Hechos 5

Anania, Safila sho

cäcöbö lä cuaano wei tä a̦

1Inaja bä ma cuaaö däjä ma cui, abinaja Anania a cuaaö dicooma, bä suwäbö Safila sho cäcöbö lä cui. Cama a ficalibö ca fa jöbömoicunö, blada bä dälema. 2Bä suwäbö e sho cäcöbö a̦ wayou balöo ja, ai bä blada mashi jo̦yaquema. Ai bä blada mashi lä cui, Jesucristonö bä lä shömöleno wei bä nija, jai bä comi jöböquema a wa̦ cuaama. 3Ö̦jö ma cui, abinaja Pedronö a nowa tama.

—Anania. ¿Wedi tä tabä fecula bada a Sadanasi nija bei wa bufi li lulumoa dicolayoma? ¿Wedi tabä Yai Bada a Bufi nija wa li jolemolayoma? Afä ficali wa täca lä nomöjöqueno wei täca nowa ja, wa bä blada lä däleno wei, wa bä mashi tabou malä showale.

4’Wa täca jöböaö showao mlao däjä, afä täca cadidiwä cuoma. Wa täca fa jöböcönö, ö̦jö täca nowa ja wa bä blada lä däleno wei, afä bä ca̦i blada cuo showaoma. Wa bä jöböaö bufi doblao ja, wa bä jöböabä bä li cuoma. Wa bä noshi umabou bufi doblao ja, wa bä noshi ca̦i umabobä. Einaja tä yai ma cuono wei ma cui, ¿wedi tä tabä, jai wa bä comi jöböquema bei wa wa̦ li cuaaö dicooma? Yanowamö yamacö nija wa jolemonomi. Yai Bada nija wa yai jolemoa dicolayoma —Pedronö a nowa tama.

5Ananianö ö̦jö a wa̦ fa ji̦lilänö, a nomawä wäcädou showalayoma. Ö̦jö tä a̦ lä ji̦liano wejei, bä bluca quilia fe balojolaliyoma. 6Fiya bänö, acadafu sicönö a nomawä fa o̦cablalöjenö, sibo jamö a ca̦i fa alujenö, a didiquemaje.

7Inaja tä cublou waiquilayono wei ja, tä nö fa dedejedalunö, ö̦jamö lä bä suwäbö e mojodi waloa jäqueyoluma. 8Ö̦jö nija Pedro a wa̦ faö nomöjöoma.

—Ficali täca nowa ja, ¿einaja bä cudale wafä bä dälema? —a cuma.

—Awei —a jole cuma—. Wa lä cufenaja bä cudale yafä bä dälema —a cuma.

9Einaja a cuu ja, abinaja Pedronö a nowa tama.

—¿Wedinaja wafäcö bufi cuu fa dicoonö, inaja bei wafäcö nowa li tayoma? ¿Wedi tabä Yai Bada wafä a Bufi mölamabä, bei wafäcö li wabäo dicoblaoma? Bei. ¡Fe̦yalofä a nomawä lä didiqueno wejei, bä mamicö jo̦wa blölölömou co̦a lä cuimi! Ö̦jamö lä, cafä wa nomawä nia bälaö nomöjöoje —a cuma.

10Pedro a cotä ja, a suwä fa wäcäblaicunö, a waicou showadaoma. Fiya bä fa falönö, a nomawä fa dalalöjenö, sibo jamö ö̦jö a ca̦i aa nomöjölayomaje. Bä fe̦yalobö a didia lä balöqueno wejei jamö, ö̦jö a didia yädäquemaje.

11Jesucristo ebä bluca lä cui, bä quilii dodijioma. Ai bä ma cui, tä a̦ lä ji̦liano wejei bä bluca ca̦i quilii fe balojooma.

Yai Bada tä mayo wawäa

lä dodijimaleno wejei tä a̦

12Jesucristonö bä lä shömöleno wei bä lä cuinö, Jelusaleteli bä nijamö, tä nö lä quilijii bluca tä wawämamaje. Yai Bada etä yafi yädäa lä boale ja, showadi bä bluca yododoblaama, Salomo e a̦fa yafi lä cule jamö. 13Ai täbä lä cui, ö̦jö bä nija täbä jole jole yädäblou quilima. Ö̦jö ma cui, Jelusaleteli bä lä cuinö, “Ö̦jö bä nofi yai dodijaö”, Jesucristo ebä nofi tabou fe balojoomaje.

