Lucas 10

Jesúsnö bluca bä

shömaö lä nomöjöono wei tä a̦

1Ö̦jö tä cublou fa waiquilonö, Bada tä nia lä juno wei jamö a wa̦no taö balöodayobeje, 70 ai bä yaia nomöjömaquema. Bluca bä lä bälöblai bä nijamö, cama a nia waloadalou lä cuaaö wei jamö, bolacabö bä cudawä bä shömöa balöabodayoma. 2Ö̦jö däjä, ö̦jö bä nija abinaja a cuu yaclämoma.

—Wale nia lä bufiblaö wejei bä bluca cublawä. Nii bä tamobä bä bada lä waiquiinaja bä cuwä ma cui, bä nii nia lä taö wejei, bä bolacami dicowä. Wale nofi mölabobeje, ¿wedi bänö bä nia li yömölaöje? Yai Bada tä nija bä a̦ da fa, ö̦jö lä. Cama etäca ficali lä cule, a Bada lä cui nija wamacö a̦ fa fanö, bä ojodamobä ö̦jönö bä yai shömabä.

3’Bei —a cuma—. Bä da alufälö. Bämacö shömaö lä cule. Ji̦ima bä waiteli lä läle jamö, oweja bä ocalo shäablamou si ijejewä lä cuo weinaja, wamacö nia cuo. 4Blada wama bä nia besiboimi. Afä wama täbä didibofälöbä tä ma cui, ö̦jö wama täbä ca̦i nia däafälöimi. Wamacö mamicö didio nomöjöobä täcö ma cui, wama täcö nia bolacafälöimi. Bei yo jamö, wama bä a̦ wayomaö mlai, wamacö nia jayuo showadao.

5’Wamacö yafii cuaabä jamö, Yai Bada nija, ö̦jamö bä lä bälöle wama bä nia bayelimaö showadao, bä bufi ca̦i yanöcöwä cuobä —a cuma—. 6Ö̦jamö bä ca̦i lä culenö dodijidawä wamacö waloamaö ja, Yai Bada tänö a bufi nia yai yanöcömabou. Ö̦jö ma cui, dodijidawä wamacö waloamaimi dicoo ja, a nia bayeliblamoimi. A bufi yanöcömabobä ami.

7’Wamacö shifilimou mlai ja, wamacö lä cuo wei jamö bä da yanöcöicu, ö̦jö bä nija wamacö nö liyobä. ¿Ö̦jö tawä? Shinoco täbä ma juu wei ma cui, bä ojodamou yalo, bä dobäbeje bä li waiquiwä malä cui. Ai täbä yafibö jamö, wamacö nia bälöadalou cuaaimi.

8’Wamacö juu cuaabä jamö, ai a shabono jamö dodijidawä wamacö waloamaöje ja, ö̦jamö wamacö niibö lä baaö wejei bä ja, bä da iya —a cuma—. 9Ö̦jamö bä lä jalili wei bä da jalomaje. Abinaja bä nowa da taje. “Yai Bada tänö cama ebä nia ca̦i lä cuo wei, cafä wamacö nija tä ajedou waiquia”, wama bä nowa tabä.

10’¿Ö̦jö tawä? Ö̦jö ma cui, ai a shabono jamö dodijidawä wamacö waloamaimije ja, cama bä lä juu wei jamö, wawädowä wama bä nowa taö ja, abinaja wamacö nia cuu. 11“Afä shabono jamö bä libu libu lä jilai, bei yamacö mamicö jamö bä lä jeicufe, yama bä yaösöblaö lä cule, bämacö dobloimi jömabä. Ö̦jö ma cui, wamalecö a̦ da ji̦lilä. Yai Bada tänö cama ebä ca̦i nia lä cuo wei, tä ajedou waiquia lä cule”, wamacö nia cuu. Einaja wama bä nowa taö fe yadiobä.

12’Bämacö nowa taö lä cule —a cuma—. Yai Bada tänö täbä jömabä etä cublou däjä, Sodomateli bä nö nia ma bleaaö wei ma cui, ö̦jö lä bä nö nia shino yai bleaaö dodijio —Jesús a cuma.

