeje. 22Abinaja bä nowa tama.

—Camiyä ya lä yanowamöblaleyoluno wei ya lä cui, wale nö nia bleaamaöje. Judio bada bä ma cuinö, nofi bäyäalewä blowäjäwä bä ma cuinö, Moisesi tä a̦ ja täbä lä damaö wejei bä ma cuinö, ö̦jö bänö wale nö nia bleaamaö fe balojooje. Wale nia waiije. Ya nia shämou cadidio. Inaja ya taamamobä ya waiquiwä. Ö̦jö ma cui, bolacabö tä mö fa dödölönö, ya demi nia jocädou co̦o —bä nowa tama.

23Ö̦jö däjä, abinaja bä nowa bluca tama.

—Camiyä nija bä nia lä nocao wei bä lä cui, cama bä cuaaö bufi lä doblao wei tä ja, showadi bä nia yai wasöo. Wale bufiije yalo bä ma shäöje däjä, bä nia ojode cudio fe yadio. Bä nia nocao fe yadio. 24Bita ja bä nia demi lä cudio wei tä ja, bä bufi mö lä blucao wei bä lä cui, bä ba̦limi nia cuodayou malä mlai. Ö̦jö ma cui, camiyä ya nowa ja bä shämou lä ojodao wei bä lä cui, ö̦jö bä nia shino ba̦limi cuo ayao. 25Bita jamö bä madofi bluca lä cublai bä madofi ma däamou wei ma cui, bä nia yai lä ba̦limiblou wei tä joyamou dicoo ja, ¿wedi tänö bä yai nia li bayeliblamou majöo, ö̦jö lä?

26’¿Ö̦jö tawä? —a cuma—. Iba bä a̦fa jilamou quilii dicoo ja, inaja showawä camiyä ya nia quilii cuo mö feduo. Wale a̦fa ca̦i wäyäö quilii dicoo ja, inaja showawä camiyä ya lä yanowamöblaleyoluno wei ya ma cui, ya nia quilii cuo mö feduo. Ya shi̦i ca̦i itou lä co̦le däjä, camiyä ma cui, “Iba cäbä”, ya nia cuu quilii, Fayä etä shi̦i lä cule jamö a̦jele ya etäbä ca̦i itou däjä. 27Ö̦jö ma cui, cafä wamacö nija ei ya wa̦ lä cui, bejedi lä ya wa̦. Ai wamacö lä ublale wamacö nomaö showaono mlai ja, Yai Bada tänö cama ebä nia ca̦i lä cuo wei, wama tä nia dablaö.

Jesús wäyäcu mömou

lä shomiblaliyono wei tä a̦

28Ö̦jö tä a̦ wäyäö fa balöonö, jai 8 tä mö didi cublou fa co̦lonö, Jesúsnö cama ai ebä nacalema. Pedro, Juan, Santiago bä fa nacalänö, jefu a jamö bä ca̦i dolequebefälöma, Yai Bada nija a nö bayeli nacaojolayobä. 29A nö bayeli nacao däjä, Jesús wäyäcu mömou shomiblaliyoma. Camishi ecö ma cui, ecö shi̦i ca̦i wacalamiblaliyoma. 30Ö̦jö däjä, ai täcöbö fa bädalunö, Jesús sho bä a̦ wayoma. Moisesi, Elia sho cäcöbö cuoma. 31Yai Bada tä shi̦i lä cule ja cäcöbö fa wawäblalunö, Jesús a nia lä shämono wei tä a̦fa wayoamaje. Jelusale jamö Yai Bada tänö a shämaö lä bufino weinaja showawä.

32¿Ö̦jö tawä? Pedro sho bä lä cuono wei bä fa malishalönö, bä ma miqueno wei ma cui, bä la̦a fa co̦lunö, Jesús etä shi̦i lä doblale etä shi̦i dalalemaje. Jesús nija cäcöbö ublaa lä yädäono wei, cäcöbö ca̦i daa showadaalalemaje. 33Ö̦jö däjä, Jesús nija Moisesi, Elia sho cäcöbö mladou co̦fälöö däjä, Pedro a wa̦ fama.

