Aiseya 36
36
Senaquerib bal tawan kutbi brin ba
(2 Ki 18.13-37; 2 Kr 32.1-19)
1Ezequías king aimakan ba wina pat 14 mani bri kan, bara Senaquerib, Asiria kingka ba, witin mapara aiklabi balan, tawan kutbanka karnika bri kan nani ba sut dakban. 2Laquis wina war wihtka kum blikan, war aiklaklabra tara, bara karnakira aikuki Jerusalem ra, King Ezequías mapara; bara witin nani balan bara lî madakura watla kârma plapi ba, Kwala Tatuskra nani pliska ba kat bal takaski banhwan. 3Bara witin wal prawaia wan nani ba, Eliaquim, Hilquías luhpia, klark; bara Sebná, sturi âiulbra ba; bara Joah, Asaf luhpia, âiulbra ba. 4Bara Asiria wihta mita win:
—Nanara man nani Ezequías ra wis, Asiria kingka ba naku wisa: ‘¿Dîa sât kupia param tânka man ra sa ki, bara bahara kasak luki tniwisma? 5¿Aisanka ba kau yamni sa lukisma, war aiklabaia karnika nani ba wal? ¿Yaura kasak lukisma yang maipara aiklabaia aulma ba ra? 6Yang kaikisna man ba, Idsip uplika nani ra tniwisma, baha pain; Idsip ba kayu yuya baku#2 Ki 18.21; Isi 29.6-7. yaba, bahara tniwisma, ya bahara tniwi ba, ai mihta bâk silak dimi mâ walak lubia. Baha sika king fero, Idsip kingka, ya uplika nani witin ra kasak lukbia kaka, baku takbia. 7Bara baku ai wima kaka: Yang nani kasak lukisna Dawan wan Gâdka ra, Ezequías mita daukan baha altarka nani pliska purara kan ba, munan altarka nani ba sakan, bara Juda Jerusalem ra win: Naha altarka na mawanra baman man nani maiyunma. 8Dawanki wal lâ kum dauks, Asiria kingka; bara aras nani 2,000 yang bui man ra maikamna, man sip sma kaka aras âiulra nani yas ulbia. 9Nahki muni man aiklaklabra wihtka kum mapara buisma, man sip apia sma wihtki tara albika kau sirpi bara munrika plapaia, ¿bara ban sin lukisma, Idsip araska nani ba bara uplika nani ba sut briaia? 10¿Man ban kra lukisma, yang naha pliska ra balri na, Dawan adarka apia wal mai sauhki tikaia balri? ¡Dawan ba yang ra ai win, aiklabi sauhki mai tikamna!’
11Eliaquim, Sebná bara Joah, Asiria wihtka tara ra win:
—Mamkabisna man wan aisas Aram uplika bîla ra, baku yang nani tânka brimna. Hibru bîla ra wan aisapara, kan baha uplika nani kutbanka purara bâra ba mai walbia.
12Sakuna Asiria wihtka aisin:
—Asiria kingka ba, man ra bara sin dawanka ra ai blikras kan, naha bîla nani wiaia ba; kau pali ai blikan sa upla nani kutbanka purara ba ra, witin nani sin man nani wal baku ai tâskika pibia bara sin ai iskika dibia.
13Bara wihta ba buan, bara ai bîla karna saki winan, Hibru bîla ra aisin:
—King tara bîla na wals, Asiria kingka ba aisin: 14‘Yarka king Ezequías mita kunin mai munbiara; kan man nani ba yang mihti wina swaki mai sâkbia apia.’ 15Baku sin Ezequías, Dawan mita swaki sâkbia kra wisi wibiara: ‘Kasak pali sika Dawan ba mita swaki wan sâkbia, baku sin naha tawanka tara na, Asiria kingka ba swika sip bribia apia’, 16Ezequías ra walpara, kan naku sika Asiria kingka ba aisisa: ‘Yang wal kupia kumi taks, bara yang ra tawi bal, bara kumi bani wainkam tawahkia dusa mâ ba wina pis, bara kumi bani liwanhta ba wina sin dis. 17Ani yua ra yang bal muni, tasba kum man tasbayam na sâtka ra mai brih wamna, plawar mâ bara wain nani tasbaya ra, brit bara wain nasla nani ra.’ 18Aman kaiks Ezequías naku mai wi kunin mai munbiara: ‘Dawan yawan pri wan sâkbia.’ ¿Dîa gâd bahki nani upla sât sât nani brih banhwi ba, ai tasbaya ba pat pri sakan ki, Asiria kingka mihta wina? 19¿Anira sa Hamat bara Arpad gâdka ba wal? ¿Anira sa Sefarvaim gâdka ba? ¿Witin nani ba sip kan ki, Sameria ba yang mihti wina pri sakaia? 20¿Ani gâdka baha tasbaya nani ra ba bui Asiria kingka mihta ba wina kuntri nani dakbi pri sakan ki? ¿Jerusalem na, Dawan bui yang mihti wina dakbi pri sâkbia lukisa?
21Upla nani ba sâp kan, bîla kumi sin pana aisaras, kan king adar yan upla kumi sin pana aisaia apia. 22Bara Eliaquim, Hilquías luhpia watla ra diara nani pura kakaira ba, Sebná sturi âiulbra ba, bara Joah, Asaf luhpia ba king wauhkataya âiulbra ba, Ezequías ra balan, ai prâka nani ba kalkan, bara Asiria wihtka tara dîa aisin ba sut win.
Currently Selected:
Aiseya 36: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
