Juan 8

1Ö̦jö bä bluca fa co̦obomobodunö, Oliba tä balöcö jamö, Jesús a li juma.

A joleblalobä jamö a

suwä lä juwäleno wejei tä a̦

2Tä mö jaluaimaö däjä, Yai Bada etä yafi jamö Jesús a jua fenaa fa co̦lunö, ö̦jö nija bluca täbä co̦camou fenao co̦oyoluma. A fa loicunö, tä a̦ wäyäö co̦oma.

3Ö̦jö däjä, a joleblalobä jamö a suwä fa dalalöjenö, bada bä lija a juwämalemaje. A fa juwämalöjenö a ca̦i waloquemaje. Moisesi tä a̦ ja täbä lä damaö wejei bä ma cuinö, faliseo bä bada ma cuinö, ö̦jö bänö a suwä ca̦i fa jujenö, a möamoblamalemaje. 4Abinaja Jesús nija bä cuma.

—Tä a̦ wäyäle. Ei a suwä joleblalobä jamö a dalalemaje, cäcöbö yacao däjä. 5¿Ö̦jö tawä? Inaja bä lä cuaaö wei bä lä cui, Moisesinö bä yai shämaö bufima, maa mabänö. Inaja tä a̦ oni malä cuu wei. ¿Wedinaja cafänö wa nofi yai tabou? —a nowa tamaje.

6¿Ö̦jö tawä? Jesús a nia fa wabajenö bä a̦ li cuoma, Moisesi etä a̦ ja a wa̦ shominajaaö ja, a wa̦fa dobloimi tabeje. Jesús a lolanö, bei iminö, coshi coshi bä jamö tä a̦ onimama. 7A wa̦lidiije ja, a ubladaliyoma. A fa ubladalunö, abinaja bä nowa tama.

—Ja̦o, ö̦jö lä. Cafä ai wa lä cuinö, wa̦lidiwä wa tä taö dao lä mlai wanö, fei a suwä nija wa ma jaba shäyäabä, ö̦jö lä.

8Inaja bä nowa fa talönö, a loa fa co̦icunö, coshi coshi a jamö bei iminö a onimou co̦oma. 9Ö̦jö ma cui, Jesús a wa̦ fa ji̦liläjenö, bä yanöcöwä bluca co̦oquema. Bada bä co̦o fa balöoicunö, fiya bä co̦o juoquema. Jesús a loo juobä jamö, suwä a yami ublaa jäaliyoma.

10Suwä nija Jesús a mamo fa showaicunö, abinaja e cuma.

—Wa shäö bufi lä doblao wejei, ¿wedi jamö bei bä li cuoquei cufe? Wa shämobä, moli a ma cui, ¿bei a wa̦ ca̦i faö nomöjöo mlao cufe? —e cuma.

11—Ma, tä a̦ wäyäle. Moli ma cui, a wa̦ ca̦i fanomi —a suwä cuma.

Abinaja Jesús e cuma.

—Camiyä ma cui, ya wa̦ ca̦i nia faimi. A da co̦jamö. Wa̦lidiwä wa tä taö co̦daaö mlai —e cuma.

Jesúsnö täbä bufi lä

wacacamabou wei tä a̦

12Judio bä nija Jesús a wa̦ faö co̦o ja, abinaja a cuma.

—Yanowamö ya täbä wacacamabobä, camiyä ei ya shi̦i. Camiyä nija bä lä nocao wei bä lä cui, mö didi jamö bä nia juimi. Camiyä ya shi̦i wacacaobä jamö bä cuo ja, ba̦limi bä nia cuo —a cuma.

13Ö̦jö däjä, Jesús nija abinaja faliseo bä bada cuma.

—Cafä wa wa̦fa wäyämamou bädao dicoo ja, wa wa̦fa bejedimou tabeje, tä cuami waiquiwä —bä cuma.

14Abinaja Jesús e cuu mö feduoma.

—Camiyä ya wa̦fa wäyämamou ma bädao wei ma cui, ya bejedimou. Ya cuo lä balöono wei tä ma cui, ya nia lä juu wei tä ma cui, ya tä malä dale. Ö̦jö ma cui, cafä wamacö lä cuinö, ya cuo lä balöono wei wama tä shino daimi. Ya nia lä juu wei tä ma cui, wama tä ca̦i daimi.

