Sins Lâka 5
5
Sturi damni aisi mairka lamara sin wapara
1Luhpi, sinski lâka aisinka kat kiamam lihni bas;
yang diara tânka lukisna ba kat, kiamam pri tniki wals.
2Baku lika tânka brima
nahki âuya mâira kaia ba,
bara sip kabia sins tânka pliki wal aisaia.
3Kan upla mairka un nani aisi ba
nasma damnika baku sa,
ai bîla baikra ba
oliv batanka wal kau swapni sa.
4Kuna baha ningkara,
witin tahpla pali takuya,
sord ai malika wâl bri ba baku mala sa.
5Witin wal taukaia ba prura ra wan bri wisa;
witin wapanka nani ba wan bri auya raiti bîla kat.
6Mairka ba rayaka yabalka ba kulkras pali sa;
ai dahra sin walras sa anira ai mina lulki ba.
7Baku bamna, luhpi, yang ra wals,
bara bîli smalkanka nani wina tnaya ra tawpara.
8Upla wala mairka lama wina laihura taks;
ai watla durka lamara sin wapara.
9Baku mika tiwbia apia mankam ailal yua ba,
tringsar bara kupias nani mihta ra.
10Tringsar kumi sin karnikam ni
wark daukram mâ nani ba wal aibanhbia apia.
11Kau ni mapara, ini yauhma lâs piua ra,
man wînam tara ba tawa tawa danh taki auya ba ra.
12Bara wima:
“¡Nahki sip kapri smalkanka ba saura wiaia!
¡Nahki sip kapri bahki kulkaia kupia kraukanka nani ra!
13¡Walan ai daukras kan smasmalkriki nani ra,
kiaima pri tniki walras kapri,
dîa ai smalki nani ra,
14bara kau wiria kan,
asla takanka aiska mawanra,
yang pât saura kat dimi waia!”
15Man lamya watla kârma wina, lî taki ba ni
dirankam ba dasks.
16Man lamya kârma wina lî plapi ba laikpara;
bahki yabal nani ra laiki taukpara.
17Man lamyawanhta ba man dukiam sa,
¡yarka man baman dukiam kabia;
upla tringsar nani,
man wal asla dukiam bripara!
18¡Lamya kârma man dukiam ba,
yamni pali kabia!
Wahma kapram mairka kan ba wal,
liliam bris.
19¡Snapuka mairin latwanka aihka painkira ba,
man wal lihki ban kama!
¡Piua bani ra ai latwanka ni mai
sruki ban kabia!
20¿Dîa kan luhpi upla maya wal aiblakwi kaia?
¿Dîa kan mairin tringsar klahkla ra klahbi aimakaia?
21Dawan ba kaikisa upla daukanka ba;
witin ai nakra wina,
mina lulkanka kum sni tiwras.
22Upla watawi ba, witin pali
ai watawanka nani mita klauna bliki alkisa;
witin ra prak alkan kabia,
ai saurka mita sin kiwa ni baku.
23Witin ai wîna ra smalkras kan ba tâka mita prubia;
witin ai taniska lâka ba mita ban tanis tiwbia.
Currently Selected:
Sins Lâka 5: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