Ai täbä shabonobö jamö

bä bufi lädono lä mlai tä a̦

13Ö̦jö däjä, Jesúsnö ai bä lä bälöblai bä nowa blajawä tama.

—Colasiniteli wamacö, Besaidateli wamacö, wamacö nö bleaaö fe balojoobä wamacö. Yai Bada wama a lojode dablabä, cafä wamacö nijamö tä nö lä quilijii bluca ya tä wawämama. Diloteli bä nijamö inaja ya cuaaö mö feduo fa cunoja, Sidonoteli bä nijamö ya inaja cuaaö mö feduo fa cunoja, wa̦lidiwä tä ja, yedu bä bufi nö lädaliobö wei. Bä doblou lä mlai tä ja, yubu ushibö ja yedu bä nö looquebö wei. Camishi a̦loqui bä ja yedu bä nö didiobö wei, bä bufi nö wa̦lidiwä ö̦jöböamobä.

14’Yai Bada tänö täbä obi nia lä jömadayou wei jamö, Diloteli bä nö nia ma bleaaö wei ma cui, Sidonoteli bä nö ca̦i nia ma bleaaö wei ma cui, cafä bei wamacö nö nia shino yai bleaaö fe balojoo.

15’Cabenaoteli wamacö —a cuu nomöjöoma—. ¿Fedu jamö Yai Bada tänö cafä dodijidawä wamacö nia tabodayou daanö? Mlaicätä. Bä lä nomaö wei bä cuobä jamö, wamacö nia shäyäjäabodayou, täca nö quiliwä lä cubodi jamö —a cuma.

16Ö̦jö däjä, abinaja Jesús a cuma, cama ebä lä nocamabono wei bä nija.

—Cafä wamacö a̦ ji̦liaöje ja, camiyä ma cui wale a̦ ji̦liaö mö feduoje. Wamacö a̦ waii dicooje ja, camiyä ma cui wale a̦ waii mö feduoje. Inaja showawä, camiyä wale a̦ lä waii wejei bä lä cuinö, wale lä shömöleno wei a ma cui, ö̦jö a wa̦ waii mö feduoje —a cuma.

Cama 70 ebä bufi doblalou

ca̦i co̦blou lä co̦layono wei tä a̦

17Jesúsnö 70 ebä lä shömöleno wei bä lä cui, bufi doblalolanö bä waloa coquema. Abinaja Jesús nija bä cuu co̦ojoloma.

—Bada tä. Cafä wa wa̦nö fecula yama bä yashublamaö däjä, ö̦jö bä ma cuinö yamalecö a̦ juaöje —bä cuma.

18Abinaja Jesús a cuu nomöjöoma.

—Bejedi lä. Sadanasi a lä ujudulayono wei däjä, fedu jamö ya quei dalalema, madula a wacö quei lä culenaja showawä. 19¿Ö̦jö tawä? Wamacö nö wa̦lojabä, bämacö tablamaö waiquilayoma. Olu wama bä ma cadädäablaö wei ma cui, sufi wama bä ma cadädäablaö wei ma cui, wamacö nö nia bleaaimi. A nö lä nabämou wei a fecula bada lä cui, ö̦jö a ma ishou däjä ma cui, wamacö nö nia wa̦lojaö fe yadio. Ai tä bädawä ma cui ja, wamacö nia famiimi. 20Ö̦jö ma cui, fecula bänö wamacö a̦ lä juaö wejei tä ja, bä bufi doblalo fe balojoo dijä. Fedu jamö, Yai Bada tänö wamacö a̦fa lä oniboladi tä ja, ö̦jö tä ja bä bufi shino yai da doblalo —bä nowa tama.

Bufi doblalolanö Yai Bada

nija Jesús a wa̦ lä fano wei tä a̦

21Ö̦jö däjä, Yai Bada tä Bufinö Jesús a bufi doblamabou fe fa balojoonö, bä Fö̦ö nija a wa̦ fama.