14¿Ö̦jö tawä? Jesucristo a bejedi fa bufilöjenö, showadi bä yädäblou nosi ma blacäcono wei ma cui, ¡ö̦jö däjä yai! Wa̦lo bä ma cui, suwä bä ma cui, Bada tä nija bä bluca yädäblou dodijilayoma. 15Jalili bä jalomaö fa dalalöjenö, bä shi fa jalimolunö, cama jalili ebä ca̦i bluca sibolayomaje. Pedro a jayuabä jamö, bei yo casö jamö bä jalili blaaquemaje. Täbä maqueobä täbä ja, bä maqueaquemaje. ¿Ö̦jö tawä? Ö̦jamö lä Pedro a jayuaö däjä, “Bei a malashinö bä fa jo̦yablamafälönö bä jalobä”, a nofi tabomaje. 16Jelusaleteli bä shabonobö jamö ai bä yanobö lä siboblamono wei jamö ma cui, ai bä bluca ca̦i waloblaaö mö feduoma. Jalili bä ma cui, bä lä feculaböono wei bä ma cui, ö̦jö bä ca̦i fa waloicujenö, bä bluca jalolaliyoma.

Bada bänö Jesucristo ebä

juwäa lä co̦alaleno wejei tä a̦

17Ö̦jö ma cui, nofi bäyäalewä a bada lä cui, a bufi jushujuo fe balojooma. Cama nija bä cuo mö lä feduono wei bä saduseo ma cui, ö̦jö bä bufi ca̦i bluca jushujuo mö feduo showaoma, Yai Bada yafi jamö bä lä badamou wei bä lä cui. Jesucristonö bä lä shömöleno wei, bä nofi doablamou ayao cudeenö, bä jushuoma. 18Ö̦jö däjä, bä juwäa fa co̦malöjenö, bä doblou lä mlai bä fe lä laono wei jamö, bä fe laa co̦maquemaje. 19Ö̦jö ma cui, didi däjä Yai Bada tänö a̦jele etä fa shömöludunö, bä fe lä laono wei yoca fa caloblalönö, bä öböa siboblaö co̦layoma. Abinaja bä nowa tama.

20—Yai Bada etä yafi jamö wamacö cua fa co̦lunö, bä yömölaö da co̦oduje. Fei däjä, Yai Bada nija dodijidawä wamacö cua lä nomöjöle, bä a̦ da wäyämo —bä nowa tama.

21A̦jele a wa̦ fa ji̦liläjenö, Yai Bada etä yafi jamö bä lucäa fa fenalunö, tä a̦ wäyäö co̦o fenaomaje.

Bei. Bä nia lä yododano wei jamö, nofi bäyäalewä a badanö, cama ebä ca̦i waloa fenaquema. Ö̦jö däjä, Isaeli ebä bada lä cui, bä bluca nacaa fenaalalema, bä a̦ wayobä. Bä bluca fa co̦cablalunö, Jesucristo ebä nia co̦aö fa fenaojenö, ai ebä shömölemaje, bä fe lä lamaqueno wejei jamö. 22Ö̦jö ma cui, bä fe lä laono wei jamö bada bä waloo däjä, bä cuonomi. Ö̦jö däjä, bä cuono lä mlai tä a̦ wäyäö co̦jolomaje. Abinaja bä cuma.

23—Bä fe lä lao wei tä yafi jamö, yoca lojodooma ma cui, sibo jamö yoca nofi lä läbou wejei bä läo ma showao däjä ma cui, yama yoca fa caloblalönö, a yafi blocooma —bä nowa tamaje.

24Ö̦jö däjä, ö̦jö tä a̦ fa ji̦liläjenö, bä bufi wedinajamolayoma. Yai Bada etä yafi nowamabeje bä ca̦i lä cule a bada ma cui, nofi bäyäalewä blowäjäwä bä ma cui, “Shädayai. ¿Wedinaja bei tä nia cublou nomöjöo, ö̦jö lä?”, bä bufi cudaliyoma. 25Ö̦jö däjä, ai a co̦blou fa nomöjölonö, ö̦jönö bä yömölaö nomöjöoma.

—¡Quija, quija! Wama bä fe lä laqueno wei bä lä cui, Yai Bada etä yafi jamö bä cua co̦a lä cubiyei. Täbä yömölaö co̦a lä cubiyejei —a cuma.

26Ö̦jö däjä, Yai Bada etä yafi nowamabeje bä ca̦i lä cule a bada lä cuinö, cama ebä fa nacalänö, bä co̦a co̦lemaje. Yanowamö täbä nija bä quilima yalo, dodijidawä bä öböalalefälömaje. “Maa ma bänö yamalecö shäö mlaobeje”, bä bufi fa cunö, bä i̦cali öbömanomije.

27Bä ca̦i waloa fa co̦icujenö, bada bä lä yododoono wei jamö, bä mötaleblamalemaje. Nofi bäyäalewä a bada lä cuinö, abinaja bä nowa tama.

28—Jesús wama a wa̦fa wäyäö co̦daaö mlaobä, bämacö wasöö ma dodijiono wei ma cui, Jelusaleteli bä nijamö, ö̦jö wama tä a̦ jo̦wa jödödöblamaö waiquia lä cule. Ö̦jö bädawä mlai, ö̦jö a lä shämono wei a lä cui, camiyä yamacö nija wama tä nowa jo̦wa shadimabou bufi doblao —a cuma.

