Aiseya 35
35
Upla nani kli Saion ra tawi balbia
1Upla iwras tasbaya ba, lilia taks,
tasba lâwan nani yakan swin kan ba lilia takbia,
lapta tasbaya ba sin lilia bribia,
tangni baku tangnika baiwbia.
2Tangnika ailal baiwbia,
bara sin witin lilia aiwanbia, liliakira pali.
Líbano mayunra ba witin ra yan kabia,
Carmelo, Sarón prana ba sin tasba maura ra.
Upla sut Dawan prana ba kaikbia,
wan kingka Gâd prana ba.
3Mihta swapan nani ba man nani mita karna daukma,
lula karnika âpu takan nani ba sin
man nani mita karnika yama.#Hib 12.12.
4Kupia sibrinkira nani ra wis:
“¡Man nani kupiam karna dauks, si bripara!
Kaiks nâra sa man nani Gâdkam ba
man nani swaki mai sakaia,
bara waihlam nani ba klala yabaia
baha klalka witin nani briaia kan ba.”
5Bâra mika nakra prakan nani
nakra ba diara kaikbia,
kiama prawan nani kiama ba sin walbia;
6bâra mika skahwa nani ba
sula srutwi pâli baku srutwi kabia,
bara baha nani sturi aisaras twisa nani ba sin
ai pura winbia.
Upla iwras tasbaya, tasba lâwan wina
lî kârma nani sin takbia.#Mt 11.5; Lk 7.22.
7Upla iwras tasbaya ba lî madakura nani takbia,
tasba lâwan pali ba sin, lî kârma nani man takbia.
Yul wail nani watla, yukuwaika ba,
yauhrus nani bara snati nani pâwbia.
8Yabal tara, yabal sirpi bâra kabia,
bara nina mâkan kabia “Holikira kaia yabalka nani.”
Diara tâski ba bahak lubia apia;
sinskas nani ba, baha yabalka ra sip wapbia apia.#Ais 41.18; 43.19-20; 44.3-4.
9Bahara layan nani bâra âpu kabia
bara daiwan kraskira ba sin bahak lui wabia apia.
Atki sakan uplika nani ba,
baha yabalka ai impakaika yabalka kabia.
10Dawan mita atki sakan nani ba kli tawi balbia,
liliakira witin nani Saion ra kli balbia;
lilia baman witin nani iwi kabia.
Bara witin nani lilia tara bribia,
sari lâka bara mamna lulkanka nani ba âpu tiwbia.#Ais 51.11.
Currently Selected:
Aiseya 35: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