15’Cafä wamacö lä cuinö, yanowamö showadi bä bufi lä cuaablalou weinaja, wamacö bufi fa cuaablalonö, wama täbä li jömaö. Camiyä ya lä cuinö ya täbä jömaimi. 16Ö̦jö ma cui, ya täbä jömaö ma bädao wei, bejedi lä ya wa̦. Ya täbä jömaö cadidobä, camiyä ya bufi lä cuu weinaja ya nia cuu bädao malä mlai. Wale lä shömöleno wei a lä cuinö, wale a̦ fa bayelibonö ya wa̦ faö malä cui. 17Moisesi wama etä a̦ oni lä tabole sibä jamö, abinaja tä a̦ cuu.

Bolacabö cäcöbö a̦ nö wäo fe usucuwä ja, “Bejedi lä wafäcö a̦”, wama cäcöbö nofi nia tabou.

’Einaja tä a̦ cuu. ¿Ö̦jö tawä? 18Camiyä ya wa̦fa wäyämamou. Fayä a ma cuinö, wale lä shömöleno wei a showawä lä cuinö, ö̦jönö yale a̦fa ca̦i wäyäö —Jesús a cuma.

19Inaja a cuma yalo, abinaja bä cuu nomöjöoma.

—¿Wedi jamö Faafä bei a, ö̦jö lä?

Abinaja Jesúsnö bä nowa tama.

—Fayä wama a daimi waiquiwä. Camiyä wamale ca̦i daimi. Camiyä wamale daö fa cunoja, Fayä a ma cui, wama a nö ca̦i daö mö feduobö wei—bä nowa tama.

20Yai Bada etä yafi jamö bä yömölaö ja, einaja a cuma, Yai Bada nija bä blada lä jöböblaaö wejei, bä blada didiobä tä lä cule jamö. Ö̦jamö bä yömölaö ma wawädoono wei ma cui, a juwäamanomije. A yai nia lä shämou wei etä cuo showadaono malä mlai.

Jesús a nia lä juno wei tä a̦

21Judio bä nija abinaja Jesús a cuu co̦oma.

—Ya nia julayou. Wamale nia ma dayäö wei ma cui, wamacö wa̦lidiwä showai wamacö nia nomalaliyo. Ya nia lä cuo wei jamö, wamacö juu daomi —a cuma.

22Ö̦jö däjä, judio bä wa̦liyoma.

—¿Cama a nia shämou daanö? “Ya nia lä cuo wei jamö, wamacö juu daomi”, a malä cui wei —bä cuma.

23Abinaja Jesús a cuma, ö̦jö bä nija.

—Eja cafä wamacö li cuo showadaoma wamacö, camiyä fedu jamö ya li cuo balöoma. Bita jamö wamacö lä bälöblai, ö̦jö lä wamacö showawä, camiyä ya shino shomi. 24Wa̦lidiwä showawä wamacö nia lä nomablou wei tä ja, bämacö yömölalema. ¿Ö̦jö tawä? “Yai Bada tänö a nia lä shömano wei, fei a waiquiwä”, wamale nofi taboimi ja, wamacö wa̦lidiwä showai wamacö nia malä nomablou wei —a cuma.

25Abinaja cama nija bä cuma.

—Cafä ¿wedi bei wa dodijiwä?

Abinaja Jesúsnö bä nowa tama.

—Ya wa̦fa jaba da wäyämoblei däjä, bämacö nowa da tableinaja, ö̦jö ya waiquiwä. 26Cafä bämacö a̦fa tabä, bluca ya tä tabou. Bämacö jömabä tä bluca. Ö̦jö ma cui, wale lä shömöleno wei ya wa̦ fa ji̦lilänö, yanowamö täbä nija, ö̦jö lä ya wa̦ nia shi̦lo yai wäyäö. Ö̦jö a bejedimou —bä nowa tama.

27¿Ö̦jö tawä? Bä Fö̦ö e a̦fa yai lä wayoano wei tä ja, bä bufi jaducublonomi. 28Ö̦jö cudeenö, abinaja Jesúsnö bä nowa taö nomöjöoma.

—Ya lä yanowamöblaleyoluno wei ya lä cui, wamale befi ca̦i i̦tamaö waiquio däjä, ö̦jö lä däjä, wamale nö nia bejedi ö̦jöböaö. “Ö̦jö lä a waiquiwä cuoma, a da cubleinaja showadawä”, wamale nofi nia tabou. “Cama a bufi cuu lä bädao weinaja, a cuaanomi. Bä Fö̦önö tä a̦ wäyäö ja, a wa̦ yai cuoma”, wamale nofi nia tabou. 29Wale lä shömöleno wei a lä cuinö wale ca̦i cua showaa lä cule. Wale daanomi. Ya yamimi. Showadi ya bufi malä doblamabou wei —bä nowa tama.