29Ö̦jö ma cui, Pedro, Jesucristonö bä lä shömöleno wei ai bä sho, abinaja bä cuma.

—Yai Bada yama a wa̦ yai ji̦liabä yamacö. Yanowamö wamacö a̦ ma läo wei ma cui, bämacö a̦ ca̦i nia ji̦liaimi. 30Fii balitama defi ja wama a fa basumacönö, Jesús wama a shämalema. Wama a ma shämaleno wei ma cui, Yai Badanö a demi jocädamaö co̦layoma, bämacö nö badabö nija a lä bufiblamou wei a lä cuinö.

31’¿Ö̦jö tawä? A nö Bada ö̦jöböamobä, cama Yai Bada jayu boco mashi jamö, a döcämabou lä culadi. Yanowamö täbä jucäabä, ö̦jö a Bada. Wa̦lidiwä tä ja, Isaeli nodiwä ebä bufi lädamabä, a Bada tablamalema, bä doblou lä mlai tä ma cule, tä nowa mladamabä. 32¿Ö̦jö tawä? Tä lä cublaliyono wei yama tä a̦fa wäyäbä, ö̦jö yamacö. Yai Bada a Bufi ma cuinö tä a̦fa ca̦i wäyäö. A wa̦ lä juaö wejei bä nija a Bufi jöböamou —bä cuma.

33Inaja bä cuma yalo, bä bada jushudou fe fa balojolonö, bä shäö bufi doblaomaje. 34Ö̦jö ma cui, bä lä yododano wei bä nijamö, ai a faliseo lä cui a bada ubladaliyoma. Camalieli a wa̦fa cuoma. Moisesi tä a̦ ja täbä lä damaö wei ö̦jö a bada cuoma. Judio bä blucanö a nofi tabomaje. Ö̦jö a fa ubladalunö, Jesucristonö bä lä shömöleno wei bä lä cui, bä sibomaö balöo bufima, cama bada bä a̦ wayou juo balöobä.

35Ö̦jö bä fa famalöjenö, bada bä lä yododoono wei bä nija abinaja Camalieli a cuu juoma.

—Isaeli wama ecö. Ei wama bä nia lä taamaö wei tä ja, bä bufi da moyaweicu. ¿Ö̦jö tawä? 36Ei tä cublou showao mlao däjä, ai tä wawäblou mada balöoblei. Ö̦jö Deuda a wa̦fa lä cuono wei a fa wawäblalönö, a wa̦ bada wäyämamou fa cuaanö, cama nija bluca bä lulolayoma. Ö̦jö nija jai 400 bä nocaoma. Ö̦jö ma cui, a fa shälöjenö, cama ebä bluca lä nocamabono wei bä mada sheleleblalui. Ö̦jö däjä, tä a̦ ji̦limamou co̦daaö mlai, tä a̦ mladou showalayoma. 37Ö̦jö a nodi jamö, Calileateli a Judanö, cama ai ebä lulubou nomöjöoma. ¿Ö̦jö tawä? Bämalecö a̦fa bluca da onimablejei däjä, a wawäblaliyoma. Ö̦jö a fa shälöjenö, cama ebä lä nocamabono wei bä bluca ca̦i sheleleblou nomöjölayoma.

38’Fei däjä ma cui, abinaja ya cuu ja wamale a̦ da ji̦lilä. Ei bä lä cui bä yabäca dijejä. Bä cuobä. Ei tä a̦ ma tabolajei ma cui, yanowamö tä a̦ bädawä ja, tä a̦ cudio mlaicätä. 39Ö̦jö ma cui, ei Yai Bada tä mayo waiquiwä cua ja, ö̦jö bä nija wamacö nö nia wa̦lojaimi. Yai Bada tä ma cui nija wamacö a̦ läo dicoo wei, ¿ö̦jö tawä? —a cuma.

40Inaja a lä cuu wei, a wa̦ ji̦lilemaje. Jesucristonö bä lä shömöleno wei bä lä cui, bä lucäa fa co̦malöjenö, bä si yafelilalemaje. Jesús a wa̦fa wäyäö co̦daaö mlaobeje, bä wasöö co̦omaje. Ö̦jö däjä, bä jujeblaö showalayomaje. 41Bada bä lä co̦caono wei jamö, bä faa co̦layofälöma.

Jesús a nowa ja bä nö li bleaama cudeenö, bä bufi doblaloma. Inaja Yai Bada tänö bä taamaö bufi doblao ja, bä bufi yai doblaloma. 42Yai Bada etä yafi jamö ma cui, cama bä yafibö jamö ma cui, showadi bä damaö fe yadiomaje. Täbä yömölaöje ja, abinaja bä cudima.

—Yai Bada tänö a shömabä a lä yaileno wei a lä cui, ö̦jö Jesús a waiquiwä.

Currently Selected:

Hechos 5: GUU

Highlight

Copy