Lawana Nani 30
30
LAWANA 30 (29)
Tingki lâka ra Dawan mayunra nani
Lawana. Tempel ba Dawan ra yabaia, Debit aiwanan.#1 Ki 18.12-66; 2 Kr 6.1-7.10; Esd 6.16.
1Dawan, yang mamyunisna, kan
man purara ai bukram bamna,
bara waihli nani yang maipara
saura aisi kikaia ba wina takaskram.
2Dawanki, yang Gâdki,
man ra puri sunri bara sikniski wina ai rakram;
3Dawan, man mita prura wina ai rakram;
rayaki aikram, prura wina pri ai sakram.
4Man nani, Dawan uplika kasakkira nani,
¡Dawan ra lawana nani aiwans!
¡Ai nina holikira ba, man nani mayuns!
5Dawan ai lawanka ba tisku lap tiwuya,
witin yawan ra yamni luki ba lika,
wan rayaka yua sut ra ban kaia ra ban sa,
tihmia ra yawan inisa kaka,
titan ra yawan pat lilia brisa.#Ais 54.7-8.
6Yang na karna sna daihra wali kapri,
bara lukri:
“Upla âpu sa yang ra ai batakaia.”
7Dawan, man kupiam yamnika ba mita,
yang na, il kumi baku
karna bapi bûi kaia ai daukram.
Sakuna hilpkam ba yang wina sakram bara
sibrin lâka ba mita sinski blaki swin.
8Dawan, yang bui man ra winisni;
Dawan, yang bui man ra makabisni:
9¿yang pruamna ba ra dîa brimna,
dîa sin raiti ra brih wamna?
¿Tasba yuya ba sip mamyunbia apia,
man tânkam kasak ba dukiara sin aisabia ki?
10Dawan, ai wals bara umpira ai kaiks;
Dawan, ¡man lika yang hilpki aimaki bas!
11Inanki nani ba, lilia pulan ra laki aikram;
sari prâka dimi katma ba saki,
lilia prâka ni ai dingkram.
12Bahamna man Dawanki, yang Gâdki,
yang sip sâp kamna apia:
¡lawana aiwanamni man ra mamyunaia
bara tingki mai wimni ban kaia ra!
Currently Selected:
Lawana Nani 30: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
