Juan 9

Jubäbö a mamocu lä

dodijidablaleno wei tä a̦

1Jesús a jayualanö jubäbö tä dalalema, jubäbö showadawä a oshe lä tablaleno wei a lä cui. 2Cama ebä lä nocamabono wei bänö a wa̦liije ja, abinaja bä cuma.

—Tä a̦ wäyäle. Ei a lä cui, ¿wedi mayo ja, a li jubäböblaliyoma? Cama a doblou lä mlai tä nowanö, ¿inaja a li tablamolayoma daanö? Ma, bä nöö, bä fö̦ö, ¿ö̦jö lä cäcöbö mayonö a jubäbö tawä? —bä cuma.

3Abinaja Jesúsnö bä nowa tama.

—Ma. Fei a lä jubäbö wei, cama etä nowanö mlai. Bä nöö e ma cui, bä fö̦ö e ma cui, ö̦jö cäcöbö mayonö ca̦i mlai. Cama nija Yai Bada etä lojode nia yai fa dablamonö, ö̦jö a waiquiwä. 4Wale lä shömöleno wei a lä cuinö tä tamaö lä bufii wei bäma tä taö showadaobä cätä, tä wacacawä lä showai däjä. Tä mö fa dödölönö, täbä ojodamou daomi. 5Eja, ei ya cua lä showale däjä, yanowamö ya täbä wacacamabobä ya shi̦i —bä nowa tama.

6Einaja a cuolanö, mashita jamö tä fa cläshäcönö, bei canojoli bänö tä a̦jiblamalema. Inaja a fa tablalönö, a̦ji a̦ji cäcönö, jubäbö a lä cui mamo casöcö ya̦leblalema. 7Abinaja a nowa taö showadaoma.

—Siloe uca jamö, a mö da ya̦lömolöcölö —a nowa tama.

¿Ö̦jö tawä? Siloe tä a̦ lä cui, “Shömano”, tä a̦ li cuu.

Bei. Einaja Jesúsnö a nowa tama yalo, a mö ya̦lömobä a ayoma. A mö fa ya̦lömolönö, a lä co̦layou wei, tä möablalaö cuaalanö a co̦layofälöma.

8A lä jubäböono wei nija bä bälöo lä ajedeono wei bä lä cui, bä bufi wedinajamoma. A jubäbö nacou ja, imicö dodoablalou lä läaano wei a lä möno wejei bä lä cui, inaja showawä bä bufi wedinajamou ca̦i cuo mö feduoma. Abinaja bä cuma.

—Quijamö a lolanö, imicö dodoablalou da läodiblei, ¡fei a nofi lä cui! —bä cuma.

9—Awei. Ö̦jö lä a —ai bä cuma.

—Ma —ai bä cuu mö feduoma—. Ö̦jö a mö li owäbou bäa lä cule.

A lä jubäböono wei a lä cui, abinaja cama a cuma.

—Ö̦jö lä ya —a cuma.

10Abinaja bä cuma.

—Ja̦o. Ö̦jö lä wa ja lä, ¿wedinaja wa mamocu li jaloa cua bälayoma? —bä cuma.

11Abinaja a cuma.

—Jesús a wa̦fa lä culenö, a̦ji a̦ji cäcönö wale mamo casöcö fa ya̦lelönö, Siloe uca jamö wale shömölema, ya mö ya̦lömobä. Ö̦jö cudeenö, ya julayoma. Ya mö fa ya̦lömolönö, bei ya mamocu yai jalolayou cublei —a cuma.

12—Ö̦jö a lä cui, ¿wedi jamö a li culayou cufe? —bä cuma.

—Cuwi —a cuma.

13Ö̦jö däjä, a lä jubäböono wei a lä cui, faliseo bä bada nija a ca̦i jumaje. 14¿Ö̦jö tawä? Jesúsnö a̦ji a̦ji lä tablaleno wei, mamocu ca̦i lä jalomaleno wei tä lä cui, täbä yanöcöobä tä mö jalu jamö tä tama. 15Mamocu lä jalomaleno wei tä ja, faliseo bä badanö a wa̦lii co̦omaje. A wa̦liije ja, abinaja bä nowa tama.

