Hechos 2

Yai Bada a Bufi lä

waloqueyoluno wei tä a̦

1Showadi bä nii lalou däjä, judio bä iyaö ca̦i lä co̦camou wei tä cublou fa co̦lonö, bä yododabä jamö Jesucristo ebä bluca co̦cablou co̦layoma. 2Yedu jai wadoli a wa̦ bada cuwä tä a̦ fa itoimanö, bä lä loono wei a yafi lä cui jamö, a wa̦ jödödöblaliyoma. 3Ö̦jö bä nija, jai cowa wacöbä cuwä wacöbä wai fa shedequeblalunö, ö̦jö bä bluca nija wacöbä wai döcäcäolaliyoma. 4Inaja tä fa cuonö, Jesucristo bluca ebä nijamö, Yai Bada a Bufi fa jödödöblalunö, bä a̦ faö shomiblamalema. Yai Bada a Bufinö bä a̦ fa bädamanö, shomi bä caficö a̦ ja bä a̦ bluca fadou cuaama.

5Bei. Ö̦jamö, Jelusale jamö, judio bä bluca bälöblaama, Yai Bada nija bä bejedimou bufi lä doblaono wei. 6Ö̦jö a wa̦ bada lä ji̦lileno wejei däjä, bä bluca co̦cabloyoluma. Bä a̦ faö lä shomiblaliyono wei bä a̦ fa ji̦liläjenö, bä bufi wedinajamoma. Cama bä caficö a̦ showadawä ja, tä a̦ ji̦lilemaje yalo, 7bä bufi shädayaimoma. Bä bufi wedinajamolanö bä a̦ fama.

—Ei bä a̦ bluca lä cui, ¿cama Calileateli bä mlai daanö? 8¿Wedinaja tawä? Camiyä bämacö a̦ caficö cadidiwä showawä ja, bä a̦ faö mö feduwä. 9Bluca bämacö shomi coyocoa lä cule. Badia jamö bä lä bälöle bä ma cui, Media jamö bä lä bälöle bä ma cui, Elama jamö bä lä bälöle bä ma cui, bä cua lä cule. Mesobodamia jamö bä lä bälöle bä ma cui, Judea jamö bä lä bälöle bä ma cui, Cabadosia jamö bä lä bälöle bä ma cui, Bo̦do jamö bä lä bälöle bä ma cui, Asia jamö bä lä bälöle bä ma cui, bä bluca coyocoa.

10’Judio bämacö waiquiwä bämacö ma cui, judio bämacö nija bä lä co̦cao wei bä ma cui, bä bluca coyocoa mö fedua —bä cuma—. Flijia jamö bä lä bälöle bä ma cui, Ba̦filia jamö bä lä bälöle bä ma cui, Ejido jamö bä lä bälöle bä ma cui, ö̦jö bä ca̦i bluca cua lä cule. Libia jamö, Sileneteli bä lä bälöle tä ajede jamö, ö̦jamö bä lä bälöle bä ma cui, Lomateli bä fama lä co̦blaliyono wei bä ma cule, ö̦jö bä bluca coyocoa. 11Cleda jamö bä lä bälöle bä ma cui, Alabia jamö bä lä bälöle bä ma cui, bämacö bluca cua. Camiyä bämacö a̦ caficö cadidiwä showawä ja, bä a̦ faö lä cule. Yai Bada a wa̦fa lojode lä wäyäö wejei, camiyä bämacö a̦ faö lä culenaja, bä a̦ faö cuaaö cudeenö, walalawä bäma bä a̦ ji̦liaö lä cule —bä cuma.

12Bä bufi bluca shädayaimoma. Bä bufi wedinajamoma yalo, cama bä ca̦i wa̦liyodima.

—¿Wedinaja dodijiwä tawä?

13Ö̦jö ma cui, ai bä lä cuinö bä noca flecamaje.

—Shi wa̦limamodima ubä dude fa coalalöjenö, bä a̦ li biyäcäblalou lä cubiyei. Nashiwä toubänö bä shi li wa̦lii —bä cuma.

