Hechos 1

Yai Bada a wa̦fa Bufi lä

wäyämamono wei tä a̦

1Deofilo, cafä nija ya si jaba lä oniblaleno wei si ja, Jesús ya wa̦fa wäyäö balöoma. A lä cuaano wei tä ma cui ja, täbä lä yömölano wei tä ma cui ja, ö̦jö ya tä a̦ bluca wäyäö waiquioma, 2a ösöö showao mlao däjä, a lä cuaano wei tä a̦ lä cui. ¿Ö̦jö tawä? Fedu jamö a co̦amamou showao mlao däjä, cama ebä nosiemaö balöoma, bä lä shömöleno wei bä lä cui. Yai Bada tä Bufinö a wa̦ fa cadidonö, bä nosiemama.

3A nö lä bleaamano wejei däjä a fa nomalönö, a demi ca̦i jocädou fa co̦lonö, cama ebä showawä lä cui nija a demi damoa co̦laliyoma. A lä cuaano wei tä blucanö, a nö demi ö̦jöbömolayoma. 40 tä mö didi cublou jaöo mlao däjä, ö̦jö bä nija a dablamou lä cuaale jamö, Yai Badanö cama ebä nia ca̦i lä cuo wei tä a̦ wäyäö cuaama. 4¿Ö̦jö tawä? Jesúsnö bä ca̦i cuo showao däjä, bä juu wasöma.

—Äyämö, Jelusale jamö bä da yanöcöicu —a cuma—. Fayänö tä a̦fa wäyäö lä balöono wei tä ja, bä nö da daicu, cafä wamacö nija ya tä a̦fa da wäyäblei tä lä cui. 5Juan a lä cuinö, mau u ja bä fe ojomaö ja, mau unö bä jödödöblamama ma cui, tä nö dedejeblou mlai ja, inaja showawä, Yai Bada tä Bufi yainö wamacö nia jödödöblaö nomöjöo —a cuma.

Fedu jamö Jesús a lä

co̦layofälöno wei tä a̦

6Ö̦jö cudeenö, bä lä yododano wei däjä, Jesús a wa̦limaje.

—Bada tä. Isaeli yama ecö lä cui, eja yamacö nia bälöo shi ma wa̦lio wei ma cui, shomi bä bälöa läa showaa bashia lä cule. ¿Fei däjä, yamalecö bälöa lojodomabobä, ei tä waiquiwä tawä? —bä cuma.

7Jesús a wa̦ juo ja, abinaja bä nowa tama.

—Ö̦jö tä lä cui wama tä dabä wamacömi. Fayänö ö̦jö tä shino daö ayao. “Fei däjä dodijiwä”, a cubä, ö̦jö a shino. 8Ö̦jö ma cui, cafä wamacö nija Yai Bada tä Bufi bälöo däjä, wamacö nö wa̦lojoblobä, wamacö nia bayeliblamou. Ö̦jö däjä, Jelusaleteli bä nija wamale a̦fa nia wäyäö. Judea jamö ma cui, Samalia jamö ma cui, wamale a̦fa wäyäö fa cuaaimadunö, täbä bälöo lä jödödole jamö ma cui, wamale a̦fa nia wäyäö cuaaö —a cuma.

9Inaja bä nowa fa talönö, bä mamo showao däjä, Yai Bada tänö a ösömalefälöma. Ölajashi anö, a nö daamou mladaliyoma. 10Fedu jamö Jesús a lä ösöimadi jamö, bä mö nonoo showao däjä, bolacabö täcöbö bädaliyoma. Camishi shuducaje cäcö labe ja, täcöbö didioma. 11Abinaja bä nowa taböma.

—Calilea tä ulifi jamö wamacö lä bälöle, ¿wedi tä tabä, bei wamacö mö li nonodia cule? Ö̦jö Jesús a lä cui, fedu jamö a lä ösölöfe, wamacö lä dacöfe a lä cui, a nia itou co̦oyoluu. Cafä wamacö mamo showao däjä, fedu jamö a ösöa lä culufenaja, inaja a nia cublou co̦o.

Juda a lä cuono wei jamö

ai a lä lämaqueno wejei tä a̦

12Oliba tä a̦fa balöcö lä jilabolajei jamö, Jesús a fa co̦lufälönö, cama ebä lä nocamabono wei bä lä cui, Jelusale jamö ebä co̦a co̦layoma. Yo ajededaoma. 13Bä fa yafilönö, bä bälöblao lä feyacaono wei jamö bä fa dubofälönö, bä lucälayoma. Abinaja bä bluca cuoma, Pedro, Juan, Santiago, Andrés, Felipe, Tomás, Badolomei, Mateo, ö̦jö bä bluca lucälayoma. Afeo bä ijilubö Santiago a ca̦i lä cui. Simón a ca̦i lä cui, Lomateli täbä lämabou nofi lä wa̦libono wei a lä cui. Santiago bä ijilubö Juda a ca̦i lä cui. 14Ö̦jö bä lä cui, Yai Bada nija showadi bä a̦ fadima. Ö̦jö bä ma cui, suwä bä ma cui, Jesús bä nöö María e ma cui, Jesús bä fääshä ebä ma cui, inaja bä bluca cuoma.