—Tä a̦ wäyäle. Eja bämacö lä cule, tä dodijidawä waiquiwä. Yano 3 yama bä nia wai i̦tamaö, ¿ö̦jö tawä? Afä a, Moisesi e, Elia e, einaja yama bä nia wai yano tablaö, ¿ö̦jö tawä? —a cuma.

A bufi mlaö yalo, a wa̦ biyäcou bädaoma. 34A wa̦ faö showai ja, ölajashi a bada fa itolunö, bä jo̦yablalema. Ö̦jamö bä fe fa̦yoblou ja, bä quililaliyoma. 35Ö̦jö däjä, ölajashi jamö culanö a wa̦ bädaliyoma.

—Ei Ijiluyä a, ya lä yaileno wei. A wa̦ da ji̦liläje —a cuma.

36A wa̦ faö fa waiquidalunö, Jesús a yami ublaa daa co̦a majölalemaje.

¿Ö̦jö tawä? Mamicai bä cudio balöoma. Tä lä möno wejei tä lä cui, moli a ma cui nija tä a̦fa wäaö jaöonomije.

Fiya a nija Jesúsnö

fecula a lä yashuleno wei tä a̦

37Ö̦jö tä fena ja, jefu a jamö bä dömöa fa co̦balufälönö, bä bluca lä co̦camono wei bänö Jesús a mö bamalemaje. 38Bä lä co̦camono wei bä nija ai a wa̦lo lä ublaono wei, Jesús nija a wa̦ i̦cali fama.

—¡Tä a̦ wäyäle! Ei iba ijiluyä a nofi da ojodadalö, ¿ö̦jö tawä? A malä moli wei. 39Fecula anö a nabä fa queicunö, a si̦lalamou. A shi fa wa̦limalönö, a i̦cali yabolemou. Inaja a fa cuaadinö, showadi caficö moshi boyacaoblou. Ya̦cumö a nö shälebö. A yabäcaö mladoimi. 40Afä wa bä lä nocamabole bä nija ya wa̦ fe blacäjoma ma cui, a yashublaö doblonomije —a cuma.

41Abinaja Jesús e cuma.

—¡Uo! Äyämö ya nö dedeaö ma waiquile, Yai Bada wama tä nofi nö mölabobimi waiquiwä. Bejedi lä, wamacö dobloimi. Wama tä nofi mölabou shaliliobä bämacö nö dabou ja, ya modaaö waiquiwä. Bei. Bä ijilubö e da bälabayoje —e cuma.

42Bä ijilubö e blacäö däjä, feculanö a fa shäyäblacönö, a i̦cali yabolemolayoma. Ö̦jö ma cui, Jesúsnö fecula e bälöo fa wasönö, e faa co̦a showadalayofälöma. A fiya fa jalomalönö, bä fö̦ö nija a demi icua co̦maquema. 43Yai Bada a nö Bada lojode lä quiliaö wei tä fa damolalunö, bä bufi bluca shädayaimoa fe balojolayoma.

Jesús a nia lä shämono wei tä a̦

Ö̦jö ma cui, Jesús a lä cuaano wei tä ja, bä bufi bluca shädayaimou showao däjä, cama ebä lä nocamabono wei bä nija abinaja a cuma.

44—Ei ya wa̦ lä fale, wamale a̦ ji̦liaö buo mlai ja, bei wamacö bufinö tä a̦ yai däa da cadidilöje. Ya lä yanowamöblaleyoluno wei ya lä cui, yanowamö täbä nija ya nia jöböamou —a cuma.

45Ö̦jö ma cui, cama a wa̦fa lä wäamono wei a wa̦ ji̦lia möblanomije. Yai Bada tänö tä a̦ nofi mojodumaboma, bä bufi jaducublou mlaobä. Tä a̦ ca̦i wa̦lii quilimaje.

Cama bä bada cuo

bufi lä doblaono wei tä a̦

46Jesús nija bä lä nocaono wei, “Camiyä ya yai bada cuobä”, bä nowa bluca tayou ja, bä a̦fa tayoa dicolayoma. 47Jesúsnö bä bufi daö fa waiquionö, ijilu a fa dälänö, a ublaa ajedemaquema. 48Ö̦jö däjä, abinaja bä nowa tama.