30Inaja a wa̦ cuablalou showao däjä, bluca bänö a wa̦ bejedi bufilemaje.

Bejedi tä a̦nö bä lä

bayeliblamou wei tä a̦

31Ö̦jö däjä, Jesús a wa̦ bejedi lä bufileno wejei bä judio lä cui bä nija abinaja a cuma.

—Showadi wamale a̦ nofi cadidibou ja, camiyä nija bejedi lä wamacö nia shino yai nocao. 32Yai Bada nija tä a̦ bejedi lä cule, wama tä a̦ bejedi fa dalalönö, ö̦jö tä a̦nö wamacö nia shino jujeblamolayou —a cuma.

33Abinaja Jesús nija bä cuma.

—Ablaamö nodiwä yama ecö waiquiwä. Yedu ja ma cui, shomi täbä nija yamacö ca̦i nosiemamou mlai ja, yamacö showawä. ¿Wedi tabä “Wamacö nia jujeblamolayou”, wa li cuu dicoo cufe?

34Abinaja Jesúsnö bä nowa tama.

—Cafä wamacö nija ei ya wa̦ lä cui, bejedi lä ya wa̦. Wa̦lidiwä tä lä taö wejei bä lä cui, wa̦lidiwä tä ja, bä li nosiemamou waiquiwä. Ö̦jö lä wa̦lidiwä tänö bä yai tabou. ¿Ö̦jö tawä? 35Täbä ojodamobä täbä lä tabou wejei, wama tä daö. Shomi täbä nija bä lä nosiemamou wei bä lä cui, ö̦jö bä nija bä yanöcöwä cudiobä bämi. Bä ojodamobä bä li tabouje. Bä ijilubö ebä cadidiwä lä cui, ö̦jö ebä nia shino yanöcöwä cudio. 36Ö̦jö cudeenö, Yai Bada bei Ijilubö ya e waiquiwä lä cuinö, wa̦lidiwä tä ja bämacö yai jujeblaö ja, wamacö nia yai jujeblamolayou.

37’Ablaamö nija wamacö lä nodiblaliyono wei, ya tä daö lä. Ö̦jö wama ecö bäwä ma cui, wamale a̦ waii dicoo yalo, wamale shäö bufi doblao. 38Fayä nijamö ya tä lä möno wei ya tä a̦fa wäyäö. Inaja showawä, cafä wamacö yai lä fö̦ömou wei nija wama tä a̦ lä ji̦lileno wei, wama tä li taö dicoo —bä nowa tama.

39Abinaja bä cuma.

—Ablaamö a lä cui nija yamacö yai fö̦ömou.

—Ma —Jesús a cuma—. Ablaamö wama ecö ijilubö yai cuo fa cunoja, ö̦jö a lä cuaano weinaja, wamacö nö ca̦i cuaaö yauabö wei. 40Ö̦jö ma cui, inaja wamacö cuaaimi dicowä. Yai Bada nijamö ya wa̦ lä ji̦lileno wei, cafä wamacö nija ya tä a̦ bejedi ma wäyäö wei ma cui, wamale shäö bufi doblaa dicoa lä cule. Inaja Ablaamö a cuaano malä mlai. 41Wamacö fö̦öbö yai lä cuaano weinaja, wamacö cuaaö yauaö dicoa lä cule —Jesús a cuma.

Abinaja bä cuma.

—Shomi yamacö ijilubö malä mlai. Yamacö yai lä fö̦ömou wei, ö̦jö lä Yai Bada tä waiquiwä —bä cuma.

42Abinaja Jesúsnö bä nowa tama.

—Yai Bada wama ecö ijilubö cuo fa cunoja, wamale nö nofimabö wei. Ö̦jö lä Yai Bada nija ya cuoma ya malä juno wei. Camiyä ya juu bashio bufi fa doblaonö mlai, ö̦jönö wale yai shömölema. 43¿Wedi tabä wamale a̦ ji̦lia möblaimi ö̦jö lä? Wedi tabä mlai. Wamale a̦ ji̦liaö moji waiquiwä yalo, wamale a̦ ji̦lia möblaimi.