—Fabe. Fedu jamö ma cui, bita jamö ma cui, cafä lä wa shino Bada cua ayaa. Ei ya tä a̦ lä wäyäfe, bä bufi a̦fa moyawä lä taö wejei bä nija wa tä a̦ nofi mojodumabou. Bä bufi a̦fa dao lä taö wejei bä ma cui nija inaja showawä. Inaja ö̦jö wa bä ma taamabou däjä ma cui, jai ijilu bä lä cule bä nija wa tä a̦ yai wawäblamalema. Awei, Fabe. No mlai ja inaja wa bä taamaö bufi malä doblaono wei.

22’¿Ö̦jö tawä? —a cuu nomöjöoma—. Jödödöwä täbä nija ya Bada läobä, Fayänö wale tablamalema. ¿Ö̦jö tawä? Yanowamö täbänö wale daimije. Fayä a lä culadinö, bä Ijilubö ya e lä cui, wale shino daö ayawä. Inaja showawä, Fayä a daö ma mlajei ma cui, camiyä bä Ijilubö ya enö, ya shino daö ayawä. Fayä ya dablamaö bufi lä doblao wei bä lä cui nija ya fa damalalönö, ö̦jö bä ma cuinö a daö mö feduaje —a cuma.

23Ö̦jö däjä, cama ebä lä nocamabono wei bä nija a mö fa yaiblalunö, wajado bä yömölama.

—Cafä wamacö lä cuinö, ei däjä tä lä cuaale wama tä fa mönö, wamacö bufi yai möblou yalo, wamacö bufi yai doblalobä wamacö. 24Bämacö nowa malä tale. Yai Bada a wa̦no wäyälewä bä cuo lä balöono wei bä bluca ma cuinö, bä bälöo lä dodijiono wei bä bada ma cuinö, fei däjä wama tä lä möö wei, tä möö bufi ma doblaono wejei ma cui, tä mönomije. Wama tä a̦ lä ji̦liaö wei, tä a̦ ca̦i ji̦liaö bufi ma doblaono wejei ma cui, tä a̦ ji̦lianomije —Jesús a cuma.

Samaliateli a lä

dodijano wei tä a̦

25Ö̦jö däjä, Moisesi tä a̦ yai lä daö wei ai a fa ublaiquiyonö, Jesús a wa̦ bejedi wabama.

—Tä a̦ wäyäle. ¿Wedinaja ya yai fa cuaanö, ya li ba̦limi bälöquedayou?

26Abinaja Jesús e cuma.

—Ja̦o. Moisesi esibä oni jamö, ¿wedinaja tä a̦ oni cuu, ö̦jö lä? ¿Wedinaja bämalecö taamabä tä a̦ li? Wa bufi lä cuu wei tä a̦ da wäba —a cuma.

27Abinaja e cuu mö feduoma.

—Abinaja tä a̦ oni cuu.

Bada wama tä yai nia nofimaö, cafä wamacö nija a bufiblamobä a lä cui. Bufi jaduculanö wama a nia nofimaö, bei wamacö bufi yainö. Wamacö bufi lä cuaablalou wei tä ma cuinö, wamacö nö lä wa̦lojoablalou wei tä ma cuinö, wama a nia ca̦i nofimaö fe balojoo. Aifä bä ma cui, cafä wamacö nofi jo̦lio lä culenaja, inaja showawä aifä wama bä nofi tabolanö, wama bä nia ca̦i nofimaö.

’Einaja tä a̦ oni cuu —Jesús nija a cuma.

28—Ja̦o. Wa wa̦ cadidou —Jesús a cuma—. Inaja wa cuaaö ja, wa ba̦limi bälöaledayou —a nowa tama.

29Ö̦jö ma cui, dodijidawä a nia dablamou fe fa yadionö, abinaja a cuu dicooma.

—Ö̦jö ma cui, iba aiyä a jo̦wa nofimamaö lä bufino wei, ¿wedi jamö bei a, ya nofimabä? —a cuma.