—A̦ji a̦ji cäcönö wale mamo casöcö fa ya̦lelönö, ya mö ya̦lömoa fa majölönö, ya täbä möö lä cule —bä nowa tama.

16Faliseo ai bä bada lä cui, abinaja bä cuma.

—Ma. Ei a lä jalomalöfe, Yai Bada tänö a shömanomi. Täbä yanöcöobä, tä mö jalu nofi cadidibou malä mlai —bä cuma.

Ö̦jö ma cui, abinaja ai bä cuu mö feduoma.

—Wa̦lidiwä talewä a cuo fa cunoja, tä nö lä quilijii tä lä wawämafenaja, a nö cuaaö fe balojoobö mlai —bä cuu mö feduoma.

Einaja bä bluca cuu majöadalou ja, bä bufi shedequeblaliyoma. 17Ö̦jö däjä, a lä jubäböono wei nija Jesús a wa̦lii cadidiomaje.

—Cafä wa mamocu lä jalolayono wei wanö, ¿wedinaja cafänö wa nofi li tabou? —bä cuma.

—“Yai Bada a wa̦no wäyälewä, ö̦jö a”, ya nofi tabou —a cuma.

18A mamocu lä jalolayono wei, a jaba daö fa mlacujenö, judio bänö a wa̦ bejedi bufii jaöonomije. “A ma jubäböono wei ma cui, mamocu jalomalema”, a nofi tabonomije. Ö̦jö cudeenö, bei bä nöö e sho, bei bä fö̦ö e sho cäcöbö nacamaje. 19Cäcöbö wa̦liije ja, abinaja bä cuma.

—¿Ei ijilufä a tawä, jubäbö showadawä wafä a jo̦wa lä tano wei a lä cui? ¿Wedinaja a li fa cublalunö, täbä li möö majöwä? —bä cuma.

20Bä nöö e, bä fö̦ö e sho, abinaja cäcöbö cuma.

—Ei ijiluyä a. Yafä a daö. Jubäbö showadawä yafä a lä tano wei, yafä tä ca̦i daö. 21Ö̦jö ma cui, fei däjä täbä möö lä nomöjöo wei, yafä tä daimi. Mamocu lä jalomaleno wei a ma cui, ö̦jö yafä a daimi. Ijiluyä a bada malä waiquii, cama a da wa̦lije. Cama a wa̦ nö wäobä a —cäcöbö cuma.

22Judio bä nija cäcöbö quilima yalo cäcöbö a̦ li cuoma. ¿Ö̦jö tawä? Judio bada bä a̦ wayou malä waiquiono wei. “Yai Bada tänö a shömabä a lä yaileno wei, ö̦jö Jesús a waiquiwä”, wawädowä bä lä cuu wei, bä nia joyamaje. Judio bä yododabä yafi jamö, bä nia coyocomabou co̦daanomije. 23Ö̦jö cudeenö, bä nöö e ma cui, bä fö̦ö e ma cui, cäcöbö a̦ cuoma. “A bada malä waiquii, cama a da wa̦lije”, cäcöbö lä cuno wei.

24Einaja cäcöbö cuma yalo, a lä jubäböono wei a nacaö co̦omaje. Abinaja a nowa tamaje.

—Yai Bada tä nofi shino yai da doabla. Wa mamocu lä jalomaleno wei, yama a dobloimi daö waiquiwä —bä cuma.

25Abinaja e cuu mö feduoma.

—Cuwi. Ö̦jö a doblou lä mlai ya etä daimi. Ya lä jalolayono wei ya tä shino yai daö. Ya ma jubäböono wei ma cui, fei däjä ya täbä dablaö —e cuma.

26A wa̦lii co̦oje ja, abinaja bä cuma.

—¿Wedinaja wa li fa taamanö, wa li jalolayoma? ¿Wedinaja a fa cuaanö, wa mamocu li wacacablamalema? —bä cuma.

27Abinaja e cuma.

—Uo. Bämacö yömölaö ma waiquiono wei ma cui, wamale a̦ ji̦lianomi. ¿Wedi tä tabä, wamale a̦ ji̦liaö bufi doblao co̦o? Ja̦o. Cafä wamacö ma cui, ö̦jö nija wamacö nocaobä, ¿bei wamale wa̦lii co̦o daanö? —e cuma.

