Lawana Nani 19
19
LAWANA 19 (18)
Gâd prana nani ai paskanka ra
Aiwani nani tâ bri ba wina. Debit lawana.
1Kasbrika pura ba,
Gâd prana ingnika dahra aisisa;
purara walpa sangnika ba sin,
witin mita daukanka ba wan maisa pakisa.
2Naiwa yua, yauhka yua ba wal,
pana pana aisisa;
tihmia nani ba mita bîla baikra ba
yua laihura auya.
3Witin nani sturi aisi ba walras,
bîla baikra binka ba sin sip walras sa sakuna;
4witin ai smalkanka bîla ba,
tasba aiska ra taki auya,#Ro 10.18.
witin aisi bîla nani ba tasba aiska pali kat auya.
Bahara lapta ba sin ai watla kum brisa,
5bara lapta ba liliakira ai yabalka ra impaki auya sa,
waitna kum ai wîna trin munan ba baku,
kut taki uplika kum,
marit rumka wina taki aula ba baku.
6Lapta ba kasbrika pura tnaya kum bâk baiwi takisa
bara baha wina tnaya wala kat kitwi wisa,
ai laptika ba wina
diara kumi sin plapi swakras kira.
7Dawan lâka smalkanka ba kasak yamni pali sa,
kan rayaka raya yabisa.
Dawan adarka bîla ba kasak ban buisa,
ai dahra yamni walras nani ba,
sinskira daukisa.
8Dawan wan smalkan lâka nani ba,
wapnikira sa,
wan kupia lukanka lilia sakisa.
Dawan lâka bîla ba saura luha sa,
wan nakra diara kaikaia ingni daukisa.
9Dawan sibrinka ba sunu sa,
baha ba ban bâra sa.
Dawan lâ aisi daukanka nani ba,
kasak rait baman sa,
lâka nani sut ba wapni baman sa.#Law 119.
10¡Dawan lâka nani ba,
gul wal kan mapara tara sa!,
¡gul pali ba wal sin kau mana tara sa!
¡Baha lâka nani ba lika,
nasma laya wal kau damni sa!#Law 119.103,127.
11Baha lâka nani ba mita,
naha nampakan sna na kupia kraukuya;
baha lâka bîla nani wali dauki ba wina,
nampakan ra diara yamni uya takisa.
12¿Ya witin ai swakwanka nani tânka briaia sip sa?
¡Yukuwan ra daukri pâtki nani daira walras sna ba,
baha wina man klir ai sâks!
13Tara bara praut pulaia daukanka nani nampakan bri ba,
witin wina sâks;
baha lâka nani yang purira aimakbiara.
Bara baku lika, upla pâtkas kamna;
lâ sauhkanka tara daukaia ba wina sin klir kamna.
14Bîli aisinka nani ba,
kupi mununhtara lukisna ba sin,
yarka man mamwanra briaia yamni kulkan kabia;
Dawan, yang yukuwaiki walpaya tara,
ai atki sasakra sma ba.
Currently Selected:
Lawana Nani 19: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