30Jesús abinaja e cuma.

—Wale a̦ da ji̦lilä, ö̦jö lä, wa bufi jaducublobä. Jelusale jamö a culanö, Jelicoteli bä nijamö ai a alayoma. A jufälöö däjä, tomömolewä bänö a nabä quea mö baquemaje. Camishi ebä jayualalemaje. A famimaö fe fa balojoojenö, shinoco a jalili daquefälömaje.

31’¿Ö̦jö tawä? Ö̦jö däjä, a jalili blaobä yo jamö, nofi bäyäalewä a juu fa bädaofälönö, a blaa dalalema. A dablaö däjä, a ja̦loa dicoquefälöma. 32Inaja showawä, ö̦jamö Lewi nodiwä a juu fa jeimanö, a jalili daa nomöjöaleyoluma. A dablaö däjä, inaja showawä, a ja̦loa cua nomöjöquema.

33’Ö̦jö ma cui, Samaliateli a juu fa nomöjöoimanö, a jalili blaobä jamö a waloa jäa majöqueyoluma —a cuma—. A jalili dablaö däjä, shomiteli a ma cuinö a nofi ojodadaö showadalayoma. 34A fa icuicunö, dabö dabö ubänö a jalili fä̦lömaö fa showadaonö, nashiwä toubänö nini nini ebä fe lölalema. Acadafu cäcönö ebä o̦caaquema. Ö̦jö däjä, cama yalo e ji̦ima jamö a maquequema. A befi ca̦i fa lululäfälönö, fama bä waloblaabä yafi jamö a fa bälacönö, a bayeliblalema.

35’Ö̦jö tä fena ja, blada 2 cäcöbö fa dälönö, cama e yafi lä cui nija cäcöbö jöböquema. Abinaja a nowa tama. “Jalili a nofi taa da jäcö”, a nowa tama. “Wa bayeliblabä ai wa bä blada joyaö bädao ja, ya jayuaö co̦lanö ya tä nowa co̦amaö wä”, a nowa tama. ¿Ö̦jö tawä?

36’Ja̦o —a cuma—. Fei däjä ¿cafä wedinaja wa bufi cuu? Tomömolewä bänö a nabä fa queicujenö, a famimalemaje. A jalili blaobä jamö 3 bä waloa jequema. ¿Wedi jamö a lä cuinö a nofi yai tadalema? —Jesús a cuma.

37—A nofi lä ojodadaleno wei a lä cuinö —a cuma.

—Inaja cafä wa ca̦i cuaaö mö feduobä —Jesúsnö a nowa tama.

María, Marta sho cäcöbö

fe lä waloleno wei tä a̦

38Jelusale jamö, Jesúsnö cama ebä cai̦ juu co̦fälöbä jamö, ai a shabono jamö bä ca̦i yafilayoma. Ö̦jöteliyoma a Marta lä cuinö, cama e yafi jamö a nacalema. 39Bä fääshä María e a̦fa lä culenö, Bada tä cotä jamö a fa loicunö, tä a̦ lä wäyäno wei tä a̦ ji̦liama. 40Ö̦jö ma cui, fama bä nia fa iyamanö, nii bä ja Marta a li yabäcou dicooma. Jesús nija a fa icuicunö, abinaja a nowa tama.

—Bada tä. Fääshäyänö wale daa fa dicocönö, yami ya ojodamou dicoa lä cule. “Inaja waiquiwä buo”, ¿bei wa bufi cuu daanö? Wale bayeliblamaö da bufi, ö̦jö lä.

41Ö̦jö ma cui, abinaja Bada tänö a nowa tama.

—Ami, Marta. Wa bufi nofi jushublaa dicoa. Bluca täbä ja wa yabäcäablalou dicoa. 42Tä yai lä dodijidai, moli tä cua. Maríanö ö̦jö tä yaia waiquilema. Ya wa̦ nia lämoimi —a cuma.

Currently Selected:

Lucas 10: GUU

Highlight

Copy