28A wa̦ lafujalajenö, abinaja a nowa tamaje.

—Ö̦jö nija wa nocaobä, cafä wa. Camiyä yamacö lä cui, Moisesi nija yamacö nia lä nocao wei yamacö li cua waiquia. 29Moisesi nija Yai Bada tä a̦ lä fano wei, yama tä daö ma cui, fei a lä cui, a jaba lä cuono wei yama etä daimi.

30A mamocu lä jalolayono wei a lä cuinö abinaja bä nowa tama.

—¡Shädayai! A jaba lä cuono wei wama etä daö ma mlai ma cui, ¡wale mamocu nofi lä jalomaleno wei! 31Yai Bada tänö wa̦lidiwä talewä bä a̦ ji̦liaimi. Ö̦jö bäma tä daö. Yai Bada nija bä möfe bolanö, a wa̦fa Bada doblao lä taö wejei bä lä cui, ö̦jö bä a̦ shino ji̦liaö ayao, tä tamaö lä bufii wei tä ja, bä lä cadidou wei bä lä cui. 32Bita jamö täbä yanowamö lä bälöle, yedu ja täbä jaba ma bälöaliyono wei ma cui, camiyä wale lä taamano weinaja, moli ma cui, tä a̦ ca̦i jaba ji̦limou buonomi. Fei däjä ma cui, tä a̦ ji̦limamoimi showawä. Jubäbö showadawä bä lä tablamou wei bä lä cui, bä mamocu nö dodijidablobimi waiquiwä. 33Fei a lä cui, Yai Bada tänö a shömaö mlao fa cunoja, a nö cuaabö mlai —bä nowa tama.

34Abinaja a nowa tamaje.

—Cafä wa̦lidiwä talewä wa oshe fa cublalunö, wa cua lä showale wa lä cuinö, ¿camiyä wamalecö nia damaö majöo daanö? —a nowa talajenö, sibo jamö i̦cali a jilululemaje.

Jai jubäbö bä bufi

lä cuwä wei tä a̦

35Mamocu lä jalolayono wei, Jesúsnö a wa̦fa jilulamou ji̦lilema. Ö̦jö däjä, a fa dayäblalönö, abinaja e cuma.

—A lä yanowamöblaleyoluno wei a lä cui, cafänö ¿wa wa̦ bejedi bufii cule? —e cuma.

36—Bada tä. ¿Wedi jamö a lä cui, bei a yanowamöblaliyoma, ya wa̦ bejedi bufibä? —a cuma.

37—Fei ya lä yanowamöblaleyoluno wei, wale möö a lä cule —Jesús e cuma—. Cafä nija ya wa̦ lä fale, ö̦jö ya waiquiwä.

38—Bada tä. Cafä bäfä a̦ bejedi bufii lä cule —e fa cudalunö, a möfe bodou fa showadalonö, a wa̦fa Bada doblao tama.

39Jesús abinaja e cuma.

—Täbä dobloimi jömamobä, eja, bita jamö ya waloqueyoluma. ¿Ö̦jö tawä? Täbä lä jubäbö wei bänö tä möbeje, ya juma. Bä mamocu a̦fa dodijidawä waiquiwä lä tamou wei bä lä cui, jai jubäbö bä cuo mö feduobä —e cuma.

40Faliseo ai bä lä ajedeono wei bä bada lä cui, ö̦jö a wa̦ fa ji̦liläjenö, abinaja bä cuma.

—Camiyä yamacö ma cui, ¿yamalecö a̦fa ca̦i möbloimi taö mada tawä? —bä cuma.

41Ö̦jö bä nija abinaja Jesús a cuma.

—Wamacö mamocu a̦fa wa̦lidiwä tamou showadao fa cunoja, afä tä nowa nö cuobö mlai. Täbä lä jubäbö wei, täbä shino bayeliblamou malä cui. Ö̦jö ma cui, “Yama tä dodijidawä möö waiquia lä cule”, wamacö cuu dicoo ja, afä tä nowa cua showaa.

Currently Selected:

Juan 9: GUU

Highlight

Copy