Pedronö bä lä

yömölano wei tä a̦

14Ö̦jö ma cui, Pedro a wa̦ juo showadaoma. Ai bä 11 lä cuono wei bä ca̦i fa ubladalunö, a wa̦ i̦cali fama.

—Judio wamacö mö lä fedui. Jelusale jamö wamacö lä bälöle wamacö. Ei ya wa̦ lä cui, wamale a̦ da ji̦lilä. 15Ei bä lä cui, wama bä shi a̦fa wa̦lii lä tafe, bä shi wa̦lii malä mlai. Einaja a motoca jaba ösöblou cuo däjä, täbä shi wa̦libä tä cuami. 16Ma, ei bä a̦ lä shomiblalufe, yedu jamö Yai Bada a wa̦no wäyälewä Joeli a lä cuinö, ö̦jö tä a̦fa ca̦i wäyäö balöo showaoma. Abinaja tä a̦ cuu.

17Yai Bada ya wa̦no taö lä cule. Yai Bada tänö täbä nia lä jömaö wei tä cublou ajedou däjä, bluca bä nija Yai Bada tä Bufi nia jo̦wa yai jöbömou. Wamacö ijilubö bä ma cuinö, wamacö tääbö bä ma cuinö, a wa̦no nia wäyäöje. Tä nia lä cublou wei, cafäteli ai bä fiyanö, tä yai nia wawädou mööje. Bada bä lä cuinö, tabi tä nia li dablaöje. 18Bejedi lä ya wa̦. Yai Bada a nosie juamobä bä suwä ma cui nija, bä wa̦lo ma cui nija, Yai Bada cama a Bufi nia jöböamou. A Bufi fa jöbömoicunö, a wa̦no nia jo̦wa wäyäöje. 19Täbä bufi möblobä, fedu jamö tä nö lä quilijii, tä nia bluca wawämadayou. Bita jamö ma cui, yanowamö bämacö lä cule jamö, a mayo nia ca̦i jo̦wa dablamou nö quiliaö. I̦yä i̦yä bä ma cui, cowa wacöbä ma cui, waqueshi bä bada lä tolucou wei bä ma cui, ö̦jö täbä nia bluca wawäblou. 20Bada tä nö nia yai lä quiliaö wei, tä mö jalu cublou showao mlao däjä, motoca a shi̦i nia jo̦wa lublou balöo. Belibo a ma cui, i̦yä i̦yä bä wacä lä culenaja, a nia cublou nö quilio. 21Ö̦jö däjä, Bada a nija a bayeliblamou lä bufio wei a lä cui, a nia jo̦wa jucäamou.

’Einaja tä a̦ cuu. ¿Ö̦jö tawä? —Pedro a cuma—. 22Isaeli cä wama ecö. Nasaleteli Jesús ya wa̦fa wäyäö ja, wamale a̦ da ji̦lilä. Yai Bada tänö cafä wamacö nija Jesús a fa shömölönö, a nö wa̦lojoblamalema, wamacö bufi jaducublobä. Yai Bada tänö a nia lä shömano wei, “Fei a waiquiwä”, wama a nofi tabobä. ¿Ö̦jö tawä? Cafä wamacö nija a da cuoblei däjä, Yai Bada a lä cui, ¡bejedi a lojode damalalema! Tä nö lä quilijii tä bluca wawämalema. Jesús nija Yai Bada a lojode damoa dodijilaliyoma.

’¿Ö̦jö tawä? —a cuma—. 23Ö̦jö a Jesús shäbeje, wama a jöbäa dicoquema. Yai Bada tänö inaja a taamaö bufi doblao waiquioma yalo, tä cublaliyoma. Tä daö waiquioma. Wa̦lidiwä talewä bä nija, fii balitama defi jamö wama a shäa dicomalema. 24Ö̦jö ma cui, a ma shäleno wejei ma cui, Yai Bada tänö a jucäa fe yadilema. A ca̦i demi jocädamaö co̦layoma. A nomaö shi wa̦lijiobä a cuono malä mlai. 25¿Ö̦jö tawä? Ö̦jö yedu ja, Davidnö a wa̦fa wäyäö balöoma. Abinaja a cuma.