—Ei ijilu a lä cui, a shomi ma cui, camiyä ya wa̦nö a wai nofimaö fe yadioje ja, camiyä ma cui wale nofimaö mö feduoje. Inaja showawä, camiyä wale nofimaöje ja, wale lä shömöleno wei a ma cui, ö̦jö a nofimaö mö feduo showaoje. ¿Ö̦jö tawä? Cafä wamacö nijamö a jömöo lä mlai a lä cui, a nofi bada tabou lä mlajei, ö̦jö a lä cui, Yai Bada tänö bada bei a nofi shino yai tabou.

49Jesús nija Juan a wa̦ fama.

—Bada tä. Ai a lä cuinö, cafä wa wa̦ ja fecula bä yashuu. Yama a dalalema. Camiyä bämacö nija a yädäo bufiomi yalo, yama a wasöblalema, ¿ö̦jö tawä?

50Ö̦jö ma cui, abinaja Jesúsnö a nowa tama.

—A wasö dijejä. Cafä wamacö nija bä a̦ läblou dao lä mlai bä lä cui, wamacö a̦ bayeliblabeje bä li waiquiwä malä cui—a cuma.

Samaliateli ai bänö

Jesús a lä waileno wejei tä a̦

51Fedu jamö Jesús a nia lä co̦amou wei etä ajedou waiquioma yalo, a bufi cadidilanö Jelusale jamö a aa shalililayoma. 52Cama a wa̦no taö balöodayobeje, bä shömöa balölema.

Samalia tä ulifi jamö, ai bä shabonobö jamö bä fa waloicunö, Jesús dodijidawä a waloamabeje bä a̦ faö balöodayoma. 53Ö̦jö ma cui, Jelusale jamö a cadidou waiquioma yalo, a bälömabou bufionomije. 54Ö̦jö tä fa dabölalönö, Jesúsnö bä lä nocamabono wei ai cäcöbö a̦ fama, Santiago, Juan cäcöbö lä cui. Abinaja Jesús a nowa taböma.

—Bada tä. Fedu jamö cowa wacö lä culadi, ¿yama wacöbä blälämabä tawä? Ei bä waicaö showadaobä —a nowa taböma.

55Ö̦jö ma cui, Jesús a mö fa yabadalunö cäcöbö a̦ wasölema. 56Bä jayuaö fa showadaicufälönö, ai a shabono jamö bä waloa majöquema.

Jesús nija bä lä nocao wei

tä nowa nia lä cuono wei tä a̦

57Bä jufälöbä jamö, Jesús nija abinaja ai a cuma.

—Wa juu lä bädao wei jamö ma cui, ö̦jamö ya nia nocao —a cuma.

58Abinaja Jesús e cuu mö feduoma.

—A möla dijä, ya yafibö cuami. Yalo bä bäcabö cublawä. Biyomö bä ma cui, bä yabäcabö cublawä mö feduwä. Ö̦jö ma cui, camiyä ya lä yanowamöblaleyoluno wei ya lä cui, ya yanobö cuami —e cuma.

59Ai a nija abinaja Jesús a cuma.

—Camiyä nija a da nocaiquiyo —a cuma.

Ö̦jö ma cui, abinaja a cuu mö feduoma.

—Bada tä. Fayä a lä ujudule etä cublou däjä, ya nomawä didiaö balöobä, ¿ö̦jö tawä? —a cuma.

60Ö̦jö ma cui, abinaja Jesúsnö a nowa tama.

—Bufi nomawä cama bä li nomawä didiayobä. Cafä a da alufälö. Yai Bada tänö cama ebä ca̦i lä cuo wei tä a̦ da wäyädu —a nowa tama.

61Abinaja ai a ca̦i cuma.

—Bada tä. ¡Camiyä ca̦i! Cafä nija ya nia nocao. Iba yafi jamö, ya nia lä juu wei ya tä a̦fa wäyäö balöojolayou —a cuma.

62Abinaja Jesúsnö a nowa tama.

—Ficali täca jamö a nia ma ojodamou wei ma cui, a bufi shaliliomi dicowä ja, a nia dobloimi. Inaja bä bufi lä jujeblou wei bä lä cui, Yai Bada tänö cama ebä ca̦i nia lä cuo wei tä a̦ wäyäbeje jamö, ö̦jö bä yädäobä bämi—a nowa tama.

Currently Selected:

Lucas 9: GUU

Highlight

Copy