Aiseya 44
44
Dawan kumi baman ba liliaka
1“Israel, nanara, ai wals,
Jekob uplika nani yang duki dadaukra, bâk sakri ba.
2Yang sika Dawan, man mai Papaskra,
kau aisubi takras kapram piua ra
pat mai paskan kan, bara hilp mai muni ba.
Si bripara, Jesurún,#Kli S 32.15; 33.5,26. Jekob uplika nani,
upla dukia dadaukra sakri ba,
3kan upla iwras tasbaya ra yarka lî plapbia,
awala nani daukamni, tasba lâwan diara pâwras pliska nani ra.
Kiamkam nani purara, yang rayaka raya yabamni,
bara yang yamniki nani blikamni.
4Bara inma baku pâwbia,
yasu dusa nani sâtka baku
lî nani lamara,
sauhka purara sin pâwbia.#Ais 43.19-21; Jir 31.12; Isi 47.1-12; Jn 4.10-14; 7.37-39; Par M 22.1-2.
5Bara tila wina kum wibia:
‘Yang sika Dawan uplika sna’;
wala wibia: ‘Yang nani Jekob kiamka sna’,
bara wala nani ba ai mihta ra ulbia:
‘Yang Dawan prapatika sna’,
bara wala nani ba ai nina Israel mâkbia.”
6Dawan, Israel kingka witin ra swaki saki ba,
Dawan karnika sut bri ba, witin aisisa:
“Yang sika diara sut tâura sna,
ningkara sin yang bâra sna ba.#Ais 41.4; 48.12; Par M 1.17; 22.13.
Yang tnaiya ra Gâd wala âpu sa.
7¿Ya wala yang wal baku bâra sa?
Witin aisi tânka param saki ai wibia.
¿Ya sip kan upla ra wiaia,
blasi pali ra bâra kan ba,
bara naika ra kli dîa takaia ba aisaia?
8¡Man nani si bripara,
man nani sin tâ iwpara!
¿Blasi pali kankika ba piua wina,
maikri man nani walram
bara sin mai wîri kan apia?
Man nani ba sika yang witniski nani sma.
Gâd wala âpu, yang baman;
yukuwaia watla wala âpu;
kaikras sna wala kra.”
Aidul lâka ba mapara
9Aidul lilka papaskra nani kumi sin diara apia sa,#Law 115.4-8; 135.15-18; Ais 40.18-20; 41.6-7; 42.17; 45.16; Jir 10.1-16. witin nani aidul ra kulkanka tara yabi ba bahki baman. Ya bahara ai pura suni ba blain banhwisa bara sin sinskas, ba mita swira lâka ra takaskbia. 10Upla kum diara slilki aidul paski, bahara ai pura suni ba gâd kum ra baku, ai taimka ba bahki ra tikisa. 11Upla sut mayunbia ba, swira lâka ra takaskbia. Aidul paski uplika ba waitna sa. Upla sut ba asla takbia kaka lâ pliska ra swira lâka ra takaskbia, bara sibrin ni banhwan kabia.
12Yawan kaikpi ayan ni diara papaskra ba, nahki dauki ba: ayan klakaika ba ni alkisa, lapta dauki bara amar ni pruki wîna daukra ba daukisa. Ai klahkla karnika ni baha warkka takisa; witin tisku plun daukisa, piras sa kaka ai karnika nani sin âpu takisa, lî diras bara mahka swapni takuya.
13Yawan kaikpi dus ni diara papaskra ba: kulkaika dukia ba ni, dus ra praki kulki kaikisa, lilka ba ulbisa dus ra, baha ningkara klakaika ba ni klaki upla lilka painkira kum daukisa, upla wîna daukra lilkika paskisa, upla pranakira lilka ba, bara tempel bilara suni swisa.
