Lawana Nani 22
22
LAWANA 22 (21)
Pât saura wina winanka bara aiwani mayunaia lawana
Aiwani nani tâ bri ba wina, tiunka ba “Lalma kahbi swalia ba”. Debit lawana.
1Yang Gâdki,
¿dîa kan ai lulki ai swiram ki?#Mt 27.46; Mk 15.34.
¿Man dîa muni swaki ai sakaia balras sma?
¿Dîa muni man, yang inanki nani ba walras sma?
2Yang Gâdki,
yang kakna ra, tihmia ra mai winisna,
sakuna man pana aisaras sma;
¡yang sip ris briras sna!
3Sakuna man lika holikira sma,
man king aimakisma,
Israel mamyunisa.
4Damiki nani man kat luki kan;
witin nani kasak luki kan,
man sin witin nani ba swaki sakatma.
5Witin nani hilpkam makaban bara man bui
witin nani ra swaki sakram;
man kat mai kulki kan,
witin nani swira daukras katma.
6Sakuna yang na upla apia,
yang na liwa kum sna;
upla nani sut,
yang na saurakira ai kulki misbara ai kaikisa.
7Baha nani ai kaiki ba, laiwaska kikisa;
witin nani ai un drubi, ai lal wauhisa:#Mt 27.39; Mk 15.29; Lk 23.35.
8bara aisisa: “Naha sika Dawan kat luki kan;
swis Dawan bui witin ba swaki sâkbia;
witin ai brinka ba sika Dawan,
bamna witin bal swaki sâkbia.#Mt 27.43.
9Baku sa:
man sika yang yaptiki biara wina aisubi takaia ai daukram;
yang kainira diara bîla kaikaia sin ai daukram,
kau yapti tialka aubi kapri ba ra.
10Kau aisubi takras kapri ba kaina wina,
man pat karnikam ra aihwaki ai kaiki katma,
yaptiki plauya ra katna ba wina
man Gâdki sma.
11Yang wina laihura kapara,
kan trabil laimara sa;
bara upla kumi sin âpu sa
hilp ai munaia.
12Bîp wainhka ailal,
Basán wina tnaya kir sa;
waihli nani bîpka wainhka prautkira nani ai prihban sa;
13witin nani ai bîla kwâki,
layan nani plun wahwi kan ihbi baku yang ra aula.
14Karniki âpu,
lî laikan baku ai daukan;
dusi nani sin lukutbaika bani wina
aihka sakan sa.
Kupi na sin blas baku,
yang wîni biara ra slilwisa.
15Bîli sin lâwan, laya âpu sa;
yang twisi na dairkaya kat alkan.
¡Man bui yang na, prura tasbaika kat ai bri balram sa!
16Watawikira nani dakni tara kum,
yul nani baku kir kutbi ai brisa,
yang mihti bara mini sin
witin nani kraukan sa.
17¡Yang dusi nani ba sut kulki kaikaia sip sa!
Witin nani ai nakra lakras,
yang kat mangki ai kaikisa;
18witin nani bui yang kwailka nani ba
ai tilara yui daukan,
yang kwailka nani ba wal
witin nani lat lulkan.#Mt 27.35; Mk 15.24; Lk 23.34; Jn 19.24.
19Sakuna, Dawan, man karniki sma ba,
¡laimara bas, man aihni hilp ai muns!
20Yang sord ni ai ikaia ba wina swaki sâks,
baha yula nani ba mita yarka ai ikbiara.
21Layanka nani ba bîla wina sin ai dakbi ai sâks;
¡bîp wainhka nani aringka ba wina,
man bui yang kaini kahs!
22Yang bui man tânkam ba muihki nani ra smalkamni,
upla kwâra tilara yang mamyunamni.#Hib 2.12.
23¡Man nani, Dawan ra sibrin lukisma ba,
witin ba mayuns!
¡Jekob kiamka sut bal witin ra prana dauks!
Israel kiamka nani sut,
witin ra mayuns.
24Umpira nani pât wahwi ba,
witin bahki kulkras,
tnayak sin lui waras;
witin ba ai mawan yukukras
witin nani ai sîa;
¡sakuna witin nani ai hilpka makaban ba walan!
25Uplikam nani kwâra tilara mamyunamni,
aisankam kat buisma ba;
yamni mai kulki nani ba mawanra
dauki maikaia wîri ba daukamni.
26Taiban ra uplika nani sma ba plun pis,
man nani aibanhwisma ba kat;
man nani bui Dawan plikisma ba,
witin ra mayuns,
bara mani ailal raya kama.
27Nisan kiamka sât nani sut,
upla nani sut tasba aiska ra iwisma ba,
man nani bui Dawan ra kupiam krauki bas,
man nani lika witin ra bal;
¡ai mawanra lulam kriks!
28Kan Dawan sika king,
bara witin sika nisan nani purara karnika alki ba.
29Man nani, witin ra bawi bas,
witin ra baman mayuni bas
man nani sut diara ailal bri iwisma ba,
baha nani sut tasba yuya ra tawaia kan ba,
witin nani yakan ai wîna ra rayaka âpu ba.
30Yang kiamki nani ba
Dawan ra mayunbia,
bara ai rayaka aiska witin tânka ba aisi kabia;
31kiamka nani ningkara aisubia ba ra sin aisi wibia
witin ai kasakka lâka dahra,
ai warkka nani dahra ba sin.
Currently Selected:
Lawana Nani 22: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
