Sins Lâka 6
6
Witnis aimakaia mapara kupia kraukanka nani
1Luhpi waitna,
man uplikam dukiara witniska takram sa kaka,
apia kaka man upla tringsar hilpka takram kaka;
2man yakan minam alkaika ra wih aimakisma:
aiblakwi takaskisma,
man klauna bîlam aisanka ra.
3Yang luhpi, pri takaia sma kaka
kan upla wala mihta ra sma bamna,
naha dukia nani dauks,
praut lâka ba lanhks
bara uplikam aihwa ra tras alks.
4Man yappara,
minit kum sin ris bripara.
5Sula baku plaps daiwan âikra aula ba wina;
daiwan tnawira baku plaps,
mina mangki alkaika wina ba.
Sringwaskira nani ra smalkanka ba
6Papu ra wih kaiks, sringwaskira,
kaiks dîa dauki ba,
bara smalkanka ba lan taks.
7Witin ba ai wihtka tara âpu,
pura kakaira sin âpu dîa daukaia ba.
8Mani piua ra, ai pata nani kasak suni brisa,
insla mâ kriki piua ra asla dauki sunisa.
9¡Aitani yapram, sringwaskira!
¡Bahara pat aitani aitnikram sa!
10Man kau yaprisauhkan kaiki lamla wauhisma ba ra,
kau pain yapaia wisi mihtam kruski alki prawisma.
11Umpira lâka ba balbia mampara aiklabaia,
âimplikra kum ridi taki aula ba, baku man ra balbia.#S L 24.33-34.
Upla saurakira natka nani ba
12Upla rugkira bara aisawan nani ba,
piu bani kunin aisi wataukisa;
13ai nakra nani kiuskisa,
ai mina nani ni sain daukisa,
ai mihta sirpika nani kulki marikisa;
14witin lukanka ra lâ warha nani bâra sa,
piua bani ra lukisa saura ba daukaia,
bara unsaban lâka tuski wataukisa.
15Baha mita minit kumi ra
sauhki tikan lâka ba balbia;
wan nakra klipan kumi ra.
Hilp âpu kira aisawi takaskan kabia.
Dawan mita saura pali kaiki ba
16Diara 6, apia kaka 7 bâra sa,
Dawan mita aiska misbara kaiki ba:
17ai nakra praut lâka ra kaiki ba,
twisa kunin aisi ba,
mihta nani sin tala pâtkas laiki ba,
18lukanka saura daukaia luki paski ba,
mina nani aihni diara saura daukaia brih wi ba,
19Witnis kuninkira
ai bîla wina kunin man aisi ba,
bara ani uplika tuski unsaban daukisa
ai muihni nani tilara.
Marit lâka sauhkaia ba tâka wina dîa bal taki ba
20Yang luhpi,
piu bani ra lukankam ra mangki bri bas
aisikam, yaptikam lâ mai smalkanka nani ba.
21Piu bani ra kupiam purara brih was;
namna ra wilki bris,#S L 1.8-9.
22yabal ra wataukisma ba ra tâm bri kabia;
yapisma ba ra main mai kaikbia;
rawi buma ba ra, man wal aisabia.
23Kasak lâ bîla bara smalkanka ba,
lamp kum ingni klauhi ba sika;
wapni takaia lâka bara kupia kraukaia ba sika,
rayaka yabalka ba.#Law 119.105.
24Mairin saura ba wina main mai kaiki kabia,
upla maya bîla damni aisi ba wina sin.
25Witin wîna tara painka ba kaiki
kupiam ra brin mai daukbiara;
¡ai nakra mai kaiki ba wal,
yabrika kupiam alkbiara!
26Ur mairin ba, plun bîla kumi ninara wîsa,
sakuna upla maya lâka sasauhkra ba,
waitna kulkanka bri ba ninara wîsa.
27Ya pauta klauhan ai lama bilara mangki ba,
kau sin lukras kwalka amisa.
28Waitna sin masku lakni purara taibia kaka,
ai mina nani tuhan kabia.
29Ya upla maya wal aiblakwi ba,
klala luha kabia apia.
30Upla kumi sin âimplikra ba,
bahki kulkras sa
plun dauki kan
ai biara banhkaia dukiara impliki ba,
31ban kra impliki kaka dara walras alkbia kaka,
aima 7 taim kli implikan dukia ba yabia
bara kau yabaia kabia diara sut bri ba wina.
32Ya upla maya wal tauki ba sinskas lâka sa,
ya baha dauki ba ai rayaka sauhki tikisa.
33Kan wal prawaia kabia pruki saura munaia lâka bribia,
bara diara kumi sin âpu kabia,
diki sakaia saura pali kulkan ba wina.
34Kan waitna lalawra ba
pauta klauhan baku sa,
bara padin munras pana munaia piua aula ba ra.
35Witin mairin ba pura mana sât aibapbia ni sin,
sip aitani kulki bribia apia,
sip sin pâtka ba swih tikbia apia,
man prisant ailal yama ni sin.
Currently Selected:
Sins Lâka 6: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