Bada a lä cui, showadi ya bufibou. Ya shominajablou mlaobä, wale malä ajedebou wei. 26Ö̦jö cudeenö, ya bufi doblalou. Ya wa̦ bufi ca̦i doblao faö. Quilii mlai ja ya nia cudio. 27Bä lä nomaö wei bä cuobä jamö, wale noshi nia ö̦jödabou malä mlai. Camiyä wale lä yaileno wei ya lä cui, wale sicö nia jodemaimi. 28Dodijidawä ya cudiobä, cafänö wale damama. Wale ca̦i lä cua wei tänö, showadi ya bufi nia doblalou.

’Einaja a cuma —Pedro a cuma—. 29Iba wamacö. Wamacö bufi yai jaducublobä, ya wa̦ nia wawädoablalou. Nö badabö David a lä cui, ö̦jö tä a̦fa lä tano wei ja, cama a wa̦fa tamonomi. ¿Ö̦jö tawä? David a fa nomalönö, mashita jamö nomawä a didiquemaje. Bäma a didibou malä showale. 30Ö̦jö ma cui, Yai Bada a wa̦no wäyälewä a li David cuoma cudeenö, tä nia lä cublou wei tä ja, a moyawäo showaoma. Yai Bada a wa̦ lä wäono wei, tä a̦ ca̦i daö waiquioma, cama David a bada läo lä cuono weinaja, e nia bada nodiwä lämabou lä juono wei tä a̦ lä cui.

31’Ö̦jö cudeenö, tä cublou showao mlao däjä, Yai Bada tänö a shömabä a lä yaileno wei, a nia demi jocädou lä co̦ono wei tä ca̦i daö showaoma. ¿Ö̦jö tawä? Bä lä nomaö wei bä cuobä jamö, a noshi nia a̦fa ö̦jödaboimi lä wäyäno wei ja, cama a wa̦fa tamou mlai ja, a nia lä shömano wei bei a wa̦fa li wäyäma. Ö̦jö sicö yai jodemanomi. 32Ö̦jö Jesús a lä cui, Yai Bada tänö a demi jocädamaö co̦layoma. Camiyä bluca yamacö mamocunö, yama a demi daa co̦lalei cublelei.

33’¿Ö̦jö tawä? —a cuma—. A nö Bada ö̦jöböamobä, cama Yai Bada jayu boco mashi jamö, a döcämabou lä culadi. Ö̦jamö a Bada lä döcämaqueno wei däjä, bä Fö̦önö a dobälema. Cama a Bufi a̦fa wäyämamou lä balöono wei tä ja, a dobälema. Ö̦jö tä ja, cama a fa dobämamoludunö, camiyä yamalecö dobäa fe dolea nomöjölema. Ei wama tä lä möle, wama tä a̦ lä ji̦liale, ö̦jönö tä wawäblamalei lä cufe. 34Cama David a ösöono malä mlai, fedu jamö. A ösöono ma mlai ma cui, abinaja a cuma.

Iba Bada a nija, abinaja Bada a yai lä cui a cuma. Eja, camiyä ya lä cule jamö a da döcäiquiyo, jayu ya boco mashi jamö. 35Eja wa döcäo showao däjä, bä nö lä nabämou wei bä lä cui, cafä nija ya bä möfe nia quilili bomabou.

’Einaja a cuma. ¿Ö̦jö tawä? —Pedro a cuma—. 36Isaeli wama ecö bufi bluca jaducublobä ya wa̦. Ö̦jö Jesús a lä cui, fii balitama defi ja wama a lä shämaleno wei a showawä lä cui, Yai Bada tänö Bada bei a yai tablamalema. A shömabä a lä yaileno wei, ö̦jö a —a cuma.

37¿Ö̦jö tawä? Pedro a wa̦ fa ji̦liläjenö, bä bufi nö yai bleaaö fe balojooma. Pedro a ma cui nija, Jesucristonö bä lä shömöleno wei ai bä ma cui nija, abinaja bä cuma.

