Hechos 6

Jesús ebä bayeliblabeje

bä 7 lä yaileno wejei tä a̦

1Bei. Ö̦jö däjä, Jesucristo nija bä lä nocao wei ebä blucablou däjä, cama bä showawä bä a̦fa tayoma. Clesiateli bä caficö a̦ lä däleno wejei bä judio lä cui, bä nacömoma, cama judio bä caficö a̦ lä showabono wejei bä nija. Nii showadi bä jöbäö lä shedecaö wejei bä ja, camateliyoma bä lä feiblono wei bä walablaö dicooje ja, bä jushudaliyoma. 2Jesucristo 12 ebä lä cuinö tä nia fa cadejeblajenö, Jesucristo nija bä lä nocaono wei ebä bluca co̦camomamaje. Abinaja bä nowa tamaje.

—Yai Bada yama etä a̦ wäyäbä, ö̦jö yamacö li waiquiwä. Nii bä ja yamacö yabäcamou ja tä dodijidawämi. 3¿Ö̦jö tawä, iba wamacö? Ö̦jö cudeenö, cafä wamacö nija 7 wama bä nia yaiaö, nii showadi bä jöbäbeje jamö, yama bä lämabobä. Bä a̦fa wayoamou dao lä mlai wama bä nia yaiaö, Yai Bada tä Bufinö bä lä jödödöbou wei, bä bufi ca̦i lä jaducui. 4Inaja cama bä li ma cuaaö däjä, camiyä Yai Bada nija yamacö a̦ fadibä, yama etä a̦ ca̦i wäyädibä, showadi ö̦jö yama tä nabä nia cadidou mö feduo —bä cuma.

5Ö̦jö bä a̦ ja, bä bufi bluca fa doblalonö, ei bä a̦fa lä cule bä yailemaje. Esteban a yailemaje, a bufi cadidilanö Jesucristo a nofi lä mölabono wei a lä cui. Yai Bada tä Bufinö a jödödöbou ja, showadi a cadidoma. Felipe a ca̦i yailemaje. Blocolo a ma cui, Nicanolo a ma cui, Dimono a ma cui, Bamena a ma cui, Nicolasi a ma cui, ö̦jö bä bluca yaialalemaje. Nicolasi a lä cui, Adioquiateli a cuoma. Judio a jaba cuono ma mlai ma cui, ö̦jö bä nija a fa yädäblalunö, Jesucristo nija a bufi cuquema. 6Ö̦jö bä 7 lä cui, Jesucristonö bä lä shömöleno wei bä nija bä ca̦i jumaje. Wawädowä bä bada nia fa lämabojenö, bä imicö maquelanö, Yai Bada nija bä nö bayeli nacamaje.

7Inaja bä fa cuaanö, Yai Bada tä a̦ ji̦limou blaucou cuaama. Ö̦jö däjä, Jelusale jamö, Jesucristo nija bä nia lä nocao wei ebä blucablou dodijilayoma. Nofi bäyäalewä ai bä bluca ma cuinö, Jesucristo etä a̦ fa julejenö, a bufilemaje.

Esteban a lä

juwäleno wejei tä a̦

8Yai Bada tänö Esteban a bayelibou wawädooma, a nö ca̦i wa̦lojomaboma. Yanowamö täbä nija, tä nö lä quilijii tä bluca wawämama, tä tamou dao lä mlai. 9Ö̦jö däjä, Esteban nija judio ai bä a̦ läoma. Ö̦jö Sileneteli ai bä cuoma. Alejadiateli ai bä cuo mö feduoma. Shomi bä judio lä yododaö wei yafi jamö, showadi ö̦jö bä co̦cabloma, Jujeblano tä a̦fa yafi lä jilabono wejei jamö. Silisia jamö bä judio lä bälöle ai bä ma cui, Asia jamö bä judio lä bälöle ai bä ma cui, ö̦jö bä lä cui bä a̦ ca̦i bluca läoma. 10Ö̦jö ma cui, Yai Bada tä Bufinö a wa̦ faö fa moyawäonö, Estebannö bä a̦ nö wa̦lojamanomi. 11Ö̦jö däjä, ai täbä nija Esteban a nofi washuquemaje, bada bä nija a wa̦fa jole wäyäbeje. Ö̦jö bä lä cui, abinaja bä jole cuma.

—Estebannö Moisesi a nö lä waiblano wei, yama a wa̦ ji̦lilema. Yai Bada tä ma cui, tä nö ca̦i waiblama. Yama a wa̦ ji̦lilema —bä jole cuma.

12Ö̦jö bä a̦ ja, ai bä shi bluca jalimoa showadalayoma. Bada bä ma cui, Moisesi tä a̦ ja täbä lä damaö wejei bä ma cui, ai bä ma cui, ö̦jö bä shi fa jalimolunö, Esteban a nabä juu showadaomaje. A fa juwälöjenö, bada bä yododoobä jamö a shailefälömaje. 13Esteban a wa̦fa jole wäyäbeje, ai bä fa ublamacöjenö, abinaja ö̦jö bä jole cuma.

—Ei Yai Bada yama etä yafi lä yaibole tä ma cui, tä yafi nö waiblaö dicoo. Moisesi tä a̦ ma cui, showadi tä a̦ nö ca̦i waiblaö. 14Yama a wa̦ malä ji̦lileno wei. Nasaleteli Jesús a lä cuinö, ei bei a yafi nia jo̦wa wa̦liaö. Moisesinö yamalecö taamaö lä bufino wei tä a̦ lä cui, ö̦jö bei tä a̦ nia jo̦wa shomiblamaö nomöjöo—bä cuma.

15Bada bä lä yododoono wei bä lä cui, Esteban nija bä mamo fa showaicunö, wäyäcu shi̦i lä wacalamiono wei wäyäcu dalalemaje, a̦jele bä wäyäcu lä culenaja showawä.

Currently Selected:

Hechos 6: GUU

Highlight

Copy