Aiseya 43
43
Dawan baman swaki sasakra kumi ba
1Sakuna nanara, Dawan naku wisa,
Jekob, Israel man mai Papaskra ba,
witin naku mai wisa:
“Si bripara, kan yang atki mai sakri;
ninam mâki mai wîri,
man ba yang upliki sma.
2Man lî nani bâk lui wama ba ra,
yang sin man wal bâra kamna,
bara awala nani luma kaka,
lî dih pruma apia.
Pauta klauhan lama bâk luma sin,
mai angkbia apia,
pauta lakni ba sin mai ambia apia.
3Kan yang sika man Dawankam,
man sasakrikam sna,
Israel ra Gâd Holikira ba,
yang duki mai briri;
man puram manka baku Idsip ra,
Etiopía ra bara Sebá sin aibapri.
4Kan man ba yang naikra ra pain mai kaikisna,
man ba mana tara sma
bara latwan mai kaikisna.
Yang bui man mai briaia bara rayakam ba sin,
swaki sakaia tâwan
upla nani nisan nani ba sin waihla ra yabisna.
5Si bripara, kan yang lika man wal sna;
man kiamkam ba lalma wina bri balamni,
bara muna wina asla mai kukamna.
6Yahbra ra wimna: ‘Upla nani ba nâra laki yas’,
bara waupasa ra wimna:
‘Man alki takaskpara.’
Luhpi waitna nani ba laih wina bri bal,
bara luhpi mairin nani sin,
tasba tâ wala ba wina bri bal,
7yang nini bri nani ba sut,
witin nani ra yang bui paskri bara daukri ba,
yang bui witin nani paskri ba maiyunra ba daukaia.’
8“Upliki nani ba man wis balaia,
nakra bri sakuna sip kaikras ba,
ai kiama brisa sakuna sip walras ba.
9Nisan nani sut asla brih bal,
bara nisan nani sut asla taks.
¿Ya witin nani ai tilara bâra sa,
naha diara nani sturka ba pat aisin kan ba,
yawan ra aisin diara nani blasi kata ba?
¿Apia kaka, diara pat takan ba dukiara aisin ba?
Witin nani ai witniska nani wan marikbia
bara yawan kaikbia,
witin nani aisi ba ai raitka brisa,
witin nani walbia bara wibia baha ba rait.”
10Dawan aisisa:
“Man nani ba yang witniski nani sma,
bara yang duki dadaukra,
yang mita bâk sakri ba,
man nani ai kaikma bara yang ra kasak lukaia
bara man nani tânka brima yang ban sna ba;
Gâd kumi wala yang kainira âpu sa,
bara yang ningkira sin âpu sa.
11Yang, yang baman Dawan sna,
yang wina wala âpu sa swaki mai saki ba.”#Kli S 4.35.
12Dawan aisisa:
“Sturi ba yang maisa pakri bara yang bîli blikri;
yang mita swaki sakri,
gâd tringsar nani baha daukras,
man nani sika yang witniski nani sma ba.
13Yua nani bal takaia kau kainara,
yang Dawan pat bâra kapri,
upla wala âpu sa yang mihti wina pri mai sakaia.
Baha yang daukisna ba,
upla âpu sa baha slingbaia.”
14Dawan, Israel Gâdka Holikira ba,
witin mita pri sakan ba, aisisa:
“Upla nani Babilon ra blikamna,
man nani swaki mai sakaia tâwan
bara yang daukamna get nani ba sut param sakaia,
Caldea uplika nani liliaka ba sari ra tawaia.
15Yang sika Dawan sna ba,
Israel Papaskra, Gâd Holikira ba,
bara man nani kingkam ba.”
16Dawan bui kabu ra yabal kum daukan sa,
lî karna plapi bâk yabal ba mangkan;#Imp St 14.13-31.
17witin daukan aiklaklabra daknika karna kum sut bal takaia,
waginka nani araska nani ba aikuki sauhki tikaia.
Baha nani sut kauhan witin nani sip kli buras kan;
witin nani daswan lamp wîkka daswi ba baku.
18Nanara Dawan bui ai uplika nani ra wisa:
“Diara nani pat ninamra luan ba
man nani kli kupiam kraukpara,
diara almuk pali ba dukiara sin
lukankam ra kli lukpara.
19Yang diara raya kum daukisna,
man kaikma baha naha minitka ra bal takbia.
Upla iwras tasbaya ra yabal kum daukaisna
bara awala nani diara pâwras tasbaya ra.
20Daiwan wail kraskira nani unta ra ba
yamni ai kulkbia,
suksuk tara tnawira pâlras tara ba luhpia nani ba sin,
kan upla iwras tasbaya ba wina
lî aubra yâri bal takisa,
tasba biarapara wina awala aubisa,
yabrika upliki bâk sakri ba lî dakakaia.#Imp St 17.1-7; Ais 35.6-8; 41.18; 44.3-4.
21Naha uplika nani ba yang mita paskri;
yang maiyunra dahra ba aisaia.#Jir 16.14-15; 23.7-8.
22“Sakuna man, Israel, Jekob tawanka,
yang nini mâki yang ra winras kapram,
man lika yang tayatki takram.
23Daiwan wîna aiska angki sakripaiska dauks yang ra bri balras kapram,
sakripaiskam nani wal sin pain ai kulkan lâka ba yang ra aikras katma.
Baku sin yang taibi mai munras katna
prisantkam nani aiki kaia,
kîa yamni dauki sakripaiska nani sin
dauki aikma mai wiras katna.
24Man nani yauhrus kîa yamnikira ba yang duki atkras katma
prisantka baku sal aikaia,
sakripais ra wîna batanka nani ni banhkras katma,
ban sakuna, man nani saurkam wirhika
yang purira kahbram,
watawikam lâka ni ai swapkram.
25“Sakuna yang, man nani Dawankam sna bamna,
saura daukram ba diki sakisna
bara kli sin man saurkam nani ba dukiara
kupi kraukamna apia.
26Man nani maipara aisaia diara kum brisma kaka,
yawan aikuki lâ dimaia brih bal.
Maipara aisas man nani rait pâtkas sma sapa kaikaia.
27Man aisikam nani tâura saura daukan,
smasmalkrikam nani sin wark saura maipara daukan.
28Man wihta nani brisma ba tempelki ba tâski daukan,
baha mita yang wîri,
Jekob tawanka, Israel ba,
swira dauki, sauhki tikaia.
Currently Selected:
Aiseya 43: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