44’Faafä fecula bada wama ecö yai ijilubö. Ö̦jönö tä tamaö lä bufii weinaja, wamacö cuaaö bufi doblao. Jaba däjä ma cui, täbä shäö bufi doblao showaoma. A bejedimou daimi yalo, tä lä bejedi wei tä julii daimi waiquiwä. A jolemou däjä, cama a bufi lä cuaaö wei etä wawälayou. Jolemolewä a waiquiwä malä cui. Bä lä jolemou wei bä lä cui, ö̦jö nija bä li fö̦ömou.

45’Ö̦jö ma cui, camiyä ya li bejedimou. ¿Ö̦jö tawä? Cafä wamacö nija bejedi ya tä a̦ li yai wäyäö cudeenö, wamale a̦ bejedi bufiimi. 46¿Wedi jamö a lä cuinö wale nia dobloimi jömaö, ö̦jö lä? Ya jolemoimi waiquiwä ja lä, ¿wedi tabä wamale a̦ bejedi bufiimi? 47Yai Bada ebä lä cuinö, cama Yai Bada etä a̦ ji̦liaöje. Yai Bada wama ecö waiquiwämi yalo, wama etä a̦ li ji̦liaimi —bä nowa tama.

Judio bänö Jesús a

wa̦fa lä tano wejei tä a̦

48Judio bä a̦ juoma.

—Cafä Samaliateli bäfä a̦fa wa̦li wäyäö ja, yamacö a̦ bejedi. Fecula wa lä bälömabolenö, wa wa̦ li —bä cuma.

49Abinaja Jesús a cuma.

—Fecula ya bälömaboimi. Fayä ya nö yai dodijidawä ma ö̦jöböamaö wei ma cui, cafä wamacönö wamale nö li waiblaö. 50Ö̦jö ma cui, wale a̦fa doblao tabeje, camiyänö ya tä dayäimi. Ö̦jö tä shino lä dayäö wei tä cuadayoa. Ö̦jönö wale nia shino jömaö. 51Cafä wamacö nija ei ya wa̦ lä cui, bejedi lä ya wa̦. Wale a̦ nofi lä cadidibou wejei bä lä cui, bä nomaö mlaicätä —a cuma.

52Jesús nija abinaja judio bä cuma.

—Ei malä cui, ¡fecula wa malä bälömabole! Ablaamö a ma cui, a nomalayoma. Yai Bada a wa̦no wäyälewä bä ma cui, inaja showawä. Ö̦jö ma cui, “Wale a̦ nofi lä cadidibou wejei bä nomaö mlaicätä”, bei wa li cuu. 53Bämacö nö badabö Ablaamö a ma cui, a nomalayoma. ¿Cafä wa shino yai lojode ayawä daanö? Yai Bada a wa̦no wäyälewä bä ma cui, bä ca̦i nomalaliyoma. Cafä ¿wedi bei wa wa̦fa yai li jilou? —bä cuma.

54Jesús abinaja a cuu mö feduoma.

—Camiyä ya wa̦fa doblao tamamou bädao ja, tä nowa cuami waiquiwä. Wale a̦fa yai doblao lä taö wei a lä cui, Fayä a, wama a jo̦wa lä bufibou wei a showawä lä cui. 55Ö̦jö ma cui, Fayä wama a daimi. Camiyänö ya shino daö. ¿Ö̦jö tawä? “Ya daimi”, ya cuu fa cunoja, cafä wamacö jolemou lä culenaja, ya nö cuo mö feduobö wei. Ö̦jö ma cui ya daö lä. Ya wa̦ nofi ca̦i cadidibou. 56Wamacö nö badabö Ablaamö a lä cuinö, a bufi doblalolanö wale nö daboma. Ya nia lä wawäblou wei tä daa fa balölalönö, a bufi doblao dodijioma —a cuma.

57Ö̦jö däjä, abinaja Jesús nija judio bä cuma.

—Jolemo dijä. Lasha 50 wa famaö showao ma mlao däjä ma cui, ¿“Ablaamö ya daö”, bei wa li cuu? —bä cuma.

58Abinaja Jesús e cuma.

—Cafä wamacö nija ei ya wa̦ lä cui, bejedi lä ya wa̦. Ablaamö a cua showaa mlai ja, ya cuo lä balöono wei, ei ya —e cuma.

59Inaja a cuma yalo, maa mabä ya̦caalalemaje, a shäyäbeje. Ö̦jö ma cui, Jesús a nofi fa mojodublalufälönö, Yai Bada etä yafi jamö a siboa co̦a ja̦toa showalayofälöma.

Currently Selected:

Juan 8: GUU

Highlight

Copy