14Apia kaka upla kum kra, yalam dusa ba mangkisa bara lî auhi ba wal pâwisa; baha ningkara bri kabia yalam dusa klakaia, apia kaka saiprus dusa, apia kaka usupum dusa, unta ra main kaiki yaban tara nuhwan kat. 15Baha wina upla hilpka takisa, angkaia dukia bara pauta ailahkaia; kubus ra sin mukisa, bara plun nani sin piakisa; baha purkara sin baha wina gâd bahki kum lilka daukisa, bara bahara mayunisa; aidul kum paskisa, bara witin mawanra ai lula krikisa.
16Dus klakan ba wina mânka kum ba, pauta klauhan ra mukisa; mânka wala ba wîna angki pîsa, wîna angkan kum ridi daukisa, baha pi aibanhwisa. Baha ningkara pauta ra ailahki, bara wisa: “¡Âu, nanara yang lapta takri, pauta klauhan ba yang kaikri!” 17Bara tâka kau swin ba wina gâd bahki lilka kum daukisa, baha mawanra bawisa, bara mayunisa bara witin ra ai pura suni wisa: “¡Pri ai sâks, kan man sika yang gâdki!”
18Baha uplika diara nu âpu, tânka sin briras; kan ai nakra nani ba sut blain sa, ai kupia sin baku sa diara tânka briaia. 19Man nani luki kaikras sma, sins lâka âpu, diara tânka aisaia: “Naha wina mânka kum pauta ra piakri, ai maskuka purara plun angkri, wîna angkri, bara baha piri; bara kau witin mânka wala ba wina diara saura pali kum daukri, dus klakan praiska kum dauki bahara puri sunisna.” 20Kasak pali sika, yamhpus piaia baku, lukanka bahki ni ai kupia ra kunin munan baha uplika nani sip swak takras kabia. Sip ai dahra wali luki kaikras, ai mihta ra alki ba diara bahki ba.
Dawan lika Israel pâtka kulkras, swaki sakisa
21“Naha diara nani dukiara kupiam krauks,
Israel man, Jekob tawanka,
kan man ba, yang duki dadaukra sma;
yang mai daukri, man ba yang duki dadaukra sma;
Israel, yang ra âmya ai tikpara.
22Maipara buanka nani man daukram ba sut
yang slingbi tikri,
mukus kum awi tiwi ba baku.
Kli yang ra tawi bal,
kan yang atki mai sakri bamna.”
23¡Kasbrika pura, liliakira wins
Dawan daukan ba dukiara!
¡Wins raya sa, tasba tihuka nani pali ba!
¡Il nani bara unta ra dus tara nani sin,
liliakira wini banhs;
kan Dawan ai prana ba marikan,
Israel luhpia nani ba swaki sakan bamna
Jekob uplika nani ba!
24Naku Dawan aisisa, man sasakra,
witin pat mai paskan kan,
kau mai baikras kan ba ra:
“Yang sika Dawan, diara sut ba paskisna,
yang yakan kasbrika pura nani ba yakabisna,
tasba ba sin drabisna,
wala hilpka briras kira.
25Yang swiras,
prapit kuninkira nani diara aisan ba kat aimakbia;
yang daukisna smaya kakaira nani ba,
ai raitka ba tikbia.
Yang sinskira nani ba yâri kli ai walka mapara aisisa
bara sinska lâka ba, diara tânkas ra lakisna.#2 Ko 1.20.
26Sakuna yang duki dadaukra aisan ba, yabri daukisa
bara bâk saki briri uplika ba lukanka nani ba pain baman takbia.
Yang param sakisna, Jerusalem ba kli upla iwan kabia,
bara Juda tawanka nani ra sin.
Yang daukamni, kli bukan kabia slingwanka nani ba wina.
27Yang sip sna kabu tihuka tara ra wiaia lâwbia,
bara ai laya ba lâwan kaia.
28Ciro ra yang wisna:
‘Man ba yang sepadki kama,
man daukma yang dîa daukaia want sna ba sut’;#2 Kr 36.23; Esd 1.2.
yang bui Jerusalem ra wisna:
‘Man ba kli mai paskan kabia’;
Bara tempel ra sin wisna:
‘Man ra playa tara nani kli bapbia.’ ”
Currently Selected:
Aiseya 44: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