—Shädayai. Iba wamacö. ¿Wedinaja yamacö li cuaaö dodijiobä? —bä cuma.

38A wa̦ juo ja, abinaja Pedro a cuma.

—Wedinaja mlai. Wa̦lidiwä tä ja, bä bufi da lädalu. Jesucristo nija wamacö bufi fa cuicunö, ö̦jö a wa̦nö, bä fe da ojomamo. Wamacö doblou lä mlai tä ma cule, tä nowa mladamabä. Inaja wamacö cublaliyo ja, cama Yai Bada tä Bufi ja, wamacö nia dobämamou. 39Cafä wamacö ma cui nija, wamacö ijilubö nodiwä ma cui nija, bä blajawä lä bälöle bä ma cui nija, bluca wamacö bayeliblamobä tä a̦ wäa malä balöqueno wei. ¿Ö̦jö tawä? Yai Bada bäma a lä bufiblaö wei a wa̦ nö wäoma, bäma a nofi lä Badabole a lä cui. Cama nija bä ajedou co̦obä bä bufi lä taamaö wei bä lä cui nija a wa̦ nö wäquema, täbä bluca bayeliblabä —a Pedro cuma.

40Jesús a wa̦fa wäyäö ja, bä yömöladima. Yai Bada etä a̦ ja bä nowa talanö, abinaja a ca̦i cuablaloma.

—Ei bä lä bälöblai, bä dobloimi waiquiwä. Ö̦jö bä lä cui bä nö bleaabä jamö, wamacö nö bleaaö bashio mlaobä, bä da nowamöo —a cuma.

41Ö̦jö cudeenö, Pedro a wa̦ fa ji̦liläjenö, tä a̦ dädaö lä showalayono wejei bä lä cui, bä fe bluca fa ojoblamolunö, Jesucristo ebä nija bä yädäblou showadalayoma. Bä lä yädäblaliyono wei bä lä cui, jai 3.000 bä cuoma. 42Jesucristonö bä lä shömöleno wei bä a̦ ji̦liaö bufi doblaomaje. Ö̦jö bä sho, bä nofi tamayou bufi doblaoma. Bä iyabä jamö ma cui, bä ca̦i co̦caablalou bufi doblaoma. Yai Bada nija bä nö bayeli nacaobä jamö ma cui, bä ca̦i yädäablalou bufi doblao showaoma.

Yai Bada ebä lä cui

bä lä taamayono wei tä a̦

43Jesucristonö bä lä shömöleno wei bä lä cuinö, tä nö lä quilijii showadi tä bluca wawämamaje, tä tamou dao lä mlai. Ö̦jö cudeenö, ö̦jamö lä bä bluca lä cuono wei bä quilima.

44Jesús a bejedi lä bufibono wejei, cama bä bluca yaiblamolayoma. Bä bayeliblayou bufi doblaoma. Cama bä madofibö ma cui ja, bä bufi läablalou mlai ja, bä madofibö nofi bluca ibamayoma.

45¿Ö̦jö tawä? Abinaja bei bä taamayoma. Ai bä jo̦li ja, ulifi bä lä tabou wejei bä ma cui, madofi bä lä tabou wejei bä ma cui, blada bä ja bä jöböqueije. Ö̦jö däjä, ö̦jö blada bä ja, bä lä jo̦lio wei bei bä bluca dobäleije, bä cuaama. 46Cama bä bluca lä cui, showadi Yai Bada e yafi jamö bä yododaö nosi blacäcodima. Cama bä yafibö jamö bä iyaö ca̦i co̦camodima. Bä iyamayou bufi doblaoma. 47Yai Bada a lä cui, showadi a nofi dodijaö doablamaje. Dodijidawä bä cuoma yalo, ö̦jamö bä lä bälöle bä blucanö, bä nofimamaje. Inaja bä cuaalanö, Yai Bada tänö bä jucäaö lä nocamono wei bä lä cui, Jesucristo ebä nija bä yädäblamaö nosi blacäcofälöma.

Currently Selected:

Hechos 2: GUU

Highlight

Copy