15Bei. Jesucristo ebä lä yododano wei jamö, jai 120 bä cuoma. Ö̦jö bä nija Pedro a fa ubladalunö, a wa̦ falayoma.

16—Iba wamacö. Juda a lä cuaano wei tä ja, bämacö bufi wedinajamobä tämi, Jesús a juwäabeje, täbä lä lulubono wei a lä cui. Ö̦jö tä da cublalui, Yai Bada a wa̦no bejedi wawäblobä, tä li cublaliyoma. ¿Ö̦jö tawä? Nö badabö David a lä cui, Yai Bada tä Bufinö a wa̦ fa cadidamanö, a wa̦fa wayoaö malä balöono wei. 17Camiyä yamacö ai a cuoma. Yai Bada a nosie juamobä, ö̦jö a ma cui a ca̦i taamaö mö feduo showaoma. 18¿Ö̦jö tawä? —Pedro a cuma—. Ö̦jö a doblou lä mlaono wei tä nowa ja, blada bä fa lululänö, ö̦jö bä ja, tä nowa ulifi co̦amamoma. Ö̦jö tä ulifi showawä ja a fa quelunö, bei shibä bläshäblaliyoma. 19Ö̦jö tä lä cui, Jelusaleteli bä blucanö tä a̦ ji̦lilemaje. Ö̦jö tä a̦ ji̦lilemaje yalo, I̦yäbö wei tä a̦fa ulifi jilaquemaje. Cama bä caficö a̦ ja, Asedama tä a̦ li cuoma. 20¿Ö̦jö tawä? Tä a̦ oni malä cule. Amowa täbä a̦ oni ja, tä a̦ lä cuu weinaja showawä.

Fei däjä a yafibö nia blocoo. Ö̦jamö lä ai a nia bälöo nodiomi.

’Einaja tä a̦ cuu. Abinaja ai tä a̦ ca̦i —Pedro a cuma—.

Cama a bada läobä tä ma cuono wei ma cui, fei däjä ai a nia läo juo nomöjöo.

’Einaja tä a̦ cuu. 21-22Ö̦jö cudeenö, ai yama a nia lämabou nomöjöo —Pedro a cuma—. Bada tä Jesúsnö yamalecö ca̦i juu lä cuaano wei jamö, showadi bä lä co̦loloablalono wei bä lä cui, eja ai bä coyocoa. Juan nija Jesús a fe lä ojoblamono wei däjä, bä coyocoo fa showaonö, showadi camiyä yamacö nija bä yädäablalou cuaama. Fedu jamö Jesús a lä co̦amamono wei däjä ma cui, ö̦jö däjä bä ca̦i yädäo showaoma. Ö̦jö bä nija moli a nia yaiamou, Jesús yama a wa̦fa demi jocädou wäyäö cuaabä jamö, ö̦jönö yamalecö a̦ bayeliblaö cuaabä —a cuma.

23Jesucristo ebänö, ö̦jö a wa̦ fa ji̦liläjenö, bolacabö cäcöbö jömöblalemaje. Ai bänö, José Basabaa, a jömöblalemaje, Juto a wa̦fa ca̦i lä cuono wei. Madia a ca̦i jömöblaö mö fedulayomaje. 24Ö̦jö däjä, Yai Bada nija bä nö bayeli nacao ja, abinaja bä cuma.

—Bada tä. Cafänö wa täbä bufi bluca yai lä daö wei, cafä wa. Ei cäcöbö nija wa yaiamaö lä bufile, camiyä yamacö nija a jömaö da cadido, ö̦jö a yai cuobä. 25Cafä wa nosie juamobä a Juda lä cuono wei jamö, a bada läo nomöjöobä. Jesucristonö bä lä shömöleno wei bä nija a yädäobä. Ö̦jö bä nija Juda a yädäobä a ma cuono wei ma cui, a yacläa dicolayoma. A nö bleaabä jamö a alayoma —Yai Bada nija bä cuma.

26Ö̦jö däjä, madofi a jamö cäcöbö a̦fa fa oniblalöjenö, a nia lä yaiono wei a wa̦fa nia oni wawäö mömaje. ¿Ö̦jö tawä? Inaja bä fa cuaanö, Madia a wa̦fa oni wawälayoma. Ö̦jö a wa̦fa fa wawälönö, Jesucristonö bä lä shömöleno wei bä nija a yädäquema.

Currently Selected:

Hechos 1: GUU

Highlight

Copy